حد له خبرة فى التلووين على الزجاج

[amr.elsayed]

باختصار شديد عايز اجيب قطعة زجاج وحطبع صورة معينة من الكمبيوتر
وحفرغها وحلون مكان الفراغات دى على الزجاج
كنت حعملها عند واحد بتاع زجاج بس طلبت معايا اعملها بنفسى .. وعندى شوية اسألة لو حد يعرف يجاوبنى
1- هل التلوين على الزجاج صعب .. يعنى محتاج يد ماهرة ولا كون انى املأ الفراغات المحددة حيكون سهل
2- الالوان دى بتكون جاهزة ولا ايه .. لان انا ما شوفتش الوان الزجاج دى قبل كدة (معرفش شكلها اصلا)
3- بشتريها منين ؟؟؟ هل ينفع اشترى كل لون لوحده علشان محتاج لونين بس ولا بتبقى باكدج على بعضه ؟؟؟ الانواع الكويسة ايه ؟؟؟
4- تنصحونى اكمل ولا الطيب احسن ... وشكرا مقدما يا احلى اعضاء

[SHNORY]

بتبقي عباره عن انابيب بسن رفيع
الاساس فيها حاجه اسمها ريليف بتحدد بيها الرسمه وبعد كده بتبدا تملاها وتلونها بالالوان التانيه علي حسب ذوقك
المهاره حتكون في التحديد والرسم
لانه محتاج رسام
بس عموما انت بتفرغ الرسمه وتحددها بالريليف الاول وبعد كده الموضوع بيكون ساهل
وفيه كتالوجات مخصوصه للرسم علي الزجاج

[amr.elsayed]

الاف شكر يا شنورى ربنا يكرمك ... لسة شايف فيديو شارح فيه كلامك
عارف اصعب حاجة قالها ان وانا بحدد الريليف لازم ابدأ من اول كل خط لاخره
عموما انا حسال على الادوات دى وحجرب وربنا يسهل وشكرا يا باشا

[SHNORY]

الاف شكر يا شنورى ربنا يكرمك ... لسة شايف فيديو شارح فيه كلامك
عارف اصعب حاجة قالها ان وانا بحدد الريليف لازم ابدأ من اول كل خط لاخره
عموما انا حسال على الادوات دى وحجرب وربنا يسهل وشكرا يا باشا

العفو يا باشا
اختار رسومات خطوطها قصيره
والاحسن بدل ما تفرغ الرسمه انك تحطها تحت لوح الزجاج وتمشي علي خطوطها
وعاوزين نتفرج علي اللي حتعمله يا باشا

[amr.elsayed]

ان شاء الله لو التجربة نجحت حصورها واخد رايك فيها
بس ربنا يستر احسن اخوك مجرد ما يمسك الوان فى ايده البيت بيتفجر ههه
دة انا طلبت معايا ارش طاسات العربية سيلفر ورشيتها فعلا وطلعت تحفة
بس المشكلة ان البلكونة كلها بقت سيلفر ... ربنا يستر

[SHNORY]

اوعي تقتنع بيا خالص في الموضوع ده
انا المعلومات اللي قولتهالك دي علشان خالي كانت جت عليه فتره بيرسم علي الازاز وكنت بشوفه وانا صغير
اصلا العيله عندي نصها بيرسموا حلو جدا
انا لو عملت خط مستقيم بمسطره بيطلع معووج ههههههههههههه

[nonetta]

الرسم بالريليف مش صعب
بس المهم يبقى التحكم في الايد كويس وما تترش
وبعدين ممكن تمسحها في ساعتها بسرعة قبل ما تنشف لو غلطت
جرب الاول في قطعة زجاج مش عاوزها لحد ما ايدك تتمكن
و خلي بالك ما يجيش عالهدوم عشان مش بيطلع
البس لبس الشغل

[amr.elsayed]

اوعي تقتنع بيا خالص في الموضوع ده
انا المعلومات اللي قولتهالك دي علشان خالي كانت جت عليه فتره بيرسم علي الازاز وكنت بشوفه وانا صغير
اصلا العيله عندي نصها بيرسموا حلو جدا
انا لو عملت خط مستقيم بمسطره بيطلع معووج ههههههههههههه

