تـــــــحـــــذيــــــــر :(

[el_nahal2004]

انا بحكى الى حصل عشان الناس تستقيد من الناس الى منها لله محترفة النصب
واحد اتصل بية دلوقت وقالى معلش انا بعتلك رصيد بالغلط واسمحلك ترجعهولى
قولتله ازاى انا فاتورة مفتوحة ومينفعش اصلا حد يبعتلى رصيد قفلت معاه من هنا ومفيش ثانية
لقيت رسالة جاتله من رقمه
وفيها
تم تحويل 50 جنيه من
رقم01063909310
لطلب رصيد ب15 قرش
*506*1*الموبيل#


وطبعا الراسل فوق رقمه هو

طبعا انا شكيت فى الموضوع ومش واخد بالى كان كل هدفى انى الحق ارجعله فلوسه اتصلت بالشركة وقولتلهم على الى حصل قالولى هو الراسل رقم ولا كلمة فودافون
قولتلهم رقم قالولى ده نصب وبالفعل مفيش حاجة جت عند حضرتك ومينفعش يجى رصيد ليك عشان انت فاتورة
قفلت معاهم لقيته بيتصل بية تانى
وبيقولى حضرتك مبعتش ليه الرصيد
قولتله انت نصاب واتقى الله يانصاااب لقيته قفل السكة
حبة وكلمته من رقم تانى
قالى انا هحكيلك الوضع الى انا فيه
بيقولى انا فى الجيش ومحتاج اكلم اهلى ومعيش رصيد قولتله ولما تحتاج رصيد تسرق من الناس وتسرق 50 جنييييه
وبعتلى رسالة وكلمتينى مرتين فيهم مرة دقيقيتن
مكلمتش بيهم اهلك ليه يعنى نصاب وكداب؟

لقيته مش عارف يتكلم وقفل السكة وبعد كدة قفل موبيله
انا من الناس الى مكنتش عارف ان الراسل لازم تيجى من فودافون
ولو كنت كارت وعارف الكود عالطول كنت بعتهمله
فارجو نشر المووضع للى ميعرفش
بجد ياجدعان انا حزين اوى على البلد والى حاصل فيها
الناس بتاكل بعضيها

[محمد بلال]

قصة انا فى الجيش حركة قديمة من النصابين ولاد....

[Amr Axel]

ياااااااااااه الموضوع ده كان دايما يتعمل معايا و قفشه اكلمه و افضل اطول في مكالمة ( اكلفه شوية ههههه ) و في الاخر اديله التهزيئة التمام و اقفل هههههههههههه
لأن اولا ببص ع الراسل و بعدين ببص ع الرصيد عن طريق الخدمات بدون فلوس

[Nistelrooy]

طب انا داخل الجيش كمان اسبوع بس تبقي تبعتوا لي بقي :))

[el_nahal2004]

ياااااااااااه الموضوع ده كان دايما يتعمل معايا و قفشه اكلمه و افضل اطول في مكالمة ( اكلفه شوية ههههه ) و في الاخر اديله التهزيئة التمام و اقفل هههههههههههه
لأن اولا ببص ع الراسل و بعدين ببص ع الرصيد عن طريق الخدمات بدون فلوس

ايو ة صح بعد ماقفلت قولت ياريتنى كنت كلفته شوية
بس هتلاقيه كله ببلاش من الناس الى اضحك عليهم

[Amr Axel]

ايو ة صح بعد ماقفلت قولت ياريتنى كنت كلفته شوية
بس هتلاقيه كله ببلاش من الناس الى اضحك عليهم

مهو انا بقي بضيعهم عليه هههههههه افضل اقوله لسه موصلتش بالرغم انها وصلت و حاضر و من عنيا و تؤمر طب كلمني كمان شوية جايز تكون جت و هكذا مع كل واحد فيهم من النصابين دول و لما اكون زهقت او ورايا حاجة اهزقه و اقوله تعيش و تشرب غيرها يا ناصح و اقفل ههههه بحب انا اتسلي ع اللي بيعملوا ناصحين دول و خاصة زي بتوع الخزنة بجهزلهم الارباع و الانصاص و زمان كنت بجهزلهم برايز و شلنات هههههه دلوقتي بجهز الارباع في جيبي بالكومه مجرد غلاسة عليهم مش اكتر ساعات بروح افك 20 جنيه و اشتري اي حاجة عشان اخد فكة و اغلس ع العالم ديه لأن الجنيه و لا الاتنين مش هيفرق معايا لكن لما تقولي مفيش و فعلا مفيش اقولك مش مشكلة و مسامح انما اديك الفلوس و تاكل 2 - 3 جنيه و انت قدامك فكة اد كده و يبقي اللي قبلي مديك كمان فكة و تديلي الفلوس بكل برود و لا كأن فيه حاجة يبقي لأ انا مش كيس جوافة واقف و نفس الموضوع بالنسبة تغيير الانابيب السعر الرسمي 4 جنيه يقولك 5 عالطول و التموين و غيره و غيره , العالم ديه مينفعش معاها غير كده مهي سلبطة بسلبطة بقي

و للأسف اللي خلي الاشكال ديه تعمل كده ان الناس بتسكت و تكبر دماغها و الراجل اللي يعملي فيها بورم و فييس و تلاقي معهوش يكمل لأخر الشهر و يقولك انا هكلم عشان جنيه
اه المفروض تكلم عشان ربع جنيه كمان طالما حقك انت لو في اي مكان لو ليك باقي تلاقي الراجل طلع يجري وراك في الشارع عشان يديك الباقي

[أحمد كمال]

واحد لسه مكلمني دلوقتي و بيحلف بالله

اقول له و الله؟ يقول لي و الله

و يقول لي محول 120 جنيه

و انا بهدوء بافول له طب اقفل بدل ما اوديك في داهية

راح سب لي الدين انا و ابويا و شتمني شوية شتايم قذرة !!!!!


