ياترى فى السينما بتضحك على الفاضى ومبتقعدش ساكت ؟؟؟

[M_HaFeZ]

موضوع مضايقنى جدا جدا جدا ألا وهو سلوك المصريين فى السينما
اول امبارح كنت فى سينما جودنيوز وباتفرج على فيلم ليلة البيبى دول فى حفلة منتصف الليل خصيصا علشان الزحمه وانى اتقى النوعيات اللى باشوفها دايما
الفيلم رغم انه اجتماعى سياسى حركى الا ان معظم الموجودين مضيعوش اى فرصه او لمحه او لفته او بادره ليضحكوا على اى منظر او شبهه شئ كوميدى كان يبتسم ممثل بطريقه ما او يحدث اى شئ غير القتل ليبدأو فى ضحك هو اقرب لتقطيع الحناجر !!
بجد طريقة بالنسبه لى مستفزه جدا وانا من النوع اللى احب اتفرج على الفيلم والكلام فى حدود ضيقه جدا
ولكن الشعب المصرى طبعا مبيضيعش فرصه للضحك حتى لو فيلم رعب او فيلم حركى امريكى .. ضحك ... ضحك ... ضحك .. بطريقه بجد مستفزه وبقيت اسال امال لو فيلم كوميدى هيعملوا ايه .؟؟ مش بعيد ينقلوا منهم على المستشفى لان وقتها الضحك المتوقع هيخليهم ميقدروش يتنفسوا فيموتو او يصابوا بمشاكل وضيق فى التنفس

رغم انى من هواة الافلام الا انى بابعد فى كل فرصه عن الذهاب للسينمات ومش نافع اى نوع او اى مستوى اجتماعى يخللى اللى داخلين على قدر من التحضر ويخليهم داخلين بس يتفرجوا مش يمارسوا اقصى درجات فك الكبت والاستمتاع بالحياه بطريقتهم ال******** دى وطبعا اتذكر انى ذات مره وانا طالب دخلت سينما من سينمات الدرجات الادنى وصدقونى مختلفتش كتير
نفس اللى بيضحكوا ويصقفوا عن لحظات ما كأن يحضن البطل البطله او يصقفوا مع اغنيه وطبعا الضحك الخرافى كانها عمليه Exorcism او تخلص من روح شريره ساكنه فى رئاتهم ..
نفس المستوى المتدنى قريب جدا من مستوى مرتادى سينمات الدرجات الاولى والتذاكر المرتفعه .. ويحيى شعب مصر المتحضر اللى عارف واجباته كويسه وبيقدر يعنى ايه حقوق الغير او سلوكه فى مكان عام

السؤال بقى ياترى لما تدخلوا السينمات بتتفرجوا على الفيلم عادى .. لو فى مناظر تستدعى الضحك بتضحكوا .. ولا على البحرى اى حاجه فى اى حاجه وضحك وقضيها وصوت عالى وقزقز لب واتكلم مع اللى جنبك وادى تحليلك للفيلم كان اللى بيتفرجوا جنبك دول اطفال مش فاهمه اللى قدامها ؟؟؟

[Karim_Monir]

ها ها ها
احد اسباب اني ماخلش السينمات هيا الاسباب اللي انت قولتها دي
مع اسباب تانية طبعا
الاسلوب التعبيري عند الناس متدني بشدة

[osama]

الناس عوزة تضجك وخلاص ومتنساش ان السينما بتقدم علي مدار خمس وسنوات واكثر افلام كوميدا

[Dr Ahmed]

يبقى أنا وانت نتفق نروح سوا

أنا باقعد وانا باتفرج أنقد فى الفيلم وأكتشف أخطاء التصوير والإخراج وحبكة السيناريو والخدع وباضحك عندما يدفعنى المشهد للضحك غصب عنى وإلا هبقى رايح أتنكد بس..

[bee]

سيدي الفاضل
دي حاجه مش جديده
ونصيحتي يعني متشغلش بالك لانك هتتعب مهما كانت السينما هتلاقي النوعية دي من الناس
يمكن اخف مكان هتلاقيه في سيتي ستارز لأسباب تانيه :)

تحياتي

[M_HaFeZ]

يبقى أنا وانت نتفق نروح سوا

أنا باقعد وانا باتفرج أنقد فى الفيلم وأكتشف أخطاء التصوير والإخراج وحبكة السيناريو والخدع وباضحك عندما يدفعنى المشهد للضحك غصب عنى وإلا هبقى رايح أتنكد بس..

