احدث تقارير عن السيرك والاوبرا و دريم بارك ومقر الحريه والعداله

[mazagngi2010]

باختصار واحد صاحبى ابن ناس بيحب يغير جو كل شويه
ولانه محترم حبتين بيكتب انطباعه عن الاماكن اللى بيروحها فى صفحته على الفيس علشان يفيدنا
ولانى محترم هنقلهالكم هنا

==============
تقرير دريم بارك

النهاردة رحنا دريم بارك

سعر التذاكر كالأتى :

فضية 60 جنيه .. و ده تخليك تلعب كل الألعاب ما عدا الألعاب اللى بفلوس
ذهبية 100 جنيه ... و ده تهليك تلع كله بلس 5 العاب من ام 15 جنيه
بلتونيوم 120 جنيه ... وده تلعب كل الألعاب بلس 6 العاب من ام 15 جنيه و لعبة با 20 جنيه

و ممكن تلاقهيم ارخص من كده فى نقابة المهندسن

احسن اختيار هو الدهبية ....

لأن الألعاب الى ببلاش تقريبا 7 ( العربيات المتصادمة- المركبة اللى بتغرقك ميه- الغسالة- قطار الشرق- قطار الظلام-المراكب الطائرة-المركبة .. و شوية العاب بسيطة)

و فى ركن العاب خاص للأطفال

الألعاب اللى لعبتها النهاردة و دفعت 15 جنيه على كل واحدة كانو خمسة...

السيميلتور ... و ده تلبس نظارة وتقعد على كرسى و تكون مكان كايتن طيارة فى رحلة لأصطياد اليناصورات فى جوراسك بارك ... و كانت روعة ... الكراسى بتتحرك مع المنظر الثلاثى الأبعاد

تيرنادو وTOP Spin ... ما يتوصفوش ... لازم تجرب ينفسك

الصاروخ ... بتحس ان بطنك طلعت فى زورك

قطار الموت .... وده كان افظعهم

المهم اقطع تذكرة من ام 100 جنيه .. لأن الألعاب ده هى احسنهم و مش ها تقدر تشوفها و ما تجربهاش( انا دفعت 35 جنيه زيادة للأسف)


المهم لو رحتم ها قولكم 3 نصايح :

- البيبسى و الميه و الأكل غالى جدا ( تقريبا الضعف التمن) هما بيكتبوا ان ده ممنوع دخوله.. لكن كله بيخش بشنطته و ما حدش عارف هى فيها ايه ... عشان كده ابقى جيب معاك اكلك

- فى لعبة اسمها الأناناسة المجنونة .. ما حدش يركبها .. ما فهاش اى فن .. و بتدوخك بس ... وممكن تبوظ اليوم كله عليك

- اليوم بيخلص على الساعة 7 بليل .. اخرج نص ساعة بدرى عشان تلاقى مكان فى الأتوبيس

الأجرة با 7 جنيه لحد رمسيس من عند دريم

و فسحة سعيدة

=================
تقرير السيرك القومى

لسه راجع حالا من السيرك القومى

الحفلة بدأت الساعة 8:30 مساء الى 11:10 مساء

الفقرات كانت متنوعة و جيدة على الرغم من اللإمكانيات المتواضعة للسيرك

تقديم الفقرات كلها كان من المصريين ... الموسيقى التصويرية كانت اكتر من روعة

الجمهور كله من الطبقات العادية و البسيطة و أغلبه اذا ما كانش كله عائلات و أسر بأطفالها

الجو كان بسيط و مرح جدا و فيه الفة شديدة

التذاكر تمنها كان 30 -50-100 جنيه

انت احجز تذكرة با 30 جنيه و اتحرك زى أى كائن طفيلى محترم بعد كده على الكراسى ام 50 و 75 ... بيكون فى صفوف فاضية و ما حدش هايقولك حاجة

على العموم هى فسحة ممتعة و رخيصة تقدر تقضيها مع عيلتك

تصبحوا على خير
محمود

=================
تقرير الاوبرا

امبارح حضرنا حفلة فى دار الأوبرا للموسيقار عمر خيرت
ده كان اول مرة احضر حفلة فى الأوبرا ... انا كنت متوقع انى مش ها لاقى حد
لكن القاعة كانت مليان عل أخرها

لمدة تلات ساعات الأستاذ عمر خيرت و فرقته سمعونا اروع السموفنيات المصرية .... طبعا انك تشوف 100 واحد ... و كل واحد معاه الة من الات الموسيقى العربية .... و يعزفوا مع بعض ويطلعوا قماش زى ما بيقولوا .... ده شىء يستحق المشاهدة و لو لمرة فى العمر

