رائعة احمدفؤاد نجم

[mohammedabdallh]

رائعة احمدفؤاد نجم

- سيادة المخلوع ... ارجعلنا

سيادة المخلوع ... ارجعلنا

... مش انت واحد مننا ؟؟

و عمرك في يوم ما سرقتنا

...ولا خدت مليم مننا

ما تيجي طب ترجعلنا

تقعد بأهلك وسطنا

أهو مرة تاكل أكلنا

وتلبس يا خويا من لبسنا

وتعيش في حارة او في شارع زينا

قلت ايه ؟؟ يا حارق دمنا

سيادة المخلوع ... ارجعلنا

وغداك يا سيدي عندي أنا

رز و بطاطس مسرطنة

لحمة ؟؟... مفيش من سنة

فاكهة ؟؟... تعيش انت و أنا

و الشاي .. بآخر معلقة م السكر اللي كان عندنا

اشرب و فوق وركز بقه .. علشان نكمل حكينا

سيادة الرئيس ... ارجعلنا

مش سبت الحكم .. لأجلنا ؟؟ـ

ما تيجي تسمع حكمنا !!ـ

أفكرك ؟؟ ولا انت فاكر زينا

قطار اتحرق من كام سنة

وغازنا اللي طار من أرضنا ... لعدونا

وعبارة مللي بيغرقوا ..!! غرقت في عرض البحر و راحوا أهلنا ... و الجاني فلسع مننا

ومركبة بأحلى شباب ... ييجوا من ايطاليا غرقانين .. والقرش ياكل لحمنا

والله كانوا زينا

ويمكن أحسن مننا

لهم بيوت و ولاد و عيشة و حلم .. زي حلمنا

اتغربوا و اتبهدلوا .. لما الفساد طال كل حاجة في أرضنا

واللي ما ماتش .. قاعد في غربته .. والغريب بيذلنا

اقول كمان ؟؟ ولا كفاية ... و اهو انت عارف عننا

أصبر هتسمع حكمنا

سيادة الرئيس ... ارجعلنا

ولو انت واحد مننا

فعلا يهمك أمرنا

بينا عالنائب العام .. تفتنله على ولاد الحرام ... مصوا بلدنا و دمنا

و افتن دي فتنة مش حرام .. ده حقنا

دا لو انت واحد مننا

أصبر هتسمع حكمنا

سيادة الرئيس ... ارجعلنا

اقعد معانا و زينا

هعرفك .....ـ

دي (أم خالد) أمنا

ودول أهل (سالي) أهلنا

و(عمر بن بنونة ) إبننا

فسر و احكي و قللهم .. و قللنا

واستسمح الروح اللي منورة في الجنة عند ربنا

هتقول مكنش قصدنا ؟؟ـ

دول ماتوا غصب عننا ؟؟ـ

كداب و فاجر .. و اللي يصدقك زيك .. والكدب ريحته منتنة

تتشل إيد اللي ضرب ،، و اللي أمر ،، و عليكوا لعنة ربنا

أصبر هتسمع حكما

أيوه بقول ارجع لنا

ياللي سرقت حلمنا

وغربتنا و نهبتنا ... و في كل حتة أهنتنا

إحنا اللي سال دمنا

في الأربعين و اسكندرية و التحرير يشهدلنا

آدي القفص ... أقف هنا

والشعب يحكم .. مش أنا

صدقني ... هي بينة

من فوق سبع سماوات .. قالها ربنا

العين بالعين والسن بالسن ... و هو دا بقه حكمنا ... و مفيش غيره عندنا

[MaZaGAngeE]

اهديها لكل شفيق هينتخب فشيخ عشان يشنقنا كلنا

[Screenplays]

اول مره يكتب حاجه مفيهاش شتايم

[me_medoo]

حبيب قلبي يا محمد
تسلم ايدك ياباشا ... على مواضيعك الجميلة ياجميل
بجد قصيدة حلوة بس على راي اسكرين اول مره يكتب قصيدة مفهاش شتايم
ولا انتا مسحت الشتايم منها علشان المنتدى ههههههههه
حبيبي يابوحميد

[AhMeD MeTwAlY]

جامده اوي القصيده بس فين الشتايم متعودناش علي قصيده من غير شتايم xD

[zangry]

الراجل ده فااااجر بس فعلا فين الشتايم :d

[mohammedabdallh]

بسيطه عاوزين شتايم ؟؟؟؟؟؟؟؟؟!!!!!!!!!!!!!!

شكرا يارجاله على المرور الطيب

[mr_vampire]

ولو مسك شفيق.... هنتنفخ كلنا...
كلنا كلنا.... كلنا كلنا....

[mohammedabdallh]

ولو مسك شفيق.... هنتنفخ كلنا...
كلنا كلنا.... كلنا كلنا....

اهم حاجه نبقى مع بعض
علشان اللمه حلوه
ههههههههههههههههه

[mr_vampire]

اهم حاجه نبقى مع بعض
علشان اللمه حلوه
ههههههههههههههههه

متقلقش مش هيخلو نفسك في حاجة.... وكنت قريت من كام يوم انهم جابو منفاخ كهربائي هائل القدرة بس الغرض مجهول....

[mohammedabdallh]

متقلقش مش هيخلو نفسك في حاجة.... وكنت قريت من كام يوم انهم جابو منفاخ كهربائي هائل القدرة بس الغرض مجهول....

اه ده متصنع خصيصا علشان مصر
هههههههههه