موقف محرج ..!!!!!

[M.Osman]

مرة مروح بالعربية و داخل الشارع بتاع بيتنا اللي في نصه في جزيرة
(زي اي شارع) لقيت واحد بعربية شيروكي سوداء جاي في وشي (في المخالف) و انا كان مزاجي عنب و فل مشغل التكييف و الكاسيت و آخر روقان (مبتحصلش كتير) .. فروحت واقف في وش عربيته و صممت انه طالما هو اللي داخل غلط هو اللي يعديني مش انا اللي اعديه ..
المهم الراجل قعد يشاور لي عالناحية التانية بكل بساطة و انا مش عايز ابص.. و واقف له و عايزه يعدي على اساس ان هو اللي جاي غلط.
بعد ما زهقت روحت معديه انا و هو راح منزل الإزاز و معلي صوته (اكيد كانت شتيمة) بس انا مكنتش هنا اصلاً زي ما قلتلكم كنت في جو تاني خالص.. و بعدين اكتشفت العالم بيحصل فيه اية!!

لقيت صف عربيات كتييييير جاية وراه عشان الطريق الناحية التانية مقفول و الطريق كله متحول على المخالف...

و الله كنت هعيط لما اكتشفت.. و بصراحة نفسي الاقي الراجل دا عشان اعتذر له

بجد عمري ما هنسى الموقف دا ابداً !!

و بجد الموضوع دا موقف جــــامدة موت!! موتتني من الضحك!

[askanas]

اه حوار العربيات التفتكرها مخالفة ويطلع الطريق مقفول ده محرج اوووووي
وافضل اقولو ارجع زي ما جيت مش هتحرك ههههههههههه

[E30power]

من سنتين تقريب وانا نادرا مابروح الكلية المهم كان يوم الشلة كلها متجمعة جوة المدرج وانا كالعادة لازم اجى متاخر فالمهم هموا بيقفلوا المدرج على الوقت بالظبط والى بيجى بعدة بدقيقة مبيخشش .......المعجزة انى وصلت للمدرج قبل ما المعاد بخمس دقايق وانا بنهج ابص الاقية قفلينوا وكام حد كان واقف معايا ولمين شمال مش هتدخل وبتاع ورحت للامن علشان اقولهم انا متاخرتش وناقص 5 دقايق وكنت متعصب جداااا وخارج عن شعورى فدخلونا بالعافية بعد ما سوا اعصابنا وفتحو المدرج وانا لسة مندمج مع الامن وعمال اشتم وابرطم ومش واخد بالى انى كنت دخلت المحاضرة ولسة عمال ارطم مع نفسى والعن اليوم الى دخلت فية الكلية على الدكاترة وابص الاقى الدكتورة واقفة جمبى وانا مش واخد بالى منها وادام المدرج كلللللللللللللة حوالى 2000 طالب فى حالة ابهال قلبت لضحك وانا من لبختى لما خت بالى واتخضيت من المنظر كنت هتكعبل ادمهاا بس بصلتى بصة ورفعتلى حوجبها 4 متر خلتنى مقلش بم ...

[Ahmed Nouh]

هههههههههههههههههههههههه موضوع تحفه

اول موقف كنت فى عيد ميلاد واحده زميلتنا وكنت يومها ورايا مشوار مهم انا وواحد معايا وهى اللى صممت اننا نروح عيد الميلاد فقولت خلاص نروح نص ساعه كدا ونمشى على طول

المهم الدنيا هيصه والدى جى شغال وصاحبى اللى معايا عمال يقولى يلا يلا يلا كل شويه وانا محرج امشى لأننا لسه جايين وخلاص فاضل شويه ويقطعوا التورته ومعظم الناس هتبدأ تمشى فمش هيبقى فيها احراج , فقولتله بهزار استنى ناكل الاول وبعدين نمشى وصاحبنا نزل عليه الصم ومش سامع منى حاجه

كررت الكلمه 3 مرات وهو مش سامع وفى المره الاخيره قولتها بطئ و صوت عالى قوى علشان يسمع , قوم ايه الدى جى سكت فجأه

وبأعلى صوت فى المكان : يا ابنى بقولك استنى هناكل الاول وبعدين نمشى :) , من يومها بطلت اروح اعياد ميلاد


الموقف الثانى كان جايلى ناس ضيوف ورحت قابلتهم علشان اجيبهم عندى يتغدوا وبعدين هوديهم مشوار واللى يعرفنى فيهم مفهم بقا الناس اللى معاه انى حافظ المنطقه وان انا اللى هخلصلهم المشوار ده فى دقيقتين

المهم فى شارع عندنا رايح جاى ومقسوم برصيف من النص بس الناس بتركن عربياتها بكثافه فى الطريق اللى جاى فأصبح باركنج شبه رسمى والطريق اللى رايح بقا اتجاهين