الناس دي جرالها ايه ؟؟؟؟؟

[محمد محمد]

الحل بسيط ...قوله حاضر و ابعتله رسالة مكتوب فيا تم تحويل 50ج الى رصيدك من رقم ( واكتب رقمك ) .

[el_nahal2004]

الحل بسيط ...قوله حاضر و ابعتله رسالة مكتوب فيا تم تحويل 50ج الى رصيدك من رقم ( واكتب رقمك ) .

خسارة فيه تمن الرسالة

[mohamed_selim]

مره حصلتلى بس فعلا كانت تحويل ... انا اتصالات و فاتوره ... اتصالات فاتحه التحويل للفاتوره و الرساله جاتلى من اتصالات ... و كان محول 10 جنيه ... كلمت خدمة العملا قالى مقدرش اقول اذا كان فى تحويل او لأ بس الرساله من رقم يبقى نصب لو من اتصالات يبقى سليم .... كلمته قلتله هتأكد من الفاتوره و لو لقيت المبلغ هحولهولك ... و فعلا بعد 10 ايام الفاتوره طلعت و فيها 10 جنيه مدفوعه فرديتهالو

[yehia]

ياباشا الموضوع ده قديم وحصل معايا كذا مرة ......

آخر مرة كانت من شهرين تقريبا لقيت برده واحد بيتصل ونفس الحوار بس من غير حتى ما يكلف نفسه ويبعتلي رسالة ان الرصيد اتحول ليا ( واضح ان الكروتة وعدم الالتزام بأصول المهنة مبقاش موجود حتى عند النصابين ) ... المهم قاللي حولتلك 100 جنيه وياريت تبعتهوملي .... رديت عليه بكل برود حضرتك متأكد انك حولتيلي .. قاللي أيوه .. قلت له ربنا يكرمك أنا مش عارف أشكرك ازاي .... متعرفش الـ 100 جنيه دول جم في وقت زنقة قد ايه ... وحياة أبوك تبعتلي قد 100 ولا 200 تانيين لاحسن العملية مقشفرة حبتين اليومين دول وأكون شاكر ليك قوي ....

طبعا قفل السكة في وشي .. حاولت أكلمه بعدها بعشر دقائق أسأله مابعتش 100 جنيه تانية ليه "كانسل " عليا ومارضيش يرد ...

الخلاصة ان النصابية دي ممكن تبقى فرصة لينا نضحك نفسنا شوية ونتسلى كمان عليهم لو عايزين .......

[Dojuar]

حصلت معايا الاسبوع اللي فات و نفس السيناريو بتاعك بالظبط

الأول لقيت ميسد فكلمته فقاللي محوللي رصيد وسأل على الرسالة وصلت والا لسه...قلتله أنا خط مش كارت ...راح مديني لواحد صاحبه على إنه السنترال اللي بيحول الرصيد...قلتله نفس الكلام إني مش خط و لو هو محوللي مش حارفع أرجعله رصيده

قلتله خلاص لما تيجي حارجعهملك و أنا سرحان خالص لغاية ما الرسالة وصلت بس ب 80 جنيه

وجاية من نفس الرقم اللي اتصل عليا

كلمت شركة الموبايل وسألتهم ينفع يتحوللي رصيد وأنا خط أصلا؟ قالولي أصلا في اخر أسبوعين مفيش أي حاجة جاتلك

عرفت انو نصاب

كلمته و لسه بقوله "لو عايز تنصب..." راح قاللي عيب اتكلم باحترام و قفل السكة في وشي

[mshmshm3]

ياريت كل واحد ياخد باله ومش دايما الأيد سريعة علي الجيب فكر الأول و نسأل و كمان في الحركة بتاعت كروت الشحن واحدة بتتصل و تقولك هات 5 كروت شحن ب 100جنيه يعني كروت ب 500جنيه علشان تكسب تلفزيون او اي حاجة و تمليها اول خمس أرقام من كل كارت و تقفل و تتصل بيك تاني تقولك باقي الأرقام انت هاتصدقها انها مش نصب و طبعا ده بعد ما تكون اتصلت بخدمة العملاء و جابت باقي الارقام بتوع ال 14 رقم اللي علي كل كارت و ده لان اي حد لو خربش كارت و باظ منه و كلم خدمة العملاء و قالهم 5 أرقام منه هايقولوله باقي الارقام و طبعا ال 500 جنيه كدة طارو و كمان في اعضاء بتقول انا خط مش كارت الصح ما تقولش اي حاجة عنك في التليفون خااااااااااالص

[Donzi]

جزاك الله خيرا

[أحمد كمال]

الظريف انه سب لي الدين انا و ابويا و شتمني بأمي ....... حاجة غريبة جدا الناس دي كفرة؟؟؟؟؟ يعني بيحلف بالله كذب اقول له و الله يقول لي اه و الله ...... و في الاخر يسب الدين سب صريح !!!!!!