خــُــط الشرقية......

[A7MED_PHARMA]

السلام عليكم



.
خبر بقاله يومين
يمكن إلي فيكم شافه على التليفزيون

شوقي المحروقي .............. أكبر مسجل خطر في الشرقية
طبعا لايخفى على أحد .. إن الشرقية مرتع للمجرمين والمسجلين خطر وده بفضل جهود رجال الشرطة
.
القبض على المحروقي تم من يومين
ودي صورة البطل المحروقي والسعادة بادية على وجهه لحظة إلتقاط صورة له مع مدير أمن الشرقية


الجدير بالذكر


إن كل من تناقل الخبر.. أكد إن الخبر بفضل الجهود ..و...و.......... وتفاني الظابط الفلاني والظابط العلاني ....إلخ إلخ

المحروقي - حسب أقوال أهالي الشرقية كلهم - إتمسك بعد الإبلاغ عنه
يــقــُــال إن البت الي كان بيــ ...... هي الي بلغت عنه
ويقال إن مباحث تنفيذ الأحكام كانت رايحة تجيب حد .. وبالصدفة وقعت في المحروقي

خلاصة الكلام في الشخصية دي
المحروقي كان أخد سمعة مبالغ فيها في الشرقية
هو صحيح ضرب نار على ظباط .. وصحيح له سوابق فوق الــ 100 سطو مسلح برغم صغر سنه الــ 28 سنة

بس الجميل في الموضوع
إن المحروقي كان في الشرقية رمز لسطوة البلطجة... ووقوعه سبب حالة من الرعب عند الحرامية الصغيرين
وخصوصا إن اعتقال المحروقي..تم بعد تصفية " متــولــي " خط الدقهلية في قريته ( دنديط) إلي هي أخر حدود الدقهلية مع الشرقية من كام شهر

.

ربنا يكملها على خير
والباقيين يقعوا

[A7MED_PHARMA]

اه


نسيت أقول إن المحروقي معظم قضايا السطو المسلح بتاعته..كانت سطو على الشرطة نفسها
ههههههههههههههههههههههههههههههههههههه

ودلوقتي الأحكام الي عليه 120 سنة

[mody3on]

لول , انا برضه قلت الشرطة مش هتكلف خاطرها وتعمل جهود مضنية وبتاع
بس الصورة مش باينة
وده فيديو
‫القبض على شوقى المحروقى.wmv‬‎ - YouTube

[osama.m]

اه
نسيت أقول إن المحروقي معظم قضايا السطو المسلح بتاعته..كانت سطو على الشرطة نفسها
ههههههههههههههههههههههههههههههههههههه
ودلوقتي الأحكام الي عليه 120 سنة

هههههههههههه
بيسرق الحكومة
عقبال الباقي بقى خليها تنضف
انت اخبارك اية الايام دي

[Dr/ P.K.Sh]

الحمد للة عقبال الباقى

[mailo]

إنت فين يابني ورقمك الجديد كام

[mrghost]

الحمد لله عقبال الباقيين يارب

[kar!m]

لا يا باشا متقبضش عليه بالصدفه ولا حاجه

اللى حصل ان الواد ده كان حرامي أهبل أصلا .. و بعد الثورة اشترى الي و بقى بيثبت العربيات على طريق الزقازيق - المنصورة .. فى الحته اللى بين القنايات - ديرب نجم (هو من القنايات أصلا) .. بس الواد قلبه ميت و كان بيثبت فى اليوم الواحد 3 أو 4 عربيات .. و الموضوع ده كان عامل قلق فى المديريه شويه.

اللى فاضحه ان اللي بييجي يبلغ بيقول واحد ثبتني وشه محروق وودنه مقطوعه .. فكل البلاغات كانت بتتثبت ضده.

و الواد ده من النوع الحريص جدا جدا .. اللى مفيش حد يعرف مكانه فعلا .. حتى مراته غالبا مكنتش تعرف مكانه .. وللأسف نتيجة بعض المرشدين الفاسدين فى جهاز الشرطه .. كان بيعرف كل ما تطلع حمله عشان تجيبه.

