تعمل إيه مع زملاء عمل دماغهم أصغر من ابنك اللي عنده 9 سنين؟!!!

[Khaled Online]

السلام عليكم ورحمة الله
أنا بكتب الموضوع وأنا بضحك من غلبي والله
الموضوع ببساطة إن مديري ناداني مكتبه النهاردة وقالي اقفل الباب واتفضل اقعد
سألته: أجيب نوت بوك وقلم يا أفندم؟ (متوقعا إن هنشتغل وبتاع)
مديري: لا لا اتفضل
أنا قفلت الباب وقعدت
مديري: أخوك عامل إيه؟
أنا: قصد حضرتك جوز أختي يا أفندم؟ هو كويس الحمدلله، عمل العملية ودلوقتي في بيته بيستريح...شكرا لسؤالك يا أفندم
مديري: طيب الحمدلله..انت أحوالك عاملة إيه؟ فيه stress بتعاني منه اليومين دول أو الفترة اللي فاتت؟
أنا: لا يا أفندم، كل حاجة تمام الحمدلله
مديري: طيب أنا عايزك تعرف إن القعدة دي ودية جدا واعتبرني أخوك الكبير
أنا: دي حاجة تشرفني ياأفندم
مديري: الله يكرمك يابني. شوف يا خالد (اللي هو أنا يعني)، فيه ملاحظات على طريقة معاملتك ودي مأثرة على زملاءك حواليك
أنا: (في سري أهلا!) ممكن توضيح يا أفندم؟
مديري: مثلا بتتصرف تصرفات بالنسبة ليك طبيعية لكن بالنسبة ليهم فيها إساءة
---------بعد كام سؤال وجواب عشان أجيب اللي جواه، عرفت الآتي:----------
واحد من قسم تاني اشتكاني عشان أنا شديت معاه في الكلام مرة

اللي حصل فعلا بقى كالتالي: البيه التاني ده لسة جاي جديد وعايز ينفش ريشه، فبيسظرف مع ناس أول مرة يشوفها في حياته بطريقة سخيفة...هو جاى على position مدير HR على شئون عاملين واللع أعلم إيه تاني
مع واحد في المبنى التاني بتاعنا بيهرج بالايد!!! مستقوي عليه عشان الراجل أوفيس بوي لغاية ما عامل البوفيه ده صدرله الوش الخشب
معايا أنا كل أما يشوفني خلود أو خلودة!!! أقوله خالد، مرة تانية أقوله خليها خالد أحسن، مرة تالتة خالد يا باشا...وده مفيش فايدة
الموقف اللي شديت معاه أنا داخل المبنى التاني وبسأل على مشرف المبنى وكان واقف مع السيكوريتي تحت والبيه الرخم ده معاهم مش عارف قاعد بيرغي في إيه
أنا: السلام عليكم
ازيك يا حاج رجب؟ (فرد الأمن)
ازيك يا أستاذنا؟ (مع اللي ما يتسمى!)
اللي ما يتسمى: ازيك يا خلودة
أنا: اسمي خالد
هو: لا خلودة
أنا (صوتي علي شوية ووشي احمر): مفيش غير اتنين بيقولولي خلودة، أبويا الله يرحمه وأمي. حضرتك لا أبويا ولا أمي فتقولي خالد
هو وشه جاب ألوان وعينيه وسعت. عارفين تعبير امتقع وجهه؟ هو ده اللي حصله. أنا اتخضيت وقولت لا الراجل يكون عنده حاجة فقولت: معلش أصل الموضوع ده حساس عندي شوية
هو: لا عادي (رغي رغي رغي)
سيبته وكملت طريقي

ده السبب الأساسي اللي خلى مديري يكلمني
الأسباب التانية حسب كلامه هي: إن أنا بقعد لبعد 5 حتى لو مفيش شغل وإن ساعات برزع الباب وأنا داخل مكتبي! هههههه
السبب الأول عشان ساعات بكون رايح مشوار قريب بعد الشغل وحكاية الرزع دي حصلت مرة واحدة في التلات سنين ليا في الشركة دي والباب كان ساعتها مكسور ومابيتقفلش إلا بالرزع وكمان اعتذرت مباشرة للاتنين الستات اللي معايا في المكتب عادي

ملحوظة صغيرة: أنا مدرك تماما إن فيه مشاكل أكبر من كدة بكتيـــــــر في أماكن شغل تانية بس حبيت أفضفض مع الناس اللي برتاحلها

الاجتماع ده خلص على إني أحاول أحتوي اللي قدامي وأكسبه
حد بقى عنده فكرة ازاي أحتوي أصحاب العاهات النفسية؟
ياريت عشان أنا مش عايز أخسر المكان اللي شغال فيه

[nouranwar]

الله يكون في عون حضرتك الحل استحمل كلمة خلودة :)
سايسهم بقي و حضرتك ادري بالموضوع ده

[max_ziro]

