انقذو هذه اليمامة

[Ralliart]

كنت طالع البيت لقيت يمامة صغيرة العيال ماسكينها بيلعبو بيها وهيموتوها فأخدتها منهم وحطيتها في كرتونة ودفيتها وجبتلها شوية قمح وميه
طبعاً باين عليها انها صغيرة جداً فمعرفتش تاكل ولا تشرب لوحدها فعملت شوية سيرش عالنت عرفت اني لازم ازغطها زي توفيق عكاشة كدة وبعدين اكتشفت اني لازم بعد ما تاكل احط مية في بقي واحط منقارها في بقي واشربها يععععععععععععع
انا جبت علبة وخرمت غطاها على قد منقارها ومليتها شوية مية وحطيت منقارها في العلبة وضغطت وشربت الحمد لله

السؤال هنا ااكلها ايه بالظبط علشان حاسس ان القمح قاسي عليها لان اصلاً المفروض امها بتاكل وتهضم وبعدين تديلها الاكل مهضوم انا جربت اكلتها رز مطبوخ بس مش عارف غلط عليها ولا لأ؟
والسؤال التاني هو ااكلها كام مررة في اليوم والكمية اد ايه؟؟
السؤال التالت هي امتى هتكبر وتعرف تاكل وتشرب لوحدها علشان اطيرها وانا مطمن انها متموتش؟

[aif]

انا للاسف مش ح اقدر افيدك لاني معنديش خبرة في الموضوع ده لكن انا داخل ابلغك اعجابي بتصرفك الذي ينم عن رحمة ورفق بالحيوان كما اوصانا الله والرسول عليه الصلاة والسلام
..
..
فيه منتديات مخصوصة لتربية الحيوانات زي ده
نادى محبى الحيوانات الاليفة

[Ralliart]

انا للاسف مش ح اقدر افيدك لاني معنديش خبرة في الموضوع ده لكن انا داخل ابلغك اعجابي بتصرفك الذي ينم عن رحمة ورفق بالحيوان كما اوصانا الله والرسول عليه الصلاة والسلام
..
..
فيه منتديات مخصوصة لتربية الحيوانات زي ده
نادى محبى الحيوانات الاليفة

عليه الصلاة والسلام
شكراً على رد حضرتك واللينك فادني جداً انا دخلت قرأت معلومات عن الحمام على اساس انه نفس الفصيلة بس كاتبين انها بتبدأ تتعلم الاكل والشرب من امها وابوها.....ودي اعلمهالها ازاي ان شاء الله ارمي قمح في الارض وانزل الحسه
شكلها هتغلبني انا صعبان عليا حبستها في الكرتونة وبفسحها في الشقة 4 مرات في اليوم وفي نفس الوقت لو طيرتها مش هتعرف تاكل لوحدها نهائياً لاني جربت حطيتلها اكل ومية وحوصلتها فاضية مرضيتش تاكل ابداً ولما بحط حبوب في منقارها بتطلع لسانها وتبلع

[mr_vampire]

جزاك الله خير بجد. بس السؤال الذي يفرض نفسه بقي افرض حيت تطيرها لقيتها رجعتلك تاني لانك عوضها حينان الام ساعتها هتعمل ايه. انا اعرف ان لحم اليمام حلو وطعمه حلو اوي . ده لو فكرت يعني ههههههههههههه

[medo_2060]

فكرتنى مع انى مش غاوى بصراحه الحاجات دى بس لقيت عصفوره صغيره مره خدتها وكانت اول مره اهتم بحاجه زى كدا عايز اقلك عندنا جنينه صغيره جنب البيت لما عرفت تطير كانت بتروح الشجر ولما اطلع من الشباك اصفر تطير عليا اجيبلها اكل كدا فتره طويله لحد ما يوم اختفت يلا تلاقى صقر أكلها ولا حاجه المهم انا عملت الى عليا هههههههه

[mr_vampire]

فكرتنى مع انى مش غاوى بصراحه الحاجات دى بس لقيت عصفوره صغيره مره خدتها وكانت اول مره اهتم بحاجه زى كدا عايز اقلك عندنا جنينه صغيره جنب البيت لما عرفت تطير كانت بتروح الشجر ولما اطلع من الشباك اصفر تطير عليا اجيبلها اكل كدا فتره طويله لحد ما يوم اختفت يلا تلاقى صقر أكلها ولا حاجه المهم انا عملت الى عليا هههههههه

مين اللي قال ان دورك انتهي كدة. ابسلوتلي.

كان لازم تشوفلها عصفور وتجوزهاله عشان تطمن عليها. وكماااااااااااااان تشوف الفرح علي انهي فرع شجرة وتحضره وتصوصلهم كمان بس من تحت الشجرة بدل ماتاخد الفرع بالفرح بالمعازيم ورشق فالارض.

