ارملة تتزوج عرفيا ثم تتطلق وتتزوج رسميا فماذا يكتب فى عقد الزواج ؟

[Samah AbdAllah]

السلام عليكم اعضاء المنتدى وشيوخه وقانونييه
استفسار من الناحية الشرعية والقانونية فى حكاية مرت امامى وكان فيها جدل كتير
فقولت اخد رايكم خصوصا ان معانا الشيخ خالد
اذا تزوجت الارملة عرفيا للتحايل على القانون عشان تفضل تاخد معاش زوجها المتوفى
بغض النظر عن حرمة التصرف ده من حلاله
وهذا الزواج العرفى معلن ومعروف للجميع يعنى نقدر نقول انها من احدى القرى وكل البلد عارفة
وبعدين طلقت من الزواج العرفى وقطعوا الورقتين وخلاص على كده
دلوقتى الست دى عاوزة تتجوز حاليا بعد انقضاء عدتها زواج شرعى رسمى وعلى ايد مأذون
هتتجوز على انها ارملة الزوج الاول ولا على انها مطلقة الزوج التانى ؟
فى حين ان دلوقتى مفيش اى اثبات على الزواج العرفى اصلا غير ان اهل البلد كلهم عارفين
حتى ماذون البلد نفسه عارف :-))

[m7mda7md]

[COLOR="DarkGreen"][يكتبولها ست بيت ^_^/COLOR]

[Totexxxxx]

الزواج الاول , لان الثاني غير معترف بيه اساسا , ومعرفه اهل البلد لا يعتبر توثيقا كما تطلب القانون لذا فتعتبر كأنها لم تتزوج الزيجه الثانيه وتكون ارمله الزوج الاول, هذا والله اعلم

[MohammedAladel]

يعنى هى اتجوزت عرفى بس قدام الناس من غير مأذون لكن أهلها كانوا عارفين عشان تاخد المعاش بتاع جوزها اللى مات أنا أعرف ان الإشهار أساس الجواز وكدا يبقى إشهار ولكن من غير مأذون عشان تاخد المعاش ههههههههههههههه معنى الكلام دا إنها لو اشهرت على يد مأذون كان هيقطعوا المعاش يعنى فكرة مادية بحتة والله مش هيقدر يفيدها غير دار الإفتاء أو شيخ متمكن ومينفعش كلام المنتديات فى المواضيع اللى زى دى

[MohammedAladel]

الفتاوى شغالة الله ينور

[MohammedAladel]

جواز فؤاد من عتريسة باااااااااااااااااااااااااااااااااطل

[me_medoo]

ياجماعه انتو كل حاجة تقلبوها هزار كده
موضوع جميل .... ومهم ويفيد شريحة كبيرة من المجتمع .... انا بصراحة من مئيدين ومشجعين مثل هذا الجواز لانوا بيشبه زواج المسيار في السعودية بلد الاسلام ، الراجل الي اتجوز الارملة فبيكسب ثواب انو ستر على امرئة وساعدها في تربية عيالها وتحمل مشاق الحياة وكده اوكده معاش جوزها المتوفي اساسا ً مبيكفيش لكن اهي نوايا تسد الزير ... متتصوروش قد ايه الوحدة صعبة والمثل بيقول اعزب دهررررر ولا ارمل شهر .... يعني لو عشت طول عمرك اعزب مش هتحس بحاجة لكن متقدرش تعيش شهر واحد ارمل .... صعب ياجماعه صدقوني صعب ده الواحد بس مراتوا تروح تنام ليلة في بيت ابوها. لمن تزعل شوف الواحد بيتشقلب كاينوا ازاي ويحس ان في حاجة ناقصة في البيت وان البيت مش طبيعي. ... بس المشكلة دلوقتي مع القوانين المشحفة الجديدة ان لازم يقيد العقد العرفي في الشهر العقاري .... يعني لو كنت متجوز. وعاوز تستر على امرئة ارملة يتخرب بيتك ويبعتوا اشعار للزوجة الاولى ان جوزك اتجوز عليكي ..... والتانية بدل ما تقول كتر خيروا ان جوزي بيحل مشاكل المجتمع. وان جوزي راجل شهم وراجل وطني ومحترم تقوم تطين عيشتوو ....

بس اديكي قولتيها اهي اطلقت من جوزها التاني او انفصلوا. تقدري تقولي لي هتصرف على عيالها اليتامى منين .... دور الحكومة. في اي دولة محترمة في العالم انها لو شافت شب عاطل تديلوا بدل بطالة فما بالك بامرأة عندها اطفال يتامى .... والحياة كل يوم عن يوم بتغلى والمصاريف والحمل بيزيد ....

