ما رأيكم دام فضلكم في الليزك

[Casio2000]

السلام عليكم

كنت أرجو من الأعضاء الكرام مشاركتنا بتجاربهم أو معلوماتهم المؤكدة عن عملية الليزك - و هل هي أمان و لو ليها أثا جانبية - جزاكم الله خير

[mohammedabdallh]

80 فى الميه من الداكتره بتقول
لو هتقدر تستعمل النظاره او العدسات يبقى ملهاش لازمه العمليه
وفى ناس وخداها تجاره
بس اخطاء العمليه ضعفيه واخطرها ضعيفه
بس الخطا لقدر الله ممكن يضيع عينك بس دى حالات نادره
وقبل ما تخش العمليه بتمضى على ورقه في معناها انك المسؤل عن الى هيحصل والدكتور ملوش دعوه
يارب اكون افدك
على فكره
أ / كريم منير
لسه عاملها والحمد لله بيشكر فيها

[abotaleb2012]

أنا عملتها من حوالي 8 سنين وممكن أكتر شوية
والحمد لله زي الفل مع العلم أن الموضوع تطور أكتر كمان
بس أهم حاجة أن الدكتور بعمل الأول حاجة إسمها تضاريس قرنية ويقولك ان العملية تناسبك أم لا
وبالشفاء ان شاء الله

[Egyzizo]

الليزك دى ربنا أنعم بيها على المرضى علشان تلغى من حياتهم البؤس بتاع عدم القدرة على الاستغناء عن النظارة وجحيم العدسات.

من 6 سنين ، بنت قريبتى ( 22سنة) كانت خايفة منها ، شجعتها ومشيت معاها فى موضوع العملية ، والحمد لله نظرها النهارده ستة على ستة ، وبتقول يا ريتنى كنت عملتها من زمان.

دى من نعم ربنا على مرضى ضعف الابصار .. بتغير حياة المريض بالفعل.

مع العلم ان مش كل المرضى يصلح لهم الليزك لأن فيه فئة قليلة لديهم ما يسمى بالقرنية المخروطية ودول بيلجأوا لوسائل أخرى ..

[احمد المصرى]

انا عملتها من حوالى سنتين تقريبا والحمد لله هيا كويسه جدا بس عيبها ان اول اسبوع بتلاقى عينك بتزغلل جدااااااااا ودا طبيعى جدا وبتلاقى الزغلله دى بتقل تدريجيا وبيقعد موضوع الزغلله دا حوالى شهر عقبال لما يروح خالص بس عادى مش مشكله جوهريه



ثانيا جفاف العين العين بيكون فيها الدموع قليله نسبيا عن الاول ودا علاجه قطره معينه الدكتور كان كاتبهالى وعلى طول بستخدمها يعنى ممكن كل يوم او يومين واحيانا بقعد بالاسبوع مش بستخدمها دى العيوب ال حصلت معايا بس عموما العمليه مفيده جداااااااااااااااااااااا

[dongol123]

الحمد لله عملت العملية دي من 3 سنين و مفيش أي مشاكل

بعدها انا فعلا شوفت الدنيا بالالوان بعد ما كانت ابيض و اسود

[tiger76]

أنا عملتها من سنتين بعد سنين تردد و الحمد لله ارتحت من النظارة و قرفها

[ahmedfd]

طبعاً ألف سلامة و مبروك لكل اللي عمل الليزك بس بما إن الموضوع فيه نسبة قلق و لو بسيطة، يا ريت الموضوع القيم ده يكمل بأسماء الأطباء الموثوق فيها أو المراكز المحترمة اللي بتعملها بضمير مش التجار اللي بيحسبوها بالراس و الزبون.

[ramyhekal]

انا كمان عايز اعملها بس اوقات بكون مع واحد صاحبى مسافرين وهو لسه عاملها من سنه ومش بيبقى واخد باله اوى من الطريق زى ما انا ببقى شايف كويس بالنظاره قصدى انى بالنظاره اعتقد انى شايف احسن منه
السؤال هل النظر بيضعف تانى

[sherif_84]

السلام عليكم ورحمة الله .. حضرتك انا عملتها من 5 شهور و الحمد لله حسيت بفرق أحسن من النظارة و عموما فى عندك مركزين كويسين قوى :
1- مركز رؤية فى المظلات - برج مريم وده انا عملت فيه العملية .. مركز نضيف جدا
2- المجموعة المصرية للعيون - تقاطع شارع دمشق مع شارع بيروت - مصر الجديدة وده برضو مركز كويس جدا
ربنا يوفقك و تعملها ان شاء الله و هتحس بفرق .

[Most_H]

النضارة بتدى برستيج ووقار برضة

[Casio2000]

جزاكم الله خير جميعا - المنتدى ده فعلا قيمته من قيمة الاعضاء المحترمين اللي فيه

ربنا يسهل لو اللي ناوي يعملها عندنا عملها حاتابعكم بالأخبار - و ميت عارف يمكن أنا كمان أتشجع

شكرا جزيلا مرة تانية

[Casio2000]

صحيح يا شباب - بيشكروا لينا في المستشفي الوطني للعيون - حد يعرف أخبارها أيه؟

[chicobon]

هي العماليه بتتكلف كام و هل مع كترة استخدام الكوبيوتر النظر بيضعف تاني ولا ايه ياريت توضيح ؟

[ahmedtalat]

بعد العمليه ممكن نظرك يضعف

بص يا سيدى الفاضل

من المعروف ان الأنسان عندما يتقدم فى العمر فأنه هناك نسبه كبيره لآصابته بطول النظر

و لهذا فأن قصيرى النظر عندما يتقدم بهم العمر يزداد بصرهم تحسنا
و من يعانون من طول النظر سوف يزداد بصرهم سؤا عندما يتقدموا فى العمر

عندما يخضع الانسان لجراحه الليزك فان نظره يتحسن و يصبح 6/6

و لمن عندما يتقدم فى العمر سوف يصاب غالبا بطول النظر و يعود لأستخدام النظاره


لذلك هى عمليه مناسبه للأشخاص المصابين بطول النظر و فى الوقت نفسه صغار السن
فهم اكثر ناس سوف يستفيدون من هذه العمليه