احـــــــذرو طريقــة نصب كبـــــــرى مــن ( مكالمة تليفونية ) .......

[sokasoon]

يحدث هذه الايام طريقة نصب كبرى ووقع فيها ناس كتيرة جدااااا

وهى يأتيك اتصال على الموبايل من شخص ويدعى انه من شركة فودافون

وبمناسبة عيد ميلاد الشركة انت فزت معنا بـ 5000ج ولاب توب او 10000ج

الخ ويطلب منك اسمك والعنوان وانه سيتم تسليمك الجايزة وسنحضر ومعنا

كاميرة تصوير لانه سيكون اعلان للشركة وحوار كبير اوى علشان تصدق

المهم بعد كده بيطلب منك الرقم المسلسل لاخر كارت شحن طبعا انت بتشحن

وبترميه مش هتحتفظ بيه يقوم هو قايلك طيب اشترى كارت شحن فئه 100ج

علشان هيوصلك ماسج بأسمك والجايزة وقولى الرقم المسلسل وفى وسط الكلام

بعد ماتديله الرقم المسلسل يقولك اخدش الكارت ويعدين يقولك ادينى اول 7

ارقام من رقم الكارت بس على اساس انك تكون واثق انو مش بيكدب تروح

مديلو الـ 7 ارقام ويقولك خليك معايا ويروح حاطك على الويتنج شوية ويرجع

يكلمك يقولك رقم الكارت كامل انت طبعا تستغرب ده اكيد بقا من فودافون

وبعدين يقولك احنا حاولنا نبعت الرسالة مرتين لاكن مابتوصلش لان عدد النقاط

بتاعتك اقل من 1000 وانت حاليا 850 بشحن الكارت الــ 100 اللى انت

قولتلو منهم الــ 7 ارقام الاولى وكل كارت بيديك 50 نقطة اذن انت محتاج 3

كروت تانى طبعا كل ده هو مأثر عليك وتوهك فى الكلام وروحت مديلو 7 ارقام

تانين وفى الاخر تكتشف انو نصب عليك ازاى

اولا انا الموضوع ده اتحكالى من واحد صاحبى امبارح كلمنى على

التليفون وقالى الموضوع ده وانو فعلا حصلو الموضوع ده ولاكن اكتشف بعد

ما كان النصاب شحن الكروت اللى خد ارقامها منو كلها الحقيقة اتحرق دمى

جداا وقعدت افكر ازاى قدر يعمل كده وازاى من 7 ارقام بس يوصل للباقى

ماعتقدش ابدا انو يقدر يفبرك الـ 3 كروت

اخدت ارقام الكروت من صحبى واتصلت بفودافون وحكيتلهم الموضوع

واتفاجأت بالاتى ان الموضوع ده حصل مع ناس كتير واتصلو بينا فعلا طيب

ازاى وازاى وصل لل7 ارقام الباقين رد عليا وقالى ان هنـاك ثغرة يا فندم فى

السيستم عندنا والنصاب ده بيستغلها واضح انو هاكر محترف يا فندم طلبت منه

انو يقولى الارقام اللى تم شحن الكروت عليها ولكنه رفض وقال لى انو مايقدر

يقول اسرار العملاء وكمان تم تحويل الرصيد بالكامل الى ارقام اخرى وقالى

اتصل بمباحث التليفونات وهما هيتتبعو الرقم وابقا حلنى ومش هياخد حاجة

اتصلت بصاحبى واديتو الرقم وقولتلو اعمل محضر وشوف مش مهم يرجعو

الفلوس قد ما يمسكو النصاب ده علشان مايعملش ده مع حد تانى وكان واجب

عليا انى انبه كل اعضاء نايل موتورز من الفخ ده

[theking2690]

الف شكر يا باشا على التنبيه

[Ahmad Allawy]

ايه ده..؟؟؟
ماهو محدش بيعمل كده يعني..
هو اللي غلطان..
و عامة.. شكرا علي التنبيه..

[ashour]

من غير ثغرة فى السيستم بردو ممكن فى طريقه كمان
مرة و انا بخدش الكارت تقيلت ايدى شوية و بقى فى ارقام كش باينه
كلمت خدمه العملاء قالى انه محتاج عدد معين من الارقام اللى فاضله
اعدة اخمن لحد ما جبت اللى هو عايزة...
طبعا الالتجاء للرقم المسلسل كان صعب لانه واضح للكل..
و ده بيساعدهم فى عملية التوزيع بس.

