حافظاً علي حياتك لاتفعل التالي ( موضوع فكاهي )

[osama]

1-

اصحى يوم الجمعة بهمة ونشاط وجهز الافطار لزوجتك بس متنساش انك تستخدم 15 طبق واكبر كمية من الملاعق والشوك و 5 حلل من اللي عندكم فى المطبخ و 10 كوبيات لاعداد طبق بيض وسندوتش جبنة

طبعا يُراعى ترك آثار سمنة على الارض مع ترك التلاجة مفتوحةوقشر البيض فى الحوض

2-
اذا كنت بتتفرج على التلفزيون وهي عايزة تغيّر القناة .. قولها معلش الحلقة دى مهمة جدا واحد صاحبي شافها على القناةالفضائية وقالي ان الحلقة دي هى المسلسل كله

ولو كنت بتتفرج على ماتش كورةهيبقى الموضوع اسهل .. كل ما حد من اللاعبين من أي فريق يمسك الكورة قالها معلش ثوانى بقى انا حاسس ان الكورة دي جون حتى لو كان حارس المرمى ماسك الكورة والماتش واقف لان فى واحد مصاب

ملاحظة : اغلب النساء ذوو ثقافة كروية ضعيفة

3-
الصبح وانت رايح على شغلك وهى نايمة تعمد اسقاط اى شئ او خبط الباب بصوت عالى علشان تصحيها هى كمان..اشمعنى انت ؟ ولو حاولت ترجع تنام تانى قولها مادام صحيتى حضري الفطار بقى

4-
فى عيد ميلادها زيّن ليها تورتة عيد ميلادها بخمسين شمعة ولو سألتك لية خمسين رغم ان عندها 15 سنة بس ؟! اتحجج بضعف الاضاءة فى البيت وانت بتبص على النجفة اللى عندكم اللى فيها 30 لمبة مع ابتسامة صفراء خفيفة

5-
لو عاملة ريجيم اجري على السوبر ماركت ومحلات الحلويات واملى التلاجة شكولاتة وحلويات وجاتوهات .. يُراعى التجول وانت مستمتع بأكل الجاتوة امامها ( وخد بالك لا تزور)

6-
ماتنساش رأيك فى طبيخها لو عاملة لحمة قولّها حلو اوووى الفراخ دي .. ولو طبخة بامية .. جميلة اوى الملوخية دي ياحياتي حطّة عليها ايه ؟؟ ولو عملة كيكة قولّها انا بحب اشرب شاى مع البسكويت الحلو ده

7-
لو طلبتْ منك تنشر الهدوم قولها حاضر مع ابتسامة حنينة وبعد ما تخلص نشر الهدوم ادخل عليها وقولها انا نازل اجيب الهدوم اللى وقعت مني فى الشارع ولو سألتك هو اية اللى وقع ؟ قولها كل هدومك اللى كانت مغسولة مع فردة شراب من بتوعك علشان متبقاش مقصودة منك

8-
لو الزوجة قررت مسح الأرضيات فى البيت حاول انك تروح وتيجي على المناطق المبلولة متحجج بأنك محتاج تتصل ضرورى بواحد صاحبك ومرة عطشان ومرة تانية بتجيب الجرنال ومفيش مانع انك تقول انك حاسس ان التليفون هيرن كمان شوية....

9-
لو كانت مشغولة فى نظافة البيت او مع الاولاد وطلبت منك تغسل كوبايتين الشاي بتوع الصبح الموجودين فى الحوض ارجعلها كمان دقيقة من دخولك المطبخ وانت ماسك كوباية من الاتنين وهي مكسورةواسألها فى براءة : ارمي دي فين ؟؟

10-
وانت قاعد تتفرج على التلفزيون وهيّ طالع عينها فى تنظيف البيت وبعد ما تخلص وتيجي تقعد تستريح جنبك بصلها وقالها حبيبتى معلش ممكن كوبية ميّة علشان ضهري بيوجعني
انتقد طبخ زوجتك دائما ، أو طريقة تنظيفها للمنزل ، وقل لها "آن الاوان لأعلمك كيف تطبخين...

