موقف محرج ..!!!!!

[bee]

السلام عليكم ورحمة الله وبركاته

يا جماعة انا فكرت في حاجه معرفش ممكن تكون مكررة في منتديات أخرى .. ويمكن هنا معرفش .. وحبيت اشارك بيها

ايه رأيكوا كل واحد يذكر موقف محرج اتعرض له .. واتعلم منه ايه ؟؟؟

هبدأ بنفسي :

انا مرة وانا في ثانوي شفت واحدة وانا مستني الكورس مع واحد صاحبي ..
المهم يشاء القدر انها تعدي اكتر من مرة .. وانا اقوله جميلة جداااااااااا.. امورة جدااااااااا.. اهي دي لو الواحد يتكلم معاها ..
وجه اليوم الي المفروض نروح فيه الكورس سوا لقيته مجاش ولما اتصلت بيه لقيته بيتهرب ..
المهم عشان مطولش عليكوا ...
تن تن تن تتتتتتتتاااااااااااااااااااااااااا

طلعت اخته :d

وبس
في انتظار مشاركتكم

تحياتي

[Mido80]

ههههههههههههههههههههه...يخرب عقلك دا انت علي راي المثل (قليل البخب يلاقي في الكرشة عضم). يعني ما لاقيتش غير دي؟؟

هاحاول افتكر موقف محرج وابقي اكتبة لاني دلوقتي الذاكرة مش مساعداني

[Hossam_Hassan]

أول مرة اروح اعزى فى حد، كنت فى اعدادى و كان والد احد زملائى بالمدرسة و زميلى ده كان أهلاوى متعصب أوى، و يوم العزاء صباحا كان ماتش للأهلى مش فاكر مع مين و الأهلى اتغلب، المهم و انا داخل على العزاء، عمال احضر الكلمتين اللى باسمعهم فى الأفلام، زى "شد حيلك" و "البقاء لله"، بس ساعة ما مديت ايدى فى ايده لقيت نفسى بمنتهى التلقائية بقوله "هارد لك يا أيمن"، الحمد لله مسكت نفسى بالعافية انى اجرى و دخلت العزاء و انا مكسوف قوى، قعدت ربع واحد و طلعت اجرى، و انا خارج حركت شفايفى من غير ما اتكلم.

لغاية النهاردة باتكسف كل ما افتكر الموقف، بس زميلى ده لو مكنش متعصب قوى و دايما بيتكلم عن الكورة، يمكن مكنش ده حصل

[Islam_galal]

مرة رحت أزور والد زميل لي في ثانوي و آخد معايا علبة شيكولاته و لقيت باب الشقة مفتوح ، دخلت لقيت العزاء مقام بسمون قاتل و أنا واقف و معايا علبة الشيكولاته1



تاني، باتصل بواحد صديق و داخل فيه شمال بهزار فضل ساكت و بعدين قاللي معلش حاكلمك كمان شوية و بعتلي رسالة إن والده في لسه داخل العناية المركزة

[sab3aawy]

بعد النجاح فى اعدادى هندسة والتخصص فى قسم الميكانيكا، كان عندنا سكشن بتاع مادة اسمها خواص المواد(كنا بنقول عليها material) وكان موعدة الساعة 2 ، وكان نظام الكلية ان من 1:20 الى 2 راحة، فخرجت انا وصديق لى نضرب كشرى فى شارع 10 المجاور لهندسة عين شمس، ورجعنا الساعة 2 دخلنا الكلية بس الكشرى كان عامينا، فانا قلت له تعتقد ينفع نطلع السكشن واحنا مش شايفين حاجة كدة، قاللى لأ طبعا، نروح عند عم مهنا(فنى معامل الميكانيكا) نضرب شاى ونطلع، المهم ضربنا الشاي وكانت الساعة بقت 2 وربع ، طلعنا السكشن لقينا الباب مقفول، قلنا يبقى اكيد المعيد جه، خبطنا على الباب فتحلنا ولد صغنطط كدة شكله فى اولى ثانوى، انا قلت فى نفسى الله يخرب بيت الجى سى أى اللى بيحدف علينا عيال بالشورت فى الكليات، المهم بصيت جوة ملقيتش حد شكله ينفع معيد، فسألت العيل ده قلت له(ايه ده هو الأفندى لسة مجاش) مردش على سؤالى وقال لى (اقعدوا) فانا كررت السؤال(هو الأفندى لسة مجاش) راح باصصلى من فوق لتحت كدة وقال لى(ماهو انا الأفندى) وانا وشى راح 579 لون ،وقعدت ممتقع طول السكشن، المهم ان هو عمره ما نسيهالى لدرجة ان فى نص العام التانى حصل بيننا احتداد تطور الى مد الأيدى وهو استغل سلطاته وادنى صفر فى اعمال السنة ، لكن لانى كنت واخد الموضوع تحدى جبت 55 من 60 فى امتحان آخر السنة ، وكنت جايب 10 من عشرين فى امتحان نص السنة وبالتالى المجموع بقى 65 من 100، يعنى جيد مقفولة برغم انفه

