الكلاب تلفت اعصابي

[tayson54]

دلوقتي فيه قبيله كلاب مقرها الأساسي ومنطقه تجمعها الشارع اللي انا ساكن فيه وميحلاش لها التجمع الا عند الفجر وده يعني ان اي انسان ممنوع من الخروج والا عرض نفسه للخطر الشديد ده غير الهوهوه والخناقات اللي بينهم والعواء المستمر اللي بيصحي كل الشارع تقريبا وده كل يوم بلا استثناء ....الكلاب دي فعلا تلفت اعصابي وكرهتني في حياتي ونفسي اتخلص منها لذلك فكرت اني اجيب لها شويه لحمه واحط فيهم سم فيران يقتلهم كلهم لكن الحقيقه خايف ان يكون ده حرام وفي نفس الوقت بقول اني بدفع اذي عن نفسي واولادي وعن غيري لان الكلاب دي ضاله ومؤذيه وفكرت كمان اني اروح اعمل بلاغ في القسم وفي حاله انهم اتعطفوا وجم هيحطوا لهم سم برده فقلت انا اخلص الموضوع بنفسي بحيث تبقي عمليه نضيفه ميه في الميه :)...
المهم انا عايز استشارتكم في الموضوع ده اتصرف ازاي بحيث في النهايه اخرج الكلاب دي من حياتي للابد ويا تري حد يعرف الحكم الشرعي لقتل الكلاب الضاله لدفع اذاها ؟؟

[osama]

اعمل بلاغ في القسم
او في الحي التابع لة
او شوف عضو مجلس الشعب

[mohamed ibiza]

حرام قتل الحيوانات يعني اصبر شوية كده و هيمشوا انما بلاش ترتكب ذنب و تموت حيوانات عشان خاطر بيعمملوا شوية دوشه و لعلمك لو حطيت سم فران مش هينوبك الا العذاب بجد والله هتعد تعذب في نفسك و تلوم نفسك علي اللي انت عملته لان سم الفران مش هيقتلهم في ساعتها بياخد حوالي 4 5ايام علي ما يفرهد الكلب خالص و يموت و طول المدة دي هيعد يعوي و يعيط و يتألم و انت هتكره نفسك بسبب الحركة دي حررررررررررام اوعي تعملها لمصلحتك صدقني لوم نفسك ليك لو عملتها هيخليك مش طايق نفسك

[MaaG]

حرام تحطلهم سم فيرن لإنه ش هيموتهم ، اسأل دكتور بطري و حطلهم سم قوي ، و بلاش في اللحمة خليها في ميه أو حاجة ، و الأحسن تبلغ .

[TaoTao]

رأيي تبلغ في القسم وهم هايتصرفوا .. بلاش تتصرف من نفسك ع الأقل عشان التخلص من الجثث وكمان اختيار السم المناسب أو وسيلة القتل المناسبة .. من الآخر دي شغلتهم وهم أدرى.

وأنا معاك إن من حقك تدرأ عن نفسك وعن أولادك الخطر طالما ضرر هذه الكلاب واضح بهذا الشكل

[tayson54]

طيب هبلغ في القسم افضل ...الف شكر علي مشاركتكم يا شباب ونصايحكم

[aif]

اتصل علي تليفون ادارة الفتوي بالازهر رقم 107 واسأل علي قتل هذه الكلاب حرام ام مباح واتصل تاني بعد ساعتين تقريبا لتحصل علي الرد برقم السؤال

[tayson54]

الف شكر يا استاذ احمد ده اللي كنت محتاجه فعلا

[Hossam.Hamdy]

هو حضرتك ساكن فى الشارع بتاعى ولا ايه.....انا كمان عندى نفس الكلام و قدمت شكوى قبل كده فى مكتب مصطفى السلاب مدينة نصر كانت فيها موضوع الكلاب و الظلام والقمامه وقالو انهم قدموها للمحافظ ولا فى حاجه اتعملت الكلاب زادت والقمامه مكانها وعدم الاناره هو هو

[Ahmed Samy]

شرطة المرافق هي اللي يتضرب الكلاب بالنار

بلغ شرطة المرافق

[tayson54]

لو شرطه المرافق هتضربهم بالنار ده يبقي محتاجين يطلعوا عدد لان دول حوالي 15 كلب ولا حاجه دايما ماشيين مع بعض وبما اننا في عرض واحد بس يجي يبقي عليه العوض ....عموما انا هبلغ في القسم وهسأل فين شرطه المرافق دي وابلغ فيها برده وهسأل في الأزهر علشان لو مش حرام قتلهم ومحدش جه يخلصنا منهم هفكر سعتها بجد اني اتخلص منهم بنفسي ملهاش حل تاني عن طريق سم قوي.

