هوا المصرى بيحب المرمطة ؟ ليه ميطلعش يفتح محل فى السعودية بدل الشغل عند حد !!؟

[MaNoLa]

الشعب المصرى بعد دراستى له أصبح عاشق للمرمطة
أى نعم المرمطة حلوة و بتخلى الإنسان صبور و عنيد فى تحقيق حلمه
لكن مرمطة الصبر و تحقيق الحلم غير مرمطة الموت

الفكرة إلى هتكلم فيها أخدت السعودية مثال
و مش عارفه ليه السعودية حلم 95% من الشباب المصرى للعمل فيها
رغم أن فيه دول كتيرة جدا بتقبل عماله مغتربين و الماديات فيها أكتر من السعودية
لكن على سبيل المثال السعودية

ليه دايما المصرى بيطلع برة بيشتغل و لو حتى بقال فى سوبر ماركت !!!؟

بس لما جيت أفكر فى الموضوع كدة حسيت أن فيه حاجة غلط
أسعار المحلات فى السعودية رخيصة جدا عن مصر
يعنى ممكن بالسعر إلى واحد يفتح فيه محل فى مصر هنا يفتح محلين فى السعودية و محدش يستغرب فيه محلات فى السعودية بـ 10 ألاف ريال بس بتكون صغيرة أوى

أى نعم طبيعة الشغل فى السعودية و السوق مختلفه تماما عن مصر و الأحتياجات برضة غريبة عن مصر لكن برضة فى نفس الوقت مع التعود و التجارب الدنيا هتبقى أفضل بكتير من الأول

لما فكرت فى الفكرة كدة أستغربت أوى قولت يعنى المصرى بيطلع بره بيشتغل عند ناس يطلعوا عينه و مش بيستفيد , طيب ليه ميفتحش محل هناك لما ممكن يكون رئيس نفسه فى المحل بل و بالعكس يستفيد ماديا و ممكن يفيد حد من قرايبة بالعمل معاة

و بما أننا فى منتدى سيارات حبيت برضة أذكر كام مهنه متعلقة بالليلة دى و هيا (مغسلة سيارات - أكسسوارات - جنوط - صوتيات) و متقلقوش الحاجات دى بتتباع هناك أكتر من مصر الضعف 10 مرات

كلامى منطقى ولا أية ؟ لو فيه توضيح فهمونى

[mazagngi2010]

عدس

[MaNoLa]

عدس

طيب ماتعرفنى يمكن فيه مشاكل فى الأجراءات القانونيه هناك أو مفيش حد بيتعامل مع مصريين أو فيه عقبات بشكل أو بأخر الموضوع لنقاش الفكرة مش لتأكيدها أو تطبيقها

[bakkarahmed]

علي ما اعتقد المشكله في التملك وروخصه التشغيل يعني غير مسموح الاجانب غير تقريبا بتملك سياره ومنزل علي ما اعتقد ان رخص التشغيل بتكون للخليجي وبناء عليه بيستقدم مغتربين للعمل....هما معاهم كمان فلوس كتير والحكومه بتديهم قروض ميسره ضخمه تمويل لكافه المشاريع في كل المجالات وبالتالي هايبقي من السهل حتي لو حد فتح هناك انهم يموتوله تجارته..ولو الحكايه دي بالسهوله دي كنت هاتلاقي الصينيين فتحوا محلات في مصر ووفروا علينا الفلوس الكتيره اللي بتروح مننا في سلسله الموردين والمستوردين ..اتمني انك تكون فهمت قصدي ..والله اعلم

[Ahmed Selim]

المشكلة أنه غير مسموح بتملك عقارات فى كافة دول مجلس التعاون غير لمواطني دول مجلس التعاون فقط.

الحلول بتكون أن الأجنبي يشارك مواطن سواء على الورق بس و المواطن ملهوش دعوة بأى حاجة غير أنه بياخد مبلغ متفق عليه كل سنة............و على الورق له 51% من الشركة ( يعنى قانوناً ممكن يبيع نصيبه اللى هو أصلاً مش بيدفع فيه حاجة ).........و اللى بيعمل كده بيطلق عليه و كيل خدمات على ما أعتقد..........بيعمل مشاركة مع عدد كبير من الأجانب على قد ما يقدر و بياخد من كل مشاركة مبلغ سنوي.

أو الحل التاني هو المشاركة الفعلية و دى قليلة جداً جداً.