السترة والعفاف .... لا يمكن تكون حرام ابداً ، والوحدة صعبه بل مستحييييييييييلة .... وناس اصدقاء ليا شخصيين عامليين كده ربنا يباركلهم يارب

[me_medoo]

. . .اما من حيث يكتبوا ايه في القسيمة الجديدة الزواجة التالتة او مطلقة او ارملة لا اعتقد ان هناك اهمية .او تفرق اذا كتبوا مطلقة او ارملة المهم اعلام الزوج الجديد .بانها تزوجت من قبله بفلان الفلاني حتى لا يكون واحد في المية شك انوا ممكن يكون اخوه في الرضاعه .

لكن كثيرررررررررررررر من المصريين متجوزين .بنفس هذا الطريقة .....
الحلال مفيش احسن منو .وياااااااااه على الثواب والاجر الي يتجوز امرأة ويعولها ويعول عيالها وبالذات في ستات قمرات .بس ملحقوش يتهنوا بشبباهم ، وواللهي تلاقيهم اغلب من الغلب .وبنات حلال ولو طالت تشيلك من على الارض شيل هتشيلك .... والي جرب الفراق مره تلاقيه يتمسك بالزوج الجديد بايدوا واسنانوا وكل الي محتاجة هيا كلمة حلوه وشوية حنية وانسان يقدرها ويحترمها. وتلاقي الشخص الي يقدر يطب طب عليها .... ويمسح دمعتها .... ده في حديث عن الرسول بما معناها الي يمسح على شعر يتيم بياخود بكل شعره حسنة فما بالك لمن تتجوز امهم وتمسح على شعرهم وشعر امهم شوف بقى الحسنات والاجر والثواب الي هتخدهم.

وتحياتي واسف على الاطالة
وفي انتظار رأي الشيخ خالد .... شيخنا وحبيببنا .

[amrelsaqqa]

اهم ما في الموضوع انقضاء عدتها ، دى مسؤوليتها قدام ربنا ومسألة الحل من الحرمانية اعتقد هتكون كلها في الجزئية دى

فطالما انقضت عدتها بتاعت اخر طلاق ، ومالهاش اطفال او حمل من اخر زوج يبقى شرعيا والله اعلم عشان برضه انا مش متخصص ، يبقى مفيش عليها اي مشكلة

وكمان قانونيا اعتقد تخليها زي ما هى والجوازة اللى في النص دى كأن لم تكن اصلا ، لان لو حاولت اثباتها دلوقتى ممكن تقابلها مشاكل لا حصر لها ..

[أحمد كمال]

اولا مفيش حاجة اسمها عقد عرفي في الشهر العقاري ..... يا ريت اللي ما يعرفش ما يفتيش ......


قدامها حل من اتنين قانونا (قانونا فقط و ليس شرعا)

1- تعمل اشهار زواج عرفي و دي قضية بتاخد سنة و بعدها طلاق و بعدها تتجوز تاني رسمي كانها مطلقة مع العلم ان لو التامينات الاجتماعية شمت خبر كده هينفخوها ويطالبوها برد المبالغ

2- تصدر العبيطة و تتجوز رسمي عادي جدا و تكتب انها ارملة .......

[ahmed]

على الورق والرسميات هاتتجوز على انها ارملة الزوج الاول لان قدام الحكومة مافيش ما يثبت انها تزوجت بعد وفاة زوجها يعنى من الاخر مافيش قسيمة طلاق يقول انها مطلقة
انما بقى بين الناس والمأذون وبينها وبين الزوج الثانى هى مطلقة وتزوجت بعد انقضاء العدة

[Khaled Seif]

بسم الله والحمد لله والصلاة والسلام على رسول الله

السلام عليكم ورحمة الله وبركاته

الأخت الفاضلة الأستاذة / ســـما , الإخوة الزملاء الأفاضل والزميلات المحترمات

أعتذر لحضراتكم عن التأخير في الرد , لأني لم أر الموضوع إلا الآن

أقول وبالله التوفيق -

الزواج العرفي - إذا استكمل شروطه من قبول وإيجاب وصداق ووليّ وإشهار - كان زواجا شرعيا

صحيحا مائة بالمائة - وهل كان زواج الحبيب صلى الله عليه وسلم وصحابته والقرون الثلاثة