لا يا باشا دة انت كل الكلام اللى انت بتقوله هو بالظبط اللى فى الفيديو اللى قولتلك عليه فانا اعمل زى ما انت بتقول وانت المسؤول .. انا ماليش دعوة .. انا مصدقت الاقى واحد اصدره هههههه

الرسم بالريليف مش صعب
بس المهم يبقى التحكم في الايد كويس وما تترش
وبعدين ممكن تمسحها في ساعتها بسرعة قبل ما تنشف لو غلطت
جرب الاول في قطعة زجاج مش عاوزها لحد ما ايدك تتمكن
و خلي بالك ما يجيش عالهدوم عشان مش بيطلع
البس لبس الشغل

الف شكر على النصايح الغالية ... وفكرة ممتازة انى اجرب الاول ... شكل البيت حينفجر تانى

[banboty]

الاخ الفاضل , انا كانت ليا اهتمامات فنية كتير والرسم على الزجاج كان جزء منها , و دي
مشاركة ليا كانت في منتدى شئون مصرية من كام سنة و إن شاء الله تفيدك !


الرسم على الزجاج :


الخامات المطلوب تحضيرها :

* انبوبة ريلييف و ده بيستخدم لتحديد الرسم , ممكن عدد 3 او 4 انابيب


* برطمانات الوان حسب الذوق للرسم على الزجاج و دي موجودة في المكتبات الكبيرة و فيه محل انا كنت بجيب منه في شارع البستان ( وسط البلد ) عند تقاطع اشارة المرور في الناحية المقابلة لكماليات المغربي في القاهرة , اسمه( كذا لون ) عنده كل ما تتخيله من الوان و خامات , و يستحسن شراء النوع الامريكاني , طبعا هوا غالي حبتين لانه بيعيش و الوانه مبتهربش ( بتبهت يعنى ) .

* تنر و ياريت يكون المستورد برضوا مش المصري , ممكن تجيب الكمية على حسب مساحة الرسم , يعنى الباب مثلا 2 م في 2 م ممكن تجيب نصف لتر تنر ..

* سرنجة ( اللى بتستخدم في الحقن )

* لوحة الرسم اللى هننقلها على الزجاج و هنزل هنا كام شكل ممكن تعمله برنت و تكبره و تشتغل بيه .

* و طبعا قطعة الزجاج تنظف قبل البدء بالتلوين بالتنر او بالبنزين و تنظف تماما و ياريت يكون الزجاج من النوع المصنفر بالرش ( رش الرملة , َسمك 3 ملي ) , و بتوع الزجاج بيقولوا عليه زجاج عمليات , عشان الرسم بيظهر كويس اوي على النوع ده و بيبقى شكله شيك ,,

اول حاجة بتتعمل , انك بتحط الزجاج اللى هيترسم على تربيزة قصيرة حبتين و ممكن على الارض يبقى اريح و بعدين تحط تحته المنظر اللى هترسمه ,

يعنى الزجاج من فوق و المنظر من تحت ,

و بعدين تبتدي تشف المنظر مستخدما انبوبة الريليف عشان التحديد الخارجى للمنظر ,

بمعنى لو مثلا هرسم مركب , يبقى هحدد شكل المركب و الشراع فقط بدون نقل التفاصيل , لان التفاصيل هي اللى هنلونها بالالوان , و التحديد بالريليف ده , بيعمل بروز على الزجاج بحوالي 1 او 2 ملي , البروز ده هوا اللى هيحبس اللون ,,, و نسيبه ينشف من 6 الى 8 ساعات , و عند استعمال الانبوية يجب ان تكون قوة ضغطك عليها متساوية عشان ميبقاش فيه خط تخين و خط رفيع ...