الموقف ده رغم ان عدى عليه ما يقرب من 20 سنة لكن مش بنساه ابدا

[محمد المشد]

اية المواقف الحلوة ديت 000 بس لازم يعنى تعاكس ولاد الناس من الاساس سواء اخت زميلك او اخت غيرة 000 اعتقد لو واحد عمل كدة معاك فى اختك كنت زعلت وعملت نفس الموقف ؟!طبعاً !
اما الاخ حسام حسن فموقفة حدث فعلاً امامى لناس كثيرة 000 عندما كنت اقوم بالعزاء فى احد الاقارب دخلت امامى قريبة وعندما قامت بالكلام لتقديم العزاء 00 قالت لهم عقبال الباقى ان شاء الله 000 بجد لم اتمالك نفسى واصطنعت موقف لكى اعبر هذا الموقف الحرج بجد
لذا يجب علينا ان ندرب انفسنا على كافة المواقف ولا نحرج من اى سؤال ، حتى نتعلم مثل هذه المواقف

[dr.ayman]

موضوع حلو اوى
بالنسبه ليا كنت مره فى الكليه و عندى سكشن و مستنى المعيد اللى هايدينى السكشن
و كنت حاطط الكارنيه بتاعى علشان ياخدوا الغياب فى طرابيزه كدة بعيده عنى شويه
الموظفه اللى بتاخد الغياب اخدت الغياب و مشت
و كان فى واحد كده قاعد قريب من الطرابيزه دى لابس لبس زى مدراس الثانويه لابس بنطلون ازرق و بنطلون جينز
قلته كابتن هات الكارنيه بتاعى فلقيته بيبصلى كدة
قلته ايه يا عم انتا ما بتتكلمش عربى ......... هات الكارنيه بتاعى من قدامك يا عم انتا انتا فى ايه .........
اخر مازهقت منه قمت نديت واحد صاحبى و قلتله هات الكارنيه يا عم
و انا طبعا بغلى من الكابتن ده
شويه ولاقيت الكابتن ده قام و لبس البالطو و قام ادانا السكشن و طلع المعيد الجديد بتاعنا
و انا كت قاعد طول السكشن مش عارف اقوله ايه لما السكشن يخلص فى الاخر ما قلتش حاجه و قمت ماشى ولا كأنى عملته حاجه
بس نفس اعرف هوا كان قاعد كده ليه ؟؟؟؟

[Nile_Storm]

انا كنت في الكليه وعندي سكشن الساعه 2
المهم قلت ادخل اصلي
و للاسف الجزمه اتسرقت
طبعا ادور عليها مش لاقيها خالص
و السكشن معاده جه المصيبه اني كنت لازم احضر عشان رئيس القسم نازل

تخيلو منظري داخل السكشن متاخر و لابس قبقاب في رجليا
و المصيبه ان السكش سيراميك فماشي و القبقاب عمال يطرقع :) تك تك تك تك
و قاعد الدرس طويله وهما في اخرها
و ده بيزعئلي اتاخرت ليه ياولد
مردتش شاورتله علي القبقاب
و انفجرت ماسوره الضحك حواليا :) :)
بجد مش هنسي الموقف ده ابدا

[araberphilosoph]

