رحله اصلاح سخان الغاز ... اقروا و استمتعوا و قولولي رأيكوا بصراحه

[Screenplays]

الموضوع بدأ يوم الخميس حيث ان السخان بدأ يهيس و يخطرف يعني شويه يشتغل و شويه ميشتغلش و طلعت 394758347 مره من الحمام بسبب ان الميه السخنه خلصت و لسه عليا رغاوي الصابون المهم فضل هذا الوضع المزري لمده 48 ساعه يعني لحد يوم السبت و هوووووووووووووووب السخان قطع النفس تماما و فشلت كل محاولات انقاذه بالصعقات الكهربيه قصدي احم بتغيير البطاريات و لكن امر الله نفذ و السخان لفظ انفاسه الاخيره فاضطرينا اسفين نكلم الحانوتي قصدي احم الصيانه فقمت جبت رقمهم من الدليل و كانت المكالمه كالتالي :

انا : السلام عليكم
يرد واحد بصوت اجش و تقريبا مازال يجري في دمائه اثر مخدر ما
الرجل : و عليكم السلام
انا : دلوقتي السخان معتش شغال
الرجل : السخان نوعه ايه ؟
طبعا ابتدت اثار المخدر تشتغل و الاسئله الغبيه تنهال علي رأس العبد لله
انا ( بنفاذ صبر ) : نوعه كذا
الرجل : ايه مشكلته ؟
يعني لو انا عارف مشكلته كنت اتصلت استغفر الله العظيم علي المسا
انا : معدش بيشتغل
الرجل : كام لتر ؟
اصلها هتفرق ... صنايعي صيانه ال 5 لتر غير صنايعي صيانه ال 10 لتر
انا : 5 لتر يا فندم
الرجل : ممكن تمليني بياناتك ؟
مليته بياناته فطلب مني انتظر دقيقتين و المكالمه علي الموبايل حراااااااااااااااااااام انا مبتلقاش الرصيد ده في الشارع المهم بعد دقيقين بالظبط رد ( شوفتوا الدقه )
الرجل : بياناتك مش متسجله عندي
طبعا بدأت اشعر بالم في كتفي الشمال و تنميل في ايدي الشمال و الموبايل كان هيقع مني في الارض
انا ( بتوعك ) : ازاي يا فندم و الله نوعه كذا و شارينه من عندكوا
الرجل ( بنفاذ صبر ) : حضرتك كلمتنا قبل كده ؟
انا : ايوه
الرجل : من الرقم ده ؟
انا : لا يا فندم
الرجل : طب مليني الرقم اللي كلمتنا منه قبل كده
بعد مشاورات و محادثات مع الوالده طلع الرقم رقم خالتي فملتهوله فقالي انتظر دقيقتين و كله علي الموبايل و المكالمه دخلت تخش في تكلفه مكالمه طويله الاجل لمورنبيق و بعد دقيقتين رد عليا
الرجل : بياناتك كذا كذا كذا ؟
الالم وصل لرجلي الشمال و بدأت اشوف غشاشه سوده قدام عيني
انا : ايوه يا فندم
الرجل : هيجيلك راجل الصيانه يوم الاتنين
انا : مينفعش يجي بكره ؟
الرجل : الصيانه اتنين و خميس بس
خلاص بقي رجلي معتدش شايلاني و اختي عماله بتضحك من تعبيرات وشي و عايز برشامه نيتروجليسرين
انا : طب هيجي الاتنين امتي ؟
الرجل ( بنفاذ صبر ) : انتظره من الساعه 11 الصبح ل 8 بليل
انا : شكرا

قمت رميت نفسي علي الكنبه و امي بتنهال علي رأسي بالاسئله

انا ( لاختي ) : هاتي جهاز الضغط بسرعه

اصل اختي دكتوره عقبال عندكوا و بعد قياس الضغط اللي طلع مرتفع قليلا بسبب المكالمه حكيت للوالده اصل و فصل الحكايه و طبعا مقولكوش قضيت اسوأ 48 ساعه في حياتي بدون مياه ساخنه او حتي بارده حيث المياه المتوفره مياه مثلجه كحراره الاسكيمو و الحمد لله اختي خلعت علي كليتها لتستمتع بالمياه الدافئه و امي راحت لخالتي لظروف عائليه و برضه قاعده تستمع بالمياه الدافئه ( والعه معاهم ) و انا قاعد مفيش حموم و طبعا الوضوء مأساه اغريقيه و لكن كل حاجه تهون في سبيل الجنه

نيجي بقه ليوم الاتنين اليوم المنتظر :

الوالده صحيتني الساعه 10 صباحا مع اني مبصحاش قبل الظهر نظرا لعدم وجود عمل لاسباب لا تخفي عن احد المهم انا كل يوم بصحي و بروح اقعد مع صديق في المحل بتاعه عشان قعده البيت تجيب الغم و طبعا اليوم غير كل يوم فدار بيني و بين امي الحوار ده

انا : عايز انزل البنك
امي بتبصلي شزرا و كنت حاسس انها هتديني بالحله اللي في ايديها
امي : ليه ؟
انا : مشوار في السريع طالما صاحي بدري

طبعا اخدت الموشح التقليدي حيث اني لا استطيع تحمل المسئوليه و خلافه مع اني شايل المسئوليه دي من يوم ما وعيت علي الدنيا عشان الوالد بيعمل في احدي دول الخليج المهم بعد مشاورات نزلت و لفيت علي بنوك المحافظه كلها حيث اني عاوز افتح حساب بالدولار مرفق مع فيزا للدفع من خلال الانترنت و لكن طبعا تلك التكنولوجيا في بلدنا كتكنولوجيا السفر الي الفضاء فين و فين لما اتلاقيت بنك موظفينه سمعوا عن الحوار ده و لكن كانت الصدمه لازم استني من 10 ايام الي 15 يوم عشان استلم الفيزا ده غير ان لازم الحساب يكون فيه علي الاقل 500 دولار منين يا بشر ؟ هو انا لو معايا المبلغ ده كنت قعدت في البلد و طبعا كنت نازل مستعجل فلا سرحت شعري و نازل شبه عمر حمزاوي للاسف و لابس سليبر و شكلي كالمختلين عقليا الذين يهيمون علي وجوههم في الشوارع ما علينا رجعت البيت و انا بدعي ربنا ان ميكونش الراجل جه المهم افتح المنتدي مفيش الفيس مفيش اي موقع بتاع اي بياع بتنجان مفيش المواقع خاليه علي عروشها من الموضوعات و الاعضاء و الاصدقاء فمارست هوايتي التقليديه و هي التحديق في السقف و الدعاء ان ينهار علي رؤوسنا عشان نخلص و نرتاح بلا قرف و فضلت كده لحد 6 بليل و الراجل برضه مجاش فقمت اتفرج علي فيلم تيرميناتور 3 و حدثت المعجزه و الراجل شرف علي الساعه 8 الا خمسه تخيلوا 5 دقايق تفصلنا عن المعاد المهم اتضح ان السخان سليم و ان الحنفيه فيها مشكله و غيرها و مأخدش اي فلوس نظرا لاننا في الضمان و الحمد لله

[hossam_elwani]

حوار كبير ............... حمد لله على سلامة السخان