شغل التيم ورك هنا كان اكتر من ممتاز .... هنا تعرف اللى انت كنت يتسمعه ... د ه و راه شغل جماعى رهيب

نوعية الناس اللى حاضرة ... تحس انهم مش من مصر .... من الأخر ناس مستحمية

اللألات و الإيقاع الشرقى المصرى ليه طعم تانى

جو مختلف .. ناس مختلفة ... حياة و فكر مختلفين

يا ريت الناس اللى دفنا نفسها بالحياة فى الشغل ... تجرب تغير

بس ابقوا خدوا حبوب ضغط .... عشان ضغطكم اكيد ها يعلى من الصدمة اللى ها تحصلكم

و هاتقولوا لنفسكم احنا ايه اللى جبنا هنا .... :)
محمود عبد المحسن

==================
تقرير زياره مقر الاخوان المسلمين

للمتفائلين فقط :)

طبعا انتم عارفين ان اللإنتخابات على الأبواب
عشان كده قررت انى اتعرف على ألأحزاب عشان اختار صح

فى تلات احزاب فى بالى : الحرية والعدالة -الدستور - مصر القوية ( لسه حركة احرار لأحازم ابو اسماعيل تحت التأسيس)

كلمت مندوب منطقة المهندسين لحزب مصر القوية .. و بكره ها يكلمنى
و مندوب حزب الدستور .... ما كنش فاضى

كلمت حزب الحرية و العدالة فرع العجوزة ... رحتلهم بعد العشا

قابلت استاذ ايمن .. عضو فى لجنة الإعلام

عرفته على نفسى وبدأت اسأله .... عايز اتعرف على الحزب ... ايه الخدمات اللى بتقدموها .. ايه اللى يخلينى انتخبكم

طبعا قاللى المقدمة المعروفة .. انه حزب مدنى بس بمرجعية اسلامية .. و تاريخ الجماعة .. و نشأتها .. و الخ

الأنشطة هناك متوزعة على خمس لجان

لجنة التثقيف : محاضرات لشخصيات معروفة ... تحاضر فى الأمور العامة و السياسة
لحنة الشباب : سفريات و انشطة رياضية للشباب
لجنة الأعمال الأجتماعية :: انشطة خيريبة زى جمعية رسالة
لجنة المرأة : خاصة انشطة و تثقيف المرأة
لحنة الإعلام و ألأعضاء الجدد : وده المختصة بالأعضاء الجدد

اثناء الكلام عرفنى انه مهندس كهربا خريج جامعة القاهرة عملة ماجستير ادارة اعمال فى امريكا و اشتغل فى الأمارات و بعد رجع هنا مستشار فى مصنع من المصانع ( مش فاكر اسم المصنع)

هو شغله تطوعى و منضم من 11 شهر بس

سألته هو استفاد ايه من شغل الحزب ... قاللى هو استفاد من العلاقات اللى كونها .. قاللى هتلاقى اصحاب المصانع و الشركات و الدكاترة و اللى بيفهم فى الأقتصاد و السياسة و افكار و بنى ادمين بأفكار مختلفة و جديدة ...

قاللى كام نقطة عشان اقارن الأحزاب ببعض

تاريخ الحزب .... توجه الحزب ( اسلامى- ليبرالى- علمانى-يسارى-اشتراكى) ... عدد المشاركين فيه و قدرته على الحشد و التنفيذ ....مستقبل الحزب ..هل الحزب مرتبط بشخص و لا بفكرة .. البرنامج و الرؤية... الخ)

على العموم و الواحد مش ها يعرف الناس دول غير لما يتعامل معاهم

بكرة نكمل الرحلة مع الدستور او مصر القوية

و صباحكم حرية و عدالة :)
محمود

=================================

لو مواضيعه عجباكم ياريت تشجعوه ولو عندكم اماكن تستحق الزياره ياريت تفيدونا بيها لانه بيحب يغير جو على طول

[grand hand]

طبعا مواضيع ممتازة وكفاية انه بيوصف اماكن جديدة معظمنا ما زارهاش قبل كدة زى الاوبرا مثلا واحنا محتاجين دايما مواضيع زى دى ولو كل واحد شارك خبرته وتجربته فى زيارة مكان ما او التعامل مع شئ او خبرة معينة هيكون شئ جميل، ياريت يا مزاجنجى تخلى صاحبك يسجل هنا فى المنتدى ونتبادل كلنا الخبرات والتجارب دى وكله يستفيد

[mazagngi2010]

الموضوع يلعلع شويه وهخليه يسجل ان شاء الله

[Y a r i s]

بس غريبة هو مقلش تذكرة الاوبرا كانت بكام والحفلات ايام معينة ولا طول ايام الاسبوع ياريت التوضيح

[mr_vampire]

سيرك قومي ودريم بارك هههههههه نصيحة لو باقي علي صداقته متخلهوش يسجل هنا ويشوف الموضوع او بلاش تقوله انتا اللي ناقل زياراته للاماكن ده.

