...........سجاير ............

[piezo]

طيب صحيح يا دكتور احمد ماتقولنا علي ادويه كويسه تنضف صدرنا من الكلام ده حاجه مذيبه للبلغم تكون كويسه

[terminator44]

للاسف العضوية السابقة اتوقفت من غير سبب - تعدد عضويات - انا مش عارف فين العضويات التانية
المهم اللى عايز يبطل انا ممكن اخدة معايا زيارة صغيرة فى قسم الاورام ويشوف ماسى السيجارة
على فكرة كتير اوى بيخفوا مع العلاج وبيروحوا مع اهليهم
اما المدخنين بتبقى دايما فى الرئة ودول دايما - مش غالبا- بينزلوا التلاجة قبل مايروحوا ..بس مش على البيت

[أشرف العدوي]

انا بقالي حوالي 14 ساعة أهوو
بس مش قادر بصراحة
و الي نازل عليا بضحك هستيري

و خصوصاً و ا،ا بقرأ مشاركة الأستاذ حسيني
أستوقفني المقطع ده و فطست على نفسي من الضحك

انا الحمد لله بطلت التدخين دلوقتي وبدأت اشم .

أنا مش قصدي حاجة وحشة
بس انا قعدت اقرا الجملة دي كذا مرة ورا بعض و جالي هيسترية ضحك


انا ايدي كل شوية تروح على مكان علبة السجاير ما لاقيهاش

الوضع صعب جداً جداً
انا بحزركم كلكم و خصوصاً أحمد فارما


أدعولي اني اقدر اكمل

[grand hand]

غريبه
أنا نفسي اشرب بايب برضه
مع اني الحمد لله و لا بشرب سجاير و لا شيشه
بس بحس البايب كده شيك و لها بريستيج

البايب ده حكاية فعلا وله طقوس ومزاج معين، طقت فى دماغى واشتريت واحد خشب بنى جميل ولفيت عالدخان بتاعه لحد ما لقيته نوع مشهور تقريبا مفيش غيره فى مصر اسمه الكابتن الكيس بعشرة جنيه وله سحابة من فوق شبه اكياس الماريجوانا بتاعة بلاد برة انتاج الشرقية للدخان ورائحته جميلة معطرة، بس عايز واحد فاضى يرص ويولع وينضف لانه لو متنضفش على فترات متقاربة بيتسد وطعمه بيتغير، نظامه شفط وطرد مش بيتاخد على الصدر زى السجاير، اخر ما زهقت منه كسرته وازبهليت من كم الزفت والقطران الملزق اللى كان جواه تقريبا كان سادد الانبوب، غسلته وكان شكله مؤذى جدا وخلا الحوض اسود من كتر البلاوى اللى نزلت. على فكرة التبغ بتاع الكابتن بيتصدر بلاد بره والسياح العواجيز لما بيجوا مصر بياخدوا معاهم كميات منه وعمار يا مصر

[Ahmed_lol2007]

الحمد لله مش بدخن
وإن شاء الله مش هدخن لان ملهاش أى فايدة
الحمد لله صدرى نضيف لان محدش ف الاسرة عندى بيشرب سجاير لا والدى ولا أخويا وبحمد ربنا على النعمة دى
والحمد لله كل صحابى مش بيدخنو ولو حتى قعدت مع حد بيدخن بسيبه وبقوم
ولو حد ركب معايا العربية وكان بيدخن بحاول أنى أقوله ممنوع التدخين بس بشكل كويس عشان الاحراج وف مرة كان خالى راكب معايا وكان بيدخن أول ما ولع السيجارة ركنت على جمب وعملت نفسى بفحص العربية وأول ما خلص السيجارة ركبت تانى وهو فهم ساعتها أنا ليه عملت كدة
ولو ف اى مرة ركبت ميكروباص أو أى مواصلة ولقيت حد بيدخن بقوله إن ممنوع التدخين ف المواصلات وممكن أسيب العربية دى وأنزل لو لقيت إن أكتر من شخص بيدخن ومفيش تقبل للكلام اللى أنا بقوله

[Abdelrahman.H]

أنا الحمد لله مش بأدخن و مش حأدخن ...

