الحمد لله

[A7MED_PHARMA]

السلام عليكم ورحمه الله


.
ماعملتش مواضيع من فترة
.
حالة نفسية سيئة
كسور كتير في حياتي العملية .. ووقف حال .. ومشاكل .. وخسارة

دعيت ربنا بفرج الحال
وإستغفرت كتير

وبفضل ربنا ونعمته
كل الكسور .. جُبرت
وكل المشاكل .. معظمها إتحل بفضل ربنا ونعمته
والخسارة .. إنعكست لمكسب

مش هدخل في تفاصيل ومحدش يسألني ليه

المهم

الدعاء بيقلب حياتك للأفضل
ودي عن تجربة

الخسارة في الشغل .. كان جايبالي إكتئاب مريع
الحمد لله
الواحد مش ملاحق ع الشغل
وأعدائي .. إنقهرو بلاتدخل ربني .. ربنا كفاني شرهم وعاقبهم بأعمالهم
كان نفسي أحكيلكم التفاصيل
ولا أقولكم

الرزق على الله

هحكي
واللهم إكفني شر حاسد إذا حسد



.

الشغل وقع بعد الثورة
أخدت شقة جمب الصيدلية .. فتحت عيادة
صرفت كتيررررر
بدأت تشتغل واحدة واحدة
فجأة
حادثة ضرب نار عليا .. في محاولة سرقة كانت نتيجتها
1. بهدلة العربية بهدلة جامدة .. مع إصابة خفيفة ليا
2. العيادة إتقفلت علشان الأطباء خافو ييجو تاني

إتقفلت
وكنت معتبرها الأمل الاخير أنها تزق الشغل
الشغل من سئ لأسوأ
عرضت الصيدلية للبيع
فجأة
يدخل عليا واحد عرفت بعد كده إنه دكتور أطفال أخصائي .. قالي سمعت أن عندك عيادة مقفولة
قولتلو تعالى إشتغل
وجه إشتغل
واحدة واحدة
من 3 أسابيع لحد دلوقتي شغال
دعايا يمين وشمال
الراجل مابقاش ملاحق ع الكشوفات.. وأنا مابقتش ملاحق على روشتاته
واحد صاحبي دكتور تحاليل.. جبته كمان في نفس المكان .. وبقت عيادة ومعمل
لسه فيه غرفة فاضية
جبت فيها دكتور باطنة . . . هييجي من أول الشهر
وإتفقت مع دكتور كبد وجهاز هضمي.. هييجي يوم في الاسبوع
ودكتور تخسيس في البلد هنا.. دكتور التحاليل صاحبي... يبقا صاحبه
هيجيبه معانا برضو في نفس المكان
وإشتغلت

الحال إتغير 180
الشغل زاد 100%
معدل البيع نط للضعف

بلاحول مني ولاقوة
جت من ربنا بدون سعي ورا دكاترة تجيلي ..أول مرة فتحتها كنت لفيت على دكاترة وإتحايلت على دكاترة تيجي .. وجبت اتنين من الدكاترة اصحابي (صغار السن) في الاخر
لكن دلوقتي
معايا أخصائيين
.
مابيكتبوش إلي أقولهم ماتكتبهوش .. مراعاة ليا منهم يعني .. مش علشان أنا صاحب المكان الأصلي

قولتلهم
إكتبو أي حاجة ..أنا بس عاوز الأفضلية إني أعرف الأصناف الي هتكتبوها قبل ماتكتبوها
إنما
مش هنشفر روشتات .. ولاهنفرض على الناس تيجي عندي الصيدلية تجيب الأدوية
أنا لو جالي ربع شغلكم وأقل .. هحمد ربنا وأشكر فضله


الناحية التانية

الدكتور إلي كنت حكيت عنه (الجراح) إلي عنده عيادة غير مرخصة في بيته..وفتح صيدلية لمراته وبيكتب أصناف مش موجودة نهائي علشان الناس تلف تلف وتجيب الدوا من عند صيدلية مراته

عمنا الحج
تقريبا حاله وقف
اللهم لاشماته

الناس بدأت تعرف أنه بيكتب أصناف غالية .. مش علشان المريض محتاجها..لا
بيكتبها علشان الناس تلف ماتلاقيهاش وتجيبها من صيدليته

كان هو الوحيد في البلد تقريبا
الـ 10-15 كشف الي بيجو لأخصائي الأطفال الي معايا .. كانو بيروحو له الأول
مع وجود أخصائي (((أخصائي))) .. بقت الناس تروحله وتسيب الدكتور بتاع البلد علشان ماكنش فيه غيره


.

عرفت من المخزن الي بيسحب منه((بتكلم على الجراح الي فاتح لمراته صيدلية))
إن مسحوباته قلت من المخزن
قشطة
اللهم لاشماته

.
مسحوباته قلت
علشان
شغله قل.. وتلبيس الناس في أدوية غالية قل

.
اللهم لاشماته
الراجل ده كان بيخلي شكلي كصيدلي .. زي الزفت
لما تدخل عليك روشتة من دكتور في نفس البلد.. ماعندكش منها ولا صنف
وكل يوم صنف جديد .. وكل يوم صنف غريب

المهم
مابقتش محتاج روشتات(ده لو جالي منه روشتات يعني)

معايا الدكاترة بتوعي
الست الي في العيادة .. موصيينها كده وكده أنها تبعت الناس ليا
الناس جاتلي.. كان بها
ماجتليش.. يبقا رزق مش مكتوبلي