في الجامعه كام في محاضره لدكتور الماني كانت تقريبا عن تطور اللغه
وانا طول عمري بتغاظ من اللي بيخط واطي للاجانب ويقعد بقه يضحك ويبين نفسه
المهم كانت قاعد في الصف التاني وقدامي صف المعيدين
وواحد كده كانت اول مره اشوفه قاعد في الصف القدماني مع المعيدين فكرته طالب دراسات عليا وكده (القسم كله علي بعضه بدكاترته ومعيدينيه وطلابه في الصفوق الخمسه ميجبش 300 واحد يعني علي الاقل عارفهم بالشكل)
المهم الدكتور كان ملاه السبروه كتابه وبيدور علي الباشوره يمسح السبوره
فقام البني ادم اللي معرفوش ده وبضحكه صفرا ولعتني ومسح السبوره له
بصراحه مقدرتش امسك نفسي وقلت (كفايه .......... بقه هو يعني علي اديه نقش الحنه ايه ال........ ده)
طبعا زمايله المعيدين كلهم سمعوا واشتكوني لرئيس القسم وكده
بيني وبينكم انا احرجت من نفسي موووت اني قلت كلام كده علي معيد برده (انا باحترم اي حد بيشتغل في مجال العلم مهما كانت منزلته)
في الاخر برده صممت علي رايي قدام وكيل الكليه(الموضوع اتطور) وقلت اني مش بشتم الشخص انا بس باستنكر العمل نفسه ولو كان اي حد عمله كانت هاقول نفس الكلام
وطبعا من الاول اعتذرت ليه بس محصليش حاجه ووكيل الكليه لم الموضوع
ياااه ولا يوم من ايام الجامعه

[محمد المشد]

انا كنت في الكليه وعندي سكشن الساعه 2
المهم قلت ادخل اصلي
و للاسف الجزمه اتسرقت
طبعا ادور عليها مش لاقيها خالص
و السكشن معاده جه المصيبه اني كنت لازم احضر عشان رئيس القسم نازل

تخيلو منظري داخل السكشن متاخر و لابس قبقاب في رجليا
و المصيبه ان السكش سيراميك فماشي و القبقاب عمال يطرقع :) تك تك تك تك
و قاعد الدرس طويله وهما في اخرها
و ده بيزعئلي اتاخرت ليه ياولد
مردتش شاورتله علي القبقاب
و انفجرت ماسوره الضحك حواليا :) :)

اية دة يا عم الشباب 000 دا كان الافضل انك تمشى حافى احسن ، وكمان بتشاور على القبقاب 00 جزاك الله كل خير 000 بش ياترى اللى سرق الجزمة مسبش حتى شبشب قديم 00 الله يسامحة فى اللى عملة فيك
بصراحة موقف صعب لاينسى
بجد مش هنسي الموقف ده ابدا

[pendodo2002]

هوا في مواقف كتير اوي
بس ابسطها و اقرب موقف (من كام شهر كدا)
واحد لقيته باعت للمنتدى اللي انا كنت فيه بتاع الكليه ان بنتو معرفش بتعمل عمليه في القلب ومحتاجه دم و فصيله دمها -b (سالب) ... المهم الموضوع ده عرفناه على 11 بالليل ... عملت انا و اصحابي في الكليه شوية اتصالات وعرفنا ان في بنك للدم اسمه البنك السويسري و اتصلنا بيه و اتأكدنا ان في دم (الكلام ده على الساعه 3 بالليل) .... المهم انا قلت اتصل بالراجل (اللي بنتو بتتعالج) ... لأ الوقت متأخر اوي ... بس انا هبعتله مسج على الموبايل .. لو صاحي اكيد هيرد عليا ... ولو نايم يبقا الصباح رباح ...
انا بعت المسج من هنا .. مفيش دقيقتين و لقيت واحد بيتصل تلات ارباع نايم او ضارب حشيش ... بيقولي دم ايه و سويرس مين (مش سويسرا) بقوله مش انتا اللي كانت بنتك عامله عمليه وعايز دم ... بنت مين و عمليه ايه يا زفت انتا مش شايف الساعه كام ؟؟ ... فقلتله الموضوع والقصه ... ده بدل ما يتضبط لقيته انفجر في وشي (اقصد في ودني) و هاتك يا شتايم من كل ناحيه من بدايه شجره العيله لحد اصغر فرع في الشجر و هوبا قفل في وشي ....
بس

[Nile_Storm]

اية دة يا عم الشباب 000 دا كان الافضل انك تمشى حافى احسن ، وكمان بتشاور على القبقاب 00 جزاك الله كل خير 000 بش ياترى اللى سرق الجزمة مسبش حتى شبشب قديم 00 الله يسامحة فى اللى عملة فيك
بصراحة موقف صعب لاينسى
بجد مش هنسي الموقف ده ابدا

