ايه اللي حاصل في امتحانات الثانوية العامة يا جماعة؟

[OlaOsman]

سمعت النهاردة كذا مرة عن امتحان تعجيزي في الفيزيا.. و قبله في التفاضل بس ماحدش في عيلتنا السنة دي في ثانوية عامة.. حد ليه قرايب في الثانوية العامة يقدر يوضح لنا الأمور؟

[mohamed2002]

انا جاري اللي جمبي في سنة تانية والتفاضل بيقول انة جة سيئ جدااا ,قريت ان المدرسين معرفوش يحلو حاجات فيه
بجد تهريج اللي بيحصل دة ,كمان الامتحانات يقال انها متسربة
الفيزياء معرفش صراحة لان جاري (ادبي) بس جابو تقرير في البيت بيتك بيقول انة امتحان كان سيئ جداااااااااا

[SEATLOVER]

انا ماعنديش اى حد اعرفة فى ثانوية عامية السنة دى
بس بجد الواحد قلبة بيتقطع على العيال دى و اللى بيحصل فيهم
ربنا ينتقم من كل واحد متفزلك و مُعقد نفسياً و بيئة
عمل فيهم كدة

[ams]

راى مخالف : لازم الامتحان يبقى صعب و صعب جدا كمان عشان التمييز بين الطلاب و استخلاص العقول المميزه

ولو الامتحان صعب ايه المشكله ؟ الامتحان موحد على الناس كلها و صعب على الناس كلها

لو الامتحان جه سهل و العيال كلها جابت الدرجات النهايه نقول مثلا 300الف و عندك اماكن فى الجامعات حوالى 200 الف هتوزعهم ازاى وهم كلهم بنفس الدرجات ؟ هتحصل مدابح على كليات معينه اللى بيقولو عليها "كليات القمة"

طبعا الحكومة مش بتفكر كده بس الشىء بالشىء يذكر

[مصراوي جدا]

للأسف كتير جدا دلوقتي بقى اتجاههم أدبي هروبا من العلمي ومقالبه زي اللي حصلت السنة دي

[alaa_dash]

امتحانات تانية ثانوي جت معقولة جدا ...بشوية تفكير بسيط.. اللي مذاكر كويس ..
يقدر يحل كويس اوي ..انا شفت امتحانات تانية كلها ..فقرتين تلاتة في الا متحان كله
هما اللي عايزين جهد غير كده كله بسيط ..
انا نفسي لما كنت ثانوي شفت نفس الكلام ... لاقيته كله مبالغ فيه ...

[islambana]

يا جماعه انا اخويا في ثانوي وابن عمتي الاتنين جايين يشتكوا من صعوبه الفيزياء والامتحان فعلا طويل جدا

[YoussefMostafa]

انا النهاردة خلصت حرب الفزياء

[YoussefMostafa]

1-امتحان طويل جدا

2-اجزاء كتيرة جدا في المنهج اكنها مش موجودة اصلا (مركز علي اجزاء معينة بس)

3-افكار غريبة جدا (صباح التعجيز)

4-ملوش علاقة باسئلة النماذج (جاي من الاولمبيات)

علي فكرة انا جايب 96% في تانية بس من بعد الامتحان ده

مبقتش افكر في كليات القمة (زي ما تيجي بقي )

[Noha.M]

اوففففففففف

متفكرنيش يا علاااا

يا سااااااااااااااااااااتر

انا عنيت والله فى الفيزيا دى بجد .. انا منساش نفسي ليلة الامتحان و انا عمالة افقر و ماما كل ما اجى عنية تغمض بس تقوم جاية عند ودنى و مصقفة !! عشان افووووق يلهوييييييييي و رحت طبعا لا عرفت احل ولا انيل حاجة عشان كان قدامها يومين و نص بس و مع انى كنت جايبة فى تانية ثانوي 98.5 الفيزيا خليتني اجيب فى تالتة 93% لانى نقصت فيها وحدها 10 درجات !! بس الحمد لله كله على بعضه كان 95 باين

الواحد عانى والله على ما دخل الهندسة دى .. اللى جت كملت عليه!!!

و فى الاخر كله محصل بعضه ..بلا وكسة!!!

[Chicco]

بصراحة مش فارقة .....يعني أنهي أسوأ ...الأمتحانات تيجي سهلة و اللي يجيب ٩٨ ٪ ما يلاقيش مكان في الطب مثلا ....و لا تيجي الأمتحانات صعبة و الناس تزعل بس الحد الأدني ينزل
كده و لا كده النظام كله عقيم و لازم له تغيير جذري

[kingnoro]

انا اخويا في ثانوية عامة و فعلا امتحان الفيزياء كانت صعبة جدا

[Ahmed Samy]

أنا مع الامتحانات الصعبة

مع وجود ما يضمن (نجاح) الطالب متوسط التحصيل و الذكاء


بدون عواطف لو سمحتم

الامتحان مطلوب منه (فلترة) الطلبة لتقديم النخبة لكليات النخبة المنوط بها تخريج خلاصة المتعلمين في هذه السنة ليكونوا في المناصب و الوظائف التي يعتمد عليها الناس في حياتهم

و كليات القمة هي (بالترتيب في نظري)
1 - كليات الهندسة و الحاسبات
2 - كليات العلوم و ما يكافئها
3 - كليات الطب بفروعها (وعلى رأسها التمريض)

اما باقي الكليات كالزراعة و التجارة و الحقوق و الآداب و السياحة و الفنادق و الألسن و الفنون الى باقى القائمة فهي كليات لا تحتاج لمهارات ذهنية خاصة و انما تحتاج لحب الدراسة و بعض المهارات الشخصية التي قد لا تتوافر لطالب في كليات القمة

و هنا تبرز الحاجة الى اختبارات القدرات مع الرغبات لضمان وضع الانسان الصحيح في المكان الصحيح ..

