شكلى كده ..... قطعت الخلف ...

[hosamsief]

استنوا شوية ... عقبال ما استجمع قوتى علشان اعرف احكيلكم على اللى حصل ....



مش عارف ابدا منين .... بصوا .. انا برجع من شغلى اليومين دول متأخر .. و الولاد بيأخروا الغدا علشان ناكل كلنا مع بعض ... طبعا الباشا الصغير مبيستحملش الكلام ده ... ففتح التلاجه و دعبس فيها شوية ..و طلع طبق كان فيه جبنه قديمه بالطحينه و الطماطم ... و اكل شوية و قام محلى بطبق فراوله ... رجعت انا من الشغل متاخر ... مفيش شوية .. و لاقيت الواد عمال يهرش زى الكلب الجربان ... حساسية مسكت فى دراعه و رجلية ... اتصلت بواحد زميلى قالى انزل هاتله مرهم معين ... من الصيدلية ... طيب .. نزلت انا على طول ...


الكلام ده بقى امتى ... حوالى 12 بليل ... طبعا الجيران حواليا ... بترشد استهلاك الكهرياء و شايلين اصلا لمض السلم ..نزلت بسرعه من السادس .. و جبت المرهم ... وطالع بسرعه علشان الحق الواد قبل ما يقطع فى نفسه ......


و عمال اخد سلمتين فى سلمتين .. كانى داخل سباق حواجز ... و فجأة انزل برجلى اليمين بكل تقلى على شيىء مكعور كده فى الضلمه و يلية حته طريه .. و اسمع صوت صرااااااااااخ .. نووووووووووووووووووو وووووو بخخخخخخخخخخخخخخخخخخ .. و خرابيش فى سمانه رجلى ... و عض فى الشبشب ............ و حاجات بتجرى يمين و شمال . يخرب بيت كده ..... بشكل تقائى نطيت لفوق و قمت نازل تانى برجلى التانية على حاجه مبرومه وطويلة لفت تحت الشبشب و اسمع بقى ... و نووووووووووو و بخخخخخخخخخخخخخ ...
تخيلوا بقى .. و فى الضلمه .. و انا اصلا قلبى كان هيقف من السلم .. دوست على دماغ قطه .. كانت حشرة بوزها فى شويه اكل .. و المصيبه ان مقاس رجلى 45 .. يعنى دوست على دماغها و افاها و كنت داخل على ديلها كمان ...
و لما حاوت انقذ نفسى نطيت على ديل دكر قط شرس ... فرج عليا العمارة كلها ... صوتنا احنا الاتنين كان جايب اخر الشارع .....


لاقيت الاستاذ براد جارنا ... فتح الباب .. و طلع بوزة برة كده علشان يستكشف الامر .. و لاقانى مكعور على السلم و المرهم طاير جنب الباب عندة ... وقالى خير يا استاذ حسام .. سلامتك ... كوبايه ميه بسرعه .. رجلك بخير.......مش تخلى بالك .....



طبعا ان كنت فى حاله يرثى لها .. و كنت عاوز اقوله.. يطلعلى قاعدة الحمام على السلم ... و رديت عليه و انا مخنوق و عمال انفض البنطلون .. ابوس رجل اهلك .. مترميش اكل تانى على السلم و ابقى نور النور لوجه الله ...


طلعت اديت المرهم للمدام ... و قولتلها ابعتى الواد بقى يجيبلى مرهم جروج للخرابيش .............

[w-m-a]

تعيش وتاخد غيرها
بقى قطط تعمل فيك كده؟

[magid1010]

ههههههههههه والله انت مش ممكن انا فطست على نفسى من الضحك الف شكر ليك و سلامه ابنك

[M.Elgergawy]

ههههههههههههههه
يا راجل انت فين وحشتني كتير من ايام الحديقة الدولية :)

[ahmedeihab]

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههههههه و الله العظيم انا بدخل اقرى مواضيعك علشان اضحك
بس تعيش و تاخد غيرها
ادى اخرت العيال و اللى ييجى من وراها
الحمد لله لسه متجوزتش
^_^

[fiat128man]

انا دمعت من الضحك والله ربنا يجازيك خير ........ألف سلامة عليك و طمنا علي ابنك

[mohammedabdallh]

والف سلامه عليك والى الولد
وده العادى

[mesaharaty]

باقول إيه بقى ونصيحة لوجه الله تعالى

موضوع الخرابيش ده يرجى عدم الإهمال فيه .
اكشف واعرض نفسك على طبيب لتطمئن بإذن الله لأن أنا كان عندى تجربة - غير شخصية - مش حلوة مع القطط ولا أريد أن أحكيها فى هذا المجال ولا أريد أن أخوفك . بس المطلوب حضرتك تطمئن على الخرابيش دى .

[TOOLA]

فكرتنى بحكاية منيلة كده بردو, و انا عيل كنت متقردن اوى بصراحة, كنت فى تالتة اعدادى و لسه كنت مشترك فى فريق الكونج فو فى النادى مباقليش شهر و انا اساسن كنت عايش دور بروس لى خلقة.