الفاضلة إلا عرفيا

ولكن لأن متطلبات الحياة وخراب الذمم اقتضت الكتابة لإثبات نسب الأولاد وما إلى ذلك

إذن فهذه الأخت الفاضلة - مع التحفظ على تصرفها - فهي تعد الآن شرعا مطلقة وليست أرملة

وجوابي هذا من الناحية الشرعية - وانتظر رأي الزملاء القانونين

هذا وما كان من صواب فمن الله وحده وما كان من خطأ فمني ومن الشيطان والله بريء منه

ورسوله صلى الله عليه وسلم

وصل اللهم وسلم على الحبيب المصطفى وءاله أجمعين

[me_medoo]

اولا مفيش حاجة اسمها عقد عرفي في الشهر العقاري ..... يا ريت اللي ما يعرفش ما يفتيش ......


قدامها حل من اتنين قانونا (قانونا فقط و ليس شرعا)

1- تعمل اشهار زواج عرفي و دي قضية بتاخد سنة و بعدها طلاق و بعدها تتجوز تاني رسمي كانها مطلقة مع العلم ان لو التامينات الاجتماعية شمت خبر كده هينفخوها ويطالبوها برد المبالغ

2- تصدر العبيطة و تتجوز رسمي عادي جدا و تكتب انها ارملة .......

يا احمد يا كمال يا عزيزي الملافظ سعد ياحبيبي
نفتي ايه بس هو حد قالك اننا مفتي المنتدى. انا بتكلم على حسب ما اعرف على قد معلوماتي
وبعدين. لو عرفت التامينات بتقول هتنفخها هتنفخها على كام ٣٠ ولا على٢٨ علشان الصيف
الملافظ سعد ياعزيزي وتحياتي

[أحمد كمال]

يا احمد يا كمال يا عزيزي الملافظ سعد ياحبيبي
نفتي ايه بس هو حد قالك اننا مفتي المنتدى. انا بتكلم على حسب ما اعرف على قد معلوماتي
وبعدين. لو عرفت التامينات بتقول هتنفخها هتنفخها على كام ٣٠ ولا على٢٨ علشان الصيف
الملافظ سعد ياعزيزي وتحياتي

هو اللي يقول معلومة مش متاكد من صحتها يبقى بيفتي و لا لأ ؟؟؟؟؟ العرفي لا يشهر في الشهر العقاري و انما يشهر بقضية اشهار زواج عرفي و دي بيتم الحكم فيها من اول جلسة (بس بتاخد حوالي سنة عشان حجز الجلسة و كده ) في حالة اعتراف الطرفين بالزيجة (الزوج و الزوجة) و لو فيه طرف بينكر الزيجة بتبقى موال اسوددددددددد و بتاخد سنين مش سنة بس ......


بالنسبة للنفخ ..... مش عارف ..... ممكن اسال لك في التامينات اللي بيتمسك بيتنفخ على كام .....


و سعد مات من زمان دلوقتي فيه السيد البدوي

[me_medoo]

هو اللي يقول معلومة مش متاكد من صحتها يبقى بيفتي و لا لأ ؟؟؟؟؟


بالنسبة للنفخ ..... مش عارف ..... ممكن اسال لك في التامينات اللي بيتمسك بيتنفخ على كام .....


و سعد مات من زمان دلوقتي فيه السيد البدوي

هههههههههههههههههه
حبيبي يابوحميد اه والله ياريت تسئلي في التامينات .... معليش اصل مش مركز العيال دوشني قاعدين بيلعبوا بنك الحظ وكل شوية دورك يابابا. دورك يابابا هههههههه عيال تزهق ، بس انا فاكر انهم مره عملوا زيطة على برنامج تسعين دقيقة وكانوا بيتكلمو عن الزواج العرفي لابد توثيق في الشهر العقاري والا هيبقى فيها عقوبة سجن سنتين وكان معتز الدمرداش بيتكلم عن الموضوع ، فبقى الواحد خايف من ساعتها. وبالذات اني سمعت ان القانون بيفرض على الواحد انوا يعلم الزوجة الاولى طيب قولولي انا هعلمها ازاي .... يعني افرضوا لو مثلاً مثلاً مثلاً انا كنت متجوز عليها. اقوم اعلمها وتيجي تغزني في بطني باي سكينة وعيالي يتيتموا .... وميلقوش حد يلعب معاهم بنك الحظ او السلم والتعبان

صحيح استفسار كده من خبراء المنتدى هو الي ينتقل لنقطة البداية في بنك الحظ ياخود ٤٠٠ جنية ولا ٢٥٠ جنيه بس
وتحياتي .