المدينة المنورة - جوها إزاى دلوقت

[mesaharaty]

بإذن الله تعالى وبمنه وفضله سوف أتوجه لأداء عمرة على أواخر الشهر الحالى تبدأ بالمدينة المنورة أولا وكنت محتاج أعرف من أخوتى اللى ليهم خبرة بجو المدينة المنورة فى مثل هذا الوقت من السنة هل هو بارد ولا معتدل وهل أنا محتاج ألبس تقيل كهدوم داخلية ولا أخلينى عادى علشان أعمل حسابى من قبل السفر .
أنا عارف إن جو مكة هذه الأيام معتدل (الحرارة 30 مثلا ) وبالتالى لا نحتاج إلى لبس تقيل

وبرضه كنت عاوز نصايحكم من اللى سافر العام الماضى .
مع جزيل الشكر وعقبالكم جميعا

[م.احمد زكريا]

شوف يا سيدي

أولا ربنا يتقبل منك ان شاء الله ويوعدنا جميعا يا رب

ثانيا : المدينة المنورة في الشتاء باردة جدا شديدة البرودة وفي الصيف حر جدا جدا

في اليومين دول هاتلاقي درجة الحرارة الكبرى : من 20 الى 25 والصغرى بتلعب حوالين 10

أما مكة فهي حر في الشتاء شديد الحرارة في الصيف

---------------------------

توكل على الله وماتخدش لبس كتيير معاك

خلي اغلب لبسك جلاليب او ترينجات مرحيحه .. لأنك هاتقعد في الحرم مدة طويلة
ملابسك الداخلية حاول تكون استخدام مرة واحدة بدون غسيل عشان ما تتعبش نفسك
بالنسبة للهاتلبسه في رجلك : خليه شبشب من ارخص الانواع لأنه في العادة بيتسرق او بيضيع في الزحمة
والافضل يكون معاك شنطة كروس بحجم وسط تحط فيها حاجتم من شبشب واوراق ومناديل وفلوس وتليفون وغيره من المستلزمات تكون معاك طول الفترة الانت فيها في الحرم

أي حاجة هاتحتاجها هاتلاقيها بسهولة حوالين الحرم وبالسعر الانت عايزه ... يعني ماتشلش كتيير على الفاضي

الاكل والشرب اسهل حاجة هناك مطاعم كتير ولكل الجنسيات

بصراحة العلاج هناك هو الغالي بس تمنه فيه .. مش بونبوني زي العندنا ... بس يفضال تاخد الحاجات بتاع الطوارئ زي المسكنات وحاجات مطهرة للبطن واحاجات للإسهال ولو معاك اطفال خد خافض للحرارة ... كده يعني

بالنسبة للإتصالات : هاتلاقي هناك شركات المحمول عاملة عروض وخاصة للمصريين هالاتقي التكلفة ارخص من انك تعمل تليفونك تجوال ... وماتشتريش من الناس الفي الشارع او االفي التوبيس في المدينة جنب الحرم فيه مكتب لكل الشركات اختار منهم العامل احسن عرض

ركز في العبادة وماتشيلش هم حاجة

وتروح ترجع بالسلامة ان شاء الله ولا تنسانا في دعائك

[mesaharaty]

أفادكم الله
وشكرا على ردك

[aif]

فعلا برد المدينة قارص ليلا
يعني زي مصر تقريبا
لكن مكة الجو جميل في الشتاء
والسعودية عموما فيها امطار كتير بقالها كام سنة
يعني خد حاجة شتوي معاك بس مش كتير... كفاية الملابس اللي انت ح تسافر بيها من مصر او ممكن عباية صوف فوق هدومك العادية لانك مش ح تحتاجها الا في المدينة بالليل ... واثناء السفر من مصر والعودة اليها باذن الله
نصيحة ..... حاول انك تقلل من الكلام هناك عشان تقدر تركز في عبادتك ... واستثمر كل دقيقة .... الركعة في الحرم المكي ب 100 الف ركعة ....يعني لما تصلي 10 ركعات باجر مليون ركعة فيما سواه ..... فرصة لا تضيعها بالكلام مع اي حد .... الوقت اللي ح تتكلم فيه مع اي حد تكون صليت ركعتين او قرأت 10 آيات او ذكرت الله ..... استثمر كل وقتك .... دي ايام و ساعات خارج المنافسة
عمرة مقبولة ان شاء الله

[mesaharaty]

أهلا يا aif ومراحب كتير
كنت مستنى مداخلتك التى أشكرك عليها شكرا جزيلا
والسؤال الذى يطرح نفسه دلوقتى
أنا لو نزلت من البيت لابس الإحرام (غالبا الساعة 4 الفجر) ينفع الكلام ده ولا ممكن أروح أحرم من المطار وهل الإحرام من المطار سهل ولا هرجلة ؟

ألف شكر على ردودك

[Abdm]

الآفضل تلبس لبس الآحرام فى البيت براحتك علشان الزحمة
وربنا يتقبل منك ومنا جميعا

[mesaharaty]

مانا بافكر إنى ألبس لبس الإحرام فى البيت بس الدنيا برد جدا والسفر بإذن الله حيبقى فجرا .
طيب المطار كمان برد ولا الحتة بتاعت الوزن بتبقى دفا ولا إيه أنا مابعرفش أعيش فى البرد خالص

[aif]

مانا بافكر إنى ألبس لبس الإحرام فى البيت بس الدنيا برد جدا والسفر بإذن الله حيبقى فجرا .
طيب المطار كمان برد ولا الحتة بتاعت الوزن بتبقى دفا ولا إيه أنا مابعرفش أعيش فى البرد خالص