مرة سألت نفسي هما المدخنين عاجبهم فيها إيه السيجارة دي ... قلت طيب ما أجرب علشان أعرف ...رحت شاري علبة و ولعت أول هبابة ... مش قادر أقولكم على اللي حصلي ... خنقة و دوخة وحرقان في عيني و مناخيري و عيني دمعت قمت راميها و رميت باقي العلبة ...
أنا بجد مش عارف إنتم عاجبكم فيها إيه ....
أنا مش بأطيق ريحتها ولا ريحة اللي بيشربها و أي حد يدخل عندي مكتبي في الشغل بأقوله إطفيها و إنفخ النفس برة و بعدين إدخل ... ومديري لما يطلبني في مكتبه و أروح ألاقيه بيتهبب يدخن بأقوله إفتح الشباك و إطفي السيجارة الأول و لما المكتب يتهوى حأجيلك لدرجة إنه ما بقاش يطلبني أروحله مكتبه تاني :))))))

ربنا يديمها عليا نعمة و يرحمكم ويتوب عليكم منها

[zkralla]

يا ريت الى بطل التدخين يقول عن الاختلافات الى حصلت فى حياته بعض ما بطل وياريت لو بالتفصيل ( يعنى مش نقول الصحة بتتحسن لكن يقول ايه الى بيتحسن بالظبط بناء على احساسه مش مثلا يقول عشان امراض القلب والسرطاه وكده لان كل مدخن بيبقى حاسس ان الكلام ده هيجى للاخرين لكن اقصد التغيرات الملموسه تفصيلا ) عشان ده بيخلى الناس الى بتشرب تتشجع على اخذ قرار الامتناع وبيحسسهم بكم الفوائد الى بتترتب عن الامتناع ( طبعا هم عارفين بعضها ) بس فعلا والله فى حاجات المدخن مع طول فترة تدخينة بينسها وبيحسب ان ده هو الوضع الطبيعى
زى مذاق الاطعمه مثلا الى بيرجع تانى بعد الامتناع عن التدخين ( اقسم بالله العظيم انى نديت زوجتى وقلتها طعم اللبن متغير راحت داقت وقالتى لا كويس لانى كنت فعلا نسيت مذاق اللبن الحقيقى ) حاجه كمان زى النهجان الى بيحصل مع طلوع السلم وزى الشهية الى ناس كتير انا منهم - بتفقدها مع التدخين وزى غمقان لون الوجه الى بيكون راجع لصبغه صبغة الملاتنين وزى تحسن القدرة الجنسية الملحوظ ( خاصتا لمن تخطى مرحلة الشباب ) وزى النوم المريح بالليل الا المدخنين مش بينعموا بيه لان التدخين بيعمل ارق وعدم راحه فى النوم والمدخن مع طول فترة التدخين بينسى شعور النوم الهادى وبيحس ان نومه ده هو الطبيعى ومش بيحس بفرق الا لما يبطل سجاير - النيكوتين اساسا ماده منبهة كمان حالة الارهاق من اقل مجهود الى بيعانى منها المدخن وبيعتبر ان ده هو العادى عند كل الناس ومش بيحس بالفرق ده الا لما يبطل تدخين كمان فيه دراسات بتأكد ان هناك علاقة وثيقة بين الاكتئاب الخفيف ( عسر المزاج او المود الى مش حلو ) وبين التدخين وبرضه ده بيحسه الى بطل سجاير
الحاجات ديه لما يتم ذكرها تفصيلا بتادى لتخلص المدخن من الادمان النفسى للسجاير عشان غالبية المدخنين بيعتقدوا ان التدخين - رغم اعترافهم جميعا باضراره - بيخليك نفسيا سعيد او اكثر سعادة
يعنى الكلام ده يأكد للناس انهم هيكونوا اسعد حالا وافضل مود وفى نشاط اكثر وشهية افضل وتذوق افضل للاكل وقدرة جنسبة افضل ونوم اهدا ووجه اكثر اشراقا ( عشان الملاتنين ) وشعور بالتحرر واستمتاع اكتر بمباهج الحياة

