...........سجاير ............

[Eng_hatemfathy]

انا بقالي 10 ساعات مشربش
و ضارب بتاع يجي 10 عسليات ده غير اللب و التوفي و السندوتشات
انا النيكوتين ابتدى يسيطر عليا بس انا هحاول اناضل على قد ما اقدر
ادعولي و النبي
بجد نفسي ابطلها
تعبان منها جداً

يارب يا مسهل

ربنا يعينك وكما قال العقلاء كن عبدا لله ولا تكن عبدا لسيجاره ولقد رأيت بعينى من يقوم فى جوف الليل ليس ليذكر الله او يقضى حاجته انما ليشرب سيجاره -هل هناك ذل اكثر من هذا
اسأل الله ان يعافيك ويعينك وخذها منى كلمة صادقة من ترك شيئا لله ابدله الله خيرا منه

[Eng_hatemfathy]

طيب
بس لو بطلت السجاير هعمل ايه ؟

سؤال لذليذ اوى يدل على حقيقة التدخين ويجب ان يسبق الاجابه سؤال اخر الا وهو لماذا تدخن؟ فان استطعت الاجابه سوف تعلم ماذا تفعل بعد الاقلاع عن التدخين
التدخين مغضبة للرب مفسده للصحة مهلكه للمال ايذاء للجار مذهبة للوقار والهيبة
واقسم بالله انى اكاد ان اخرج من الصلاة اذا وقف بجانبى مدخن من فرط سوء رائحته فما بال الرجال بنسائهم واولادهم وهم مجبرون بان يجاوروهم ويعاشروهم اسال الله ان يعافينا ويعاف شبابنا اجمعين

[kimo-nubira]

بشرب علبه مارلبورو احمر في اليوم

ومن فتره بطلتها 3 شهور ورجعت تاني للاسف

بالمناسبه اتفرجو علي الصور الجديده اللي علي العلب حاجه اخر قرف

[Eng_hatemfathy]

موضوع جامد ربنا يتوب على الجميع وديه تجربتى مع تبطيل التدخين

بصراحه كلام رائع رائع رائع
فعلا حطم صنمك
بس اهم حاجه اعتزال جو المدخنين لان فى ناس بعد سنه واتنين بيرجعوا تانى بسبب القعده اياها وفى اول موقف ضعف بيكون الحل فى سيجاره
والحديث واضح مثل الجليس الصالح وجليس السوء............ الى ان قال ونافخ الكير اما ان يحرقك بناره او تجد منه ريحا خبيثه ولا اجد فارق بين نافخ الكير ونافخ السجائر بل نافخ الكير افضل لانه يصنع شيئا مفيدا لغيره ويعود عليه بالنفع اما المدخن فيسىء الى نفسه والى غيره
نسأل الله العفو والعافيه
وانقل لكم موقف حدث لى بشارع اكسفورد بلندن
كنت اسير مع سائق على ارجلنا بعد ان ركنا السياره اتجهنا للتسوق ووجدت عدد بسيط يدخن فسألته انا شايف ناس بتدخن فى الشارع بس مش بكثافه قالى من عشر سنين كنت تشوف الشارع ده سحابة دخان اما دلوقتى فالناس اصبحت تحتقر المدخن فى كل مكان حتى اماكن العمل واختيار العاملين (شوفوا التمييز العنصرى يعنى لو بيدخن مش هيشغلوه-ههه) لحد ما ناس كتير بطلت تدخين علشان تحافظ على اكل عيشها ووجاهتها فى المجتمع
تخيلوا الناس اللى عرفتنا التبغ انهارده اصبحت تحتقر المدخن واحنا طبعا بناخد السىء بس ونسيب الجانب الحسن
ربنا يهدينا ويعافينا

[Eng_hatemfathy]

لازم اشرب معسل قص اول ماستفتح الصبح الشغل على باب المحل

سؤال لو صدقت فيه مع نفسك اكيد هتبطل
هو ده شكر النعمه والدعاء بالبركة فى الرزق-حاول تفتح حوار مع نفسك باسئلة من هذه النوعية واكيد الاجابة هتكون بتقطيع العلبه ورميها فى الزباله قبل ما تتحرق لان كدا كدا هتترمى
وربنا يعينك

