حريقة عند الجيران .. الحمد لله الذي عافانا مما ابتلى به غيرنا

[نور القمر]

على الساعة 12 سمعت دوشة في الشارع وواحدة بتخبط على بوابة عمارة قصادنا وبتنادي بفزع على الناس
طلعت جري على البلكونة لقيت دخانه خفيفة طالعة من اول بلكونة والدور اللي بعده مش ساكن
مفيش 5 دقايق والدخان بقى اسود وكثيف بفظاعة
بدأت اصرخ لا ارادايا
سمعت واحدة في الشارع بتقول حد يتصل بالمطافي
جريت انا على التليفون اتصلت بالدليل مش بيرد او اتأخر في الحالات دي بتحس ان الثانية كأنها ساعة
ابني ماشاء الله اتصرف بسرعة ودخل النت وجابلي رقم المطافي من نفسه
الحمد لله ردوا بسرعة ووصلوا
الشاب ربنا الهمهم وجريوا جابوا سلم عالي وطلعوا وانا نزلت لهم طفاية حريق (الحاجة اللي باقية لنا من ريحة العربية )
شوية والشباب من كل ناحية جاي ومعاهم طفايات حريق ووصلوا خرطوم مية بحنفية واشتغلوا بيه في غرفة البلكونة
ظهرت الست اخيرا في البلكونة هي وولادها طفلين 4 سنين وسنتين
اخيرا الحمد لله نزلوا واطمنا عليهم
في وسط الاحداث لقيت بوكس كهربا العمارة اللي جنبهم فرقع وغطاه طار
جريت زي المحنونة افصل الكهربا والغاز من شقتي وشقة حماتي وفشيت شقة اخو زوجي وفصلت عندهم
لحد دلوقت منعرفش ايه السبب الست كانت في المطبخ والحريقة كانت في الليفنج وابنها الصغير دخل لمامته مذهول ومش عارف يقولها
طلعت من المطبخ لقت الدنيا ضلمة مش شايفة العيال وتنده عليهم ميردوش لحد الشباب ماطلع وجابهم للبلكونة
من رحمة ربنا ان الست مش فارشة اي سجاد على الارض وكانت غسلاه كله ولا مكنتش عرفت توصل للبلكونة
الاب وصل اخيرا من برة كان معايا رقمه ومرضتش اتصل بيه قولت يعمل حادثة ولا حاجة بسبب اتصالي لاقدر الله
الشباب جزاهم الله خير بينضفوا الشقة
وطبعا الفرش كله اصبح رماد
ناس بتحول الرماد من البلكونة وناس في شارع بتعبيه على كارو
الحمد لله تجربة صعبة جدا بالرغم اني مش طرف فيها ويدوب متابعة من البلكونة فما بال اصحاب الشأن
ربنا يعافينا كلنا يارب

[bmya]

الحمد لله سليمه بس ياترى ايه السبب ماس كهربي ؟

[نور القمر]

محدش عارف
بس بعتقد انه ماس عشان بوكس كهربا العمارة المجاورة فرقع

[sherif_m72]

طب والمطافى مكانش ليها دور ولا جت وسلمت ومشيت؟

[aif]

محدش عارف
بس بعتقد انه ماس عشان بوكس كهربا العمارة المجاورة فرقع

ممكن يكون انفجار البوكس بتاع الكهرباء نتيجة الحريق وانصهار الاسلاك
كله ح يبان لما الامور تهدي ويتعرف سبب الحريق
الحمد لله على سلامتكم ....ربنا ستر .... الحمد لله ان الناس بخير .... وربنا يعوضهم خير في الخسائر
يظهر ان فعلا لازم يبقى فيه طفاية حريق في كل بيت ..... بتفرق كتير اوي اوي

[نور القمر]

طب والمطافى مكانش ليها دور ولا جت وسلمت ومشيت؟

لا طبعا المطافي دورها اساسي ووصلت في اقل من ربع ساعة وتقريبا واحد من رجال المطافي اصيب بشيء ما لاني شوفت زمايله مسندينه وخارجين بيه وهو ماسك دراعه
مساعدات الشباب يدوب ساهمت في انقاذ البشر بس
وبعد ربع ساعة المطافي اتصلت بيا عشان بعتو عربية تاني ومش عارفة الشارع

[نور القمر]