[mazher_m]

انت وصاحبك من الناس اللي لازم تتصاحب

[mazagngi2010]

سيرك قومي ودريم بارك هههههههه نصيحة لو باقي علي صداقته متخلهوش يسجل هنا ويشوف الموضوع او بلاش تقوله انتا اللي ناقل زياراته للاماكن ده.

مش كل الناس هنا معقده وحابسه نفسها على فكره

[mr_vampire]

مش كل الناس هنا معقده وحابسه نفسها على فكره

عارف علي فكرة.

[mr_vampire]

اسف ياباشا لو المشاركة اتفهمت تريقة او حاجة زي كدة.

[Car's Sniper]

صاحبك دا دماغ...انا بردو لو قعدت اسبوع ماغيرتش جو اكتئب...بس مش لدرجة اروح الاوبرا ...اخرى اتمشى قصاد الاوبرا :d
يروح AFRICANO PARK
الاقصر ...اسوان...الشرقية..كدة يعنى

[mazagngi2010]

اسف ياباشا لو المشاركة اتفهمت تريقة او حاجة زي كدة.

تريقه ايه بس
عيب عليك تفكر التفكير ده
ونورت الموضوع يابرنس
===============
Car's Sniper
ييجى يعمل ايه فى الشرقيه ولا يزور فيها ايه ده انا بلف الزقازيق فى 5 دقايق ودمتم

[dede_dodo88]

بس غريبة هو مقلش تذكرة الاوبرا كانت بكام والحفلات ايام معينة ولا طول ايام الاسبوع ياريت التوضيح

حفلات عمر خيرت بتبقى ب75-100-150
الحفلة الجاية يوم 31 أكتوبر و التذاكر بتنزل قبلها بحوالي شهر و بتخلص على طول..

أنا مليش لا في الملاهي و الهبد و البهدلة بتاعتها, و طول عمري بكره حاجة أسمها سيرك..
أنا بقى بتاع الأوبرا xD
كل فترة بروح لو في حفلة لعمر خيرت أو لو في حفلة بالية حلوة..
هي طبعاً تجربة مختلفة و ممتعة جداً خصوصاً البالية حاجة وهم بجد خصوصاً باليهات تشايكوفسكي زي كسارة البندق و بحيرة البجع..
بس الحاجة اللي بتقفلني تماماً في حفلات خيرت الناس اللي بتقعد تسقف في الحفلة, بيفصلوني بجد..

[egyptawy2010]

بجد الموضوع رائع وجميل وفيه حاجات كتيرة احنا مش عارفين نستمتع بيها عشان مش عارفين انها فى بلدنا


زى السيرك القومى مثلا انا ما اعرفش هو فين ولا اروحه ازاى وكده


ياريت الناس تنقل تجربتها هنا لكل مكان راحته عشان تفيد غيرها

[grand hand]

حفلات عمر خيرت بتبقى ب75-100-150
الحفلة الجاية يوم 31 أكتوبر و التذاكر بتنزل قبلها بحوالي شهر و بتخلص على طول..

أنا مليش لا في الملاهي و الهبد و البهدلة بتاعتها, و طول عمري بكره حاجة أسمها سيرك..
أنا بقى بتاع الأوبرا xD
كل فترة بروح لو في حفلة لعمر خيرت أو لو في حفلة بالية حلوة..
هي طبعاً تجربة مختلفة و ممتعة جداً خصوصاً البالية حاجة وهم بجد خصوصاً باليهات تشايكوفسكي زي كسارة البندق و بحيرة البجع..
بس الحاجة اللي بتقفلني تماماً في حفلات خيرت الناس اللي بتقعد تسقف في الحفلة, بيفصلوني بجد..

الدخول بالملابس الرسمية؟

[shaddadfalcon1]

هههههههههههههه جامد قوي موضوع ناس مستحميه ده