و لو فيه جزء من الريليف طلع بره و مش ماشي مع الرسمة , نستنى عليه لما ينشف و بعدين نقشطه بالموس او الكتر تانى يوم ,

*استخدام الالوان :

بنقوم بخلط برطمان اللون مع كمية مناسبة من التنر , عشان نخفف كثافة اللون شوية و كمان التنر بيعمل تفتيح للون و تغميقه ,

بعد اما بنكون نقلنا الرسمة و حددناها بالريليف ’ نبدأ نعبئ السرنجة باللون اللى عاوزين نشتغل بيه ( فيه ناس بتلون بفرشاة رسم ) , و ننقط بالراحة الجزء المراد تلوينه , و لو شوية لون طلعوا بره التحديد , علطول نمسحها بقطعة قماش نظيفة ..

و لو نخلط لونين على بعض للتفتيح او للتغميق و انت و ذوقك

و نسيب الالوان تنشف على الزجاج من غير اما تحركه او تهزه علشان الالوان تثبت و تنشف مكانها و بتاخد حوالي من 6 الى 8 ساعات ....


لو فيه استفسار تانى , انا مستنيك

[amr.elsayed]

قوللى اشكرك ازاى يا بنبوتى .. الف شكر يا باشا وربنا يباركلك
انا كدة بقى عندى الموضوع دة مرجع ليا وان شاء الله حدور على الادوات دى وهبدأ واحدة واحدة ان شاء الله

[A7MED_PHARMA]

بص ياسيدي

تحديد الرسمة على القزاز..بيتكون(زي ماشنوري قالك) بأنابيب لها طرف رفيع
بتضغط بالراحة على الانبوبة .. وايدك ماشية على الخط الي هترسمه
لازم عملية الضغط وحركة ايدك على الرسمة..تكون متناسبة


انابيب التحديد دي..حسب منا فاكر..كان فيه منها لون ذهبي..ولون فضي

المساحات الكبيرة الي بتتلون..لها ألوان مخصوص
بتلاقيها في المكتبات المحترمة

الموضوع دقة في الاداء بس..مش محتاج حرفية ولا مهارة

[amr.elsayed]

شكرا يا فارما وربنا يسهل والموضوع يطلع يسهل و حبقى اوافيكم باخر الاخبار

[amr.elsayed]

عايز اخد رائيكوا فى حاجة محيرانى وهى الالوان
ان اولا سرقت قطعة ازاز من البيت حاجة امى بتقول عليها شوفونيرة ... انا مش عارف الحقيقة مين نيرة دى بس مش مهم
قولت اجرب فيها الاول وكان الاتى
1- دورت على النت على تصميم يكون سهل شوية علشان اجرب فيه الاول
2- بدأت فى تحديد الرسمة بالريليف
3- احترت جدا فى الالوان فا لونت التصميم على اساس اعمل صورة قريبة للصورة اللى حتكون مرسومة على الزجاج
ودى الصور وعايز رايكوا فى الالوان وخاصتا اللون الاسود ايه رائيكوا فيه ولا الالوان الفاتحة احلى زى البرتقالى او اصفر مائل للخضار على خفيف
.............................................
ودى الرسمة على الازاز و الريليييف دة طلع مش سهل خالص وعايز تمرين كتير والرسم على الورق اسهل بكتيييير جدا بس انا وراه لحد ما اعرف ديته

..........................
ودة الوضع الان على الازاز

...............................
ودة التصميم بعد ما لونته والورد البلاستيك حلزقه على الازاز زى الصورة كدة و دة سرقته من حاجة غريبة كدة لونها ابيض بتتعلق على الحيطة وفيها ورد

.........................
المشاركة شكلها غريب زى مايكون حرامى غسيل اللى كاتبها هههه .. منتظر رائيكم .. ويا ريت يا جماعة لو حد عنده اى اقتراح او شايف اى عيب يقولى عليه وشكرا ليكم

[SHNORY]

بسم الله ماشاء الله
تسلم ايدك فعلا
بس تعليقي الوحيد انها غامقه اوي
حاول تفرفشها
رسومات الزجاج بتكون الوانها يغلب عليها الفواتح والفواقع
علشان لما الشمس تيجي عليها تبقي منوره

[amr.elsayed]

الله يسلمك يا شنورى وان شاء الله استحدم لون فاتح شوية