في حد بيشتغل في مصلحة الاحوال المدنية عندي مشكلة في شهادة ميلاد بنتي

[nonetta]

السلام عليكم

شهادة ميلاد بنتي فيها اسم الام غلط

الهانم اللي كتبت شهادة الميلاد كان مخها ملحوس عشان تاخد الحلاوة
وزهقت جوزي لانه طلب منها تعمل له مستخرجات
اما صدق اخد الشهادات من غير ما يبص فيها
لما رجع اكتشفت الغلطة
رجعلها راحت مصلحة بالقلم تصليح مش باين لان الاسم قريب
قال لها صلحيها في الدفتر قالت له ما تقلقش هاصلحها
طبعا لانعدام الضمير ما صلحتهاش
لما جينا نعمل شهادة الكمبيوتر لقيت نفس الغلطة

من سنة وشوية رحت القسم قدمت التابع لينا قدمت طلب وشوية حاجات كدة مش فاهماها قالولي ابقى تعالي اسألي
رحت كذا مرة لسة لسة لسة

طبعا الاقسام اتحرقت جيت اعمل شهادة تاني لقيت نفس الغلطة مش عارفة فين ضمير الناس

في ناس قالولي تخلص في الاحوال المدنية
واحدة معرفة من بعيد حاولت تعملهالي ما عرفتش وقالت لازم انا اللي اروح
وبعتت قالت هاتي قسيمة الزواج ومستخرج من الشهادة بالاسم الغلط
الست دي مش عارفة اوصل لها تاني

انا مش عارفة اروح على فين بالضبط عشان المكان هناك مبهوأ و هل الموضوع هيخلص على طول ولا ايه ؟

[M.Radwan]

هو مش هيخلص علطول بس هيخلص يعني..ويستحن فى الحاجات دي تروحي مصلحة الأحوال المدنية فى العباسية علطول عشان تختصرى الوقت.

[mero100]

1- معاكي اكيد شهاده الميلاد اللي الموظفه صلحت فيها الاسم و اكيد مضت جنب التصليح و ختمت .

2- حتروحي مبني المصلحه نفسه ....و تطلعي اداره الإدخال و تقدمي الورق و معاه طلب .

3 - غالبا حيتم التصليح من اداره الادخال .

4 - لو القسم اللي فيه الدفاتر اتحرق ....و الموضوع متحلش من اداره الادخال ....حيطلبوا منك تروحي قسم السلام لانه فيه غرفه الحفظ المركزي و الحمد لله متحرقش القسم ده و ده لمصلحة و حسن حظ المصريين . قسم السلام عند مدينه الحرفيين قريب منها اوي .

5 - و برضوا في الاخر حيتصلح الموضوع من اداره الادخال بمبني مصلحه الاحوال المدنيه بالدور التالت او الخامس تقريبا .

الموضوع بسيط و هيتحل ان شاء الله و مش حيخرج عن الخطوات اللي ذكرتهالك

[aboomar22]

هو الغلط فى اسمها ولا اسم الاب او الجد لو اسمها حضرتك هتروحى مصلحة الاحوال المدنية وهتملى نموذج تصحيح اسم وهتاخد معاكى شهادة الميلاد وقسيمة الزواج وصورة بطاقة الاب وصوره بطاقة حضرتك لو الخطا فى اسم الاب يبقى شهادة ميلاد الاب كمان بس اسف ان اقول لحضرتك هتاخد وقت بعنى حوالى شهر او اكثر لان فيه لجنة التصحيح بتبقى كل فترة واجيانا اللجنة بتأجل اسبوع وكده انا اصلى عملت القصة دى وخدت وقت ولما سالت ليه التعقيد ده ردت عليا الموظفة وقالت ماهو حرف فى الاسم يخرج واحد من ميراث او يدخله فى ميراث او يخرج واحد من قضية او يكون ممنوع من السفر والحرف يفرق علشان كده بتمر على عدة جهات قبل التصحيح عندها حق برضه ربنا معاكى ويكون الوقت بقى اسهل دلوقتى

[أحمد كمال]

لو قفلت خالص اعملي دعوى تغيير اسم ....... ب 300 جنيه و بتاخد شهرين بالكتير

[sherifahmed]

طب ينفع تغيير سن؟

[nonetta]

الغلط في اسمي انا
والموظفة ولا مضت ولا ختمت
هوا غيرت حرف الميم خلته نون وزودت حرف الدال
شهادة الميلاد الاصلية في المدرسة بتاعة البنت
عندي مستخرجات بردو فيها نفس التصليح اللي هيا عاملاه بايدها ربنا يسامحها
وعملت شهادة ميلاد بالكمبيوتر بالاسم الغلط
بردو في تقصير مننا انا عارفة
انا هاروح الاسبوع القادم وهاخد كل الاوراق الممكنة وربنا معايا

[nazekbakr]

يا مدام حضرتك تاخدي اصل شهادة الميلاد الورقية اللي بتتطلع اول مرة اول ما الامورة شرفت الدنيا وتطلعي علي الاحوال المدنية اللي انتي تابعة ليها ولو جنبك مركز اصدار نموزجي عادي برضه المهم اي مكان تابع ليهم وهيقولك تروحي فين غالبا يا هتروحي مصلحة الاحوال المدنية يا اما هتروحي حجة اسمها مركز المعلومات وده بيكون في مديرية الامن اللي انتي في دايرتها والموضوع بسيط جدا هتشتري ورق من مكتب البريد بحوالي 3ج وتديهم صورة شهادة الميلاد الورق اللي اسم حضرتك فيه صح وبعد يومين ترجعي تطلعي شهادة ميلاد للامورة ربنا يخليهالك هتلاقيهتمام انشاء الله