ربنا يكرمك ويتقبل منك ان شاء الله
بص يا باشا
لبس الاحرام يختلف عن النية بالاحرام
ممكن تحرم من المطار وانا عملتها قبل كدة لنفس السبب
بتدخل دورة المياه وتغير هدومك وتلبس ملابس الاحرام وتكون مغتسل في البيت قبل كدة وتصلي في المصلى الموجود في المطار ركعتين( سنة الاحرام ) الاولى بسورة الكافرون والثانية بسورة الاخلاص ثم تنوي الاحرام بنية العمرة ... او تأجل الركعتين والنية الى ان تصليهم في الطائرة عندما يعلن الطيار عن قرب الوصول لميقات الاحرام
.... وممكن تعمل حاجة تانية
الغتسل في البيت والبس ملابس الاحرام وانت لابس ملابسك الداخلية ..... وانزل من بيتك بملابس الاحرام وفوقها ممكن تلبس عباية صوف او ما شابة علشان البرد
ولما تروح المطار مجرد انك ح تخلع ملابسك الداخلية ..... وخليك بالعباية وانت في الطيارة لأن المطار وانت طالع الطيارة بيبقى هوا جدا .... لغاية ما توصل للميقات اللي ح يعلن عنه الطيار .... هنا تقلع العباية تخليها معاك وتصلي ركعتين سنة الاحرام و تنوي الاحرام ....
الاحرام بيبدأ من النية مش من ملابس الاحرام
...
انت فكرتني بموقف حصل معايا
كنت في المدينة وقعدت يومين وعاوز ارجع مكة واعمل عمرة تانية .... فلازم احرم من المدينة
وكنت عملت مغادرة من القندق بعد صلاة الظهر و تركت شنطتي في الريسبشن عشان آخدها وانا ماشي بعد صلاة العشاء لأني ح اقعد في المسجد النبوي لغاية صلاة العشاء
لما جيت آخد الشنطة كنت عاوز اغتسل في الفندق واحرم من هناك ..... ما نفعش والناس اللي في الفندق مارضيوش .... وقالو انت سبت الفندق من الظهر ومش ح نفتحلك غرفة تاني
قلت ياواد مش مشكلة ..... قمت واخد الشنطة ورايح على دورات المياه بتاعت الحرم النبوي ..... وواخد دش محترم بالمياة الباردة في الحمامات اللي هناك اللي من غير سقف دي ..... واحرمت من هناك وعلى مكة طوالي ..... المشكلة ان الكلام ده كان في شهر يناير اللي فات ..... والجو كان زي اليومين دول .... تلج ..... بس ربنا يسر الامور
..
الموضوع ده اللي عمله الشيخ خالد ح يفيدك كتير

..
..http://www.nilemotors.net/Nile/224644-a.html

..
وكمان الموضوع اللي في توقيعي

[Dr Ahmed]

على فكرة لا توجد سنة إسمها سنة الإحرام

ثانيا جو المدينة حاليا بارد جدا لسه سائل ناس راجعة أول إمبارح ، وبالقياس الجو فى مكة دلوقت بارد والمدينة دايما أبرد

[marsguy]

الجو في المدينه زي دلوقت السنه اللي فاتت كان برد سنه, زي يوم شتوي عادي في مصر مش من الأيام البرد اللي إحنا فيها دية.

كفايه أوي إنك تلبس جلابيه ثقيله وممكت تحتها فانله بكم أو حاجه أثقل من كده لو عاوز.

أنا السنه اللي فاتت أحرمت من البيت ونزلت وكنت لابس عبايه صوف فوق الإحرام وأول ما ركبت الطياره خلعت العبايه.

ربنا يتقبل منك ولا تنسانا من الدعاء

[ahmed_belta]

لبس الإحرام ليه هو مش رايح المدينة الأول

[aif]

لبس الإحرام ليه هو مش رايح المدينة الأول

ايون ... صحيح عندك حق
انا مالاحظتش انه رايح ع المدينة الاول
كدة سيادتك ح تحرم من المدينة مش من مصر
كما كنت جميع الخطوات اللي فاتت ( وش ظابط جيش)

[ahmed_belta]

أصل أنا رايح بردو في شهر 2 و كان موضوع لبس الإحرام ده محيرني لغاية ما عرفت إن إحنا رايحين المدينة الأول
طيب في حاجة أنا واحد صاحبي قاللي إن هو ما أحرمش إلا من مكه يعني راح على الفندق في مكه وبعدين راحو أحرموا من مكان وأحرموا وعملو عمره و لما كانوا عايزين يعملو عمرة تاني كانوا بيروحوا نفس المكان
فهل هذا يجوز أم لا ؟؟ وشكراً

[mesaharaty]

لأا يا جماعة إفهمونى أرجوكم
أنا بإذن الله رايح مكة الاول لمدة ليلة ثم المدينة ثم مكة مرة أخرى بإذن الله

[aif]

لأا يا جماعة إفهمونى أرجوكم
أنا بإذن الله رايح مكة الاول لمدة ليلة ثم المدينة ثم مكة مرة أخرى بإذن الله

يبقى كدة الغي الــ كما كنت ونرجع تاني لنفس الخطوات
وممكن تحرم تاني من المدينة وتعمل عمرة تانية لما ترجع مكة
فيه آراء بتقل يجوز وآراء تانية بتقول لا يستحب
....