مساعدة في تثمين موبايل

[sayed911]

بسم الله الرحمن الرحيم

السلام عليكم ورحمة الله وبركاته

انا محتاج مساعدة من اخوتي في الله :)

موبينيل عاملة عرض للعملاء الـ VIP عندها الا وهوة تقسيط موبايل على سنة بدون فوائد على السعر نهائيا ! وبصراحة العرض شاددني جدا اغير موبايل واجيب جلاكسي نوت
فتقريبا الموبايل يبقى بعد سنة بـ 5004 جنيه :) انا مش عارف شايف العرض مش بطال وعلى 12 شهر يبقى حوالي 417 جنيه :) فالسعر كده يبقى معقول جدا اعتقد ومن غير فوايد فشئ اجمل واجمل الحقيقة :) المعضلة عندي مش هنا
المعضلة انه موبايلي التاني
Galaxy Ace جبته في اجازة نص السنة يعني من حوالي 5 شهور تقريبا او اكثر شوية او ازيد شوية مش متذكر المهم اللي متأكد منه انه الضمان لسة موجود على الموبايل !!
الجهاز في حالة الجديد وحاجته كاملة !! للأمانة فيه شوية خرابيش بسيطة من الإستخدام ولكن ليست ظاهرة بالعين إلا للي يركز قوي الجهاز كنت جايبه بـ 2000 جنيه !! وكان الفيرجن الجديد من الجهاز نازل بكفرين واحد اسود والثاني ابيض !! فعايز اعرف السعر العادل للجهاز اللي يتباع بيه !! الجهاز في حالة الجديد والله وانا كنت محافظ عليه جدا والبيع اظن السبب وضح لحضراتكم الأن فعشان اللي ها يشتريه مني لا اظلمه ولا يظلمني عايز اعرف السعر العادل ليه كام من فضل حضراتكم ! مع العلم انه فيه الكوفر الأبيض لسة بالإستيكر متركبش حتى ! والضمان لسة موجود للجهاز !

[romieh]

بص هو الموبايل تمنه جديد بالضمان حوالى 1650-1700 جنيه

يعنى بتاع حضرتك بعد حساب الاستهلاك 5 شهور يكون حوالى 1350-1400 جنيه

بس هو النوت هيقف عليك ب 5000 من غير فوايد - أظن انهم مبالغين فى السعر قوى لان تمنه لا يتعدى ال 4000 جنيه بأى حال من الاحوال

[hazemhassan]

سعرة 1300 لو حالة نضيفة وبالضمان
لان سعرة دلوقتى 1650 وبعدين نزل مودلين بعدة ace plus و ace 2
وموفق فى البيع

[aly_hosny]

كتير اوي 5000 على النوت
الموبيل ب 3250 دلوقتي

[A_H_M_A_D]

هم كده حاسبين فايده حوالي 25% , ودي فايده عالية جدا على سنة واحده , يعني ده كده مش عرض حلو ولا حاجه

[beshomilan]

كتير اوي 5000 على النوت
الموبيل ب 3250 دلوقتي

فعلا سعر النوت دلوقتى ب 3250 وبضمان 3750 فأزاى تدفع 5000 فيه حتى لو تقسيط!!!!
حرام الفرق ده كله
انا رايي تحوش الفلوس على كام شهر اللى هتدفعهم فى القسط وهيكون تمنه وصل ل 3000 وتجيبه