[A7MED_PHARMA]

أبو آسر
عملت إيه ؟؟
بص
خليك متابع معانا ف الموضوع هنا .. كل ساعة خش قول كلمتين وبين للرجالة إنك صلب
أنا صاحي من النوم النهاردة الظهر .. علبة السجاير خلصانة ولسه ماجبتش
أديني قاعد أهه بقالي 5 ساعات من غير ولا نفس
وعمال أفرك..دلوقتي وقت الشغل ف الصيدلية
يعني هنساها لحد نهاية فترة الشغل ............

أنا هتابع معك ف الموضوع

الواد خالد عمل إيه؟

[yakoot]

انا جربت كل حاجة واى حاجة كانت بتنزل عشان ابطل السجاير ولكن مكنش فيه فايدة
الحل الوحيد الى هيخليك تبطلها بجد وعن تجربة ( الدعاء بصدق )
--
دى تجربة من واحد مبطل من 7 سنين وكنت بشرب من علبتين لتلاتة فى اليوم

[yakoot]

نسيت احط الخطبة الى كانت السبب فى انى ابطلها
حرب التدخين - محمد حسين يعقوب | طريق الإسلام

[mohammedabdallh]

الحمد لله انا مش مدخن
جربتها زمان بشس وبعد كدا سبتها علشان متنفعش لا بالعكس بدر مالا وصحه
وده فيديو جامد
اتفرجوا

‫تجربة سوف تجعلك تترك التدخين حتما‬‎ - YouTube

[Ralliart]

انا الحمد لله مبدخنش رغم اني مدخن سلبي عايش في بيئة حشاشين مش مدخنين طبيعيين
جربت اشرب قبل كدة كحب استطلاع وشربت علبة محستش بأي حاجة ولقيتها ملهاش لازمة وحسبت لو الواحد حوش تمن السجاير ممكن يعمل قسط لابتوب او موبايل او قسط عربية!

المشكلة عندي مع الحج بقاله ييجي 20 سنة بيدخن وحاولت اخليه يبطلها بكل الطرق بيبطل شهر ولا حاجة والاقيه مخبي علبة في العربية تحت الكرسي
واللي مشجعه انه مبيدفعش فيها ولا مليم كل واحد جاي من بررة بيخليه يجيبلو خرطوشتين مرلبورو ابيض من السوق الحرة وعاملين عندنا مخزن سجاير في البيت
يا ريت تقولو الادوية وانا متابع معاكو وهحاول اقنعه

[A7MED_PHARMA]

أبو آسر
أنا لسه ماشربتش من ساعة ماصحيت
دماغي بتاكلني .. بس أديني قاعد باكل ف ظوافري ههههههههههههه

أبو آسر إنهزم يارجالة ولا إيه؟؟؟

[أشرف العدوي]

أبو آسر
عملت إيه ؟؟
بص
خليك متابع معانا ف الموضوع هنا .. كل ساعة خش قول كلمتين وبين للرجالة إنك صلب
أنا صاحي من النوم النهاردة الظهر .. علبة السجاير خلصانة ولسه ماجبتش
أديني قاعد أهه بقالي 5 ساعات من غير ولا نفس
وعمال أفرك..دلوقتي وقت الشغل ف الصيدلية
يعني هنساها لحد نهاية فترة الشغل ............

أنا هتابع معك ف الموضوع

الواد خالد عمل إيه؟

أنا فضلت صامد حتى الساعة 7.30 مساءً
و بعد كدة ما قدرتش امسك نفسي
شربت سيجارتين بس حتى الأن
بس بصراحة كنت كارهم و مكملتهمش

[أشرف العدوي]

قلبك كان حاسس
انا كتبت مشاركتي قبل ما أقراء مشاركتك الأخيرة
بس بإذن الله في امل