كبر دماغك انا سعات بشوف حركات ولا الاطفال الحقيقية منهم مثلا يسلم عليك و ميسلمش على الى جمبك و يطلع يشتكى ان الى جمبك مبيسلمش علية ههههههههههه
و حجات من هذا القبيل

[medododo]

كبر دماغك ولا كأنك شايفهم

[Khaled Online]

الله يكون في عون حضرتك الحل استحمل كلمة خلودة :)
سايسهم بقي و حضرتك ادري بالموضوع ده

آمين
وشكرا للمداخلة
أنا نفسي أبقى عايش زيهم كدة في البلالا بس مش عارف
إحنا عندنا القسم معظمه سيدات وأنا واتنين كمان والمدير بس اللي رجالة
ويمكن انت تعرف يعني إيه تعامل سيدة في الشغل
بس إن اللي يعمل كدة يبقى راجل زيك؟! دي اللي غريبة

[cyborg_ift]

لما يقولك خلوده متردش عليه ههههههههههه

استاذي العزيز الناس اللي زي اخينا ده تعتبرهم أصحاب مرض فإنت لو قدامك حد مريض هتفوتله فأحلا حاجه فووووووووووت ومتحطش في دماغك

[تامر.محمد]

برغم انه شخص سخيف , الا انك انفعلت على حاجة صغيرة اوي , و فيه مديرين بيبقى العرف عندهم ان اللي انفعل او على صوته غلطان من قبل اي حاجة ( و هي وجهة نظر معتبرة برده )

كان ليها حلول كتير , ابسطها تعمل ان ده مش مضايقك و تناديه بإسم دلع هو كمان
او العكس تماما , تتجاهله و ما تقفش معاه و ما توجهلوش اي كلام , و لما يقول لك ازيك يا فلان صدر له الوش الخشب برده و استأذن منه و سيبه
انا عارف انه مستفز , بس له حلول

[mohamed_selim]

اشتغل بنفس نظام العيال .. لما يقولك خلوده روح اشتكيه :)

[Khaled Online]

كبر دماغك انا سعات بشوف حركات ولا الاطفال الحقيقية منهم مثلا يسلم عليك و ميسلمش على الى جمبك و يطلع يشتكى ان الى جمبك مبيسلمش علية ههههههههههه
و حجات من هذا القبيل

كبر دماغك ولا كأنك شايفهم

والله مكبر دماغي وماشي بمبدأ امشي عدل يحتار عدوك فيك
بس هما بيتمحكوا في أي حاجة ويقولك بتاع مشاكل والـ attitude بتاعه عايز يتعدل!
يعني ازاي أسايس ناس بطبيعتها مؤذية بس؟

خدوا عندكم دي: زميلة غير فاضلة شغالة تليفونست بقالها 15 سنة في الشركة ومعاها دبلوم تقريبا. لحد هنا عادي
هي بقى عايشة في دور مديرة مكتب المدير العام وبتتنطط على اللي يسمحلها -سوري في الكلمة- بكدة
أول ما جيت الشركة بقيت أسايسها ولما تعمل مشكلة أنا اللي أصالحها وأجيبلها أي حاجة عبيطة وأنا طالع من البريك، وابنها بقيت أجيبله أفلام كرتون على فلاشة وأي حاجة واقفة قصادها في الماك أعملهالها والنتيجة؟ الطبع يغلب التطبع، وهي بتاعت مشاكل فبرده اخترعت كام مشكلة ومن ساعتها بعدي بسلم بس ما بقتش حتى ترد السلام فبطلت أنا أسلم أصلا

السؤال بقى: ازاي تسلم نفسك من مشاكل مفتعلة لناس ما وراهاش إلا المشاكل؟

[Khaled Online]

لما يقولك خلوده متردش عليه ههههههههههه

استاذي العزيز الناس اللي زي اخينا ده تعتبرهم أصحاب مرض فإنت لو قدامك حد مريض هتفوتله فأحلا حاجه فووووووووووت ومتحطش في دماغك

موضوع إن مردش عليه ممكن قوي عشان هو في قسم بعيد عني واللي بيـ هندل أي ورق إجازة وإذن ناس في الدور بتاعنا :) فالحمدلله
بصراحة أنا من النوع اللي صعب يفوت

برغم انه شخص سخيف , الا انك انفعلت على حاجة صغيرة اوي , و فيه مديرين بيبقى العرف عندهم ان اللي انفعل او على صوته غلطان من قبل اي حاجة ( و هي وجهة نظر معتبرة برده )

كان ليها حلول كتير , ابسطها تعمل ان ده مش مضايقك و تناديه بإسم دلع هو كمان
او العكس تماما , تتجاهله و ما تقفش معاه و ما توجهلوش اي كلام , و لما يقول لك ازيك يا فلان صدر له الوش الخشب برده و استأذن منه و سيبه
انا عارف انه مستفز , بس له حلول

ده دلوقتي واخد موقف وأقابله وهو داخل للمدير العام يقدمله تقارير أو حاجة< أسلم عليه وهو ميردش فأنا أبتسم وأتنحله الحقيقة!
شكرا للنصايح يا تامر بك

