يا رب سترك ,,, افيدوني افادكم الله تعالي

[mim_86]

السلام عليكم ورحمه الله وبركاته
انا اسف اني بتقل عليكم بمشكلة وقعت فيها ومحتاج دعائكم ربنا يسترها معايا ويا ريت تفيدوني بخبراتكم وتشوروا عليا اتصرف ازاي
في ال18 يوم بتوع الثورة كنت بنزل مع الناس باليل ,وفي واحد (كان مظهرة بسيط ساكن في مكان متواضع جدا ) من اللي كانوا بيقفوا معانا حفظ شكلي وأبتدي بعدها بفترة يطلب مني فلوس بحجة انه عيان ومش معاه فلوس العلاج , وبما اني بشهادة كل اللي يعرفوني طيب واهبل صدقتة واديتة فلوس ,طلبات الفلوس زادت وانا كنت ساعات بطنشة لاني مابقتش مستريحلة , و بعد كدة الموضوع اتطور و بقي يطلع يخبط عليا وعايز فلوس , قمت نزلت اخيرا و عملت اللي كان المفروض اعمله من زمان وسألت علية , طلع مدمن ومسجل خطر ,,, من ساعت ما عرفت وانا متاخد ومش عارف اتصرف ازاي؟ و ع فكرة انا رصيد خبراتي الأنسانية ضعيف جدا ومش بعرف اتعامل مع الناس ,,وبقيت دلوقتي خايف لما ارفض اديلة بعد كدة يأذيني انا او حد من أسرتي ,, يا رب سترك

[Screenplays]

انت غلطان وش

[mim_86]

انت غلطان وش

اكيد غلطان انا بس متعشم في ستر ربنا ,ولو ممكن تسعدوني وتقلولي اتصرف ازاي اكون شاكر جدا

[hugan]

ابتدي معاه بالتدريج
ماتقطعش معاه مره واحده
لان التصرف ده ممكن يخليه يتهور ويفكر في حاجه غلط
لان المسجلين ممكن يعملوا اي حاجه اي حاجه ممكن تخطر او ماتخطرش علي بالك
يعني من 50 لي 40 ل30 ل20 ل10 لمفيش خالص
وكل مره
اشتكي من الظروف والشغل والدنيا والمصاريف
يعني من الاخر تصعب عليه وتخليه يطلع اللي في جيبه ويدهولك
وماتحاولش تكون عنيف معاه
انما كله بهدوء وابتسامه

[SHNORY]

عادي خالص
قوله متجيش تخبط عليا تاني ولا تطلب مني فلوس
ولما تشوفني متكلمنيش
كانت فلوس زكاه وخلصت خلاص
ولو بلطج قوله لو جيت تاني حتصل بالبوليس

[mim_86]

اخواني الكرام SHNORY& hugan
الف شكرا ع اهتمامكم وردكم ,,, لا أراكم الله تعالي مكروة في عزيز لديكم

[rompo10]

قوله مش معايا فلوس خالص وانا مزنوق وعندي مشاكل لو معاك انت فلوس سلف سلفني

[احمد المصرى]

قوله مش معايا فلوس حاليا وقوله دا انا كنت عايز استلف منك بس الاهم انك تمنعه من انه يجى البيت ولو مسجبش بالهدوء يبق بالرخامه والقوه

[هيثم المنياوى]

أخى الفاضل جزاك الله كل خير وأعلم أن صنائع المعروف تقى مصارع السوء وليس العكس
فكن مطمئن البال هادىء النفس وأعلم انك طالما صدقت الله عز وجل فى صدقتك فلن يضيعك