اللى حصل ان مدير المباحث اللي هو العميد عبد الرؤوف الصيرفي .. كلف الضباط بتكثيف التحريات عشان يعرفوا مكانه .. و عرفوا انه مستخبي فى الحي العاشر فى مدينة نصر هو هيتجنن أصلا عشان يعرف مين اللى قال عليه و شاكك فى مراته.

المهم المباحث شكلت حمله من 3 ضباط و 3 مخبرين مش معروفين .. يعني مش ضباط تنفيذ أحكام .. اللى هم محمد سليم (ضابط فى المديريه) و محمد النحال (ضابط مخدرات) و محمد الحسيني (ضابط فى مركز اولاد صقر) .. و خدوا عربيه ملاكي بتاعة واحد صاحب واحد فيهم .. و راحوا قعدوا على قهوه فى المكان اللي هو مستخبي فيه .. و على فكره مكانوش منسقين مع مديرية أمن القاهره .. و ده كان ممكن يعمل مشاكل .. بس عشان ميكونش للواد مرشد جوه المديرية يقول له ولّا حاجه.

المهم الواد نزل و كان معاه واحد تانى اسمه محمد بركات مسجل برضه (أكيد مش طبيب أسنان يعني :-) ) .. المهم الضباط و المخبرين هجموا عليه و ضربوا طلقتين فى الهوا كده .. و مسكوه .. لدرجة ان الناس فى الشارع كانوا فاكرينها خناقه .. و كانوا شاكين فى الضباط .. و الضباط طلعوا الكارنيهات عشان يتأكدوا.

الواد كان فاكر ان الضباط هيقتلوه .. عشان عمل جرايم كتير .. و بيقول انا عارف ان أنا لما هيتقبض عليه هموت و عامل حسابي على كده.

بس يا سيدى و جابوه على المديريه .. و ربطوه فى المتهم اللى معاه و 2 أمناء .. حتى الضابط اللى ربطه خد من الأمناء الطبنجات اللى معاهم .. عشان الواد مياخدهاش منهم و يهددهم ولّا حاجه.

[windofchange]

ربنا راضي عنك اه ياولاد ال........مهو لو شرع ربنا مطبق كنت مت من زمان يلا الحمدلله وربنا يرزقنا حاكم عادل يقيم شرع الله في ارضه

[Screenplays]

تعالوا شوفوا بورسعيد اللي كلها بقت سرسجيه و بلطجيه و تجار مخدرات و اللي يغيط انهم بيعدوا في انضف كافيتريات و مطاعم و الحياه عادي و تحيا الشرطه المصريه

[michohat]

اللي سمعته عنه من اهل القنايات انه بيسرق من الشرطه وبيدي الناس الغلابة بمعني انه يسرق الحكومه وبيدي الشعب الكلام ده من ناس فى القنايات

[mohamed_selim]

تعالوا شوفوا بورسعيد اللي كلها بقت سرسجيه و بلطجيه و تجار مخدرات و اللي يغيط انهم بيعدوا في انضف كافيتريات و مطاعم و الحياه عادي و تحيا الشرطه المصريه

سؤال يا باشا .... انت ساكن فين فى بورسعيد ؟

[SHNORY]

اللي سمعته عنه من اهل القنايات انه بيسرق من الشرطه وبيدي الناس الغلابة بمعني انه يسرق الحكومه وبيدي الشعب الكلام ده من ناس فى القنايات

والناس اللي ثبت عربياتها كانو حكومه برضه؟؟
وانهي شعب ممكن ياخد من مسجل خطر ؟
غير شعبه البلطجي زيه

[SHNORY]

[youtube]http://www.youtube.com/watch?v=X4Lr7_Cchw4&feature=related[/youtube]

[Screenplays]

سؤال يا باشا .... انت ساكن فين فى بورسعيد ؟

في حي المخلوع ... اشمعني ؟؟؟؟؟؟؟؟؟؟؟