ويوم ما ابطل اشجع .......هكون ميت اكيد

[ابو ليلى]

من زمان وانا عندى 4 سنين لما كان بيكون فى ماتش للاهلى كنت الاقى والدتى
( بارك الله فيها ) منتبهه جدا للماتش مكنتش فاهم حاجه بفرح لفرحها وانا مش
عارف هى بتصرخ ليه ولا بتزعل ليه .
شوية القيها بتضحك وشويه بتعيط سواء كنا فايزين او مهزومين وانا مش فاهم ليه
ويوم ما الاهلى كان بيفوز كان بيكون فى البيت كله فرح وانا برضه فرحان لفرحهم .
ابديت اعرف انها حاجه كده اسمها كورة وناس كتير بتتفرج عليها باهتمام شديد
وبقى وقت ما يكون فى ماتش اقعد جنب امى اصرخ زيها وهى بتنادى على اللعيبة
.....يلى شوط بقى ....فاول ياحكم والله العظيم .....جوووووووووول ....
انط فى حضنها وانا فرحان.... بعد الماتش تقف على السلم تقعد تزغرط
وتغيظ خالى الزملكاوى اللى ساكن فى الدور اللى تحتينا ....

كل يوم بيمر فى عمرى والاهلى دايما شريك معايا سوء فرحان او زعلان
اتربيت على عشق للنادى الاهلى ومن وقتها بقيت من ضمن الناس دى اشجعه بدرجه الجنون
ولكن من غير تعصب ياما حضرت ماتشات فى القاهرة وبعضها خارجها .....

مش هنسى اول يوم دخلت فيه النادى الاهلى وانا عندى حوالى 12 سنة ومعايا ابن خالى
وبنلعب بالكورة فى ممر كده والاقى مين قدامى جى علينا ....محمود الخطيب ......
تنحت تماما وضحكة ذهول عليا ....بدون وعى رميت الكورة نحيته ...اخد الكورة وبدا ينططها على رجله
وانا واقف متسمر مكانى ....انا بحلم ولا فعلا حقيقى ...10
دقائق وبيلعب معانا وهو فرحان وبيضحك لينا.....
10دقائق بقلها فى الذاكرة 27 سنة مش راضيه تروح .

لما تكون فى الاستاد وتقف تشجع من قلبك بتنسى نفسك تلاقى جنيك ناس متعرفهمش بس بمجرد ما يجى جول نقوم نحضن فى بعض من غير معرفه مجرد فقط انه مشجع زيه زيك وفرحان زيك وتنسى نفسك تماما صريخ وتنطيط مع واحد اول مرة تشوفه يعزم عليك باكل ولا ميه كل ده علشان انت اهلاوى زيه .

وتمر الايام والواحد سنه بيكبر والحب كمان بيكبر بيتغير الاشخاص ولكن الحب للكيان
اى كان اللى بيمثله وبما انى ورثت العشق من امى ايضا ورثته لبناتى نفس المشاهد تتكرر .......
اب منتبه جدا لشى قدامه اسمه تلفزيون واشخاص بتجرى على شى مدور اسمه كورة
كانت ليلى بنتى بتتفرج على ردود افعالى وهى مش فاهمة ليه انا بصرخ وليه انا بضحك فى نفس الوقت ....
شويه اقف وشويه اطلع على الكنبة وشويه اسجد فى الارض ...
وهى بتتفرج عليا ومش فاهمة فى ايه ..كبرت وكبر جواها حب الاهلى ...
وقت الماتش القيها على حجرى زى القطه دافسه نفسها فى حضنى منتظرة شى واحد بس ........ان الاهلى يجيب جول ....علشان عارفه رد الفعل وفعلا .......جووووووول .....
اشيلها وارفعها لفوق واتنطط بيها وهى فرحانه

كان فى بعض الماتشات الكورة مش راضيه تدخل وانا صوتى جايب الشارع ..
القيها تقول ( ماهو علشان انا مش فى حضنك الاهلى مش هيجيب جول )
........اقلها تعالى ...اقسم بالله اقسم بالله ...
بمجرد ما كانت تيجى فى حضنى الجول يجيى ....تكون فرحانه اكتر منى لانها قدرت
تخلينى اضحك مش اكتر ..........
والايام تمر وبنتى التانية تشرف نفس الشى ومنذ الصغر تلاقينى انا واختها بالمنظر ده
كمان بقت زينا وقت اى ماتش طالعه بالعلم الصغير
وتجرى بيه قدمنا ووقت الجول بيكون فى فرح فى البيت والزغروطة بتكون منها
وانا شايلهم وبلف بيهم الشقة .......عرفو ان من ضمن اسباب السعادة فى البيت الاهلى
ووقت اى ماتش يجرو على الشباك ويفضلو يدعو ان الاهلى يفوز .
هكذا يا سادة اصبح الاهلى جزء من حياتى وحياة اطفالى .....

انا واطفالى فينا جزء صغير من الشباب اللى قتلو غدرا ونعتبرهم عند الله باذنه شهداء.....
اللى كل زنبهم انهم بيحبو هذا النادى منذ نشأتهم ...