والحمد لله على فضله ونعمته


.
ربنا كريم
ويستحق ألف شكر وألف ثناء

ربنا لك الحمد حمدا مد البحر .. وأمد السماء








فيه حاجات تانية
بس الحمد لله





ربنا يخفف همكم وأحزانك يارب



اللهم إني أحمدك حمد كل الحامدين
وإشكر شكر العارفين
بنعمتك .. أحمدك
بنقمتك .. أحمدك

برضاك .. أحمدك
بغضبك .. أحمدك وأستغفرك




موضوع المرض ده إختبار تاني .. ربنا يصبرني عليه

[Lion_Heart]

الحمد لله حمدا كثيرا طيبا مباركا فيه

[فادى محمد]

يااااه يا دكتور احمد
انا فرحان جدا والله
ربنا يوسع عليك من فضله
انا تاجر ومريت بتجارب كتيير زيك
والحمد لله ربنا عمره ما ضيقها شويه الا علشان يوسعها اكتر من الاول
اصل مالناش غيره يرزقنا هو سبحانه اسمه الرزاق محدش يعرف ولا يقدر يرزق نفسه
الحمد لله .هقولك علي سر من اسرار جلب الرزق..الاستغفار دايما في القران الكريم
مرتبط الرزق بالاستغفار (استغفروا ربكم يرزقكم) ربنا يعطيك ويوسع عليك من فضله
ويعينك علي شكر نعمته

[gebreel]

"من لزم الاستغفار جعل الله له من كل هم فرجا" ده كلمة السر بجد

الحمد لله رب العالمين و ربنا هيباركلك يا احمد ان شاء الله زيادة علشان انت متوكل عليه حق التوكل و في نفس الوقت بتراعي ربنا في شغلك و ضميرك =)

[AHMED_DINAMO]

الحمدلله يا ابو حميد احمد ربنا واستغفره كتير

بس ليا سؤال امال لو الكلام كان بشماته كنت عملت ايه ده انت جرست الجراح يا راااااااجل ههههههه

[AhMeD EzZ]

الف الف مبروك يا ابو حميد و الله انت طيب و ابن حلال و جدع و ربنا بيردلك كل الي كنت بتعملة مع الناس مع ان ساعتها كان بيتقال عليك رياء

و الله فرحتلك في عز حزني يا صاحبي :)

[mazher_m]

بسم الله ماشاء الله
ان الله لا يضيع اجر من احسن عملا
انت اخذت بالاسباب وتوكلت علي الله
واجزل الله لك العطاء
لسه المشوار طويل واعتبر دي اول خطوه
ومن نجاح الي نجاح باذن الله
(احفظ النعمه بدوام الشكر واكثرها بدوام الاستغفار وطهرها بالزكاه والصدقه)

[wael30003]

مبروك يا دكتور احمد

ربنا كريم وعظيم

[bido600]

والله يا دكتور احمد انا فرحتلك من قلبي والله
واحب اقولك ما ضاقت الا وفرجها الله
رزقك مكتوب
سبها علي الله
وادعي لربنا وخليك قريب منه وصدقني مش هتخسر ابدا ابدا

[A7MED_PHARMA]

الحمد لله على فضله
الزيادة دي.. على دكتور الأطفال بس .. طبيب الباطنة وطبيب التخسيس وطبيب الكبد
لسه ماشتغلوش((إيموشن واحد بيرقص حواجبه))

بإذن الله .. أول ماظبط مواعيدهم
هعمل لوحه بانير كبيرررررررررة ( 2×4) متر
وتتحط قدام الصيدلية

تخلي كل الناااااااااااااااااااااااااااااااااااااس تشوفها
علشان هتكون كبيرة زيادة عن اللزوم .. وملفته زيادة عن اللزوم

هيتكتب فيها التخصصات كلها .. ومواعيدهم .. وكل حاجة



التقيل جاي وره
بإذن ربنا

[eldell]

'طيب الحمد لله يادكتور احمد وربنا يصلحلك الحال اكتر واكتر

[pro_samir]

ما شاء الله ربنا يباركلك

المهم ظبط موضوع التراخيص علشان اكيد الناس دي مش هتسيبك في حالك

[MASERATI]

السلام عليكم و رحمة الله و بركاته

ألف مبروك يا باشا و ربنا يباركلك و يكرمك, اوعى كل الفلوس اللى تجيلك تصرفها عالعربية اللانسر المكوة بتاعتك عشان تقلبها ايفو !!!!!!!!!!!!!!, حوش قرشين و اعملك بيهم أى مشروع تانى جمب الصيدلية, محدش عارف بكره فيه ايه و أنت عارف كويس أوى, أن الدنيا دايما فوق و تحت, لا عمرها بتفضل فوق و لا عمرها بتفضل تحت, طول مانتا قااااااااعد, فكر فى بزنس تانى جمب شغلك.

و اسعى و ربنا هيكرمك و يباركلك ان شاء الله.

[أحمد الجندى]

بعد اذنك يا د. أحمد تسمع منى نصيحة كأخ ياريت تستعين على قضاء حوائجك بالكتمان... أنت صحيح ماتعرفنيش لانى مابردش على مشاركاتك بس أنا متابع اغلب اللى انت بتكتبه وقريت كتير من الابتلاءات اللى انت عديت بيها...

جرب وشوف لو عملت بالنصيحة دى ايه الفرق اللى ممكن تلاقيه وده ميمنعش انك تفرح حبايبك وتقولهم على الاخبار الحلوة بس على قد اللزوم .... وربنا يوفقك

[mesaharaty]

ألف مبروك يا باشا وربنا يزيدك من فضله وعطائه

بس أقول لك على سر بينى وبينك :
((لا تنسى حق المحتاجين والفقراء ))
إعمل كده وهتشوف كل السعادة بإذن الله