ممكن يكون انفجار البوكس بتاع الكهرباء نتيجة الحريق وانصهار الاسلاك
كله ح يبان لما الامور تهدي ويتعرف سبب الحريق
الحمد لله على سلامتكم ....ربنا ستر .... الحمد لله ان الناس بخير .... وربنا يعوضهم خير في الخسائر
يظهر ان فعلا لازم يبقى فيه طفاية حريق في كل بيت ..... بتفرق كتير اوي اوي

الله يسلمك يا حاج احمد
ايوة ضرورية جدا طبعا
بردو من سنتين تلاتة شقة اخته تحته ولعت بسبب ماس في مكواه سايبنها متوصلة بالكهربا
بس الحريقة دي اكلت غرفة واحدة ولحقوها

[Dr_Smart]

الحمدلله انها جت سليمه وماحدش حصله حاجه

الصيف اللي فات برضو حصل حريقه في الشقه اللي تحتنا على طول وساكن فيها واحده ست كبيره لوحدها بس الحمدلله ربنا ستر ان واحده في العماره اللي قدامنا شافت الدخان وقعدت تصوت لان كان الوقت متاخر والناس كلها نايمه

بس الحريقه كلت الريسبشن كله والمطبخ والنار انتشرت بسرعه كبيره جدا وكان فيه دخان اسود كثيف جدا عشان كان عندهم خشب كتير وزرع بلاستيك والدخان طبعا بيطلع لفوق فكنا هنتخنق ومش شايفين اي حاجه تماما ومش عارفين ننزل لغاية لما المطافي طلعو نزلونا .. وطبعا الحريقه اثرت على الشقه عندي البلكونه باظت والتند ساحت وازاز الالوميتال طق والتكييف اتحرق .. بس الحمدلله انها جت على قد كده

المطافي وصلت خلال 10 دقايق .. والنيابه عاينت تاني يوم وكان السبب ماس كهربائي نتيجة توصيل اجهزة كهربائيه كتير منهم تلاجه وديب فريزر على فيشه واحده

[maka]

ربنا يعافينا جميعا و يكفينا شر الحرائق

هو البوكس ده بتاع 40 سم * 40 سم و لا دولاب ؟؟؟

و فرقع ولع يعنى و لا عمل صوت ؟؟؟

[نور القمر]

ايوة موضوع توصيل اكتر من جهاز بمشترك رديء سبب مشاكل كتير
انا كنت موصلة غسالة الاطباق بمشترك رديء ومعاه التلاجة ومحطوط فوق الثلاجة ومش في بالي خالص ان الغسالة فيها سخان ومحتاجة مشترك محترم
شوية وداخلة المطبخ شامة ريحة بلاستيك بيتحرق ربنا الهمني فورا ابص على المشترك لقيته هو فعلا ساح وبيطلع شرارة والحمد لله ربنا ستر

[نور القمر]

ربنا يعافينا جميعا و يكفينا شر الحرائق

هو البوكس ده بتاع 40 سم * 40 سم و لا دولاب ؟؟؟

و فرقع ولع يعنى و لا عمل صوت ؟؟؟

ممكن يكون 40 *80 مش دولاب
فرقع صوت والغطا طار مع شرارة
ده من رحمة ربنا بيهم كمان ان معندهمش غاز طبيعي والحمد لله

[maka]

الحمد لله , و ربنا يحمى الجميع

المتهم الاول فى هذا الحدث هو مفاتيح الفصل الاتوماتيكية و ليس الماس الكهربى

المفاتيح دى دورها تفصل فى حاجتين الحمل الزائد عن قدرة المفتاح + فى حالة حدوث قفلة لا قدر الله

كون ان المفاتيح مفصلتش و ان القفلة تسمع لحد الكوفرية السفلى فهى كارثة

و كون انه يفصل بالطريقة دى - فاكيد الفيوزات اللى فيه متشعرة لتوفير تكلفة تغييرها - فدى الكارثة الاكبر

الكهرباء هى العدو اللذى لا تراه الاعين ........ ربنا يعافينا جميعا

[احمد المصرى]

الحمد لله ان ربنا ستر والحمد لله ان الناس احياء


الحمد لله وربنا يعفينا جميعا من الامتحان الصعب دا

[أبو إياد]

الحمد لله ان ربنا ستر عليهم وربنا يكون فى عونهم وينسيهم اليوم ده
انا لما العربيه اتقلبت بيا فضلت اكتر من سنه تعبان نفسيا من المنظر بس

[AmatoALLAH]

الحمد لله ربنا ستر