ولكن حبيبنا وقرة أعيننا المصطفى صلى الله عليه وسلم قال"المؤمن القوى خير وأحب إلى الله من المؤمن الضعيف"
ولاأن المال من المصالح المرسله التى أوصانا ديننا بالحفاظ عليها فيجب عليك أن تعمل جاهداً للحفاظ على مالك فضلاً عن نفسك وأهلك
ولذلك وجب عليك أن تكون مؤمناً قوياً وتتصدى بكل ما أوتيت من قوه لمثل هؤلاء الذين لايراعون شيئاً فى معاملاتهم
وإن اردت أن تلجأ إلى أقسام الشرطه فبها ونعمه وإلا أن تتصدى له بنفسك
وإن لم تجد حلاً فأتمنى أن تراسلنى على الخاص.....والله المستعان

[mim_86]

اخواني الكرام انا متشكر جدا ع وقتكم ومجهودكم لمساعدتي
الف شكر استاذ هيثم و استاذ رامبو واستاذ احمد
انا بحاول اطمن نفسي بس مش عارف , ويدوبك نمتلي ساعتين بالعافية
اللهم رحمتك ارجو فلا تكلني الي نفسي طرفة عين , واصلح لي شأني كله, لا إله إلا أنت

[dongol123]

نبرة الخوف الي في كلام حضرتك دي هي اللي مقوياة عليك و اعتقد انه حاسس بيها علشان كده بيطلب منك بقلب قوي و هو واثق انك خايف منه

أنا لو في مكانك و ما قدرتش عليه فهأجر اللي يخليه يلعن اليوم اللي اتعرف فيه عليه
الدنيا ما بقتش زي الأول و الخوف هيجيب نتايج عكسية تماما
قوي قلبك و اضربه بالجذمة أول ما تشوفه و صدقني هو هينساك اول ما يعرف انك مش خايف منه

[المنسي]

عشان تتقى شره ابدا معاه بالتدريج يعني قلل الفلوس على مراحل لغاية ماتوصل انك تقوله مش معايا والظروف والحوارات وحال البلد والكلام ده مرة على مرة مش هيفكر حتى يرمى السلام عليك بعد كده

[mim_86]

نبرة الخوف الي في كلام حضرتك دي هي اللي مقوياة عليك و اعتقد انه حاسس بيها علشان كده بيطلب منك بقلب قوي و هو واثق انك خايف منه

أنا لو في مكانك و ما قدرتش عليه فهأجر اللي يخليه يلعن اليوم اللي اتعرف فيه عليه
الدنيا ما بقتش زي الأول و الخوف هيجيب نتايج عكسية تماما
قوي قلبك و اضربه بالجذمة أول ما تشوفه و صدقني هو هينساك اول ما يعرف انك مش خايف منه

يا ريني اعرف اعمل ربع اللي قولت علية , خليني اكون صريح معاك واقولك اني هافية مع الأسف من ايام المدرسة وزمايلي بيستكردوني ,انا عمري ما عرفت اتعامل مع الناس , وسهل اوي يضحك عليا , وعمري ما فكرت ان اتجوز لأني عارف اني مش حعرف احمي بيتي ,,, اسف ع التفاصيل المملة دي شكرا ع ردك واهتمامك

عشان تتقى شره ابدا معاه بالتدريج يعني قلل الفلوس على مراحل لغاية ماتوصل انك تقوله مش معايا والظروف والحوارات وحال البلد والكلام ده مرة على مرة مش هيفكر حتى يرمى السلام عليك بعد كده

ربنا يكرمك انا متشكر جدا ع ردك ومساعدتك ,,,مفيش قدامي حاجة تانية اعملها غير اللي قولتلي علية,,و يا رب الكلام دة يجيب معاه نتيجه

[mim_86]

انا عايز اشكركم انكم ادتوني الفرصة اني اتكلم معاكم , وانكم استحملتوني وشاركتوني بخبراتكم , جزاكم الله تعالي كل الخير

[هيثم المنياوى]

يا سيدى الفاضل للمره الثانيه لايجب على الإطلاق أن تترك الأمور هكذا كن مؤمناً قوياً ولن يخذلك الله

واسمحلى أقولك حتى إن مت ستموت شهيداً بنص حديث المصطفى صلى الله عليه وسلم