مشكلة في لاب توب hp

[ابو سيف]

السلام عليكم

يا جماعة الخير دلوقتي انا و لله الحمد اشتريت لاب توب جديد من شركة ONE CLICK في مصر الجديدة و عاملين بارتيشن في جولف سيتي مول في العبور اشتريت منهم لاب توب اتش بي probook 4530s

المهم اللاب تاني يوم على طول و انا شغال عليه الاقي اذ فجأة ال touchpad بتعلق !! يعني ساعات تستجيب و ساعات لأ او تستجيب غلط او ببطء
المهم دخلت ظبطت كل التعريفات و مفيش فايدة بردو
المهم لاحظت ان التعليقه دي بتفضل فترة ممكن عشر دقايق و بعدين تفك تاني و تشتغل
و ممكن طبعا تطول عن كدة ... لأن الموضوع تكرر كتير في خلال يومين الاستخدام الى الان
لاحظت كمان ان اثناء توقف عمل التاتش باد بيتوقف عمل ال USB تماما !!!
و بيشتغل لما بتشتغل !!
__(((((انا من خلال مشكله سابقه في لاب توب اتش بي كومباك و اتصالي باحد العاملين بشركة اتش بي قالي ان التاتش باد و اليو اس بي بيعلقوا عشان الشاحن مش اصلي لانهم ليهم نفس السلوت على البوردة و الشاحن بيديلهم كهربا غلط و فعلا اتاكدت اني قيست الكهربا اللى طالعه من الشاحن الغير اصلي بالفعل لاقيتها اقل من المفروض و ان التعليق دا كان لما بوصل الشاحن بس باللاب و اتحلت المشكله لما اتغير الشاحن))))____

اللى بين القوسين دا كان حاجة اعتراضيه كدة معلومه اضافيه يعني جايز تفيد


و طبعا بسبب المعلومه دي قولت طيب حاجة من اتنين
يا اما الشاحن يا اما كهربا البيت
لأني مكنتش لسه وصلت البطاريه لاني جايبه من يومين و منزلتش فقولت احافظ عليها و اشتغل شويه بالشحن بس
قولت هيبان لما اوصل البطاريه
طبعا وصلت البطاريه و بردو نفس المشكله مفيش اي جديد !!!

المهم روحت الشركة في العبور بعد ما كلمت الراجل في التليفون قالي اكيد في حاجة غلط في التعريفات هاتلي بس اللاب
شيك اللاب لقى كل التعريفات سليمه مفيش مشاكل نهائيا
و قالي جرب طيب اللاب براحتك عشان اشوف المشكله
طبعا يمين شمال لمدة ساعه مفيش فايده معلقش
قولت طيب خير
روحت البيت
تلات ساعات شغل على الجهاز و نفس المشكله ظهرت تاني لمدة بتاع عشر دقايق كدة
و صورته فيديو كمان و هوا معلق بالمنظر دا دلوقتي

دلوقتي الجهاز بقاله يومين
انا مش عارف دي مشكله في الهاردوير و هل دا اكيد 100% عشان اعرف شغلي معاهم و ممشيش غير و انا مغير الجهاز او مرجعه و لو مرضيوش اطلع على مدير المول و جهاز حمايه المستهلك
و لا اطلع على توكيل اتش بي اقولهم على المشكله و اقولهم عايز تقرير مثلا بالجهاز

و لا دي مشكله سوفت وير فعلا سواء ويندوز او تعريفات
و لا ايه بالظبط
انا مش عايز اظلمهم
بس انا حتى فرحتي باللاب الجديد ماتت بسبب اللى بيحصل من يومين دا

يا ريت لو حد له خيره يقولي دي مشكله ايه
و ايه التصرف الامثل
بس يا ريت بالكتير لحد بكره بعد الجمعه عشان انا ناوي اروحلهم و ممشيش من هناك و مش منطقي اني اروح اقعد ابات عندهم اجرب اللاب لحد ما المشكله تظهر !!!


