ايه رأيكم يا شباب فى مشروع محل لبيع الأحذية الرياضية ( الكوتشيات) ؟؟؟

[a7m00dy]

السلام عليكم ورحمة الله وبركاته
ازيكم يا شباب عاملين ايه ؟؟
يارب تكونوا جميعا فى احسن حال

طبعا انتو عارفين حال البلد عامل ازاى فى مصر .. عشان كده معظم الشباب بتحاول تعمل مشاريع حتى لو صغيرة
وانا فيه واحد صاحبى كان استشارنى فى الموضوع ده .. فقلت آخد رأيكم يمكن أفيده لأنى مش فاهم فيه ..
هو عايز يفتح محل لبيع الأحذية الرياضية او الكوتشيات
سواء بقى كوتشيات للشباب او البنات او الاطفال ..
والكوتشيات العادية و الكونفيرس والكوتشيات الصينى دى
وهو عنده مكان نسبيا موقعه كويس هنا .. فيا ترى ايه رأيكم ؟؟
ياريت لو حد يرد عليا من اخواننا التجار او اصحاب الخبرة وجزاكم الله كل الخير
وربنا يكرمنا جميعا ويوفقنا لما يحبه ويرضاه ...

[a7m00dy]

انتو فين يا جماعة

محدش بيرد عليا ليه ):

[a7m00dy]

برده محدش رد عليا !!!
على العموم جزاكم الله خيرا ):

[A7MED_PHARMA]

طيب هيجيب الحاجات منين ؟

يعني سعر الشراء هيبقا كام ؟ وسعر البيع المقترح كام ؟

وإيجار المحل كام ؟؟
والكهربا والترخيص والتأمينات إلخ إلخ إلخ ؟؟

[م. حاتم السباعي]

اخي الكريم
ربنا ييسر لكم في هذا المشروع او غيره
و اتوقع ان الاخوة الاعضاء لو لديهم اي خبرة بالمشروع ما احجمو ابدا عن النصح و المشورة
و لكن لان المشروع يحتاج لتوفر قدر من الخبرة فسوف تحتاج بعض الوقت لرفعه
و لكن ما استطيع ان اساهم به معك فهو ان تقومو بتأمين المحل جيدا من السرقة في حالة افتتاح المشروع بسبب انتشار السرقات خصوصا لو تم عرض ماركات غالية الثمن به
ربنا يوفق بأذن الله

م.حاتم السباعي

[Mshawky]

بالنسبه للمستوردين واعرف ناس جامده جدا فى المجال ده ملابس رياضيه وكوتشيات وواخدين توكيل كمان لاكتر من حاجه فى مصر فحاجتهم مضمونه وكويسه

بالنسبه للمحل فحط فاعتبارك اى محل بالاخص بيخاطب فئه شباب متوقف كل حاجه فيه على المنطقه وموقعه

لان المنطقه هى بتحدد سعر بيعك هيكون من كام لكام يعنى مينفعش افتح فى مثلا فى حته زى المطريه محل وابيع كوتشى ب 300 و400 مستوى المنطقه ميجبش مثلا وهكذا على المناطق الراقيه

فكل مكان وليه نظام بيعه وتسويقه وانصحك اتعامل مع حد بتاع تسويق شاطر هيساعدك كتير وهيقلل نسب الريبسك عليك ان شاء الله

[a7m00dy]

السلام عليكم ورحمة الله وبركاته
اولا جزاكم الله كل خير يا جماعة على مشاركتكم وردودكم المفيدة جدا ...
هو صاحبى ده عارض عليا أشاركه وانا بصراحة الموضوع داخل دماغى جدا .. لكن طبعا مش هنفتح الا لما ندرس الموضوع كويس جدا
هو بالنسبة للمكان فاحنا مش فى القاهرة .. احنا فى محافظة الغربية ( المحلة الكبرى ) .. ومكان المحل اللى ناويين عليه بإذن الله
فى مكان كويس وصاحى طول اليوم وفيه ناس ..والمحل كبير ما شاء الله وكويس

بالنسبة لتجار الجملة فصاحبى كانت كليته فى حلوان وعارف كذا واحد فى حلوان وفى العتبة ده بالإضافة لأننا عارفين ناس فى القنطرة
وطبعا معظم الناس عارفة شغل القنطرة فيه شغل نضيف واسعار كويسة جدا ..

وعموما يا جماعة احنا ناويين لو حصل نصيب وفتحنا المشروع بإذن الله لازم يكون فيه كل الأذواق
عشان نقدر نلبى طلبات الشباب لأن طبيعى ان كل واحد ذوقه مختلف عن التانى
لكن طبعا بالنسبة للتوكيلات والحاجات دى فاحنا ناويين نستنى عليها شوية على ما نشوف ايه الأوضاع
يعنى ناويين نشتغل فى الشغل المنتشر دلوقتى بين الشباب والبنات .. اللى هو من اول 60 جنيه لحد 200 جنيه

ومستنى مناقشاتكم معايا لأنى اكيد هستفيد من حضراتكم وجزاكم الله عنا كل خير
وربنا يرزقنا جميعا من الحلال الطيب ويوفقنا لما يحبه ويرضاه
اللهم آمين

[a7m00dy]

..................