[mada121977]

البلد دى دايما بتثبت انها مليانه نصابيييييييييييين (للاسف) بيبدعوا فى فن النصب على الناس

[sokasoon]

من غير ثغرة فى السيستم بردو ممكن فى طريقه كمان
مرة و انا بخدش الكارت تقيلت ايدى شوية و بقى فى ارقام كش باينه
كلمت خدمه العملاء قالى انه محتاج عدد معين من الارقام اللى فاضله
اعدة اخمن لحد ما جبت اللى هو عايزة...
طبعا الالتجاء للرقم المسلسل كان صعب لانه واضح للكل..
و ده بيساعدهم فى عملية التوزيع بس.

هو لما انا كلمت خدمة العملاء قالولى ان هو لا يحتاج

الا لــ 5 ارقام فقط من الــ 14 رقم مش 7 الحقيقة انا مش عارف

الحقيقة فين بس هل هى ثغرة ولا بمساعدة من فودافون على انو اتخدش

منو باقى الارقام اللى انا شاكك فيه اوى ان اللى بيعمل كده من داخل فودافون

او كان شغال فى فودافون قبل كده وممكن يقدر يوصل لباقى الارقام بسهولة لو

هو بيشتغل فى فودافون عموما ممثلى خدمة العملاء بيكونو متوطئين شوية لانهم

ولا عاوزين يدوك رقم التليفون اللى اتشحنلو الكروت او الارقم اللى اتحولها

رصيد علشان تقدر توصل للى اخد الرصيد ومن خلاله توصل للنصاب ده

[r0xer]

الموضوع فكرته بسيطة جداً.. و لكن التنفيذ يحتاج آلية ذكية و الشخص مش هاكر محترف ولا حاجة و ممكن حضرتك تعملها :D



كل ما في الأمر إنه بيعتمد على word list مكونة من ارقام فقط و موجود فيها كل الإحتمالات لأخر تلت أرقام

يعني مثلا

111
121
131

إلخ...

دا إحتمال... و لو في ثغرة فهتكون في إنه الخط ميتوقفش... و أفتكر دي كمان سهلة لو البيه شغال ف الشركة .

و النوع دا من الهجوم موجود من السبعينات "أي والله :D " و أسمه
dictionary list attack

أو إحتمال تاني وهو إنه يكون عارف ألية الأرقام..يعني متكنش الأرقام دي random numbers. و يكون هو عارف آليتها و بتتعد إزاي وتتغير إزاي.

و شكراً للتنبيه .

[Ahmad Allawy]

هو لما انا كلمت خدمة العملاء قالولى ان هو لا يحتاج

الا لــ 5 ارقام فقط من الــ 14 رقم مش 7 الحقيقة انا مش عارف

الحقيقة فين بس هل هى ثغرة ولا بمساعدة من فودافون على انو اتخدش

منو باقى الارقام اللى انا شاكك فيه اوى ان اللى بيعمل كده من داخل فودافون

او كان شغال فى فودافون قبل كده وممكن يقدر يوصل لباقى الارقام بسهولة لو

هو بيشتغل فى فودافون عموما ممثلى خدمة العملاء بيكونو متوطئين شوية لانهم

ولا عاوزين يدوك رقم التليفون اللى اتشحنلو الكروت او الارقم اللى اتحولها

رصيد علشان تقدر توصل للى اخد الرصيد ومن خلاله توصل للنصاب ده

شوف يا باشا..
ولا هي ثغرة.. ولا بمساعدة فودافون..
الموضوع كله مش منطقي خالص..
عشان الواحد يكلم خدمة العملا عشان يشحنوله الرصيد بتاع الكارت و يدخل كام رقم بس من ال14 رقم..
لازم انه يدي خدمة العملا الرقم المسلسل اللي علي الكارت..
من غيره مش هيعرف يعمل حاجة..
ومن غيره بتاع خدمة العملا اصلا مش هيعرف يعمل حاجة هو كمان..

و الغلط اصلا علي اللي يدي حد رقم الكارت بتاعه قبل ما يشحنه.... بس..
يعني الغلطان يتحمل مسئولية غلطه..
هو الموضوع كله سذاجة من الناس..مش ثغرة ولا حاجة..

اما فيما يخص خدمة العملا..
مش من حقهم و مسئولية قانونية انه ميقدرش يدي حد نمرة حد ولا اسم حد..
اتشحن ليه كارت او اتحول ليه رصيد او الحاجات دي.. دي بيانات شخصية لا يجق لحد الاطلاع عليها او معرفتها..
يعني مش من حق العميل ولا يقدر يقولك حاجة..
وبعدين المكالمات بتكون مسجلة.. يعني لو العميل عمل كده و قالك حاجة يبقي هيتجازي.. و مش بعيد يتحول للتحقيق كمان..
وممكن يترفد كمان..