والله انا كمان باشوف غلطات الفيلم سواء من اخراج او موسيقى او قصه
وبرضه الفيلم بتاع ليله البيبى دول رغم الانتاج الضخم الا انى طلعت غلطات من الاخراج و الموسيقى كانت هتبقى احسن من كده بكتير
وباضحك والله بس مش باقطع نفسى من الضحك :)

سيدي الفاضل
دي حاجه مش جديده
ونصيحتي يعني متشغلش بالك لانك هتتعب مهما كانت السينما هتلاقي النوعية دي من الناس
يمكن اخف مكان هتلاقيه في سيتي ستارز لأسباب تانيه :)

تحياتي

ماهو لو اللى قصدك فيه ان القعده بتبقى لحاجات تانيه نمشيها المنظره مثلا يبقى بلاش سينما احسن
انا حبيت اشارك مع الناس لانى فعلا متابع جيد للسينما ولى رأى مش بطال فى الافلام بس المتعه فى انك تتفرج على الفيلم فى السينما للاسف الناس دى بتضيعها
اى نعم انا باتفرج عندى على تلفزيون 25 بوصه داخل له من الكمبيوتر بس اوقات بتبقى عايز تروح السينما وخصوصا لما تبقى خروجه مع المدام
مش هناخد قعدتنا ونقعد فى البيت نتفرج بقى :)

[M_HaFeZ]

الناس عوزة تضجك وخلاص ومتنساش ان السينما بتقدم علي مدار خمس وسنوات واكثر افلام كوميدا

ماهو لو فيلم كوميدى ياعم اسامه نقول ماشى الناس عندها كبت وعايزه تخرجه فى الضحك
انما فيلم اكشن سياسى زى ده
طيب الموقف برضو تكرر فى فيلم زى Hitman
ولا لما اتفرجت على Lord of the rings , Return of the King
اشتغلوا ايه بقى ؟؟
كلام ولب وقزقزه لدرجه انى كنت هاخد التلاته اللى ورايا كام ضربه كده فجأه من كتر الخنقه وتخيل انت ان الفيلم ده من غير الفواصل 3 ساعات ونص وكمان كان معايا واحد صاحبى انا وهو لو قمنا بالموضوع ده كنا قفلنا الصف اللى ورانا كله

[ams]

دعهم يضحكون فانما هو ضحك كالبكاء
ما اكثر الضغوط التى تجعل الفرد منا يغدو و يروح يبكى من الالم وهو مدبوح
ارجو ان تلتمس لهم الاعذار فما تراه ليس الا قشور القشور لما بداخلهم
لا تعتقد ابدا انك اذكى او اكثر رقيا و تحضرا لان العوامل التى توافرت لك لتكوين شخصيتك و افكارك و معتقداتك لو توافرت لهم لن يكونوا اقل منك او اكثر رقيا
ما اقوله هو ان تعيش حياتك كما تريد و ليس كما يريدك الاخرون ان تحياها و ان تجد دائما الحلول

[sokasoon]

يووووووووووووووه انا مافيش مرة ادخل السينما غير ما الاقى تسقيف

وضحك وصفافير يالهوووووووى حاجة تخنق ماتعرفش تتفرج خالص

بالذات لما السينما يكون فيها شباب كتير وفى الاعيـــاد بالــذات

[M_HaFeZ]

دعهم يضحكون فانما هو ضحك كالبكاء
ما اكثر الضغوط التى تجعل الفرد منا يغدو و يروح يبكى من الالم وهو مدبوح
ارجو ان تلتمس لهم الاعذار فما تراه ليس الا قشور القشور لما بداخلهم
لا تعتقد ابدا انك اذكى او اكثر رقيا و تحضرا لان العوامل التى توافرت لك لتكوين شخصيتك و افكارك و معتقداتك لو توافرت لهم لن يكونوا اقل منك او اكثر رقيا
ما اقوله هو ان تعيش حياتك كما تريد و ليس كما يريدك الاخرون ان تحياها و ان تجد دائما الحلول

والله كلامك جميل وينم عن تفكير راسى
بس تخيل بقى لما قبل الفيلم الاقى اتنين تقريبا كده developers وبيتكلموا فى الجافا و الكلام الجامد ده .. وهوبا وقت الضحك بجد قمت من وراهم من اللى عملوه
صدقنى مش جزئيه ذكاء او ظروف او اجتماعيا انما للاسف بتلاقى ناس المفروض انها متحضره ومثقفه وبتعمل زى الغوغاء
طيب اقربها وانا راجع النهارده من الشغل
الاقى لك عربيه قدامى لكزس وحاجه اخر جمال
الشباك يتفتح ويترمى منه قشر كوز ذره وعلى الشارع
يعنى لكزس مش عربيه ب 150 جنيه مثلا او عربيه كارو وتلاقى السلوك ال***** اللى حصل ده
وبرضه مش اجتماعيا ولا ثقافيا انما تحضر

يووووووووووووووه انا مافيش مرة ادخل السينما غير ما الاقى تسقيف

وضحك وصفافير يالهوووووووى حاجة تخنق ماتعرفش تتفرج خالص

بالذات لما السينما يكون فيها شباب كتير وفى الاعيـــاد بالــذات

وكله كوم واللى حصل من كام عيد قدام سينمات وسط البلد
حاجه تكسف وتعر

[3mr Farrag]

فعلا كلامك في الصميم....
انا شايفه ذي ما حضرتك بتقول ...مش شايف ليها لزمه الزيطه و الزمبليطه الناس بتعملوا في السينما
ولا كأنك قاعد في السوق....و مالهاش اي علاقه بالمستوي الاجتماعي نهائي....
و لكن معظم اللي بيروحوا السينما شباب.....و طبعا شباب اليوم شباب العصر ..:)
مافيش اروش و اخف دما منهم.....
و انا مثلهم شاب.....بس مش بحب اعمل حاجه احس ان الناس اللي حوليا مضايقه
علي الاقل لو مش علشانهم ....يبقي علشان صورتي قدامهم....حتا لو معرفهمش