اصلي كنت لسه في سنه اولي ومن الخضه مقدرتش ارد فشاورت احسن

ياراااااااااااجل دا انا خدت القبقاب بالعافيه من عامل المسجد

[Ashraf A.Kader]

اتصل بي احد اصدقائي ليعلمني بوفاة عمه الذي اعرفه وابنائه معرفة شخصية0فاتصلت باحد الاصدقاء وذهبنا معا بالسيارة للجنازة التي كانت تبعد عن القاهرة قليلا وفي الطريق توقفت السيارات فكانت فرصة لتعزية الابناء فترجلت من السيارة مع صديقي وسلمنا عليهم وفوجئت بالاخ الاوسط يناديني ب(خلود) فنظر الي صديقي ولم يعقب وفي السيارة اتفقنا ان الاخ الاوسط مصدوم من الوفاة وغير متذكر اسمي(رغم اننا عشرة طويلة)0وفي بداية البلدة وقفت السيارات ونزلنا للجنازة وكانت المقابر تبعد مسافة طويلة ولا يمكن دخول السيارات فقابلنا انا وصديقي الاخ الاوسط الذي بادرني بقوله(عامل ايه يا خلود لك واحشة يا راجل)طبعا خلود بشد اللام تصغيير خالد ففوجئت بصديقي والابتسامة علي وجهه وكادت الضحكة تخرج منه فابتعدنا بسرعة منعا للاحراج0بعد الجنازة دخلنا لصلاة المغرب بالمسجد وعند الخروجكان ابناء المتوفي يتراصون امام المسجد لاخذ واجب العزاء وكان الاخ الاكبر يقف بالمقدمة ويلييه الاخ الاوسط وصديقي خلفي فسلمت علي الاخ الاكبر ونادانب باسمي اكثر من مرة اثناء الحديث حيث لم نتقابل منذ فترة وهممت بالسلام علي الاخ الاوسط الذي بادر بقوله (منجلكش في حاجة وحشة يا خلود000طم طم طم)نظرت الي صديقي بجانبي لم اجده وانا وراه وطول الطريق حتي السيارة لم نتوقف عن الضحك حتي عدنا الي القاهرة

[Karim_Monir]

انا كنت في الكليه وعندي سكشن الساعه 2
المهم قلت ادخل اصلي
و للاسف الجزمه اتسرقت
طبعا ادور عليها مش لاقيها خالص
و السكشن معاده جه المصيبه اني كنت لازم احضر عشان رئيس القسم نازل

تخيلو منظري داخل السكشن متاخر و لابس قبقاب في رجليا
و المصيبه ان السكش سيراميك فماشي و القبقاب عمال يطرقع :) تك تك تك تك
و قاعد الدرس طويله وهما في اخرها
و ده بيزعئلي اتاخرت ليه ياولد
مردتش شاورتله علي القبقاب
و انفجرت ماسوره الضحك حواليا :) :)
بجد مش هنسي الموقف ده ابدا

نييييييييههههههههههه
عشان موقف مشابه للموقف المهبب بتاعك ده
اتعلمت اسيب في العربية كوتش خفيف كدة(اسبدرين)وتيشرت خفيف بكم وبنطلون برضه
ومطبقم ومابيتشالوش من العربية صيف شتاء عشان الطوارئ
نيييييهههههههه
قباب
هلكتني من الضحك وكنت هاتطرد من الاجتماع بسببك

[Khalid_Mostafa]

انا بقي ليه موقف مش حنساه ...انا ساكن في الدور 11 وكنت في اليوم ده قاعد لوحدي (مراتي كانت في المنصوره مع حماتي ) واهلي كانوا في الساحل الشمالي وقاعد بشورت و مش لابس حاجه فوق وخرجت بره الشقه عشان احط كيس الزباله وهووووووب الباب اتقفل عليا و انا من غير شبشب وبالنمظر ده !!! طب و العمل ؟؟؟ نزلت حافي في الأسنسير واستلفت من البواب تيشيرت و شبشب وكان منظري هوزؤ جداً ورحت لجاري في الشقه الي جنبي و اضطريت انط من بلكونه لبلكونه ...وتقريباً قدرت اعمل كده لأن الأدرينالين كان عالي جداً من شدة الإحراج ...بس حعمل ايه ؟؟؟