أبو البنات

[OlaOsman]

واحد زميلنا سمعت خبر عنه قريب ان زوجته انجبت بنت و دي البنت رقم 2، يعني بأه أبو البنات، لما شفناه و باركنا له قال لنا انه طلع عليه اللي كان بيعمله في أصحابه.. قبل ما يتجوز كان لما حد من أصحابه بيرزق بأكتر من بنت كان بيقعد يقول له يا ابو البنات و يتريق عليه.. و دلوقتي أصبح هو أبو البنات.

يا ترى بتفرق معاكوا المولود القادم بنت أم ولد؟ بصراحة شديدة و بدون مواربة.. هل لو رزقك الله ببنت في أول و تاني إنجاب بيبقى نفسك في الولد و ممكن تنجب مرة تالتة عشان يطلع ولد؟.. مجرد سؤال :)

[aif]

شوفي يا علا
اللي عنده بنات ... عاوز ولاد
واللي عنده ولاد ...عاوز بنات
واللي ماعندوش خالص .... عاوز اي حاجة
واللي عندة ولاد وبنات .... مش عاوزهم كلهم
....................
هو ده الانسان .... لايملأ جوفه الا التراب
اللي بيعترض على خلفة البنات او خلفة الاولاد .... ياخد عبرة من اللي ربنا لسة مارزقهوش بالذرية ..... ح يحمد ربنا
يا رب ترزق كل محتاج بالذرية الصالحة

.... هو احنا اللي بنجيبهم .........ده ربنا اللي بيهبهم لنا

[maged]

انا عندى 3 بنات وعادى خالص صحيح كل قرايبى بيلحو عليا انى اخلف طفل رابع على امل انه يطلع ولد لكن انا وزوجتى مقتنعين ان كده كويس ولا نشعر بأى نقص او احساس بالحرمان من الاولاد اطلاقا وبعدين دى ارادة ربنا ومفيش حد ربنا هيعطيه كل حاجه فى الدنيا لازم هيكون فى حاجات ناقصاه لكن عليه انه يشكر ربنا بأستمرار على الحاجات اللى عنده وايضا على الحاجات اللى مش عنده لانه ربنا حرمه منها لمصلحته
وعندنا ايه بتقول ( ثمرة البطن عطية من الرب ) ودى معناها ان المولود ربنا هو اللى بيحدد نوعه محدش تانى يقدر يتدخل
وربنا يعطى الخلف الصالح للى مش عنده خالص

[OlaOsman]

انا عندى 3 بنات وعادى خالص صحيح كل قرايبى بيلحو عليا انى اخلف طفل رابع على امل انه يطلع ولد لكن انا وزوجتى مقتنعين ان كده كويس ولا نشعر بأى نقص او احساس بالحرمان من الاولاد اطلاقا وبعدين دى ارادة ربنا ومفيش حد ربنا هيعطيه كل حاجه فى الدنيا لازم هيكون فى حاجات ناقصاه لكن عليه انه يشكر ربنا بأستمرار على الحاجات اللى عنده وايضا على الحاجات اللى مش عنده لانه ربنا حرمه منها لمصلحته
وعندنا ايه بتقول ( ثمرة البطن عطية من الرب ) ودى معناها ان المولود ربنا هو اللى بيحدد نوعه محدش تانى يقدر يتدخل
وربنا يعطى الخلف الصالح للى مش عنده خالص

هنا بأه مربط الفرس.. يعني سبحان الله، ممكن يبقى زوجين راضيين بحياتهم كما هي كده، سواء اللي ماعندهمش أطفال ذكور أو حتى مافيش أطفال خالص.. انما لازم الناس تحسسهم ان فيه حاجة نقصاهم و يبدأوا يلحوا على إكمال ما هو ناقص (من وجهة نظرهم طبعا)

انما فعلا ربنا يبارك لك انت و زوجتك يا رب فيما رزقكم الله :)

[ramyfawzy]

انا عندي ولد (احمد) وكان نفسي اجيب بنت بس ربنا سبحانه وتعالى بعت لى هدية تانية بس ان شاء الله في الطريق (ولد بإذن الله)
وكفاية على كده
عشان نقدر نربيهم ونعلمهم وناكلهم كويس
وربنا يسترها معانا جميعا
على فكرة انا المدام عندي كان نفسها في ولد ولما جه احمد وكبر قالتلى انا مش عاوزة ولاد تاني بس ربنا امر وحكمه نافذ علينا

