بتعمل اية وانتا مدير ؟؟؟؟

[rockana9112007]

اخوانى الاعزاء السلام عليكم ورحمة الله وبركاتة

عندى مشكلة ومحتاج اسمع خلاصة تجاربكم فى الموضوع دة لانى فعلاا محتار وحاسس انى فاشل فى النقطة دى

المشكلة ببساطة هى ان طول عمرى وانا شغال كنت ببقى اخر واحد فى سلم العمل

يعنى انا ليا مديرينى حسب التسلسل بس مكنش ليا مرؤوسين يمكن زملاء بس مليش سلطة عليهم قوى

والحمد لله انا منضبط فى الشغل ومش اسلوبى انى اكون مشاغب او مشاكس والشغل اللى عليا بحاول اعملة بكل جد

المهم انى من سنتين كدة بقى ليا مرؤوسين وبقيت مشرف عليهم

وبقت شغلتى مش انى اشتغل اد ما اخليهم يشتغلو وابلغهم بالاوامر والتعليمات واسلمهم اوردرات الشغل واتابع معاهم لو فى مشاكل ظهرت احلها وكدة

طبعا انا فى الاول كنت مؤمن اننا كلنا ولاد تسعة وان دة شغل واحنا بنيجى الشغل عشان نعمل اللى علينا وكل واحد لة دور بيأدية او يعنى المفروض يأدية بكل اخلاص بدون ضغائن شخصية وكدة

وطبعاا انا لاعمرى اترسمت على حد او عشت دور المتسلط وكدة بس لاحظت الاتى

انا مديرى العكس تماما ومعندوش حاجة اسمها رحمة حتى لو بتموت اشتغل وخلص اللى عليك وبعدين مووت وبعدين بيكلف الناس بشغل كتير جدااا جدااا جدااا وكل ماتنهى اللى عليك يكلفك بشغل تانى لدرجة ان محدش بيعمر معاة ودايمااا الكل بيطفش من تحت ادية

لاحظت الاتى ان الناس دايما بتدلع عليا وبيتعمدو انهم يكونو مشاكسين ومحدش بيريحنى او يقولى حاضر واساتذة انهم يخلقولى مشاكل من تحت الارض حتى لو مش حقيقية لمجرد انهم يخلونى افقد اعصابى وابتدى اغلط فيهم

ولو اشتغلم بيساومونى بمعنى لو مطلوب من شخص ما اربع اوردرات فى اليوم وطبعاا انا ببلغة بشغلة يقولى لا والله اصلى تعبان ومش قادر ومش عارف اية بيوجعنى وابنى هودية المستشفى ومراتى غضبانة وبتنا جرالة اية المهم اى حجة وخلاص والله اعلم لو كان صادق او كاذب لكن فى الكثير منهم كاذب او لدية ظروف ممكن يستحملها وليست طارئة

المهم انة يوصل معايا انة مش هيعمل غير اوردرين بالعافية وعشان خاطرى وبكرة هيعوض الشغل وييجى بكرة والاقى نفس الموال


طبعاا ابلغ مديرى الاقى الشخص اللى كان مغلبنى اتعدل ومديرى شغلة شغل اكتر من اللى كنت هشغلهولة ومفتحش بقة بأى شكاوى او حجج وشغال من سكات

لية بقى
لانهم عارفين انة مش هيسكت لو مشتغلوش ونفذو اللى فى دماغة بحذافيرة
وعارفين انه مش هيتردد فى الاذية حتى لو وصلت للرفد ومبيبكيش على حد
وعارفين انة عندى جداااا ولازم كلامة يتنفذ صح او غلط ولذا محدش بيناقشة وبيعملو اللى هو عاوزة عشان يخلصو

عندة مقولة مشهورة ودايما بيقولها ...ان لو 364 يوم فى السنة موت نفسك فى الشغل وجيت يوم واحد بس مشتغلتش هو هينسى اللى عملتة طول السنة وهيحاسبك على اليوم اللى انتا قصرت فية



الموضوع اللى عاوز اطرحة

هل مديرى دة اسلوب ادارتة صح ولا ممكن نطبق اساليب الادارة الحديثة اللى اتعلمناها فى الكلية زى الادارة بالمشاركة او التفويض او الادارة بالحوافز

