ناويين تشغلوا ولادكوا بإيه في الصيف؟

[OlaOsman]

بس يا أحمد..

بطل يا علي..

بلاش ترخمي على أختك يا بسنت..

كفاية بأه جيمز ع الكمبيوتر يا ولاد..

خلاص بأه space toon اشتكت و MBC3 قفلت خلاص.. عينيكوا ياولاد..

مافيش لعب كورة في الشقة..

مش فاضي النهاردة أوديكوا النادي.

طبعا دي الحوارات اللي بتدور في كتير من البيوت.. أجازة و أطفال لازم تنشغل و زهق في زهق.. طيب ايه الحل؟

تعالوا يا آباء و يا أمهات تستفيدوا من تجارب بعض في شغل ولادكوا في أنشطة في الصيف.. انا عن نفسي هاشوف أصحابي بيشغلوا ولادهم في ايه و أقول لكوا على المنطقة اللي همه فيها و الأسعار و اللي شايف انه ده مناسب ولاده يشترك لهم فيه.. سواء نادي بسعر معقول.. مكتبة مفيدة فيها أنشطة.. مراكز تعليم كمبيوتر للأطفال.. رسم.. تلوين.. إبداع.. و القائمة طويلة بأنشطة كتير :)

[OlaOsman]

عندكوا مثلا زدني زي كل سنة عاملة نشاط صيفي للأطفال من سن 6 لسن 16.. مع ان 16 دول ما بقوش أطفال خلاص :)

همه مقسمينهم تبع المراحل العمرية و كل مرحلة ليها برنامج.. طبعا معروف ان برنامج زدني للأطفال بينمي عند الأولاد مهارات الإبداع و القيادة - بس طبعا مش القيادة بتاعتنا اللي بنقود بيها العربيات - و ازاي يشغل مخه في كل حاجة و ازاي يقدر يقود فريق و يحسن التصرف في الأمور اللي ممكن تواجهه فجأة و روح المثابرة و الإصرار.. الخ.

عموما ده الويب سايت اللي فيه التفاصيل http://zedny.org/ar/Z4K_Summer08.asp و اللي عايز تفاصيل اكتر ممكن يتصل على 0114435111 او يوصل لحد مركز التعليم الملحق بمسجد رابعة العدوية في مدينة نصر الدور التالت و يسأل عن زدني، وهناك هيلاقي شباب صاعد واعد جامد بيرد على كل أسئلته.. و على فكرة الحجز بدأ بالفعل.

[OlaOsman]

فيه كمان مكتبة في فيصل تقريبا أو الهرم، غير الكتب فيها أنشطة تانية زي الرسم و التلوين و اللعب و بتقبل سن صغير زي 5 سنين.. هاسأل على التفاصيل و أقول لكوا ان شاء الله.

[hn_kamal]

الاشتراك فى جامع لتعليم وحفظ القرآن الكريم وكذلك أنشطة رياضية مثل السباحة

[محمد المشد]

اعتقد ان الامر بهذا الشكل اعلان عن زدنى مش موضوع عام 000 وكنت افضل ان نقرأ ونسمع من الاخوة الامر بشكل عام ولايقتصر على موقع عمل واحد

[MoToRiZeR]

مكتبة مبارك في الجيزة مكان جميل برده
و اللذيذ ان اولياء الامور هيلاقوا اللي يعجبهم هما كمان هناك
و امان اوي و فيها جنينة كمان جوا
و فيه اشتراك عائلي
بجد مكان جميل اوي

[OlaOsman]

الاشتراك فى جامع لتعليم وحفظ القرآن الكريم وكذلك أنشطة رياضية مثل السباحة

جزاك الله خيرا على الإفادة :)

يا ريت لو فيه حاجة جنبك بتقدم الأنشطة دي أو مسجد كبير تقول لنا هو فين و نظامه ايه.

[OlaOsman]

اعتقد ان الامر بهذا الشكل اعلان عن زدنى مش موضوع عام 000 وكنت افضل ان نقرأ ونسمع من الاخوة الامر بشكل عام ولايقتصر على موقع عمل واحد

الأخ محمد.. الصراحة انا احترت أرد عليك أقول لك ايه.. انما عموما إدارة المنتدى هي المعنية بإذا كان ده إعلان ام لا و ليهم مطلق الحرية انهم يلغوا المشاركة بتاعتي لو شافوا فيها أي مخالفة و لهم علي تقبل القرار أيا كان :)

ما قلتلناش.. بتشغل ولادك بإيه في الأجازة؟ :)

[Eng.Mohamed Amen]

موضوعك جميل قوى يا علا بارك الله فيكى

أحسن نشاط يفيد الأولاد مع العلم إنى مش متجوز أساسا

أى جامع قريب من البيت يتعلموا فى قرآة وترتيل والإدغام والتفخيم فى القرآن والحفظ

أيضا وحضور دروس دينيه فى المساجد .أو الإشتراك فى نوادى رياضيه .أو الإشتراك

فى مركز تعليم الكمبيوتر والكتابه والصيانه .الإشتراك فى مركز تعليم لغات إنجليزى أو

لغه أخرى علشان يبقى ليهم مستقبل لو حبوا يشتغلوا والشغل طالب عده لغات .فى أنشطه كتيره جدا وأنا كتبت على أحسن الأنشطه اللى أقدر أفيدكم بيها .وشكرا تانى مره ليكى على الموضوع .