بقالى سنتين بمشى من الشارع ده بدون مشكله وفى يوم بليل وانا راجع كنت مستعجل وعمال اجرى ودخلت الشارع وانا متعود انه رايح جاى , المهم كل اللى مقابلنى مش عايز يوسع ويقلب لى نور وانا انور العالى عند معاه واجرى واللى مش بيوسع كمان كنت برمى عليه علشان انا متخيل انه واخد من حقى فى الطريق

وفى نهايه الشارع لقيت لجنه واقفه وانا داخل عليهم عكس :) , الظابط بكل هدوء قالى انت ماشى كدا ليه قولتله الغريب اعمى ولو كان بصير يا باشا , الراجل بصلى وضحك قالى هبص الناحيه التانيه وابصلك تانى الاقيك فى اخر الشارع قولتله عينى الاتنين

بعد ما لفيت الناس اللى معاى بكل هدوء , متتعبش نفسك يا ابو حميد احنا ناخد تاكسى وخلاص


مره كمان كنت ايام ثانوى وكنت متعهد خناقات ومشاكل وحاسس بنفسى , واحد صاحبى حصل له موقف مع صاحب استوديو واقنعنى ان الراجل نصب عليه فى فلوس وانى لازم اروح معاه اجيب له حقه من الراجل وكدا

المهم ضربت البدى الضيق علشان العضلات تبان وخدت الواد ودخلت الاستوديو و كان ساعتها الاستوديو زحمه وكله ناس منتظره تستلم صور بتاعتها بنات وشباب وهيصه , اول ما دخلنا من الباب ورايحين على الراجل وطبعا هو عارف انى جاى اتخانق بقول الواد بصوت عالى يعنى علشان اخوف الراجل اسكت انت متتكلمش

ورحت فى وسط الاستوديو متزحلق على السيراميك ورافع رجلى الاتنين فى الهوا ومستلقى على الارض فى وضعيه اشبه بالباليه المائى , طبعا واجهه الاستوديو كانت هتتكسر من كتر الضحك رحت قايم بكل أدب وداخل على الراجل قولتله طيب هو الموضوع بتاع الصور اللى اتحرقت ده ملوش حل ؟


موقف كمان من الجامعه

كنت فى محاضره وبعد المحاضره ما خلصت الدكتوره بتاخد اسماء الحضور , تنده الاسم واللى يسمع اسمه يرفع ايده

واحد بارد قاعد جبنى عمال يهزر معاى وبعدين راح نايم على كتفى , يشاء القدر ان البنت اللى قدامى اسمها امينه وانا معرفش والدكتوره يادوب نطقت اسمها رحت انا برد فعل تلقائى شايل دماغ صاحبى وقايله بصوت مسموع قوم يا ابنى انت شايفنى امينه رزق

طبعا انا مش مركز مع الدكتوره ولا سمعت هى قالت ايه ولا فهمت ايه اللى حصل اساسا , انا لقيت البنت لفت وشها وسمعتنى ما لا احب ولا اشتهى ومع كل محاولاتى انى اقنع فيها انى مكنتش بتريق عليها وان انا كنت بهزر مع صاحبى وحصلت الصدفه المتخلفه دى الا انها حتى يومنا هذا وبعد سنتين من الموضوع ده كل ما تشوفنى تبصلى من فوق لتحت

[m7nsh]

ههههههههههههههههههههههههههههههههههههههههه
والله موضوع مالوووووووش حل يا جماعه حراااااااااام بجد
انا سخسخت دحك والله الساعه 4 الفجر دلوقتى وانا مش قادر امسك نفسى امى عماله تزعق ونا ولا هنا

بس اول ما هفتكر موقف هحكيهولكو اكيد

[aif]

اعتقد ان الموقف اللي في الفيديو ده صعب انه يتكرر
ده جيرالد فورد الرئيس الأمريكي الاسبق في زيارة رسمية للنمسا .....و..
ولا بلاش .... علشان ما احرقش الموضوع .....
بجد اتكسفت بالنيابة عنه .... موقف زفت

YouTube - President Gerald Ford Trips And Falls

[askanas]

هههههههههههههه صباح خفة الدم يا احمد ايه المواقف دييييييييييي !!!!!!؟ :d

[Abdo_Eldesokey]

موضوع تحفة لأقصى درجة ... عايزين كمان يا رجالة

أنا أجمد موقف حصل معايا في حياتي كان في شهر 7 الي فات ، كنت في سوريا

في يوم قررت أروح مع صديقة سورية البلد بتاعتهم ونقضي اليوم هناك ، المهم خدنا ميكروباص والصدفة الغريبة إن السواق طلع جارهم ، فركبنا والميكروباص طلع على الطريق ، في نص الطريق واحدة كانت عايزة تنزل فالراجل وقف على جنب والست نزلت ، وأنا بقى الراجل الوحيد في الميكروباص فأنا الي لازم أقفل الباب
بقفل الباب عادي زي أي ميكروباص في مصر ، وهوب لقيت الباب اتخلع في إيدي ، حاولت أشده عليه لقيته اتخلع من مكانه خالص وبقيت ماسك الباب في إيدي ، والميكروباص كله بيبصلي ومتنح ، وأنا فطست على روحي من الضحك ومش قادر أتكلم أو أتحرك من الضحك :POINTI~2[2]:

الغريبة بقى في الموضوع إن سواق الميكروباص كان كووووول خالص ونزل خد الباب مني وحطه على جنب الطريق وكملنا المشوار من غير باب ..