رامي (ابو احمد) ..... مؤقتا

[aif]

خلينا نكون واقعيين اكتر ...
الموضوع له علاقة بالمواريث كمان .... اللي ما عندوش ولد بيدخل في ميراثة اخواته .... ودي عند بعض الناس بتمثل الدافع الأول لتفضيل وجود الأولاد ( ولو ولد واحد ) ...عشان يحافظ على ميراثه ... ومين عالم ... مين اللي ح يموت الأول
وفيه ناس تانية بيقولو الولد بيشيل اسمي وهو اللي بيبقى ذكرى بعد موتي .... هو يعني الواحد بعد مايموت ح يفكر في ذكراه في الدنيا ... ده ح يبقى عنده اهتمامات تانية خالص ... ده فيه جنة وفيه نار ... ح يفكر في الدنيا ازاي بقى
الناس نيام ... إذا ماتو إنتبهو
.......
والله انا ليا تجربة في الموضوع دة ... انا ربنا رزقني باولادي بعد حوالي 6 سنين ونص من الزواج وبدون اسباب طبية .... الشعور ده انا جربته ....واللي بيضايق اكتر هو تدخل الاهل والاصدقاء بل والجيران كذلك في امور شديدة الخصوصية مثل الأنجاب ... وتطوع كل من هب ودب لإعطاء النصائح واسماء الدكاترة اللي ربنا جعل الشفا في ايديهم
لو انا بقى بعد السنوات دي ربنا رزقني بمولود .... بالذمة مش يبقى طمع مني وقلة ايمان اني اقول ..لأ اصل انا كنت عاوز ولد ولا عاوز بنت ...
عشان كدة انا مدرك تماما انني لازم اشكر ربنا علي ما اعطى وما اخذ .....كل شيء بحكمة وبأوان ... واحنا نظرنا قاصر جدا ... مش شايفين غير اللي احنا عاوزينه وبس

[OlaOsman]

شوفي يا علا
اللي عنده بنات ... عاوز ولاد
واللي عنده ولاد ...عاوز بنات
واللي ماعندوش خالص .... عاوز اي حاجة
واللي عندة ولاد وبنات .... مش عاوزهم كلهم
....................
هو ده الانسان .... لايملأ جوفه الا التراب
اللي بيعترض على خلفة البنات او خلفة الاولاد .... ياخد عبرة من اللي ربنا لسة مارزقهوش بالذرية ..... ح يحمد ربنا
يا رب ترزق كل محتاج بالذرية الصالحة

.... هو احنا اللي بنجيبهم .........ده ربنا اللي بيهبهم لنا

و نعم بالله :)

يعني انت تلاقيك الناس بدأت زن عليك انت و زوجتك عشان تجيبوا بنوتة بأه تطري الجو الخناشيري في البيت شوية :)

و لا الناس بتزن على الإنجاب عموما و الذكور خصوصا و بيكبروا من البنات؟

[aif]

و نعم بالله :)

يعني انت تلاقيك الناس بدأت زن عليك انت و زوجتك عشان تجيبوا بنوتة بأه تطري الجو الخناشيري في البيت شوية :)

و لا الناس بتزن على الإنجاب عموما و الذكور خصوصا و بيكبروا من البنات؟

اللي يزن يزن ... وفي الآخر اللي ربنا رايده ح يكون
اما بقى الجو الخناشيري ده مدام شوماخر هي اللي ممكن تحس بيه ... هي وحيدة في وسط 3 خناشير.... مسكينة ... انا عن نفسي مش ملاحظ اساسا موضوع الخناشير ده :):):):)
يعني من الآخر لو ربنا رزقنا ببنوتة ح اكون مسبوط
لو رزقنا بخنشور تالت ح اكون مبسوط
لو ما رزقناش بحاجة تاني ... برضه ح اكون مبسوط
انا مبسوط علطول ... الجدع يزعلني :)

[AhmedGen2]

أنا شايف إن البنات كمان مسؤلية أكتر ، ودى من الأسباب اللى بتخلى الواحد يميل للولاد أكتر.

[Xpert]

اه بتفرق ...
انا نفسي ربنا يكرمني .. و اتجوز الاول طبعاُ هههههههههه .. و تكون واحده ال real deal زي ما بيقولو ...
و بعد ما اتجوز ... يبقي عندي ولد و بنت ... و احمدك يا رب علي كده شكراُ .. فعلاُ اتمني حقيقي ربنا يكرمني بزوجه صالحه و ولد و بنت ... مش عاوز اكتر من كده .. كده تبقي الحياه نعمه و ميه رضا ..