11-
قبل أن تضع ثوبك في الغسالة تأكد انك قد وضعت كمية لا بأس بها من المناديل الورقية في الجيوب !!

12-

حينما تحس أن جهازا ما يوشك على العطل اطلب منها استخدامه ، ولا تنسَ أن تتهمها بعد ذلك بأنها سبب العطل !!


13-
في ذكرى ميلادها ، قل لها " والله وكبرتِ "!!


14-
وانت تفرّش أسنانك ، لا تنسَ أن تبلل فرشة أسنان زوجتك بالماء لتظن انك قد استخدمتها لزوم النكد !!


15-
من دون مناسبة قدم لها هدية كريم تجاعيد الوجه و صبغات الشعر السوداء !!

16-

لو عندها مواعد زيارة.. دعها في آخر لحظة واعتذر عن توصيلها بسبب ارتباطك بموعد آخر!!


17-
اخفى بعض الادوات المستخدمه فى المطبخ (الكبريت)حتى لا تتمكن من الطبخ.. ثم بعد ذلك اتهمها بالتقصير لعدم تحضير الطعام لك!!


18
ضع المنبه دائما عند رأسها سواء كانت فى حاجه اليه ام لا
---------------
افتكر انا قلت لاتفعل

[محمد المشد]

بصراحة هذه النصائح غير مفيدة وغير جيدة للاسف 000 يا راجل انت بالشكل دة خليت الزوجات كأنهم اعداء وكل منكم فى وادى ! انا غير متفق معاك بكل صدق لهذه النصائح
فالزوجات هم النص المكمل لنا فى حياتنا وجزء اساسى للمعيشة ولا تنسى انها امك واختك وابنتك 000 وقد اوصانا الرسول الكريم بالنساء خيراً ومهما اختلفنا مع نساءنا يجب ان نقدرهم ونعطيهم القدر الواجب لهم
وجزاك الله كل خير 000 بس انا حاسس كدة انك ناوى تتحط فى اكياس وتتوزع على موائد الرحمن 0000000000!خلى بالك يا جميل

[3mr Farrag]

لأ فعلا موضوع جامد (مش مجامله مزيفه والله) :)

بس هو المفروض لا تفعل ذلك....ولا... افعل ذلك؟؟

[osama]

لأ فعلا موضوع جامد (مش مجامله مزيفه والله) :)

بس هو المفروض لا تفعل ذلك....ولا... افعل ذلك؟؟

+1000000000000 فعلاً ان قلت لاتفعل وهذة نصيحة مخفية وهي بطريق غير مباشر

[sniper2010]

يا جدع حرام عليك
ده ولا واحد يهودي يعمل الحركات دي :)

[ashour]

هو مش كفاية الكلمتين اللى بين القوسين
الموضوع مقصود بيه التهريج يعنى مش مقصود بيه عمل خطط على الزوجه و لا حاجة من هذا القبيل...

اعتبروها مجموعة نكت.

[Noha.M]

انا مكنتش واخدة بالى من كلمة لا تفعل و كنت متخيلة ان دة بجد !1!


دة بجد لو حد عمل فيه كدة هيجيلي انهيار عصبي

الف الف شكر عالموضوووع الفكاهى اللى يحرق الدم

[Goodle]

الف الف شكر عالموضوووع الفكاهى اللى يحرق الدم

انتي كده جبتي المفيد يا أونا biggrin24:

[tutankhamoun]

أيه كمية الشر دي يا شراني ........ الظاهر عليك عايزنا ننام واخدين كام غرزة .........

[islambana]

هتوحشنا يا اسامه بس ياريت تكتب الوصيه من دلوقتي وتحدد العزاء هيبقا فين ياباشا
بس فعلا تسلم اديك

[hamedo0]

هو فيه ايه اليومين دول لازم كل يومين تلاته حد عامل موضوع عن الحياه الزوجيه
بس بصراحه الموضوع علي درجه عليه من الفكاهة الزوجيه بس المشكله ان معظم الراجله طيبين ميقدروش يعملو كده عشام طقم السكاكين اللي في الجهاز وكليو الاكياس السوداء رخيص والبلاعه ياما بتاوي:)