ولا فعلا جو العمل فى مصر والموظف المصرى مبيحترمش الا الديكتاتورية والتسلط

ياريت تشاركونى من واقع خبراتكم العملية فى الحياة

[shaddadfalcon1]

طالما الناس مش بيجي معاها غير كده يبقي اسلوبه صح جدا
وانت المفروض تبقي لا وحش قوي ولا لين قوي يعني كل واحد يخلص الشغل اللي المفروض يخلصه ولو عنده ظروف يبقي ياخد اجازه يخلصها

شغلتك انك تتاكد ان الشغل يخلص ولو واحد فيها قصر انت اللي هتنضر مش هما لانهم بالمنظر ده هيقولو هو اللي ادانا شغل قليل

جرب تنشف عليهم شويه وتبين ان اي حاجه هتقولها هتتسمع

[Ahmed_Rahem]

انا بقالى مدير حوالى 5 سنوات وقبل كدة كان فية دايماً فريق عمل تحت ايدى،
اسلوبى فى الادارة انا بحط الهدف والوقت المقدر لية وهو مسئول انة يخلصة فى الوقت دة، لو واحد عندة ظروف طالما مقليش قبليها بيوم ولا اكنها موجودة إلا لو واحد ثقة فى صدقة - ودول قليل،
فى توزيع المكافأت الى بيشتغل اكتر بياخد اكتر من الباقى والى بيشتغل جمعة بديلة يوم بدالة زى لايحة الشغل ولو اشتغل سبت بحسبها بردة - زيادة عن لايحة الشغل.
العقاب زعيق وتهزئ من غير شتيمة، غير انة بيتركن وملوش مكافأت ولا حاجة.

الفيصل مينفعش تكون لين على الاخر ولا شديد على الاخر لازم تكون شوية لين وشوية شديد، الافضل اختار اكتر واحد لمض او كسول واطلب منة شغل ويرفض او يتمارض واعملة خصم فى ساعتها هتلاقى الدنيا اختلفت.
وطالما مديرك دة اسلوبة مش هيناقشك بل بالعكس ممكن يديك دعم.
الرسالة الى مفروض توصل الشغل الى انا بدية على قد قدرات كل واحد - والى انا عارفها كويس - وبالتالى الى هيكسل لية عقاب والى هيدى لية مكافأة.

والسلام ختام

[rockana9112007]

بصراحة انا معاكم ان عندكم حق فى كل اللى بتقولوة لان فعلااا فى ناس مبتعرفش الا لغة القوة

وبدام فلان مبيأذييش فيبقى لاخوف منة

بس انا كان فى الاول كنت عاوز استخدم اسلوب التشجيع والتحفيز والمشاركة فى المسؤلية والحاجات دى اللى كنا بندرسها فى الكلية لانى بجد والله مبحبش البس الوش الخشب واقعد ازعق او ادى جزاءات وخصم

لانى بصراحة مكنتش احب انى اكون مكروة

بس اللى لفت نظرى ان الناس دى على قد مابتكرة مديرى كرة العما وكل يوم بتتمنا ان تجيلو مصيبة تخدة وفى احاديثهم الخاصة بيقعدو يدعو علية وبيتمنو فعلاا انة يروح فى ستين داهية

بس لما تيجى تسألهم مين انجح مدير متوقع يكون لية مستقبل باهر فيما بعد ويعتبر اكفأ واحد فى الشغل ضمن مديرين الشركة كلها .......................يكون ردهم هوا الشخص دة

وعجبى

[Moustafa.yonis]

ربنا يعينك

[Sherifmt]