المهم نازل العصرية فى الصيف على 6 العصر كده, و بما ان الدنيا برا مكنتش ضلمت فمكانوش نوروا نور السلم لسه, و انا كنت من النوع البمسك طربزين السلم و انزل نط مش جرى حتى, يعنى اخودلى على الاقل 8 سلمات فى النطة (الخمس سلمات كنت بعتبرهم جرى مش نط), المهم كنا ساكنين فى تالت, و هوبا ناطيتين كنت فى التانى و زيهم كنت فى الأول, ومتجه على الأرضى باه, وباخود النطة وعليت لفوق, والاقى ايدى خبطت فى حاجة سودة ملظلظة و "نيوووووووووووووووووو" و الحجة سابت كل حاجة و تقريبا الفكرو انها نطت على وشى.

طبعا انا سبت ام الطربزين رغم انى كنت نطيت خلاص, وبحوض الموكوسة بايديا لافاجىء ان النطة اتقلبت معرفش ازاى, وشى تحت و رجليا فوق و هووووووووووووب, نزلت على الأرض بكف ايدى الشمال (و انا كنت طبعا ايامها رفيع اكيد مش بخودلى باه 8 سلمات فى النطة).

المهم طبعا من قرصة الخبطة قعدت متكوع على السلم بتاع 5 دقايق, و فى الأخر قمت قايم و مثبت ايدى علىجنبى كده و من الوجع مش عارف احركها بردو, و رحت نازل الشارع الحق صحابى قبل ما يسيبونى و يروحو النادى.

المهم وصلتلهم و قعدت اريح و لأول مرة ببص على ايدى بعض الوقعة, لأفاجأ بمنظر غريب, كفى زى ما يكوت فصل عن الساعد, و الجزى الفى النص ده (عظمتى الرست او الرسغ زى ما بيقولو) واقع لواحدو لتحت, طبعا شفت المنظر ده, رحت راقع بالصوت و هاتك يا عياط ,و طلعت لأهلى بسرعة, والدتى كا هيغمى عليها و والدى رايح قايم طاير لبس و خدنى و نزلنا طيران على المستشفى, المهم عشان مدخلكومش فى قصص الراجل المدشش الكان جنبى فى الطواريء و عمال يصوت و انا اعيط و بعدين غرفة العمليات و الكلام ده, طلع حصلى كسر مضاعف فى العظمتين الفصلين بين الكف و الساعد, يعنى فعليا كفى كان مفصول عن ايدى, و طبعا كان لازم عملية استعدال و جبس شهرين تقريبا.

و بهذا انتهى مستقبلى فى رياضة الكونج فو للأسف (بعد شهر تدريب و امال بدخول البطولة :d), بس الحمد لله ايدى بقت تمام, معأن رستى اليمين لغاية دلوقتى أضعف من رستى الشمال شوية, حتى فى الجيم كانت دايما هيا البتنخ الأول قبل الشمال, بس الحمد لله كله بيعدى.

اموت بأه و كنت اعتر على القطة بنت ال ......................

[mkhayiat]

هههههههههههههههههههههههه ...مبدع يا استاذ حسام ...والف سلامه لحضرتك ولابنك

[Screenplays]

جارك اسمه براد ؟ براد شاي و لا اسمه براد brad ؟ و روح اكشف علي موضوع الخرابيش دي عشان التلوث و ربنا يخليلك العيال

[aif]

جارك اسمه براد ؟ براد شاي و لا اسمه براد brad ؟ و روح اكشف علي موضوع الخرابيش دي عشان التلوث و ربنا يخليلك العيال

ايون انا برضو لفت نظري brad gilbert جارو ده
بس موقف تحفة يا حسام
هههههههههههه
ههههههههههه
طيب والقطة حصللها ايه ؟؟؟؟
دا انت اكيد فعصت أهلها وبقت قطاقيط

[medoghaly]

هههههههههههههه انت راجل زى العسل يا استاذ حسام ربنا يخليك الف سلامة عليك

[ahmedhawas]

هههههههههههههههههههه .. جامدة يا حسام بيه .. حبيبي.
وخصوصاً الحتة دي .. عجباني أوي:

يعنى دوست على دماغها و افاها و كنت داخل على ديلها كمان ...

عشان فكرتني بموضوع قديم لشنوري بيك
http://www.nilemotors.net/Nile/112440-a.html

وبدات ادوس بنزين
حطيت رجلي في كل حته من العربيه لحد ما لقيت الدواسه وهي عباره عن حاجه صغننه اوي كده في اقصي يمين رجلك من تحت
يعني تزنق وش رجلك في العربيه وبالصباع الصغير تدوس عليها
وطبعا مش ححكيلكم عن باقي الدواسات لان الدبرياج والفرامل بيتحركوا مع بعض واصلا رجلي بتدوس عليهم مع بعض
تقريبا دا نوع من انواع الترابط الاخوي والمساواه بين الدواسات (اشمعني واحده تنزل والتانيه لاء)

[lad]

هههههههههههههههههههههههههههه والله ضحكت من قلبى