موقف محرج ..!!!!!

[mesaharaty]

مرة لما كنت فى الكلية كان فيه معايا واحد صاحبى قوى
وواقفين فى الدور التالت بتاع الكلية وبنبص على الكوريدورات من فوق وبنتكلم وبعدين أنا صاحبى ده كان على يمينى وبعدين أنا إلتفت شمالى باسلم على واحد صاحبى معدى (لفتة لمدة ثانية) وباكمل كلامى وحطيت إيدى على كتفه ومندمج جدا فى الكلام إلا وألاقى نفسى حاطط إيدى على كتف بنت ماعرفش جت منين دى ولا صاحبى ده مشى امتى كل ده فى ثانية لأو كنا بنتكلم كمان فى موضوع عن البنات .
أنا مش قادر أنسى الموقف ده ولا استغراب البنت لما لقيتنى حاطط ايدى على كتفها

[نور القمر]

من كام يوم كنا معزومين عند ناس وفجأة واحنا بناكل لقيت يوسف بيقول لباباهم متكولش بصوت
صمت رهيب خيم على القعدة بعد كلام يوسف والكل بيحاول يتماسك وهوب فجأة محدش يقدر يقاوم اكتر من كدة والكل انفجر في الضحك بما فيهم الرجل

[waelfarid]

ليس كل ما يعلم يقال وليس كل مايقال حضر اهله وليس كل ما حضر اهله حان وقته
اذا كان الكلام من فضة فالسكوت من ذهب
الحكمة مش بالساهل تكتسب
استرها معانا يارب


مين يوسف ده؟

[M.Mostafa80]

يانهار ابيض متعرفش يوسف دا كان ليه مغامرات فى المنتدى يوسف افندى

[waelfarid]

مغامرات جو؟؟؟؟؟؟؟؟؟؟؟؟ الظاهر الواحد مش مقيم بصورة كافية فالمنتدي

[saadelden]

بصراحه شويه مواقف فظيعه :d

المنتدي دا فيه مواهب مدفونه ههههههههههههههه :d

[نور القمر]

ليس كل ما يعلم يقال وليس كل مايقال حضر اهله وليس كل ما حضر اهله حان وقته

اذا كان الكلام من فضة فالسكوت من ذهب
الحكمة مش بالساهل تكتسب
استرها معانا يارب


مين يوسف ده؟

فعلا حضرتك شكلك مش بتدخل الاجتماعي كتير وإلا كان لازم تتكعبل في موضوع من مواضيع ومغامرات سفندي
يوسف او سفندي اشهر طفل في المنتدى ابني الصغير

موضوع على سبيل المثال

http://www.nilemotors.net/Nile/146658-a.html

[hobby10]

حازززززززم باشا ازيك

سعادتك لو كنت شفتنى وانا بشخط فى الراجل واقوله يا عم انت ماشى بالراحه ليه انا بقولك متاخره بسرعه شويه تحس انى بكلم السواق الخصوصى مثلا والراجل من ذوقه كان بيقولى حالا هتوصلى

بصراحه مكنتش عاوزه انزل من عربيته لانى مكنتش قادره اتحرك اتمسمرت فى الكنبه

هحكيلكم بئه باقى البلاوى بعدين

مش قادرة بجد فظيعةةةةةة

[beckeryahia]

انا حصلي موقف مش محرج اوي , انا كان عندي عربية لانوس لونها ابيض والتاكسي عندنا في الفيوم لونة ابيض في اخضر , وكنت واقف تحت بيت واحد صاحبي مستنية ولقيت واحده ست عجوزه اوي نازلة من نفس العماره بتاع صاحبي ومعاها بنتها تعتبر عجوزه برده واول ما الست الكبيره شافتني واقف قالت بعلو صوتها الحمد لله لقينا تاكسي فاضي وواقف قدام البيت علي طوول الحمد لله الحمد لله كذا مره ,فا بنتها اما امعنت النظر عرفت انها عربية ملاكي فا حسيت ان الست الكبيره حست باحباط شديد , بصراحة صعبت عليا ونفضت لصاحبي واصريت اني اوصلها ووصلتها فعلا. الكلام ده من 4 سنين

[linkin2008]

