يلعن ابو البرشام و الترامادول و الذي منه

[3mr Farrag]

الموضوع و انه في يوم واحد اتخانقت مرتين مع اتنين شكلهم رافعين برشام
واحد سايس عند جامعه القاهره
و اد ضارب بلاوي شكله و بيتكلم بطريقه عجيبه....مره كنت واقف مستني واحد صاحبي بليل
و الدنيا فاضيه ولقيته جايلي و يقول ده بوورك ....قلتله انا واقف خمس دقائق و ماشي
عازني ادفع ثلاثه جنيه عافيه...المهم ادتله جنيه و كبرتله
امبارح بقي كنت راكن عند الجامعه وجالي الواد الضارب ده
روحت مديله اتنين جنيه....قعد يبرطم و يهبل و انا بتكلم في التليفون
قلتله انا بدفع علي طول 2 جنيه...(اصل انا مش معترف خلقه اني ادفه بريزه لسايس
فا مش بديلهم اللي علي مزاجهم)
راح برطم و دخل ايده من الشباك و بيعملي بأيده علي دماغي رحت مطلع ايدي و عملوا ذي ما عمل
و انا برضوا عمال اتكلم في الليفون
اضايق اوي و عمال يحاول يفتح باب العربيه و عمال يلف عليه يحاول يفتح اي باب و ماشي بكل بطء
و انا برضوا بتكلم في التليفون
المهم جت ست شكلها شغاله معاهم هدت الموضوع و قالي خلاص يا عم و كلام فاضي

تاني مشكله و انا في شارع الهرم و بلف ملف و مدي اشاره يمين
الاقي ناكسي عمال يكبس عليا
روحت مزود بنزبن و بحاول ادخل يمين ...و هو عافيه عمال يزنق و
قعد كذا مره كده لحد ما بطأت و وقفت و عمال اشاورله انه يستني...راح لابس فيا من ورا في جنب الاكصدام
نزل اخينا اللي ضارب هو كمان ...و عمال يهلل و يهبل...و يقولي انت واقف فاجئه ليه
عمال اقوله انا مديلك اشاره و انت عمال تكبس بالعافيه و انت اصلا تلزق فيا ليه...و هو ولا هنا
و يقولي انا شغال عليها و عايزك تصلحلي العربيه.... و كل اللي عنده تطبيقه خفيفه في الاكصدام لو ردها بأيده هتتعدل....
اتخانقنا بالكلام... و كان معايا اتنبن صحابي كانوا خلاص هيعجنوه .... الواد مش عارف يمسك صاحبي من اللي ضاربه من برشام شكله ....
قلت اعمل عليه نمره و اكلم واحد صاحبي ظابط و يوديه القسم علشان الواد ماكنش عايز يعمل محضر....بس صاحبي كان نايم مردش عليا
المهم هو مش بيعمل حاجه غير عمال يجعج و مش بيسمع حتا احنا بنقول ايه و مش عايزنا نمشي
و انا بصراحه كنت جعان و عايز امشي
صحابي قالولي اديله 20 جنيه خليه يغور
رحت مديله 20 جنيه.....بس مخنوق اني ادتله حاجه و هو عيل غلطان و اهطل...

بس صحابي قالولي علشان مش عربيته ...و اني اعتبرها صدقه و خلاص

الاتنين بجد لو حد شافهم هيقولوا انهم ضاربين صيدليه بحاله
مش عارف يعني كله بيضرب برشام وبلاوي حتا و هما في الشغل!!!
ده ايه القرف ده ...
انا اللي عملته ده صح ولا غلط...ولا كان المفروض ادب في الاتنين ولا اعمل ايه بالضبط

معلش صدعتلكوا دماغكوا

[amr.elsayed]

انا من كام يوم ماشى فى شارع خالد بن الوليد وماشى امامى تاكسى وماشى براحة وعمال يجى يمين وشمال
قولت اكيد بيفادى الحفر وكدة لما قربت منه لاقيته بيشرب خمرة وهو سايق وبيترنح يمينا ويسارا بالتاكسى
خوفت اعدي من جنبه احسن يلبس فى جنب العربية ... روحت واقف على جنب شوية لحد ما بعد وروحت مكمل
اصلها مش ناقصة يطلع اللى بيبلبعوا عليا .... ربنا يهدى