[medo_2060]

احسن مكان هوالمكتبات العامه

[Nader]

لو 12 ولا 13 سنة هخلية ينزل يشتغل ويحتك بالدنيا

ان شا لله يشتغل بياع في سوبر ماركت قريب من البيت

او يعمل مشروع من مصروفي يشتري سمك ويربية ويخلية

يتكاثر ويبيعة "الولدة" بعد كدة، نفس الفكرة عن العصافير

بس بتاخد وقت اطول. مش علشان هو ابن مش عارف مين

وساكن في حتة مش عارف مين فاربية ويطلع لي في الاخر

سوسو ولا توتو ويتفرم تحت عجلات قطر الحياة الغاشم.

الولاد لازم يتعلموا الاعتماد على النفس من الصغر والله هينفعهم جداً

الكلام دة لما يكبروا، هيبقى عندهم خبرة من احتكاكهم بالحياة.


اما الكمبيوتر والانترنت فكل الاطفال من سن 4 سنين بيبقوا عفاريت

في الكمبيوتر خلاص معادش الكمبيوتر من العلوم المبهمة.




مفيش مانع في فترات وقت الفراغ ان الولاد يتعلموا لغة اخرى غير الانجليزية

الماني ايطالي روسي الاطفال اللي اعمارهم صغيرة بيلقطوا اللغات بسرعة.

وطبعاً مش هنغفل الجانب الديني بس يكون عن طريق احد الوالدين -إن امكن-

وميكونش بصورة علوم بحتة يكون بطريقة غير مباشرة.

[د.محمود صلاح]

منذ أكثر من 18 عاما وأنا أعمل متطوعا بالأنشطة الصيفية للأطفال فى أحد المكتبات العامة وأحد الأندية الإجتماعية فى مدينتى المنيا واكتسبت العديد من الخبرات من خلال التعامل مع الأطفال وبمناسبة فتح موضوعك الشيق اسمحوا لى بتذكيركم ببعض خبراتى فى هذا المجال من خلال مشاركتى هذه

[الطنطاوي]

فعلا زدني فيها ناس كويسين جدا وأنا أعرف دكتور محمد عمر وهو راجل محترم جداً واللي هايتكلم معاه هايستفاد منه جدا جدا. بالاضافة لإنهم عندهم توجه ديني كويس وعندهم رسالة عايزين يوصلوها للمجتع يعني مش الفلوس هي الهدف
وده مش اعلان عن المركز أكتر ما هو نصيحة لاخوانا في المنتدى.

وقبل ما انسى شكرا لصاحب الموضوع لأن فعلاً الموضوع ده مهم جداً ومعظم الأباء بيفرحوا لما ولادهم يفضلوا قاعدين أمام الكارتون أو في النادي أو في الشارع مادام ما فيش مشاكل وبينسوا لإنهم واجب عليهم إنهم يربوا ولادهم صح
وللعلم التربية شئ صعب جداً بس ممتع خاصة لو الواحد احتسب ده عند ربنا


نسأل الله العلي العظيم بأسمائه الحسنى وصفاته العلى أن يربي لنا أبنائنا على رضاه وأن يجعلهم لنا قرة أعين

[sab3aawy]

اعتقد ان الامر بهذا الشكل اعلان عن زدنى مش موضوع عام 000 وكنت افضل ان نقرأ ونسمع من الاخوة الامر بشكل عام ولايقتصر على موقع عمل واحد

اسمحلى اختلف معاك لانى شايف ان علا فتحت الموضوع لكثير من الأفكار ،و فى نفس الوقت هى من طرفها قدمت احدى الأفكار التى قد تفيد تاركة مساحة لكل من يرغب فى تقديم فكرة أخرى،خاصة وان المركز المشار اليه مركز خيرى غير هادف للربح يقوم بتقديم خدمات اجتماعية لكل الفئات الاجتماعية والعمرية باسعار رمزية

[OlaOsman]

فيه كمان مكتبة في فيصل تقريبا أو الهرم، غير الكتب فيها أنشطة تانية زي الرسم و التلوين و اللعب و بتقبل سن صغير زي 5 سنين.. هاسأل على التفاصيل و أقول لكوا ان شاء الله.

المكتبة لا في فيصل و لا الهرم.. دي طلعت في شارع البحر الأعظم في الجيزة و اسمها مكتبة البحر الأعظم :)