يا ريت النصيحه
و شكرا ليكم

[pro_samir]

حضرتك موصل كابل شبكه علي الجهاز ولا شغال وايرلس ؟

والكابل طوله كام متر ؟

[ابو سيف]

لا انا شغال وايرلس

[elmkaneeki]

لو طلع بايظ فعلا بدله منهم فورا
انت لسة فى ال 14 يوم الى فى الاول

[pro_samir]

هي شكلها مشكلة هارد وير بس علشان تتأكد نزل ويندوز تاني 64 بت

ومتنزلش غير التعريفات الأساسيه علشان تتأكد ان مفيش حاجه بتعمل كونفليكت وشوف هل الموضوع هيتكرر ولا لأ

علي فكره الموديل ده محترم جدا ما شاء الله فا متضايقش نفسك عيوب الصناعه وارده في أي حاجه في الدنيا

[ابو سيف]

هي شكلها مشكلة هارد وير بس علشان تتأكد نزل ويندوز تاني 64 بت

ومتنزلش غير التعريفات الأساسيه علشان تتأكد ان مفيش حاجه بتعمل كونفليكت وشوف هل الموضوع هيتكرر ولا لأ

علي فكره الموديل ده محترم جدا ما شاء الله فا متضايقش نفسك عيوب الصناعه وارده في أي حاجه في الدنيا

كتر خيرك بس الويندوز اللى عليه ultimate 64 pit فعلا
هل تنصحني اغير الويندوز بردو
التعريفات المفروض انها كلها بتاعته الاصليه

اللاب فعلا محترم جدا بالنسبه لسعره انا مش مضايق منه بس انا مش عارف كيفيه التصرف دلوقتي مش عايز اروح اعمل دوشه و اتخانق معاهم و هوا مفيهوش حاجة
عايز اتأكد ان المشكله فعلا في اللاب و ساعتها انا هعرف اظبطهم بس طبعا عايز كل دا يتم في خلال يومين بالكتير عشان اقدر الحق الجأ لحمايه المستهلك او غيره لو مرضيوش يعملوا حاجة
لأن اللاب اودامهم معملش اي حاجة

تفتكر اروح اوريهم الفيديو اللى انا صورته و هوا معلق؟؟
الفكرة ان كل مشوار ليهم سفر بالنسبالي و حاجة قلق و مفيش وقت
الله المستعان

[ابو سيف]

لو طلع بايظ فعلا بدله منهم فورا
انت لسة فى ال 14 يوم الى فى الاول

منا عايز اتاكد يا باشا هوا بايظ و لا لأ
دي الفكرة
و حقي ابدله و لا ارجعه؟

[pro_samir]

اه في جميع الأحوال غير الويندوز علشان تتأكد حتي لو مش هتنزل تعريفات ، وخلي معاك الفيديو اللي صورته

المفروض يشوفو المشكله وياخدو الفاتوره ويستبدلوه طالما لسه في خلال 14 يوم لو هو فيه مشكله فعلا ، لو مرضيوش هتضطر تعمل شكوي في حماية المستهلك

وممكن تروح للوكيل بشكل مباشر لو الجهاز بضمان الوكيل مش استيراد الشركه نفسها

[elmkaneeki]

منا عايز اتاكد يا باشا هوا بايظ و لا لأ
دي الفكرة
و حقي ابدله و لا ارجعه؟

اعتقد ممكن ال 2

[fouaa]

يا كبير الجهاز محتاج نسخه وندوز فقط بس تكون اصليه وعليها برامج اصليه وهيبقى زى الفل لو تحب انا ممكن اساعدك فالموضوع ده واهو برضو تبقى جربت عشان تطمن انو تمام ومتقلقش بتحصل كتير

[Dr_Mido]