أو التالت هو المناطق الحرة و دى بيسمح فيها بأيجار طويل المدى ( 20 أو 25 سنة ) للأجانب و المناطق الحرة عموماً موجودة فى الإمارات بس على حسب معلوماتي.

[yousef1978]

هي الفكرة في مضمونها إن المصري بيروح الغربة بيبقى كل تفكيره إزاي يجمع تمن التذكرة واللي دفعه علشان ينزل لأحضانبلده وأهله

مش بيفكر يستمر ولو لسنة واحدة علشان يفكر يعمل مشروع

وبعد شوية يستخسر ينزل بعد كل العناء ده قبل ما يعمله أي حاجة يفرح بيها هو وأهله- وبعدين يقول أنا أشتغل سنة كمان علشان أدفع مقدم الشقة اللي في الشارع بتاع أهله - بعد شوية يحط اللي معاه مقدم حتى أرض جنب بيت أبوه بدل الشقة ويقول أقعدلي شوية أمسك على نفسي ع الآخر وأسدد تمن الأرض وأنزل بعدين أبوه يقوله يا ابني خليك عندك كام شهر حتى ترمي الساسات وتبني دور ولو على الطوب وانزل بعد ما يبني مراته تقوله يعني بعد كل السنين دي هترجع تشتغل تاني عند الناس - احنا نصبر شوية تعملك فيها قرشين حتى لو حبيت تفتح دكان بدل المرمطة عند اللي يسوى واللي ما يسواش -شوية ويلاقي العيال عاوزين يدخلوا مدارس خاصة وهلم جرا

وفي كل لحظة في الغربة بيفتكر إن ده آخر شهر له فمستحيل يفكر في أي مشروع يربطه بالغربة كمان مستحيل يغامر ويدخل في مشروع ويسيب الدخل الثابت اللي يضمنله إنه يدفع الأقساط اللي كل شوية بتطلعله كل ما أحلامه توسع



أحد الفلاسفة قال عن نفسه : لو علمت أني سأعيش حتى هذا العمر لكنت حافظت على أسناني

والمصري لو يعرف إنه هيقعد في الغربة عشرين سنة كان فتح مشروع وبقى " أرباب " (يعني صاحب العمل ) ويمكن كان سعى للجنسية في البلد اللي مغترب فيها



مع أرق التحيات

[samoreception]

على فكرة انا لوجالى عرض ضعفين اللى باخده ويكون فى السعودية استحالة اروحها
ومين قال لحضرتك انى السعودية حلم الشباب
عن نفسى ده اخر بلد ممكن افكر اشتغل فيها هى والكويت

[aif]

نظام المملكة يمنع الاجانب من التجارة واقامة المشروعات الا بشروط معقدة لا يقوي عليها الاشخاص العاديين ( غالبا بيبقو شركات ومستثمرين كبار وفيه نسبة سعودية من رأس المال )
....
والحل انه يعمل المشروع ده باسم واحد سعودي ( كفيل ) والسعودي بياخد مبلغ شهري من الاجنبي مقابل ان كل حاجة باسمه
وممكن اوي يقل اصله ويستولي على المشروع لو نجح ... لأن الاوراق الرسمية باسم السعودي والاجنبي بيبقى عامل عنده
وده بيحصل كتير

[aif]

على فكرة انا لوجالى عرض ضعفين اللى باخده ويكون فى السعودية استحالة اروحها
ومين قال لحضرتك انى السعودية حلم الشباب
عن نفسى ده اخر بلد ممكن افكر اشتغل فيها هى والكويت

يبقى انت من ال 5% اللي مش بيحلموا يروحو السعودية
أبشر طال عمرك

[حماده المصري]

بص انا بصراحه مع احترامي للاخوه العرب

الا ان فعلا 90 % منهم دماغهم في الكنافه او التلاجه احدى الاتنتين

انا كنت في الامارات بطلع الاول على الفصل في مدرسه عاديه لحد 3 اعدادي كل الي معايا امارتيين كلهم عندهم فوق ال 20 سنه ولسه في 3 اعدادي يعني اقل واحد فيهم خد كل سنه في سنتين تلاته ابتداءا من الحضانه!!!!!!!!!!!!!!!!!!
ابويا جه مره المدرسه كنت متخانق مع مدرس شاف الناس اللي معايا في الفصل نقلني تاني يوم لمدرسه مصريه فورا ابويا خرج من المدرسه اتجنن عليا قالي انت عاملي فيها الاول وانت قاعد مع شويه عيال متخلفين عقليا اساسا

