تعمل ايه في الموقف ده؟؟!!

[dr.hazem]

ازيكو يا جماعة

حاجه مستفزة جدا


تيجي تركب عربيتك تلاقي اللي جه وركن جنبك زانق عربيته جنبك بحيث انك متقدرش تفتح بابك عشان تركب


بغض النظر عن اي حاجه وايه اللي خلاه يركن كده خصوصا لو كان عنده مجال لكن هو برضه ركن كده
وبغض النظر ان كنت رشيق او كنت من اصحاب الاحجام العائلية (زيي)

بتعمل ايه؟؟؟؟

هل بتركب من الباب التاني اللي جنب السواق؟؟؟

هل بتستنى الباشا لحد اما ييجي عشان يوسعلك ونديله كلمتين في جنابه؟؟

هل ممكن من الباب التاني تنزل الهاند وتزق العربية لورا لحد اما تعرف تفتح الباب وتركن؟؟

هل بتحاول تركب من الباب بتاعك وتخبط عربية الباشا قد ما تقدر بحجة انك بتركب وان هوا اللي زنقك؟؟؟
هل هل هل ...

كل واحد يقولنا بيعمل ايه في الموقف ده...


تحياتي للجميع

[ainshouka]

غالبا اللى بيعمل كده مبيبقاش قاصد
ولما جه ركن مركزش فى اللى جنبه حيعمل ايه
وممكن يكون داخ على ركنة فلما لقاها قام راشق فيها من غير ميبص للى حواليه

المفروض الموضوع دا يكون فيه ذوق واحساس شوية بس فى زحمة الدنيا والبلد مظنش حد حياخد باله منها

فبحاول اشوف اى حل ممكن بس بعيد انى اخبطله العربية بالباب

[aly_hosny]

بدخل من الباب التاني
ولو المكان فاصي عموما بنزل الهاند و ارجع العربية لورا

[shaddadfalcon1]

ولا حاجه لو اعرف اركب من ورا او من اي حته هركب وخلاص
ده انا ساعات بدوخ علي ركنه وملاقيش غير ركنه هتخلي اللي جنبي ميعرفش يفتح الباب ومش برضي اركن فيها ولو ركنت بنزل كل شويه اشوف في مكان ولا لآ ولو ملقتش بانزل بدري عشان انقلها من مكانها

[dr.hazem]

شاكر لكل ردودكم

انا بالنسبالي ولا يمكن اصلا اركن في مكان لو هقفل على اللي جنبي ومش هيعرف يركن

ممكن لو الشارع يستحمل انزل الهاند وازقها واركب
مبدئيا انا مش هعرف اركب من اي باب تاني لان حجمي ولياقتي ميسمحوليش

والحقيقه الموضوع بيستفزني جدا لاني فعلا مش هعرف اطلع العربية

واكيد مش هعذر اي حد ان شالله يكون لافف ساعه كامله وملقاش غير المكان ده راح راشق فيه ومخدش باله
ده مش عذر
ده عذر اقبح من ذنب

بالنسبالي عالاقل....

تحياتي

[Amro_ON]

انا لازم اتاكد مليون في الميه ان الي جنبي هيفتح بابه مستريح ...عشان ببساطه ميجرحليش بابي اما يجي يركب ... ولو لقيت واحد قفل عليا عادي هجرب اخش من الباب التاني

[mohammedabdallh]

بركب من الباب التانى
ولو ملقتشى حته اركن فيها بركن جنب العربيه الشمال واسيب مكان فاضى من جانب الباب اليمين وانزل من الباب اليمين

[sarah5]

من الباب التاني للاسف بس ببقي متغاظة من نفسي عشان مفتحتش الباب اللي زنقه وخبطت عربيته بس الضمير بقي الحمدلله لو هو غلط احنا نعمل الصح السؤال بقي لو عربيتين زنقو البابين هنعمل ايه؟؟؟ :-(

[nazekbakr]

اتصرف واركب وخلاص من ورا من اليمين من اي مكان اما بقي لو مافيش مجال يبقي عليك وعلي 122 يبعت ونش المرور يشيلها وخلاص بس ده اخر حل لو انتظرت صاحبها ساعة واكتر ومجاش وخلاص اتخننقت يعني

[A7MED_PHARMA]

انا لو إضطريت أركن مزنوق.. لازم أزنق نفسي أنا .. ومازنقش باب السواق إلي هركن جمبه

إحترام أولا للناس
ثانيا
ماتعرفش رد فعله هيكون إيه .. ممكن ييجي يلاقي معاليك قافل عليه.. يطلع مصري زي الكتاب مابيقول
ويكتبلك كلام جميل على كبوت عربيتك.. بمسمار قلاووظ