الصح تروح فى خلال ال 14 يوم وتثبت انه فعلا بيعمل كدة و اطلب بمنتهى الادب تغييرة لو مرضيوش ولا توعق ولا توجع ماغك اتصل بحمايه المستهلك واحكيلهم الوضع وهطلبو منك بيانات والفاتورة و هتلاقى الشركه هى اللى بتتصل بيك لوحدها

[ابو سيف]

يا كبير الجهاز محتاج نسخه وندوز فقط بس تكون اصليه وعليها برامج اصليه وهيبقى زى الفل لو تحب انا ممكن اساعدك فالموضوع ده واهو برضو تبقى جربت عشان تطمن انو تمام ومتقلقش بتحصل كتير

كتر الف خيرك انا فعلا انهاردة الحل اللى عندي هنزل نسخه ويندوز كويسه يا ريت لو تعرف لينك او اي حاجة او انا هسأل اي حد زميلي على نسخة يكون مجربها و تمام معاه جدا و هجرب كدة يومين و اشوف

بجد كتر خيركم

[ابو سيف]

الصح تروح فى خلال ال 14 يوم وتثبت انه فعلا بيعمل كدة و اطلب بمنتهى الادب تغييرة لو مرضيوش ولا توعق ولا توجع ماغك اتصل بحمايه المستهلك واحكيلهم الوضع وهطلبو منك بيانات والفاتورة و هتلاقى الشركه هى اللى بتتصل بيك لوحدها

هوا انا فعلا روحت الشركة بعد يومين بالظبط و الراجل قالي طب وريني بس بيعمل ايه عشان لو مش مشكله اللاب احلها و لو مشكلته اغيرهولك سابني ساعه شغال على اللاب في خلال الساعه دي معملش اي حاجة و كان زي الفل
خدت بعضي و رجعت
المشكله اللى بفكر فيها اني في حين اللجوء لمشكله مفيش ما يثبت اني كلمتهم في اول يوم ما جيبته و روحتلهم بيه تاني يوم
مفيش حاجة رسمي يعني
عموما انا طالما في ال 14 يوم مش قلقان ان شاء الله
هجرب انهاردة نسخه ويندوز و تعريفات من الموقع نفسه و اجرب كدة و ربنا يسهلها
لو مشتغلش يبقا اتوكل على الله و اروحلهم

يا ريت لو حد له تجربه مع حماية المستهلك يقولها (( لان الشركة طبعا مش هتغير اللاب لمجرد شكوتي دي و هما مشافوش حاجة بعينهم )) يعني هل بيطلبوا اثبات للمشكله؟؟؟ هل بيطلبوا حد فني يشوف الجهاز؟؟؟ بيكون ايه المطلوب بالظبط و لا بحكي المشكله في التليفون فقط و الموضوع بيخلص؟؟؟؟ و يا ريت ارقامهم لو تكرمتو

شكرا ليكم

[ابو سيف]

طيب يا جماعة لو تكرمتوا في نقطه مهمه جدا

طبعا انا معايا فاتورة مختومه من الشركة بالسيريال
الفكرة اني لما طلبت الضمان قالي معدش فيه لماركة اتش بي ضمان بورقه الضمان دلوقتي شركة مترا على ما اعتقد و هوا بالسيريال نمبر فقط عشان كدة في تلات نسخ من الفاتورة المكتوب فيها السيريال نسخه معاك و نسخه معانا و نسخه بنبعتها ليهم عشان الضمان يتأكتف
دلوقتي لو لجأت لحمايه المستهلك المفروض انهم هيطلبوا صورة الضمان و لا عادي موضوع الضمان بالسيريال دا؟؟؟

[medododo]

شيل تعريف التاتش باد
وكمان شيل أي برامج خاصة بيها (مهمة أوي الحتة دي )
وإعمل ريستارت للوندز وسيب الوندز يتعرف اوتوماتيك عليا
وإن شاء الله هيتصلح