فضفضة مع اخواتي بشخصي مش بصفتي

[Karim_Monir]

السلام يا اهل نايل موتورز
بقالي كتير ما فضفضتش معاكم
عندي مشكلة رخمه شويه وبقالي شويه محرج اتكلم فيها لكن طفح الكيل بجد
انا معايا رقم موبايل واحد ومبعرفش امشي بموبيليين دي خالص
ونفس رقم الموبايل اللي كلكم تعرفوه وعشان بحترم اي حد يتصل بيا لانه ممكن يكون في مشكلة حقيقية بتعامل باهتمام مع كل تليفون يتصل بيا حتى لو ماردتش عليه لسبب اجتماع او غيره برجع اكلمه
دلوقتي بقالي كام شهر تليفونات تلفونات
الو نايل موتور
انا لقيت نمرتكم عالنت
الاقي فلتر هوا ليبرتي 2002 بس عايزاه الاصلي وقولي بكام هابعت السواق ياخد
وطبعا مش سايبالي فرصة ارد
الو نايل موتورز اسلام مشهور انال عايز مفصلات لامبو دورز

الو نايل موتورز عايز اتوبيس رحلات 50 فرد للعين السخنة

الو نايل موتورز الاقي فين كتاوت 128 يكون اصلي

والله والله في تليفونات منهم بتكون الساعة 2 صباحا
وفي تليفونات اكون معايا تليفون تاني ويفضل يتصل يتصل اكتر من 7 مرات
ولو قفلت عليه يتصل تاني وتالت وزعلان اني مردتش عليه
تليفوني محطوط في موضوع مركز السمكرة والدهان عشان لو محدش عرف يوصل لاحمد قدورة مدير الورشة يرجعلي
لكن مش عارف ايه علاقة تليفوني بقطع الغيار
الفكرة اني بكون مهذب لابعد الحدود ولما اقوله طلبك مش عندي يزعل ويقلي حاطط تليفونك عالنت ليه
الطريقة اللي بيقول بيها النت بتدل على انه اشتري كمبيوتر امبارح وخد وصله ومعرفش وصل لرقمي الله يخرب بيت جوجل
والله لو حكيتكلم كمية الاتصالات المستفزة لن تتخيلوها وطبعا ساعات بتيجي وانا في اجتماعات مهمة او وقت محتاج فيه تركيزي
انا بقفل التليفون وانا نايم لكن ده مش مبرر انه يتصل 2 صباحا ومرة تانية كنت في اجازة مع عيالي ونسيته مفتوح واتصل 6:30 صباحا
وعبثا تحاول تفهم الناس ان طلبهم مش عندك مفيش فايدة
النهاردة الصبح اول مافتحت الموبايل ولسه ماوصلتش الشغل

الو نايل موتورز اسلام معايا
اسلام مين النمرة غلط
اسلام مشهور حضرتك قولتلة لاء والله ولسه هاقفل
استني استني
خير حضرتك
انا عندي سيات قرطبة وعايز اغير فيها كل حاجة
موتور جامد وتابلو حديث وبيبان بتفتح لفوق وجنوط واو وكراسي ريكارو وعدة صوت فاجرة بقي بترزع ونور تحت العربية
قولت اخدة على قد عقلة طريقة كلامة صعبة قوي وانا تعمدت اكتب الفاظة
انا معايا فلوس بس قوللي هاتخلصها في قد ايه
قولتلة انا مش بعمل الكلام ده لو سمحت النمرة غلط
يقولي انا معايا عشيين(يقصد عشرين الف)
قولتلة الموتور والعفشة والبودي يا دوب العشرين مش صالون وابواب لامبو وجنوط واو الخ الخ
قاللي ليه ده كتيرر قوي
قولتلة هو انت عارف انت عايز ايه موتور ايه وعفشة ايه وصالون ايه وبعدين بتقول كتير
هو انت بتقولي الكلام ده ليه هو انا قولتلك انا هاعملهملك

دي عينات والله ويوميا مش اقل من 5 تليفونات من دي ومحدش يقولي غير رقمك لانه صعب ومش حل
حد عنده حل

[ashouhdy]

هههههههه جامد جدا الحوار ...