كلهم بيتعلموا اي حاجه ويشتغلوا اي حاجه ويبوسوا دماغهم عشان يتعلموا ويشتغلوا وهما مكبرين دماغهم لان اي حد اماراتي بيشتغل اي شغلانه حتى لو عامل نضافه هياخد مش اقل من 10 الف وبدون اي حاجه ليه بيت من الحكومه وفلوس يتجوز بيها

لسه فاكر في حصه الدين المدرسه سال وقالي متجاوبش انت

السؤال : هو احنا ليه بندور كتير قبل ما نتيمم

10 دقايق محايله يلا ياحبايبي فكروا شويه

لحد ما طلع واد ورد وهو شاكك في نفسه ..يا استاذ عشان ممكن تحصل ميا عشان كذا لازم ندور كتير

المدرس انبست جدا وقاله..والله انت بتفهم سقفولوا

[MASERATI]

السلام عليكم و رحمة الله و بركاته

السعودية مش حلم الشباب و لا حاجة, هى بكل بساطة, بلد كبيرة, فيها فرص عمل كتيرة و بجميع الدرجات و لا زالت حتى اليوم بتقبل بالمؤهلات بتاعتنا اللى واخدينها من مصر, على عكس الامارات مثلا, اللى أصبح من الصعب أنها تقبل بالمؤهلات الlocal بتاعتنا اللى بناخدها من الجامعات المصرية.

أما بالنسبة لعمل المشاريع فى السعودية, فده لازم يكون تحت اسم مواطن سعودى, سواء كان المواطن السعودى دى مشارك فعليا و لا لأ, بس لا يسمح للأجانب بتملك أى مشاريع فى السعودية, من الآخر كده, الأجنبى اللى هو اسمه (مقيم) مابيتملكش الا العربية اللى راكبها و الأجهزة الكهربائية اللى فى بيته اللى و هو نازل نهائى غالبا بينزلها معاه مصر و الهدوم اللى لابسه و حتتين الدهب اللى مراته لابساهم و أكله و شربه, و دمتم .........

انما على أفكار المشاريع هناك, فالأخوة السعوديين فعلا دماغهم فى الطراوة و الحكومة السعودية عارفة كده و لو فتحت الاستثمار لغير السعوديين, تانى يوم الصبح, هتلاقى البلد اتملت أجانب و السعوديين أصبحوا لاجئين فى الدول المجاورة.

أنا اشتغلت فى السعودية 3 سنين و كنت شغال حكومة و مبسوط و 100 100, بس مفيش Progress, بمعنى, أنى ممكن أشتغل هناك مثلا 10 سنين فى نفس الوظيفة اللى أنا أصلا من الأساس رايح عليها و ممكن يكون بعد المدة دى معايا مليون ريال, بس فى الآخر هعمل بيهم ايه الا أنى أنزلهم مصر, لو بلد محترمة بأه, كانت تستمح بالاستثمار زى أميركا و زى مابيحصل هنا فى كندا, فرص الاستثمار متوفرة لكل اللى عاوز يشغل فلوسه, ده من أبسط المشاريع اللى ممكن تتعمل فى السعودية و تدخل دخل محترم, أنك تشترى حته أرض و تبنى عليها عمارة 3 أدوار, الدور فيه بتاع 5 شقق مثلا و تأجرهم, الشقة ب 700 ريال فى الشهر و تعيش من دخلهم, ملك, و الأرض هناك رخيصة جدا, بس فين و فييييييييييييييييييين أما تلاقى واحد سعودى بيفكر كده, السعوديين اللى كانوا بيفكروا بالشكل ده, غالبا بتلاقيهم من أصول غير سعودية, يمنية, مصرية, فلسطينية أو لبنانيين, غير كده, تلاقيهم بالكتير أوى بيفحطوا بالوانيت !!!!!!!!

ممكن فى المدن الكبيرة, زى جدة و الرياض و الدمام و الأماكن دى, تلاقى بدأ يبقى فيه شباب و مواطنين سعوديين عندهم وعى و فاهمين الدنيا ماشية ازاى و دماغهم بتشتغل صح و بالذات اللى منهم سافر بره و اتعلم بره, بس الأغلبية لا زالت من النوعيات الاستهلاكية البحتة !!!!!!!

[MaNoLa]

أنا حاسة أننا شوية شوية هنقوم نحتل السعودية ههههههههههههههههه