نصيحه لوجه الله من زميل أشتغل مع 38 جنسية مختلفة زي ما بتكلمهم وتشجعهم لازم كمان عقاب رادع في حالة الغلط من غير وش خشب ولا تهزيق ولا تكشير كل اللي بيني وبينهم أحترام وشغل مع شوية مرونة عند اللزوم ممكن نضحك مس من غير تهريج وهبل وكلة بحدود والكلمة واحدة علي الكل ولا معرفة ولا واسطة واللي يشوف نفسة يتحط في حجمة من اول يوم بون احزاب ولا تحيز ومفيش عندي حد مفضل اقل واحد يعرف يعمل كل حاجة واللي يغيب بدون أذن بيمضي علي الجزا قبل ما يشتغل تاني يوم بعد مايخد درس في أداب العمل زي الكتاب مابيقول وبيخرج من منافسة الموظف المثالي 3 شهور واللي يشتغل ساعة زيادة وبزمة بديلة غيرها ساعتين وهكذا ...... وانسي انك تكون محبوب من الكل افتكر انت مش ملاك ومش بتتعامل مع ملايكة يعني كل واحد ونفسيتة وتاني طول ما هما بيخدو حقهم الشغل كمان ياخد حقة والاحترام المتبادل أساسي للثقة فيك يعني هما يعرفو انك حقاني ومش بتاع مصلحة من اي واحد فيهم وبخبرتك علمهم مش بس الشغل الكويس يكون أزاي لأ علمهم كمان الفريق الكويس يتعامل مع بعضه أزاي ويحترمو بعض ازاي وبالتالي هيحترموك ويطيعوك مش بس علشان مدير لكن زعيم وهما يرتاحو وانت ترتاح وتكون جاهز للترقية الجديدة........تحياتي من مكة :)

[Khaled_Nowaihy]

متهيأ لى ان حضرتك خليتهم (عفواً) ياخدوا عليك ...
لازم تحط حدود بينك وبينهم وتفرق بين التعامل الشخصى والتعامل معهم كمدير
ولاحظ حاجة تانية مهمة ... كده مديرك عرف انك مش حازم معاهم
أهم سلاح معاك هو الثواب والعقاب
أنا كنت اشتغلت مع مدير مخضرم كان بيشرح لى فلسفة تعامله مع المرؤوسين قال لى انه عامل زى اللى ماسك كرباج أطرقع لهم بيه فى الهوا ... بس ما أضربهمش بيه ... يقصد التلويح بالعقاب ... انما اذا حكمت يضربه
والثواب طبعاً أمره سهل

[Khaled_Nowaihy]

نصيحه لوجه الله من زميل أشتغل مع 38 جنسية مختلفة زي ما بتكلمهم وتشجعهم لازم كمان عقاب رادع في حالة الغلط من غير وش خشب ولا تهزيق ولا تكشير كل اللي بيني وبينهم أحترام وشغل مع شوية مرونة عند اللزوم ممكن نضحك مس من غير تهريج وهبل وكلة بحدود والكلمة واحدة علي الكل ولا معرفة ولا واسطة واللي يشوف نفسة يتحط في حجمة من اول يوم بون احزاب ولا تحيز ومفيش عندي حد مفضل اقل واحد يعرف يعمل كل حاجة واللي يغيب بدون أذن بيمضي علي الجزا قبل ما يشتغل تاني يوم بعد مايخد درس في أداب العمل زي الكتاب مابيقول وبيخرج من منافسة الموظف المثالي 3 شهور واللي يشتغل ساعة زيادة وبزمة بديلة غيرها ساعتين وهكذا ...... وانسي انك تكون محبوب من الكل افتكر انت مش ملاك ومش بتتعامل مع ملايكة يعني كل واحد ونفسيتة وتاني طول ما هما بيخدو حقهم الشغل كمان ياخد حقة والاحترام المتبادل أساسي للثقة فيك يعني هما يعرفو انك حقاني ومش بتاع مصلحة من اي واحد فيهم وبخبرتك علمهم مش بس الشغل الكويس يكون أزاي لأ علمهم كمان الفريق الكويس يتعامل مع بعضه أزاي ويحترمو بعض ازاي وبالتالي هيحترموك ويطيعوك مش بس علشان مدير لكن زعيم وهما يرتاحو وانت ترتاح وتكون جاهز للترقية الجديدة........تحياتي من مكة :)

+1111111

[rockana9112007]

متشكر ياجماعة جدااااا على مشاركاتكم

شكرااااااااااااااااا جزيلااااااااااااااااااااا