[medododo]

وديها عند فرارجي وهو هيتصرف

[Ralliart]

شكراً على ردودكم بس انا آخر حاجة ممكن اعملها في حياتي اني ادبحها انا فاكر وانا عندي 10 سنين اشتريت 3 كتاكيت وابويا وامي كانو فاكرين انهم شوية وهيموتو انما انا حوشت واشتريت قفص وربيتهم وكانو بياكلو اي اكل فاضل في البيت وكبرو وبقو اكبر من اللي بيتباعو في المحلات بكتير ولما اتدبحو قدامي حصلتلي عقده كأنهم دبحو اخواتي وقعدت سنين مبدوقش طعم الفراخ
مع العلم ان اليمام عكس الحمام لا يستأنس ومبيرجعش البيت تاني ويعتبر طير مهاجر

وديها عند فرارجي وهو هيتصرف

معلش اعذر جهلي مين الفرارجي ده ؟؟؟
لو الكلمة دي تعني الراجل بتاع الفراخ فهو اكيد هيدبحها لان اليمام مبيترباش وده مبدأ مرفوض

[rompo10]

جزاك الله خيرا اول ماتبدي تطير سبها وهي هاتتعامل

[Ralliart]

جزاك الله خيرا اول ماتبدي تطير سبها وهي هاتتعامل

هي بتطير بالعافية على قدها كدة في الشقة ،المشكلة اني سبتها يوم كامل وقدامها اكل وميه ومداقتهمش ،وكنت شفت في موقع اجنبي انها لو مبتعرفش تاكل لازم ااكلها بنفسي والا هتموت

[AmatoALLAH]

ربنا يجعلها سبب لدخولك الجنه ان شاء الله

و لو خايف تدبحها يا سيدي و لا يهمك بعد ما تزغطها و تكبر اشتري يمامه تانيه و هاتهمولي , اصلي لازم اكل جوز مش واحده بس :)

[mr_vampire]

ربنا يجعلها سبب لدخولك الجنه ان شاء الله

و لو خايف تدبحها يا سيدي و لا يهمك بعد ما تزغطها و تكبر اشتري يمامه تانيه و هاتهمولي , اصلي لازم اكل جوز مش واحده بس :)

ههههههههههههه او يشتري جوز وفرد لان انا برده مبكلش غير بالجوز. ويبقي هو مبسوط واليمام مبسوط وكلنا ناكل وندعيلك.

[mmffor]

اشتري جوز ايةحمام و ادبحها معاهم و اعمل اكلة حمام محشي لانها لواحدها مش كفاية

[osama.m]

القط عندي كل يوم يطلع فوق السطوح يمسك واحدة و يقطع ريشها و ينزلها البيت تحت و يفضل يتفرج عليها
بيزعل قوي لما اخدها منه و اطيرها :(

[Mostafa_Nour]

أولا جزاك الله خير على احساسك الطيب دة
ثانيا المعلومة اللى حضرتك قلتها صح بالنسبة لليمام والحمام اللى سنة صغير (يعنى أصغر من اليمامة اللى فى الصورة, قبل السن دة أهلة هما اللى بيأكلوة ) لكن بمجرد ما الحمامة أو اليمامة الزغب يبدأ يروح من عليها دة بيبقى معناة انها مستعدة للطيران , فأهلها بيرفضوا يأكلوها وهى من نفسها بتطير تروح تدور على حياتها بقى .
فمن اللى أنا شايفة فى الصورة دى اليمامة مافيش عليها زغب (أو زغب خفيف) فدة معناة انها قربت تطير وبالتالى قربت تستقل بحياتها
يعنى خلاصة (الرغى) الكتير دة : ماتزغطهاش وماتتعبش نفسك خالص , انت بس حطلها القمح قدامها وميه فى علبة زبادى ولا حاجة , وحطها فى كرتونة مفتوحة فى مكان هادى (زى المطبخ أو أى أوضه هادية بعيد عن الدوشة) وسيبها لمدة يوم لو لاحظت الأكل بينقص يبقى اليمامة بتاكل , لو مانقصش يبقى هى اصغر فى السن من اللى انا شايفة وهتضطر تظغطها .
شرب المية عند الحمام واليمام ممكن يشربوا لوحدهم , ماتحملش هم الشرب
مهم أوى انك تسيبها مع الأكل والمية و محدش يجى جنبها لمدة يوم على الاقل , (لأن اليمام طائر برى مختلف عن الحمام المنزلى اللى متعود شوية على البشر) عشان رهبة المكان والخوف اللى عندها يروح .
لاحظ برضة ان الطيور البرية عمرها ما هتاكل غير وهى مطمنة أوى , غير كدة مش هتاكل .
ومنتظرين نعرف منك ايه الأخبار :))
تقبل تحياتى