اشتغل بنفس نظام العيال .. لما يقولك خلوده روح اشتكيه :)

وماله ونقلبها حضانة هنا هههههههههههههههه

[تامر.محمد]

اشتغل بنفس نظام العيال .. لما يقولك خلوده روح اشتكيه :)

هايبقى هو الغلطان

موضوع إن مردش عليه ممكن قوي عشان هو في قسم بعيد عني واللي بيـ هندل أي ورق إجازة وإذن ناس في الدور بتاعنا :) فالحمدلله
بصراحة أنا من النوع اللي صعب يفوت


ده دلوقتي واخد موقف وأقابله وهو داخل للمدير العام يقدمله تقارير أو حاجة< أسلم عليه وهو ميردش فأنا أبتسم وأتنحله الحقيقة!
شكرا للنصايح يا تامر بك

بس خلاص مصلحة , نفض له تماما بقى , فيه عينة احسن حاجة التنفيض ليها

[Mo.Kareem]

معلش انا اسف جدا ، بس انا بصراحة مش فاهم يعنى ايه ناس بتاع مشاكل ، من الواضح ان حضرتك فعلاً عندك مشكلة فى التعامل مع الناس ، معتقدش ان لما واحد زميل ليك يقولك خلاود تستاهل ان حضرتك تحرجة امام عامل الامن ، وكمان الراجل ميستهلش ان علشان كلمة تتعامل معه بأسلوب حد ومفيش بينكم اى تعامل مباشر يا سيدى الفاضل لو الكلمة بتزعلك اوى كده اسمعها واستحمل وخلاص ، حضرتك مش بتشوفه فى اليوم 100 مرة يعنى ، ممكن تكون وجهة نظرى غلط 100% بس انا ممكن اكون اتبهدلت عنك شوية فى سوق العمل وعارف يعنى ايه تعمل مشاكل لنفسك من غير ما تكون فاهم ان الغلط عندك مش عند الناس 0 وفى الاخر اسف لو كنت حاد شوية فى كلامى ، بس ده لمصلحتك انت اولاً على رآى الحزب الواطى

[ainshouka]

انا معاك تماما فى اللى عملته طالما انت شخصية جد فى شغلك ودا واحد لسه جاى جديد يبقى ياخد عليك بمناسبة ايه

وبعدين طالما انت بتعامله بصفته الرسمية يعنى مسمحتلوش انه يعاملك كفرد قريب يبقى هو لازم يحترم حدود التعامل اللى انت حاططها دى

ودى غلطته انه مش عارف يتعامل صح

بس انت كان ممكن من الاول تقوله صراحة انه مينادكش بالاسم دا لانه بيضايقك وانك تحبه يقولك خالد

فلو كنت قلتهاله صراحة وهو برضه مستمر فانت مش غلطان

[SHNORY]

لما يقوله عامل ايه يا خلوده قوله تمام يا توتو انا كويس يا قطه

[koheya]

معلش انا اسف جدا ، بس انا بصراحة مش فاهم يعنى ايه ناس بتاع مشاكل ، من الواضح ان حضرتك فعلاً عندك مشكلة فى التعامل مع الناس ، معتقدش ان لما واحد زميل ليك يقولك خلاود تستاهل ان حضرتك تحرجة امام عامل الامن ، وكمان الراجل ميستهلش ان علشان كلمة تتعامل معه بأسلوب حد ومفيش بينكم اى تعامل مباشر يا سيدى الفاضل لو الكلمة بتزعلك اوى كده اسمعها واستحمل وخلاص ، حضرتك مش بتشوفه فى اليوم 100 مرة يعنى ، ممكن تكون وجهة نظرى غلط 100% بس انا ممكن اكون اتبهدلت عنك شوية فى سوق العمل وعارف يعنى ايه تعمل مشاكل لنفسك من غير ما تكون فاهم ان الغلط عندك مش عند الناس 0 وفى الاخر اسف لو كنت حاد شوية فى كلامى ، بس ده لمصلحتك انت اولاً على رآى الحزب الواطى

انا بقالى 12 سنة بشتغل فيهم اكتر من 4 سنين مدير لمصنع بترول وعدد 2 منصة بحرية ب14 مليار جنية وحوالى 150 عامل ومش بقولك كدة للفشخرة الكدابة بس لاقناعك ان وجهة نظرى ممكن تكون صح. يؤسفنى ان انضم للاستاذ كريم فى ردة واقولك زى ما قالك بالضبط واضيف ان العمل محتاج حساسية شديدة فى التعامل مع الناس سواء مديرينك او من تديرهم من غير نفاق او حب ظهور وتاكد ان كل ما زادت سنوات شغلك حتعرف انك كنت غلطان فى عدم احتوائك للاخرين ودة ظهر حتى فى اسلوب تعبيرك عن المشكلة.

تقبل تحياتى