[Eng_hatemfathy]

ميرت أصفر العلبة يتقعد معايا يوم ونص تقريبا

طب ماتقولنا يادكتور على ادوية تنضف الرئة من الدخان والأعراض بتاعت السجاير أفيد ؟؟

افضل دوا هوا الدعاء فى جوف الليل واعتزال شركاء التدخين وصدق النيه مع الله والصدقه بنص ما كنت تحرقه فتلاقى دعاء ارملة او يتيم او مريض يطلع للسما فى سكون الليل ان ربنا يباركلك فى صحتك وعافيتك

[Haitham10]

انا بقالي 10 ساعات مشربش
و ضارب بتاع يجي 10 عسليات ده غير اللب و التوفي و السندوتشات
انا النيكوتين ابتدى يسيطر عليا بس انا هحاول اناضل على قد ما اقدر
ادعولي و النبي
بجد نفسي ابطلها
تعبان منها جداً

يارب يا مسهل

شد حيلك يا حج اشرف ومتحسسش نفسك انها حاجه صعبه ولا تحطها فدماغك من الاساس
وموضوع الاكل ده شئ طبيعي لان السجاير بتسد النفس فالشهيه هتبقي عندك مفتوحة ودة شئ كويس
وملهوش علاقه بالالهاء النفسي الي الناس كلها بتتكلم عنه

وعلي فكره انا بطلت سجاير مرة قبل كده واخدتها عناد مرة واحدة بعد ما اشتريت 3 علب وحطيتهم في البيت ولعت سجاره وطفيتها وشكرا

اة تعبت بصراحه خصوصا اول اسبوع بس قعدت اول ايام دي في البيت ومشاوير فرديه بعيد عن المدخنين او الاصحاب

لغايه ما جاتلي فترة ودي في اول 10 ايام تلاقي نفسك خرمان وجسمك نفسك مش علي بعضها دخلت صيدليه فمرة لاني معرفتش انام وشرحت للدكتور اخدت منه حبايتين اعتقد مهدئ او منوم وعملوا مفعول ونصحني بشرب عصاير كتير

وقالي ان تعب اول اسبوع هيبقي نصه في تاني اسبوع هيبقي نص النص في تالت اسبوع وشكرا مفيش تعب ومفيش احتياج

وحصل معايا كدة

وزي ما قال بعض الزملاء .. بدات اكل بشكل غبي والاسباب كتيره بس اهمها ان الاكل له طعم مختلف تماما
حتي الكشري المصري والله تخيلوا كإني كنت بأكله لأول مرة


وللاسف رجعتلها تاني بعد 4 شهور تقريبا لظروف خاصه تركت نفسيه سيئه

ويارب ابطلها تاني بس المرة دي هحتاج اكون بره الجو الي انا فيه بالكامل

[Haitham10]

صحيح .. ممكن اللب و هولز او اي حاجه نعناع قوية هتجبرك متدخنش ساعة علي الاقل فوجودهم معاك دايما هيبعدك عن التدخين

هي بس مشكلة التوتر دى

[solid_khaled]

بشرب علبة kent 6
كل إسبوع بقالي بتاع 6 سنين بشرب بالمعدل دة و مش عايز أبطل عشان مش حسيسها إدمان عشان مبشربش فالشغل ولا فالبيت
بشرب بس برة ونا بخرج خميس و جمعة بس تقريباً و مبطقش
رريحت السجاير في مكان مغلق
و بشيش مرة وحدة فالإسبوع أو مرتين

حجر واحد فواكه

[AhMeD EzZ]

ربنا يساعد كل واحد عايز يبطل، بس فى نوع سجاير مهتم جدا انى اعرفه اللى هيا بنى ورفيعة زى اللى كان بيشربها محمد سعد فى فيلم بوشكاش، يا ترى اسمها ايه وسعرها كام؟

في كذا نوع بني
الحريمي

Moor و دي الاخضر نعناع و الاحمر سادة

و الرجالي فيه
Captain Black و دة اتقل نوع سجاير في الدنيا

و دة في منه سادة و بالفانيلا و كريز و شوكولاتة

و Macbeth و دي زي ال captain black في كل حاجة بس اخف شوية

[AhMeD EzZ]