و تأتي بعد ذلك المعاهد و هيئات التعليم المهني (الذي لا يقل أبدا عن كليات القمة) و الذي يجب ان يوضع في مكانه أكبر , وتوزيع الطلبة بشكل جديد يجب أن يضمن لهذه المعاهد مكانا في الاختيار ...


اما ما يحدث هو دخول بعض الجهلاء الصمامين حافظي القواعد و القوانين الملقحة في الكتب و اليدويات و اللابتوبات ... و لكن ايا من هؤلاء المقعدين لايستطيع ان يفهم لماذا تقف السيارة و لا كيف تسخن الشمس الأرض

و لا يستطيع مهندس من هذا الجيل أن يصمم حائطا
و لا طبيب أن يثبت شريحة
و لا كيميائي أن يغمض عينيه و يتخيل مركبا

و هؤلاء هم ليسوا فقط عالة على أهلهم و بلدهم بل هم حمل ثقيل على زملائهم النوابغ .. فهم يستهلكون خاماتهم و يحتلون مكانهم و يشتتون مدرسيهم و يأخرون تقدم مناهجهم

ما يحدث الأن هو عين الصواب

[Mido80]

علي فكرة يا جماعة انا لاحظت ان مصر هي الدولة الوحيدة اللي فيها حرب الثانوية العامة..لية وعلي اية؟ يعني انا بقالي يومين متابع برنامج العشرة مساءاً وشفت الناس حالاتها تحزن. دة غير المصاريف طول السنة علي دروس وملازم وهرية وفرية وحرق اعصاب. احنا عندنا نظام الثانوية العامة دة نظام فاشل من وجهة نظري. لان الطالب بيظل طول السنة متبهدل مذاكرة وحرق اعصاب والاف الجنيهات تدفع للدروس الخصوصية ويجي في الاخر واحد يحط امتحان تعجيزي زي دة..طب الطالب يعمل اية في الحالة دي؟ ولا ولي الامر؟

هنا في قطر الثانوية العامة امتحنت والنتيجة طلعت وما شاء الله ولا طالب رسب في الامتحان. دة لانهم بدءوا يدخلوا نظام اسمة المدارس المستقلة يعني لا منهج ولا يحزنون والمدرس هو اللي بيحط المنهج بنفسة وهو اللي بيحط الامتحان ويحدد كمية المعلومات المطلوبة.

فياريت الناس اللي مسئولة عن التعليم ماقبل الجامعي عندنا في مصر يراعوا النقطة دي ويخفوا شوية عن الناس.

حاجة بسيطة احب اقولها، اخت مراتي في ثانوية عامة السنة دي وبتروح عند مدرس رياضايت بيقولوا علية منشار دروس وراكب رانج روفر 2008 ومشغل معاة 4 مدرسين حديثي التخرج منهم اللي بيشيل لة الشنطة واللي بيركن لة العربية واللي بيرد علي تليفونة...هههههههههه....علي اية كل دة؟

اسف لاني طولت عليكم،،،

[محمد المشد]

انا بقى هقول لكم امتحان الثانوية العامة هنا فى السعودية عامل ازاى 00 بصراحة حاجة كدة ولا فى الاحلام ولا الاساطير 00 الامتحان اللى بيوضعة هو مدرس المدرسة ، اة والله لاتتعجبوا هذا نظام تم العمل به هذا العام ، لا انتظروا الاهم كل طالب له 30% اعمال سنة تتصوروا بقى المصريين او الاجانب بصفة عامة هنا بيجيبوا 100% مع الرحمة لان لو كان اكثر كانوا جابوا
بصراحة طبعا نظام فاشل بكل المعانى ، ومع كل ذلك الطلبة بيقولوا الامتحان صعب 000 بس الادهى ان كل الطلبة مش بيدخلوا الجامعات لانهم لديهم اعداد محدودة للغاية ونصفهم بيتم تأجيلهم من الدخول للجامعة وبيدخلوا بعد سنة او اثنين او ثلاثة حسب توفر الاماكن وطبعا النتيجة مع كل ذلك تطلع 98% او 100%
والله انا كمان شايف ان واضعى الاسئلة فى مصر فى حاجة الى تحليل نفسى ومعالجات نفسية قبل وضع الاسئلة ، وايضا لابد ن تغير فكر الطلبة بصفة عامة وانهاء حالة الصم واثراء عمل العقل وتغير المناهج بما يسمح معه عمل العقل واتباع اسلوب المناهج الامريكية والبريطانية