حد بيفهم فى الكلاب البلدى

[Dr_Mido]

اة البلدى ومحدش يستغرب الموضوع مافيه ان فى كلبه بلدى طلعت العمارة عندنا من يومين تلاته كدة هربا من البرد وقعدت فى اخر دور ودة مش مسكون وولدت و محدش من السكان جه ناحيتها الجو برة تلاجه

المهم فى عيل ابن #$%#$%#$%ضرب الكلبه الكبيرة من ساعه كدة وانا نايم حاليا فى 3 جراء بيعو او بينونو مش متاكد من الصوت بس بجد جابولى اكتئاب وحزنونى من غير مناسبه فى ايه ااقدر اعمله للابشوات دول لانهم نزلو الدور عندى وبيعيطو جنب باب الشقه وهيخلونى اعيط انا كمان

[heshamzaky]

حط لهم مية و اكل
حرام دول محتاجين رضاعة و لو بردو حا يموتو
ممكن تحط لهم اى قطعة قماش قديمة ينامو عليها
و لو فية شوية لبن و عيش حتى اعملهم فتة بالعيش و اللبن حا ياكلوها
بس المهم عمرهم اد اية باتقريب
و على فكرة امهم مليون فى المية حا ترجع تانى

[mahmoudalaa]

لبن دافي مش سخن و فية حتت عيش فينو صغيرة بس مش عارف سنهم ايه يقدرو ياكلو لوحده ولا لازم حد ياكله لان ممكن تحطلهم الاكل و ميعرفوش ياكلو لوحدهم و مظنش ان في حرج انهم موجودين في البيت لانك بتساعدهم لحد ما تيجي امهم و يقدرو يعتمدوا علي نفسهم وده ان شاء الله ثواب كبير لك

[windofchange]

هي امهم ماتت ولا ايه؟ في جروبس عالفيس بوك انا مشترك فيها بها دكاترة بيطرين هيفيدوك وافادة هشام بك جميلة برضه ممكن تضيفني وتشوف الجروبس اللي انا مشترك فيها وتدخل تحط سؤاللك لمزيد من الافادة

[Dr_Mido]

حط لهم مية و اكل
حرام دول محتاجين رضاعة و لو بردو حا يموتو
ممكن تحط لهم اى قطعة قماش قديمة ينامو عليها
و لو فية شوية لبن و عيش حتى اعملهم فتة بالعيش و اللبن حا ياكلوها
بس المهم عمرهم اد اية باتقريب
و على فكرة امهم مليون فى المية حا ترجع تانى

بناء على هذة النصيحه الجميله حطيت لهم اكل وميه لا شربو ولا كلو ولا كانو بيعرفو يقفو اساسا

خدتهم فى كرتونه ونزلتهم الشارع 5 دقايق وامهم جت وعادو لقواعدهم سالمين

[Dr_Mido]

لبن دافي مش سخن و فية حتت عيش فينو صغيرة بس مش عارف سنهم ايه يقدرو ياكلو لوحده ولا لازم حد ياكله لان ممكن تحطلهم الاكل و ميعرفوش ياكلو لوحدهم و مظنش ان في حرج انهم موجودين في البيت لانك بتساعدهم لحد ما تيجي امهم و يقدرو يعتمدوا علي نفسهم وده ان شاء الله ثواب كبير لك

متشكر على النصيحه ب معرفوش ياكلو انا نزلتهم ليها فى الشارع تحت

[mahmoudalaa]

تمام كده ان شاء الله لك ثواب كبير عند ربنا

[Dr_Mido]

هي امهم ماتت ولا ايه؟ في جروبس عالفيس بوك انا مشترك فيها بها دكاترة بيطرين هيفيدوك وافادة هشام بك جميلة برضه ممكن تضيفني وتشوف الجروبس اللي انا مشترك فيها وتدخل تحط سؤاللك لمزيد من الافادة

متشكر ياباشا على النصيحه جيت اعمل ادد لحضرتك بس عندى مشكله فى الفيس بيدينى ايرور لايمكن اتمام هذة العمليه الان


بعتلك لحضرتك ايميلى فى الرساله تضيفنى انت

[Karim_Mohy]

ربنا يجازيك خير

[windofchange]

متشكر على النصيحه ب معرفوش ياكلو انا نزلتهم ليها فى الشارع تحت

متهيألي كنت تستني هي تطلعلهم احسن لأنها ولدت فوق عندكم فالبيت عشان حسيت بالامان بعيد عن اولاد الشارع اللي بيضربوها وممكن يموتوها(قطتي يوم ماولدت وانا نايم عالكنبة كانت بتدفس نفسها من تحت التي شيرت عايزة تخش جوه دخلت نمت فاوضتي صحيت لقيتها خلفت عند رجللي تحت اللحاف)

[heshamzaky]

العفو يا باشا و ربنا يجازيك خير
طالما مش بيقفو على رجليهم يبقى عمرهم اقل من 10 ايام تقريبا و حا تلاقى الكلب ودانة مطبقة على راسة دة كدة يبقى اقل من ال 10 ايام بالتقريب لو اسبوعين حا يمشو على رجلهم
و لو كانو فى العمر بتاع ال 10 ايام فعلا مش حا ياكلو و لو اكلو حا يحصل لهم تلبك معوى
الى ينفع لبن بس و دة حا يبقى صعب لانة حا يشرب ب ببرونة و صعب شوية تتعامل معهم لانك ما ربتش كلب قبل كدة لانة ممكن يشرق بجد و الله ممكن يشرق و انت بترضعة من الببرونة ههههههههههههههه

[mastr_n]

ان شاء اللة يكونوا سبب فى دخولك الجنة

[kameluo]

ان شاء الله يكونوا سبب فى دخولك الجنة

ده احتمال كبير ان شاء الله

[Amr Axel]

بص يا باشا انا ربيت كلاب بلدي في الشارع كتيير و طول عمري بدرب كلاب هههههه غاوي بقي

جيبلهم حتة قماشة يقعدوا عليها لأن الكلب بيدفي بطنه
ثانيا حاول تحوط عليها بحتة كارتونة او خشبة بحيث مينزلوش و حطلهم لبن و جيبه عند بوقهم من المفترض انهم يرضعوا فحاول تشربيهم حوار العيش و التسقية مش دلوقتي لما يتم شهرين ع الاقل
بس البس كيس بلاستيك في ايديك او جوانتي زي بتاع حارس المرمي متتعاملش ابدا بايديك مباشرة مع اي حيوان حتي لو مربيه في البيت
لغاية ما امهم ترجع لو كبروا و امهم مرجعتش حاول تحطهم عند اي كلب او مجموعة كلاب في المنطقة يربوهم