تلاقى الواحد فيهم بياخد مصروف وبدل ما يروح يعمل بيه شى لنفسه يتجمع مع اصحابه فى الرابطة
علشان يشترو بيه اعلام ويجهزو للدخلة اللى هتكون فى الماتش ........
تخش اوضه اى واحد فيهم تلاقى بوسترات اللعيبة على الحيطان ....
هما صغيرين فى السن ولكن كبار بحبهم وانتمائهم .

ااااااااااااااااااااه نفسى تطلع باعلى صوت
اااااااااااااااااااااااااه بتطلع من كل اب وكل ام على ابنهم اللى مات غدر وهو لسه مشفش الدنيا
ااااااااااااااااااااااااااااااه بتطلع من كل مشجع بيعشق النادى وهو شايف اخواته بيتغدر بيهم ...

واخيرا موضوعى مش علشان اناقش هما ماتو ليه ومين السبب فى موتهم
كل الموضوع حبيت اعرفكم مين هما اللى ماتو .

ويوم ما ابطل اشجع .............هكون ميت اكيد

[ابو ليلى]

ده انس رحمه الله واسكنه فسيح جناته اصغر مشجع اهلاوى توفى فى الاحداث
ويصبر اهله ويلهمهم الصبر






ودول بناتى وقرة عينى وبرضه بيشجعو الاهلى

[A7MED_PHARMA]

مقدر حبك ياأبوليلى لحاجة إنت بتحبها
وربنا يغفر للشهداء.












.
ولو إن ليا رأي مختلف في نوادي الكرة في العموم

[Samah AbdAllah]

المصاب مصاب كل مصرى لا اهلاوى ولا زملكاوى
جوة كل واحد مننا الم وحزن واحساس قوى بالغضب
حب الكورة والاهلى وفرحة كل جون وحزن الهزيمة احساس كتير مننا عاشه وفهمه
لكى الله يا مصر

[totaman]

انا عن نفسى لا ليا فى الكورة ولا فى السياسة حتى بس بجد نفسيتى زفت من وضع البلد
ومش عارف احنا رايحين على فين

http://www.youtube.com/watch?feature=player_embedded&v=kjgC-S_Q2b0

[ابو ليلى]

المصاب مصاب كل مصرى لا اهلاوى ولا زملكاوى
جوة كل واحد مننا الم وحزن واحساس قوى بالغضب
حب الكورة والاهلى وفرحة كل جون وحزن الهزيمة احساس كتير مننا عاشه وفهمه
لكى الله يا مصر

انا معاكى ان كل الاضياف حزينة بس كلامى موجه فى الاساس لبعض الناس
اللى بيقولو ليه الشباب دى تبهدل نفسها علشان الكورة .

[ابو ليلى]

ده اب ابنه توفى فى الاحداث ...شوفو بيقول ايه .....تفتكرو الاب اللى يقول كده
ابنه اتربى ازاى فى عشقه للاهلى .

‫فيديو مؤثر لمحمد بركات‬‎ - YouTube

[medododo]

عجيب الشعب المصري ده والله
عملو مليون حاجة عشان يفرقوا بينه وبين بعضه
تكون النتيجة جماهير الزمالك والاسماعيلي و كل الفرق مش عايز انسى حد جوه النادي الاهلي بيعزوا وياخدوا العزا
الله يرحمهم ويوحدنا ديما يارب
بحبك يا بلادي

[mahmoudalaa]

ويوم ما ابطل اشجع ...هكون ميت اكيد

[aif]

الله يرحمهم ويغفر لهم ويجعل مثواهم الجنة
...
...
انا اساسا ضد الالتراس والتشجيع المتعصب وضد جو الشحن المبالغ فيه في كافة مجالات الكورة ونفسي يلغوها خالص لأنها خرجت من سياقها الطبيعي انها مجرد رياضة واصبحت شيء كريه يبث الفرقة والعصبية والاحتقان في كل ما حوله
.....
انا تعاطفي معاهم كبشر ..... ناس .... آدميين .....مصريين ..... مسلمين ومسيحيين .......... قتلوا غدرا دون حق
اما التشجيع واموت وانا باشجع والكلام ده .............. انا ضده تماما

[احمد المصرى]

انبارح فى برنامج شوبير كان جايب اب ابنه توفى بجد ربنا يصبره حاجه فعلا محزنه بجد لاقصى درجه بس ان شاء الله الموضوع دا هيخلى الشعب يقرب من بعضه اكتر من كدا بكتير واستحاله مصر هضيع واستحاله هنكون سبب فى ضياع مصر

[human]

الله يرحمهم ويغفر لهم ويجعل مثواهم الجنة
...
...
انا اساسا ضد الالتراس والتشجيع المتعصب وضد جو الشحن المبالغ فيه في كافة مجالات الكورة ونفسي يلغوها خالص لأنها خرجت من سياقها الطبيعي انها مجرد رياضة واصبحت شيء كريه يبث الفرقة والعصبية والاحتقان في كل ما حوله
.....
انا تعاطفي معاهم كبشر ..... ناس .... آدميين .....مصريين ..... مسلمين ومسيحيين .......... قتلوا غدرا دون حق
اما التشجيع واموت وانا باشجع والكلام ده .............. انا ضده تماما