طيب انا حكيلكو على موقف من المواقف انا بكره العناكب كره رهيب وكل لما ابقى قاعد مع اصحابى على قهوه ولا حاجة وحد فيهم يخش الحمام لما يرجع اسائله الحمام نضيف وهو بيبقى عارف انا اصدى ايه وطبعا الحوار ده بيخلى الناس تستغربنى لانى لما بخش مكان اول حاجة ابص عليها هى السقف المهم كنت على قهوه صحبى رجع من الحمام تمام تمام دخلت الحمام ولازم اتاكد بنفسى لا تمام وواقف وواخد راحتى والاقى عنكبوت فاخر مهيب الركن نازل بالغزل بتاعة ووقف ادام عينى بالظبط لكم ان تتخيلو انا رجعيت بضهرى وروحت خارج بره الحمام زى منا ولما اخد بالى من شكلى والمصيبة الى انا عملتها روحت واقف ورا النصبة بتاعت الشاى وروحت عادل هدومى والواد بتاع القهوة مكنش واخد بالة من الموقف فقالى انتا بتعمل ايه هنا قلتلة عايز شاى وانتا منفضلى فقلت اجى اعملة بنفسى دا انا ليا مواقف مع العناكب دى

[pro_samir]

قريته تاني يا حج احمد .. أو تالت مش فاكر

من المواقف الأخيره الأخ اللي وقع بالكرسي فكرني بموقف زباله حصلي من كام سنه .. كنت قاعد في اجتماع جنب المدير علي اساس اني الراجل التاني بقي وكده ومكانش في حد غريب يعني الاستاف الفنيين وكلنا اصحاب و واخدين علي بعض حتي المدير ، المهم الكراسي كانت رخمه قوي مش مريحه وضهرها واقف 90 درجه

مع الوقت تعبت وقلت هرجع بالكرسي ورا شويه وبعدين اسند ضهره علي الحيطه .. زقيت الكرسي وبعدين روحت رامي ضهري لورا ابتدي الكرسي يقف علي الرجلين اللي ورا بس و بيرجع يرجع يرجع بالراحه لحد ما سند علي الحيطه وهووووب راح متزحلق من تحت علي السيراميك و نزل بضهره علي الأرض وانا وراه وقعت ساند علي ايديا الاتنين .. كله وقع من الضحك واللي قاعد جنبي يقولي انا لاقيتك بترجع بترجع وبعدين روحت نازل تحت ههههههه حتي انا فطست علي نفسي من الضحك مبقتش قادر اقوم وهم يشدو فيا

[shaddadfalcon1]

من سنتين كان محمد لسه عنده سنه وشويه وكنا الصبح او عايزين ننام مش فاكر بالظبط
المهم الواد بصينا لقيناه ساكت خالص وهو نايم علي ظهره كده ومراته تكلم فيه مش بيرد ومبرق ومراتي كانت بتضحك عادي يعني لحد ماالموضوع طول شويه وبصيت لقيتها اتخضت وصوتها علي وعماله تهز في الواد وهتعيط وانا كمان اتخضيت جامد وبصيت للواد وقلت الواد مات وفضلنا نهز فيه وبصينا لقيناه بكل برود بيبتسم ابتسامه صفراء وكانه بيقولونا ضحكت عليكم
كان هاين عليا ارميه من الشباك ساعتها

[X_MM_X]

من سنتين كان محمد لسه عنده سنه وشويه وكنا الصبح او عايزين ننام مش فاكر بالظبط
المهم الواد بصينا لقيناه ساكت خالص وهو نايم علي ظهره كده ومراته تكلم فيه مش بيرد ومبرق ومراتي كانت بتضحك عادي يعني لحد ماالموضوع طول شويه وبصيت لقيتها اتخضت وصوتها علي وعماله تهز في الواد وهتعيط وانا كمان اتخضيت جامد وبصيت للواد وقلت الواد مات وفضلنا نهز فيه وبصينا لقيناه بكل برود بيبتسم ابتسامه صفراء وكانه بيقولونا ضحكت عليكم
كان هاين عليا ارميه من الشباك ساعتها

والله ابنك ده زي العسل ربنا يحفظه

[waelfarid]

شفت الموضوع بتاع الطغاة الصغار
ربنا يحفظلك مستر يوسف مدام نور القمر


مش نور القمر يعني ماهيتاب برضه ولا ايه ههههههه

[hamaza81]

مش عارف دايما الواحد في العزاء بيبقى بيتلكك عشان يضحك
مرة كنا رايحين عزاء ابو واحد صاحبنا في قرية في الصعيد
واحنا قاعدين في الصوان
كان الراجل بتاع الفراشة طالع على سلم فوق
وكان راجل كبير يجي 70 سنة
راح جه واحد تحت بينادي عليه بيقوله انزل يا تامر
احنا سمعنا تامر من هنا وكله قعد يضحك وفرجنا الناس علينا