إدارة منتدي نايل موتورز المحترمين

[inspiron]

كرهت المنتدي والإدارة بتاعته بسبب تعاملهم الميري ده..الموضوع بإختصار من حوالي شهر تعرضت لضائقة مالية شديدة.وأنا من النوع اللي مبحبش أرمي بلايا علي حد.يعني معرفتش أهلي بظروفي.وكنت شاري من محل i2 موبايلات جديدة ليا ولاخواتي.ولما تعرضت للضائقة المالية دي هما قالولي بيعها زي ما هي بقفلتها كده وربنا يعوضنا بالأحسن إن شاء الله..فعملت إعلان هنا في المنتدي المحترم..وفجأة ألاقي وقف من البيه المحترم مشرف قسم البيع والشراء.علي أساس إني عامل إعلان تجاري.يعني سعادته من وحي تصوره إن أنا تاجر موبايلات وعندي محل وبلقط رزقي.وتم وقفي شهر بناءا علي قرار معاليه....
مع إن أنا مشرف موارد بشرية في احدي الشركات الكبري و مجند في الجيش..يعني لا تاجر موبايلات ولا نيلة..
دلوقتي أنا مش عاوز أعدي الموقف ده كده.يعني عاوز أصعد الموضوع بحيث أسلوب الديكتاتورية في التعامل ده ميستمرش كتير لأنه زاد عن حده وده مش أول موقف.وعاوز أوصل صوتي للإدارة..إما تعملوا مشرفين بدرجة مناسبة من الوعي أثناء إتخاذ القرار..أو تلغوا المشرفين والإدارة العليا بنفسها تشرف علي المواضيع وتتفهم الموقف قبل إتخاذ أي إجراء..
وأنا عارف إن بعد الموضوع اللي أنا كاتبه ده هيتم واقفي مرة أخري..بس معادتش تفرق لأني تضررت بالفعل من وقفي الشهر ده.

[mailo]

حمد الله عالسلامة الاول

ثانيًا المفروض تعمل الموضوع ده ف لجنة الاقتراحات والشكاوي تقريبا مش هنا

[Ghosts]

قبل ما يتقفل الموضوع و يكتبوا علية منقول ....
أحب أحييك على جرأتك ....

[DreAmO]

ان شاء الله خير

وانت لو مكان المشرف كنت هتعمل اللي عمله ويمكن اكتر

وعموماً الفيصل بينكم قوانين المنتدى .. والتقدير الانساني

بالتوفيق

[kar!m]

حمدا لله على سلامتك .. و كنت ممكن فى فترة الوقف دى تخلى أى حد يكلم حد من الاداره عشان يفهمه الموضوع.

[wa7d]

بصراحة المفروض يكون فيه انذار قبل الوقف , وبعد كدا يتم الوقف اسبوع مش يتم الوقف بالشهور , ياريت بجد يكون فيه تقييم للموقف , مش وقف علي طول .
انا معاك فى كلامك ومؤيد ليه , وياريت الادارة تشوف حل للموضوع دا , بلاش وقف علي طول الا لو اتكررت نفس المخالفة ويكون الوقف اسبوع مش بالشهور

[مراقب المنتدى]

سياده العضو الفاضل :
هناك ايميل مخصص لتلقي شكاوي الاعضاء ويتم اعاده بحث العقوبه بعد ارسال الشكوي اذا كان هناك ما يستدعي التعديل فيها
وبخصوص وقفك فهذا نص الاعلان اللذي تم وقفك بسببه

السلام عليكم..يوجد إن شاء الله للبيع الآتي :-

3 قطع نوكيا c7 السعر المطلوب (2200 جنيه للقطعة ) - سعر السوق 2400 جنيه

4 قطع نوكيا e5 السعر المطلوب (1300 جنيه للقطعة ) - سعر السوق 1400 جنيه

نوكيا e7 السعر المطلوب 3400 جنيه - سعر السوق 3600 جنيه

نوكيا e6 السعر المطلوب 2200 جنيه - سعر السوق 2400 جنيه

جميع العدد جديدة زيرو لم تنزع من الكرتونة بجميع المشتملات ضمان i2

للتواصل يرجي الإتصال علي ........*أحمد مجدي.
الله المستعان

حيث انك تقوم ببيع عدد 9 اجهزه تليفون محمول
وهذه عينه من موضوعاتك
وعمليات البيع المتكرره اللتي تقوم بها علي صفحات المنتدي
bmw 523i for sale ( 123 ... الصفحة الأخيرة)

للبيع سيارة مرسيدس

للبيع سيارة e39 ( 12 )
للبيع بمدينة 6 أكتوبر

للبيع نوكيا c6 زيرو لم يستخدم.

.................................................. .................................................. ....*

بصراحة المفروض يكون فيه انذار قبل الوقف , وبعد كدا يتم الوقف اسبوع مش يتم الوقف بالشهور , ياريت بجد يكون فيه تقييم للموقف , مش وقف علي طول .
انا معاك فى كلامك ومؤيد ليه , وياريت الادارة تشوف حل للموضوع دا , بلاش وقف علي طول الا لو اتكررت نفس المخالفة ويكون الوقف اسبوع مش بالشهور

الوقف تم تعديله منذ عده اشهر فعليا واصبح اسبوع لكل مخالفه عوضا عن النظام السابق التراكمي للوقف نظرا لعدد النقاط
ما عدا الاعلانات التجاريه يتم الوقف فيها لمده شهر

برجاء من جميع الاعضاء متابعه قواعد وقوانين المنتدي
قبل الشكوي من الوقف واتهام المشرفين بما ليس فيهم
.................................................. ..............................................
تم غلق الموضوع تمهيدا لحذفه
وجاري بحث العقوبه المناسبه

[Karim_Monir]

تصدق انا داخل اقرا الموضوع الموجه للادارة ومتعاطف معاك جدا وناوي اتخذ اجراء صارم ضد المشرف
لكن بصراحة بعد رد مراقب المنتدى عليك مش لاقي رد اقوله
ويا ريت الاعضاء اللي بتزايد من غير ما تسمع رد الطرف الاخر نسمع الاول راي قوانين المكان اللي بتحكمنا
مش مجرد اعتراض وخلاص

تنبيه للاشراف بعدم اتخاذ اي عقوبات اضافية وينقل الموضوع لمكانة المخصص فقط