ايه الموضوع اللى كله دخان ده حد يفتح الشباك وانتم تبطلوا شرب البتاعة دى انا نفسى اشرب بايب على فكرة

تصدق لايق عليك شخصيتك قوي يا باشا :)

[AhMeD EzZ]

انا بتنيل اشرب L&m احمر من علبة ل علبة و نص يومياً حاولت ابطل قبل كدة بس مشكلتي ان كل الي حواليا مدخنين فبرجع ليها غصب عني :(

و بشيش حجر فواكة كل فين و فين

مصاريف حوالي 350 ّ400 جنيه شهرياً

[windofchange]

جزاك الله خير بجد يادوك الموضوع رائع مع اني الحمدلله مبشربش بس استفدت منه ومن مشاركات الرجالة فيه

[ganash]

مش بدخن الحمد لله

[houseiny]

على فكرة يا جماعة انا قعدت أدخن 16 سنة ( ربنا يسامحني على كل الفلوس اللي راحت دي) وكنت بشرب جميع أنواع السجاير زائد الشيشة طبعاً كان متوسط السجاير معايا في اليوم علبتين وطبعاً من النوع الفاخر يعني متوسطي في التدخين يومياً كان حوالي 12 جنيه ده مع الوضع في الأعتبار اسعار زمان عن دلوقتي ، لأني كنت بجيب المارلبورو بأنواعه والميريت ب4 جنيه ، ما علينا يعني صرفت على السجاير والمعسل في 16 سنة حوالي 70 الف جنيه ويزيد ( ده مجرد رقم تقريبي وأكيد هيزيد عن كده) بالله عليكم ربي لما يسألني عن الفلوس دي وأقوله حرقتها وضريت نفسي واللي حواليه هيعمل فيه إيه؟؟؟؟ انا الحمد لله بطلت التدخين دلوقتي وبدأت اشم بعد ما بطلت قد المدخن ده رحته معفنه وريحت نفسه مش حلوه خالص وعلى طول ماشي جيبه منفخ وشكله مبهدل من علبة السجاير وشعره مصفر بجرب كده وريحته فعلاً وحشه بجد حاجة مقرفة أوي وبيقيت ببعد عن كل اللي بيدخن دلوقتي ، وحاجة كمان وفرت الفلوس اللي ممكن اصرفها في سنة من السجاير وربنا من عليه بعمرة ، بالله عليك عمرة ولا سيجارة ، وقررت اني هعمل نفسي كأني بدخن وهاحوش المصروف بتاع السجاير كل يوم وهاطلع عمرة تاني وهاجوز يتيمة السنة اللي بعدها وهاعمل خير كتير يمكن ربنا يغفرلي الذنوب اللي عملته من التدخين وهي كالأتي
1- الكفر بأنعم الله
2- صرف الأموال الحلال في الحرام ( التدخين حرام شرعا ومنطقياً)
3- المجاهرة بالمعصية وإن كانت صغيرة من وجهة نظر البعض (لأن استحقار الذنب أعظم من الذنوب متبصش لحجم المعصية ولكن أنظر لحجم من عصيت)
4- إيذاء الغير بتلويث الجو وتدعيم شركات زي مارلبورو بتدعم الجيش الإسرائيلي وبالتالي بتدبح وتخرب في بيوتنا بفلوسنا
5- نشر عادة سيئة بين الصغار (متقولش مابشربش في البيت - لأني هاقولك بدخن في الشارع والعربية والأطفال بتشوفك وبتقلدك وبالتالي بتأذي الناس وبتأذي ولاد غيرك)
بيتهبألي كفاية الأسباب دي مع أني عندي تاني انا كنت مدخن وعرفت الأحساس بالتدخين وعدم التدخين والله ترك التدخين نعمة وربنا هيعوضك بنعم أفضل لو بطلت التدخين عشان ربنا صدقوني لو سألت كل من ترك التدخين هل في تغيير في حياتك والله لهيقولك أه وهيقولك على نعم كتير حصلتله وان كان مخدش باله بس لو فكر لحظات هياخد باله من النعم دي وهيحمد ربنا عليها - بجد ياله نبطل تدخين عشان ربنا وعشان صحتنا وعشان ولادنا وعشان يبقى معانا فلوس نعمل بيها خير كتير قوي.