[sab3aawy]

اللى انا اعرفه ان قتل الكلب العقور مش حرام، بل بالعكس انه واجب لدفع الضرر، بس ارجو منك برضه تتأكد لان ما اقوله ليس فتوى وانما معلومة سمعتها زمان ومش فاكر مصدرها ، لكن حتى لو هتقتله اختار وسيلة قتل سريعة ولا تعذب الحيوان، يعنى لو سم يبقى لازم يكون سم سريع وقوى

[tayson54]

بالظبط يا استاذ سيعاوي لا داعي لتعذيب الحيوان وانا لو هضطر اعمل الموضوع ده بنفسي هسأل صديقي وهو دكتور بيطري عن نوع سم قوي اكيد هو ادري ...لكن في الحقيقه انا مش عارف هل كلمه عقور تنطبق علي اي كلب ضال في الشارع ولا لازم يكون له مواصفات اخري لازم اتحري عنها...يعني مثلا من اسبوع تقريبا الكلاب دي صحتني من النوم الساعه 3 الفجر كالعاده لكن المره دي كنت مستحلف لها فقمت واخدت عصايه المكنسه ونزلت امشيهم بأي طريقه من ادام البيت لانهم كانوا بيعووا زي المجانين بالظبط ...المهم اول ما شفوني جريوا وفضلت ماشي وراهم بالعصايا لحد ما خرجتهم من الشارع كله لكن بالتأكيد مش هقدر اعمل كده كل يوم ...هل خوفهم مني ده يعني انهم مش عقور ولا ايه ؟

[الطنطاوي]

) يقول النووي في شرح مسلم (ج10 ص235): أجمع العلماء على قتل الكلب الكَلِب أو الكلب العقور، واختلفوا في قتل ما لا ضرر فيه فقال إمام الحرمين من أصحابنا -الشافعية-: أمر النبي -صلى الله عليه وسلم- أولاً بقتلها كلها، ثم نسخ ذلك ونهى عن قتلها إلا الأسود البهيم.
ثم استقر الشرع على النهي عن قتل جميع الكلاب التي لا ضرر فيها؛ سواء الأسود وغيره، ويستدل لما ذكره بحديث ابن المغفل.
وقال القاضي عياض: ذهب كثير من العلماء إلى الأخذ بالحديث في قتل الكلاب إلا ما استثني من كلب الصيد وغيره، وقال: وهذا مذهب مالك وأصحابه، وذهب آخرون إلى جواز اتخاذ جميعها ونسخ الأمر بقتلها والنهي عن اقتنائها إلا الأسود البهيم.
قال القاضي: وعندي أن النهي أولا كان نهيًا عامًا عن اقتناء جميعها وأمرًا بقتل جميعها، ثم النهي عن قتلها ما سوى الأسود، ومنع الاقتناء في جميعها إلا كلب صيد أو زرع أو ماشية، يقول النووي: وهذا الذي قاله القاضي هو ظاهر الأحاديث ويكون حديث ابن المغفل مخصوصًا بما سوى الأسود.
( ب ) ويقول الدميري بعد ذكر الأحاديث الواردة في قتل الكلاب: حمل الأصحاب الأمر بقتلها على الكلب الكَلِب والكلب العقور، واختلفوا في قتل ما لا ضرر فيه منها، فقال القاضي حسين وإمام الحرمين والماوردي في باب "بيع الكلاب" والنووي في أول البيع من شرحي المهذب ومسلم: لا يجوز قتلها، منسوخ وعلى الكراهة اقتصر الرافعي في الشرح، وتبعه في الروضة، وزاد أنها كراهة تنزيه لا تحريم، لكن قال الشافعي في الأم في باب الخلاف في ثمن الكلاب: واقتلوا الكلاب التي لا تنفع فيها حيث وجدتموها وهذا هو الراجح. ا.هـ.
نستخلص من كل ما سبق أن الكلاب التي فيها فائدة كالصيد والحراسة لا يجوز قتلها، والكلاب التي لا فائدة لها إن كانت تضر كالكلب العقور يجوز قتلها، وإن كانت لا تضر ففيها رأيان؛ رأي بعدم قتلها فيكون القتل حرامًا أو مكروهًا كراهة تنزيه، ورأي بجواز قتلها. والكلاب الضالة غير المقتناة -إن كانت تؤذي بتخويف المارة وبخاصة الأطفال، أو بالبول والبراز وإتلاف أشياء لها قيمتها- يجوز قتلها، هذا هو حكم قتلها، أما نجاستها فقد تقدم الحديث عنها، وكذلك عن اقتنائها والاتجار فيها.

[ara]

ممكن حضرتك ترمى عليهم أكياس مليانة ميه.. انا واحدة صاحبتى عملت كده وبعد كام يوم الكلاب بطلت تروح المكان ده. أما قتل الكلاب فده حرام إلا إذا كان كلب مؤذى و مسعور
ممكن برضه حضرتك تكلم جمعية أصدقاء الحيوان http://www.animal-friends.info
ديه جمعية مصرية وغالبا هايتصرفو فى الموضوع