[kareem_Ashmawy]

انا أمنية حياتى يكون عندى بنت...وطبعا كل اللى يجيبه ربنا كويس
بالمناسبة أنا مش هتجوز الا بالميت كمان 7 سنييييييييين:)

[Dr.A.Nabil]

انا سمعت حديث قبل كده بيقول ان اللي عنده بنتين ويربيهم كويس لغاية ما يجوزهم كانوا له سترا من النار

[Sameh]

انا سمعت حديث قبل كده بيقول ان اللي عنده بنتين ويربيهم كويس لغاية ما يجوزهم كانوا له سترا من النار

وبنت واحدة كمان بإذن الله

الرسول عليه الصلاة والسلام بدأ بتلاتة ، ولما قيل وإثنتان قال وإثنتان ، فواحدة قال فواحدة

بس أهم حاجة التربية زى ما قلت

ربنا يرزق كل اللى ماتجوزش بالزوجة الصالحة والذرية الصالحة

[د.أحمد سمير]

أنا كنت كتبت قبل كدة في الموضوع ده تحت عنوان مملكة البنات

http://www.nilemotors.net/Nile/showthread.php?t=6072&highlight=%E3%E3%E1%DF%C9+%C7%E1%C8%E4%C7%CA

لكن المسألة بالنسبة للأولاد والبنات بالنسبة لي ما تفرقش والله ..
لكن بالملاحظة والتجربة تبين إن البنات بيسوقوا اجوازهم ناحية أسرتهم وليس العكس
يعني دائماً أقرب الأسر هي أسرة الأم حيث فكرة الحرام والعيب مرتبطة بالأنثى أكثر .
فتلاقي أخوك ييجي بيتك كضيف ، لكن أخوها ييجي ياكل ويشرب وينام ويتحرك بحرية ، وتعتمد عليه في مشاوير تخصكوا ، وتلاقي كذلك لو المدام بتشتغل إنها بتودي الولاد لأمها ، وتعتمد على أسرتها في مساعدتها بدون شكوى أو تحفظات .
يعني من الآخر عندك بنات هتجوزهم وهيفضلوا برضه في أرابيزك
عندك ولاد هيطفشوا منك بعد الجواز وزي ما المثل الشعبي بيقول :
"ربي يا خايبة للغايبة "
المشكلة بس في الحكاية دي إنك مع خلفتك للبنات ولو فرضاً ربنا كرمك وبقى عندك كدة فيللا وكام عربية .. إنك هتلاقي شوية حلاليف ماشيين في بيتك بالفانلات ، وواحد فيهم بيجعر وبيقول اعمليلي شاي يا حماتي .. وتيجي تنزل الصبح تلاقي العربية الأولانية خدتها فلانة وجوزها علشان الباص فاتهم ، والعربية التانية خدها فلان جوز علانة علشان اتأخر على الشغل ، والبنت التالتة عربيتها عطلانة فخدت العربية التالتة ولا تجد أمامك سوى الميكروباص أو تاخدها كعابي على شغلك ..

لكن أنا كنت ولا زلت سعيداً جداً بابنتي الثانية دارين لسبب جوهري وهو إن كل الإناث اللي يخصوني وحيدات
يعني أنا ولدت لأم وحيدة وخالين فلم أذق طعم الخالة أبداً
كذلك لي أخت وحيدة بين ثلاثة ذكور
المدام كمان وحيدة بين أربعة ذكور
زوجات إخواتي الاثنين وحيدات بين ثلاثة ذكور لكل منهما
فكلهن لم يذقن طعم الأخت البنت ، وعيالنا كلنا محرومين من الخالات اللي أسمع انها بتيقى أقرب واحدة محبة للأولاد بعد أمهم .
لكن لو ربنا أذن وبناتي كبروا واتجوزوا فأحفادي ولأول مرة بعد سنين طويلة هيكونوا أول من يذق طعم الخالات في العائلة..
تقبلوا خالص مودتي ..

[Ahmed Taha]

نعمة من المولى

الأطفال نعمة و رزق هدية من المولى عز و جل. في حد تجيله هدية و يتأمر؟

ربنا يباركلنا كلنا في أطفالنا و يجعلهم صالحين.

عندي بنت بالدنيا كلها و الحمد لله على نعمته.