[MoToRiZeR]

انا من بتاع خمس سنين كدة كنت داخل فيلم angel's eyes بتاع جينيفر لوبيز و جيم كافيزيل بطل فيلم الام المسيح

المهم الفيلم ده من اكتر الأفلام الكئيبة اللي ممكن تشوفها في حياتك
و في مشهد كدة بطل الفيلم رايح يعيط علي قبر حبيبته و يقولها سامحيني و بتاع

و فجأة و في وسط النكد .. واحد بيضحك ضحك هيستيري .. مش عارف علي ايه .. بس تحس انه هيقطع النفس و الخلف و كل حاجة من كتر الضحك .. هيستيرياااااااا .. و فجأة لقيت السينما كلها بتضحك علي ضحكه و بقة كل الناس ميتة من الضحك

و المنظر اللي عالشاشة واحد قاعد يعيط في المقابر !

و بعدين واحد طلع في وسط الضحك كدة (زي اللي طالع من الميا ياخد نفس و يغطس تاني) .. بيقول "يا جماعة الفيلم ده نكد اوي .. هاهاهاهاا مش قادر هاهاهاهاهاها .. هو مين اللي معاه الريموت .. هاهاهاهاهاهاهاها"

و الناس طبعاَ وقعت في الأرض تاني .. و "يا ابن الفقرية .. ههههههههه" و بتاع
و انا قاعد بتفرج عالفيلم اللي في القاعة مش اللي عالشاشة
متهيألي مخرج الفيلم لو كان قاعد في القاعة كان انتحر

[Nile_Storm]

طبعا بالنسبه لي في الاعياد مش بخش سينما نهائي
بتبقي ناس غريبه بتدخل و زحمه و بلاوي بتحصل جوه
اكتر مشكله بتضايقني هناك الاستظراف الرهيب اللي بتلاقيه
في كل فيلم تلاقي واحد في القاعه عامل نفسه الظريف اللذيذ اللي احلي من الفيلم و يبدا وصلته الاستعراضيه من القلش

حاجه تضايق بجد

[M_HaFeZ]

انا من بتاع خمس سنين كدة كنت داخل فيلم angel's eyes بتاع جينيفر لوبيز و جيم كافيزيل بطل فيلم الام المسيح

المهم الفيلم ده من اكتر الأفلام الكئيبة اللي ممكن تشوفها في حياتك
و في مشهد كدة بطل الفيلم رايح يعيط علي قبر حبيبته و يقولها سامحيني و بتاع

و فجأة و في وسط النكد .. واحد بيضحك ضحك هيستيري .. مش عارف علي ايه .. بس تحس انه هيقطع النفس و الخلف و كل حاجة من كتر الضحك .. هيستيرياااااااا .. و فجأة لقيت السينما كلها بتضحك علي ضحكه و بقة كل الناس ميتة من الضحك

و المنظر اللي عالشاشة واحد قاعد يعيط في المقابر !

و بعدين واحد طلع في وسط الضحك كدة (زي اللي طالع من الميا ياخد نفس و يغطس تاني) .. بيقول "يا جماعة الفيلم ده نكد اوي .. هاهاهاهاا مش قادر هاهاهاهاهاها .. هو مين اللي معاه الريموت .. هاهاهاهاهاهاهاها"

و الناس طبعاَ وقعت في الأرض تاني .. و "يا ابن الفقرية .. ههههههههه" و بتاع
و انا قاعد بتفرج عالفيلم اللي في القاعة مش اللي عالشاشة
متهيألي مخرج الفيلم لو كان قاعد في القاعة كان انتحر

والله انت وصفت المنظر الغبى اللى بشوفه دايما
موقف نكد تام وتلاقى واحد ظريف وتانى وتالت وشغال ضحك
وبجد انا عمرى مابشوف حد بيضحك على حاجه بالسهوله اللى بيكونوها فى السينما
اللى هو لو شتمت واحد وانت بتبتسم هيضحك وهيقع من الضحك
واهو انت وضحتها فى موضوع هات الريموت والجمل المتخلفه دى
وبعدين فى شعب مصر
خلاص يعنى مفيش اى فائده

[ashour]

هو الصراحه انا مكنتش ناوى ابهت مشاركة فى الموضوع... لأنى للأسف من نفس النوعية ده... يعنى انا فاكر انى دخلت مرة فيلم لمحمد سعد و ماكنش اختيارى
من درجه الاسفاف اللى شوفتها معرفتش اكمل الفيلم و خرجت من غير حتى ما ابتسم مرة.

بس احنا عايزين حد من النوع التانى اللى حضرتك بتشتكى منه عايزين نعرف ايه دوافعه و الفيلم بيترجم ازاى فى عقليته يخلى رد فعله بالشكل ده؟؟؟