[sniper2010]

ألف شكر ع التنبيه

[sokasoon]

شوف يا باشا..
ولا هي ثغرة.. ولا بمساعدة فودافون..
الموضوع كله مش منطقي خالص..
عشان الواحد يكلم خدمة العملا عشان يشحنوله الرصيد بتاع الكارت و يدخل كام رقم بس من ال14 رقم..
لازم انه يدي خدمة العملا الرقم المسلسل اللي علي الكارت..
من غيره مش هيعرف يعمل حاجة..
ومن غيره بتاع خدمة العملا اصلا مش هيعرف يعمل حاجة هو كمان..

و الغلط اصلا علي اللي يدي حد رقم الكارت بتاعه قبل ما يشحنه.... بس..
يعني الغلطان يتحمل مسئولية غلطه..
هو الموضوع كله سذاجة من الناس..مش ثغرة ولا حاجة..

اما فيما يخص خدمة العملا..
مش من حقهم و مسئولية قانونية انه ميقدرش يدي حد نمرة حد ولا اسم حد..
اتشحن ليه كارت او اتحول ليه رصيد او الحاجات دي.. دي بيانات شخصية لا يجق لحد الاطلاع عليها او معرفتها..
يعني مش من حق العميل ولا يقدر يقولك حاجة..
وبعدين المكالمات بتكون مسجلة.. يعني لو العميل عمل كده و قالك حاجة يبقي هيتجازي.. و مش بعيد يتحول للتحقيق كمان..
وممكن يترفد كمان..

طيب لو هو مش بمساعدة فودافون ولا ثغرة هيكون جاب الـ 7 ارقام الباقيين

منين هو ماخدش غير 7 بس من الـ 14 بعدين هو خد كمان الرقم المسلسل

طبعا مافيش شك انه الخطأ الاكبر انه ادالو الارقام من اصلو ولاكن لما بتقع

تحت تأثير النصاب بيوهمك بحاجات كتير ويتوهك وفى الاخر ينصب عليك

[sokasoon]

الموضوع فكرته بسيطة جداً.. و لكن التنفيذ يحتاج آلية ذكية و الشخص مش هاكر محترف ولا حاجة و ممكن حضرتك تعملها :D



كل ما في الأمر إنه بيعتمد على word list مكونة من ارقام فقط و موجود فيها كل الإحتمالات لأخر تلت أرقام

يعني مثلا

111
121
131

إلخ...

دا إحتمال... و لو في ثغرة فهتكون في إنه الخط ميتوقفش... و أفتكر دي كمان سهلة لو البيه شغال ف الشركة .

و النوع دا من الهجوم موجود من السبعينات "أي والله :D " و أسمه
dictionary list attack

أو إحتمال تاني وهو إنه يكون عارف ألية الأرقام..يعني متكنش الأرقام دي random numbers. و يكون هو عارف آليتها و بتتعد إزاي وتتغير إزاي.

و شكراً للتنبيه .

انا اعرف انو هما 4 محاولات لو دخلت رقم كارت غلط او مشحون من قبل بيتم

وقف شحن الخط أنه يرجعو تانى ويجرب كل ده وهو معاه على الخط ده هو

الاحتراف والله واعلم النصاب ده استخدم ايه بالظبط المضحك فى الموضوع

انى انهاردا لما اتصلت بصاحبى علشان اعرف مجريات الامور قالى انو ااول ما

اتصل بمباحث التليفونات وبدأ يقولوهم قالولو باقى الموضوع قالوهم واضح انو مش انا لوحدى

بس قالولو كتيييييير اووووووى كل يوم بيتصلو علشان يعملو بلاغ ولازم يروح

يعمل بلاغ هناك واضح ان النصاب ده عندو قوة جذب عالية وقدرة على النصب

قوية انه يضحك على ناس كتير كده وماحدش عارف يجيبو

[Ahmad Allawy]

أصل فودافون لما بيبيعوا الكارت مش بياخدوا رقم بطاقة اللي بيبيعه ولا بياخدو رقم بطاقة اللي بيشحنه..
الغلطة غلطة مستخدم في الاول و الاخر..

[osama]

الف شكر يا باشا على التنبيه
علي فكرة ممكن يكون الشخص دة كان شغال في شركة فودافون

[محمد المشد]

شكراً على التنبة للاعضاء ، وهذا من اكبر فوائد المنتدى 000 الافادة فيما بينهم من معلومات

[Ahmad Allawy]

يا جماعه هو اللي شغال في فودافون ده
الدنيا عنده سايبه كده..؟؟
يعمل اللي هو عايزه..؟؟
الموضوع متراقب جامد جدا..
و كل حاجة بيعملها موظف علي السيستم.. بتبقي مكتوبة في لوج..
يعني كل حاجة معروفة..
و بيتعمل عليها احصائيات و متابعات..
وفي تيمز مخصوصه بالحاجات دي.. بيتهيألي انا مستبعد موضوع انه يكون موظف دي..
صعبة جدا.. لأنه لةو كان كده ده هيبقي اسهل حاجة و اول واحد هيتمسك..