[rompo10]

ابعد عن الناس دي وماتحتكش بيهم

[احمد المصرى]

ال عملته غلط مش علشان المفروض ان كنت ضربتهم لا بالعكس المفروض انك تكبر دماغك اكتر من كدا كمان ..... انت صح طبعا بس الاصح انك تكبر دماغك خالص لان راجل محترم والاشكال دى مش هتعرف تتعامل معاهم لانهم عايزين الضرب بالنار دا الحل الوحيد

[amdd]

ال عملته غلط مش علشان المفروض ان كنت ضربتهم لا بالعكس المفروض انك تكبر دماغك اكتر من كدا كمان ..... انت صح طبعا بس الاصح انك تكبر دماغك خالص لان راجل محترم والاشكال دى مش هتعرف تتعامل معاهم لانهم عايزين الضرب بالنار دا الحل الوحيد

عين العقل ...خسارة كمان الرصاصة اللى هينضرب بيها دا لو الحرق مش حرام كان الواحد ولع فيهم

[3mr Farrag]

طيب كويس اني ما طلعتش غلطان اوي
انا قلت هتقولولي ماكنش المفروض ادفع حاجه و اضربهم

[Karim_Monir]

والله كويس ان الموضوع ده خلانا نشوفلك مشاركات
عاش من شافك يا عمرو

التراما زفت ده بقي لازم مع كل الصنايعية بطريقة قذرة
وبحمد ربنا ان مدير الورشة عندي مالوش في الهباب ده واما ماكنتش اعرف اتعامل معاه

[3mr Farrag]

بشمهندس كريم باشا بنفسه في موضوعي
و حشني و الله يا باشا
انا موجود بس بشارك في المناسبات

[Karim_Monir]

الله يكرمك يا عمرو
وابقي شارك في غير المناسبات
وابعد عن الضريبة بيكونو مش واعيين فعلا

[Elawany13]

عامر يتراجع عن قرار فصل 132 سائقا .. ويرفض عودة متعاطي المخدرات

الثلاثاء, 20 مارس 2012

طارق عامر
اموال الغد - كتب – عبد الحليم الجندي :
تراجع طارق عامر رئيس البنك الاهلى اليوم عن قراره بفصل 132 سائقاً من السائقين البالغ عددهم 150 لتظاهرهم ومحاولتهم تعطيل سير العمل، وتقديم مطالب غير منطقية تتمثل في مساواتهم بالمصرفيين، على الرغم من وصول مرتبات كل منهم إلى نحو خمسة آلاف جنيه شهرياً وفقا للبنك .

وعلمت "أموال الغد " من مصادر مطلعة داخل البنك ان القرار لم يشمل نحو 18 سائقا ثبت تعاطيهم لمواد مخدرة اثناء توقيع الكشف الطبي الدوري عليهم .

اشارت المصادر الى تهديد السائقين بالدخول فى اعتصام مفتوح امام المقر الرئيسى للبنك فى حالة عدم التراجع فى قرار فصلهم والاستجابة لمطالبهم التى وصفوها بالمشروعة مما دفع البنك للتراجع عن قرار فصلهم .

واضافت المصادر الى تقدم نحو 15 سائق بتسجيل محضر اثبات حالة بقسم بولاق ابو العلا لفصلهم الذى وصفوه بالمتعسق ومنعهم من مزاولة اعمالهم .

ارجعوا قرار فصلهم إلى تنظيمهم وقفات احتجاجية متكررة منذ بداية مارس للمطالبة بالمساواة في نسبة الحافز التي حصل عليها المصرفيون بواقع 15%، فيما لم يحصلوا سوى على 5% فقط على حد قولهم.

وكان البنك الاهلي قرر بداية الاسبوع الحالي فصل رئيس السائقين و150 سائقاً لتظاهرهم ومحاولتهم تعطيل سير العمل، وإحالة رئيس قسم السائقين إلى النيابة العامة للتحقيق معه فى مخالفاته القانونية .

واوضح البنك فى بيان له أن قرار الفصل، والذى اتخذه، جاء من أجل الحفاظ على أكبر مؤسسة مصرفية فى مصر من الانفلات الوظيفى، وتطهيرها من ذوى الأخلاق السيئة الذين يسيئون إلى الجهاز المصرفى بصفة عامة.