1- ممكن اسأل سؤال ؟؟

هو الباشمهندس والد انس كان بيفكر ازاى و هو بيوديه ماتش فى بورسعيد فى وقت زى ده؟
يعنى اى واحد عارف ان الوضع زباله و مش مستقر و الناس عماله تطالب بالتهدئه و السنه اللى فاتت كان وضع مزرى برضه

عايز اعرف ايه اللى يخليه يودى طفل زى ده هناك؟؟؟؟ مش قادر افهمها



2- ازاى حد يودى ولاده البنات ماتش كوره و يسمعوا اقذع الالفاظ ... انا نفسى اودى ولادى و مش قادر عشان الالفاظ اللى هتبقى فى كل حتى

[ابو ليلى]

الله يرحمهم ويغفر لهم ويجعل مثواهم الجنة
...
...
انا اساسا ضد الالتراس والتشجيع المتعصب وضد جو الشحن المبالغ فيه في كافة مجالات الكورة ونفسي يلغوها خالص لأنها خرجت من سياقها الطبيعي انها مجرد رياضة واصبحت شيء كريه يبث الفرقة والعصبية والاحتقان في كل ما حوله
.....
انا تعاطفي معاهم كبشر ..... ناس .... آدميين .....مصريين ..... مسلمين ومسيحيين .......... قتلوا غدرا دون حق
اما التشجيع واموت وانا باشجع والكلام ده .............. انا ضده تماما

ازيك ياعمدة ويارب تكون بخير
انا شخصيا ضد التعصب تماما فى اى شى مش الرياضة بس
الجملة المقصودة المعنى منها انى لو مشجعتش فرقتى اكيد مش هكون موجود
انما انا طول ما موجود فى الدنيا هشجعها ........

1- ممكن اسأل سؤال ؟؟

هو الباشمهندس والد انس كان بيفكر ازاى و هو بيوديه ماتش فى بورسعيد فى وقت زى ده؟
يعنى اى واحد عارف ان الوضع زباله و مش مستقر و الناس عماله تطالب بالتهدئه و السنه اللى فاتت كان وضع مزرى برضه

عايز اعرف ايه اللى يخليه يودى طفل زى ده هناك؟؟؟؟ مش قادر افهمها



2- ازاى حد يودى ولاده البنات ماتش كوره و يسمعوا اقذع الالفاظ ... انا نفسى اودى ولادى و مش قادر عشان الالفاظ اللى هتبقى فى كل حتى

انا عملت الموضوع من الزوية دى بالتحديد للرد على سؤالك الاول واعرف عنك انك متابع كورة واكيد هتفهم انا اقصد ايه من الموضوع .

يوم الماتش ده كان الاهلى بيلعب فى بطولة افريقيا واكيد زى ما انت قلت مش هاخدهم معايا وانا عارف ان ممكن يسمعو اى لفظ خارج والحمد لله زى ما توقعت مكنش فيه اى الفاظ فى الماتش .

[aif]

الله يبارك فيك ويعزك يا ابو ليلى
اعتقد ان اللي حصل في بورسعيد ح يكون علامة فارقة في تاريخ الكورة والتشجيع في مصر
ده لو كنا اساسا عاوزين نتعلم
المفروض اي حد بيشجع كورة ويتعصب لفريق ....... يفوق ويراجع نفسه ويقتنع انها مجرد رياضة
اللي بيقولك الزمالك ده وطن في دمي
واللي يقول الاهلي فوق الجميع
والاتحاد سيد البلد
الخ .... الخ
...
باقولوهم كلهم
حرام عليكم ح تحرقو بلدنا بجهلكم وتعصبكم
انتو قنبلة موقوتة ....... اللي عاوز يدمر البلد كل اللي عليه ..... انه يشعلها ويقعد يتفرج
...
ياريت كل واحد يربي اولاده بمفهوم مختلف عن الكورة ....... انها زي الجمباز وزي العاب القوى وزي اي رياضة تانية ......
انا بنفسي قاري قبل الكارثة بايام قليلة
(بيقولك ان ح نعمل هدنة مع جماهير المنافس عشان الماتش يعدي .... لكن ..... لا يجوز ان يكون مشجع الالتراس من الفريق الآخر صديق لك .... ده ضد مبادئ الالتراس .....) الله يخرب بيت دي مبادئ هدامة مدمرة
الله يخرب بيت الألتراس وبيت اللي جابهم مصر ..... بعد مافشلو في اوربا بسبعين سنة بيعملوها في الدول المتخلفة لكي تزداد تخلفا
حسبنا الله ونعم الوكيل

[ابو ليلى]

متفق مع بعض من كلامك يا عمدة لان التعصب عموما فى اى شى لاازم يكون وره كارثة
وللاسف وزى العادة احنا مش بنفوق غير لما تحصل
رحم الله المتوفين ويصبر اسرتهم