غير رقمك ! وخلي الرقم القديم فى الورشة بس ورقمك الشخصى الجديد معاك برة الورشة

انا اصلا ماشي عامل الموبايل سيانت بكرة التليفونات الكتير

[A.Saad]

انا عملت سيرش على جوجل برقم تليفونك دلوقت
مفيش غير بعض مواضيع نايل
انت كدة حد موزعه على الناس او الناس فهمت نايل غلط
بس ممكن نعمل شغل
شوف اللى عايز حاجة ونعملها وناخد عمولة
ملاقيش عندك اجهزة كهربائية وملابس وغيارات رجالى

[ابو سيف]

بصراحه مشكله
هقولك حل
غير رقمك و خليه للشغل الحقيقي و الناس القريبه منك و اصحابك و العيله و الحوارات دي
رقمك الجديد يعني استخدامك اللى انت عايزة
و رقمك القديم المعروف دلوقتي اقفله و انت في الشغل و وانت نايم او و انت في اجازة
يعني ساعتين تلاته اربعه كل يوم مفتوح
و شكرا

[kar!m]

أمال بأه لو اشتغلت خدمة عملا فى فودافون ولا فى موبينيل أو شركة من شركات الانترنت هتعمل ايه؟

ناس كتير جدا تقول له اكتب كذا على الكيبورد .. يقول لك أصل أنا مبعرفش أكتب انجليزي .. أمال شغال على الانترنت ازاي؟!

غير بأه اللى طلب خدمه و استخدمها و عاوز يرجعها و فلوسه ترجع له .. و يتخانق و يشتم.

عموما الناس دي أهالينا و اخواتنا .. و الحال اللي وصلوا له ده من الفساد اللي كان فى البلد .. اللي خلى الوعي صفر فالميه.

و ربنا يصلح الحال.

[maka]

اما حد موزع نمرة تليفونك غلط اما حد عاوز يشتغلك و يزهقك

[mado83]

ضريبه النجاح والشهره ياكيكو
استحمل فى سبيل نايل موتورز

[Screenplays]

دي ضريبه النجاح ... الله ينور

[أبو صلاح]

حاسس ان الموضوع ده رسالة موجهة لحد ما

لكن عامة اللي انت فيه ده عادي
انا في مرة دخلت على صفحتك هنا وشوفت الناس اللي بعتالك رسائل وطلباتهم الغريبة
وتوقعت ان ده ممكن يحصل اكتر منه في التليفون

[MTAK]

دى ضريبة نجاح و ملهاش حل الا اذا غيرت نمرة التليفون

بس ما تنساش تعمل موضوع اعلانى هنا و تقولنا النمرة الجديده :)

او من الممكن توظف سكرتيره مخصوصه للرد على التليفون (هو انت شويه يا باشا )

ربنا يعينك
================
فكرتنى بواحد صاحبى كان عامل برنامج لمحل ملابس و طبعا هو شغال من البيت

و عمل ان اى فاتورة تتطلع من المحل يكتب اسفل منها بخط صغير تصميم و برمجه فلان

كنوع من الانشار يمكن حد يقصده فى برنامج مشابهه

و لكن عوضا عن ذلك كان يستقبل كل يوم مكالمات بعدد شعر رأسه عن الرغبه فى تغيير فانله بحمالات او سؤال

هاتفتحوا بكره امتى لحد ما راح لصاحب المحل و غير الكود بتاع الحه دى و شال اسمه نوهائى

[zangry]

ربنا يصبرك

[totti78ali]

يا باشه دى ضريبه النجاح و الشهره
بس هو فى حل يمكن ينفع انك تفعل البريد الصوتى و تشوف كل يوم الرسايل الى جيالك المهم ترد عليه و الى مش مهم كنسلو

[mido]

شغل ال voice mail و خصص ساعه تسمعه فيها اما تروح و حط فى رسالة ال voice mail ان الناس تسيب رساله و كمان تبعتلك sms و تقول عايزه ايه و دمتم

[koshary]

انا حاسس بالموضوع ده بجد ياكريم بس انت لازم تستحمل شوية او تشيل رقمك من عالنت من المواضيع واللى عايز الرقم يبعتلك رسالة خاصة وخلاص

[MaZaGAngeE]

ده طبيعي جدا في اي شغل او مكان ناجح