بعد ما هديت شوية من الضحك ، واحدة تانية من الي راكبين عايزة تنزل ، فقلتلها أفتحلك الباب ، قالتلي : والله ما جصرت

الموقف ده بجد كل ما أفتكره أموت على نفسي من الضحك

المصري معروف بجبرووته

[Samah AbdAllah]

المصري معروف بجبرووته

هههههههههههههههههههههههههههه
ونعم الجبروت شرفتنا فى سوريا والقطر العربى كله

[salsola]

مش عارفه اقولكوا ايه ولا ايه
المواقف كتير بس اللي يفتكر بقي

هعمل ريفريش لدماغى وارجعلكوا

[badblood]

ههههههههه

[A.Lotfy]

طيب اسمع بئه

مره كنت نازله متاخره على الكليه

واقفه فى الشارع بدعى ربنا يعدى تاكسى بعد وقفه طويله لقيت تاكســى ((او تخيلت ))

وفيه واحد راكب جمب السواق قلت مش مشكله مضطره لانى متاخره
شاورت له وقف هــــــــــــــــــب رحت فاتحه الباب اللى وراء وركبــــــت قلت له الجامعـــــه لو سمحت الراجل بص للى جمبه ومشى لما قرب من الجامعه قلت له لو سمحت الباب الرئيسى لمـــــا وصلــت بدفع له الفلوس مرضيش ياخدها قالى لا مش عاوز فلــــــوس انا اترعبت ليه مش راضى ياخد فلوس قلت له طيب عاوز فلوس زياده لازم تاخد الاجره حضرتك عاوز كم بالظبط

قالى يا انسسسسسسسه انا مش عاوز فلوس لانى مش سواق تاكســـــــــى
ولا ن عربيتى مـــــــــــــلاكى مش تاكسى والراجل ده صاحبى وانتى شاورتى لنا وقفت افتكرتك هتسالى على مكان انتى هـــــــــــب فتحتى وركبتى

اى حد ممكن يتخيل الموقف ده الا انا مش قادره افتكره ساعتها اتمنيت العربيه تبلعنى او او ونش يجى ينزلنى من العربيه مقدرتش اتسمرت مكانى وهاتك يا اعتذرات وتاسف وششششى كان ف الارض من الراجل وصاحبه ومن تصرفى من الخضه لما نزلت قلت له انت ليه داهن عربيتك اسود ذى التاكسى

ده جامد جدا الموقف ده .. انا حصلي مواقف مشابهة اني اشاور لواحد على انه تاكسي من بعيد لما يقرب يطلع ملاكي بس محدش منهم بيقفلي طبعا
100 100

[aif]

الموضوع ده من زمااااان
لكن فيه شوية ضحك ومواقف محرجة غير طبيعية
اقرأوه م الاول
فيه مفارقات تموت م الضحك

[mesaharaty]

وأنا فى الكلية كان فيه واحد صاحبى عامل معايا دويتو كده خفية دم

فى مرة كنا فى السكشن وكان زحمة شوية وبعدين فيه بنت مسيبة شعرها وقفت قدامنا
صاحبى ده كان غريب الأطوار شوية
فلقيته بيقوللى البنت دى شعرها حلو جدا فقلت له أه
وفجأة لقيته مطلع مقص من جيبه وراح قاصص لها شعرها على غفلة

وأنا طبعا حصل لى إغماء من كتر الضحك والمفاجا’ة
والبنت طبعا فضلت تعيط وتزعق وكان الموقف ما بين صراخ وضحك وإستغراب
بجد مش قادر أنساه

[aif]

وأنا فى الكلية كان فيه واحد صاحبى عامل معايا دويتو كده خفية دم

فى مرة كنا فى السكشن وكان زحمة شوية وبعدين فيه بنت مسيبة شعرها وقفت قدامنا
صاحبى ده كان غريب الأطوار شوية
فلقيته بيقوللى البنت دى شعرها حلو جدا فقلت له أه
وفجأة لقيته مطلع مقص من جيبه وراح قاصص لها شعرها على غفلة

وأنا طبعا حصل لى إغماء من كتر الضحك والمفاجا’ة
والبنت طبعا فضلت تعيط وتزعق وكان الموقف ما بين صراخ وضحك وإستغراب
بجد مش قادر أنساه

يا نهار فوشيا ههههههههههههههههههههههههه
طب وعمل ايه صاحبك ده بعد ما خرج من مستشفى العباسية ؟؟؟؟