مأساة المصريين علي قناه الجزيره

[kok3]

دلوقتي لسه بتفرج علي قناة الجزيره عاملين تقرير عن حي الدويقه الناس هناك مش ممكن بصراحه ايه دا انا مشفتش كدا دا ظلم اقسم بالله لما نعيش في البلد دي ويكون فيها ناس عايشه بالمستوي المتدني دا الناس دي مشكلتها انها ساكنه تحت صخور الجبل والجبل كل فتره يقع عليهم صخره تموت شويه منهم والمشكه ان الناس دي ييعني عايشين خارج التاريخ لا تعليم ولا رعايه ولا صحه ولا حتي حياه محترمه وكريمه والله قلبي وجعني علي الناس دي مش ممكن الناس دي عايشه ازاي فين حقهم في الحياه الكريمه ولا حقهم في الكرامه الانسانيه ولا ولا مناظر تصعب علي الكافر والله البلد دي ظالمه اقسم بالله لما توصل المواطنين فيها للمرحله المنحطه دي واحنا هنتحاسب علي تجاهلنا للناس دي مأساه المصريين كل الدول بتتفرج عليها اتفضحنا في وسط العالم السؤال هنا هو ليه كدا اشمعني احنا اشمعني المصريين بقوا كدا !!! فيه فقر ف العالم اكيد في كل الدنيا بس ماعتقدش انه زي مصر دا مش فقر دا اعدام. ليا صديقه امريكيه كانت بتحكيلي انها في مستوي اجتماعي متدني وعندها مشاكل ماديه فقيره يعني تمام لما بعتتلي صورتها في بيتها لقيت الصديقه الفقيره دي عندها حمام سباحه في الباك يارد بتاعها وبتقولي فقيره تيجي تتفرج علي الفقر اللي في مصر واكيد فيه فقرا زيها كتير في المانيا وانجلترا وفرنسا انما احنا هنا في مصر لينا وجهه نظر تانيه عن الفقر مختلفه عن العالم كله. انا اتخنقت من البلد دي واللي فيها مبشوفش كدا غير عندنا احنا بس ليه ياربي كدا بس.

[mr_vampire]

- راجع يافندم عاليوتيوب حلقات برنامج ( واحد من الناس لعمرو الليثي ) هتكتشف ان في مصر فيها في كل محافظة ( حي دويقة ) واماكن لا يشربون فيها مية ساقعة حتي .... والبرنامج ده كان بييجي ايام مبارك وقبل الثورة بفترة ومكنش حد بيتحرك ... وكان عمرو الليثي بيحرج الوزرا والمحافظين وهما برده معندهمش دم ولا بيتحركو ...

[grand hand]

حسبى الله ونعم الوكيل فى مبارك واعوانه
حسبى الله ونعم الوكيل فيهم وفى من اعانهم على الباطل الف مرة

[Y a r i s]

معليش يا كوك. ولا تزعل نفسك ياغالي
علماء الفقة لمن يجو يختلفوا في امر ويحتاروا فيه بيرجعو للاصل .... وهنا لازم نرجع لاصل المشكلة ابتدت منين .... ابتدت من المركزية في القاهرة وتوفر فرص العمل .... ابتدت الناس تزحف من المحافظات .... يلاقوا السكن غالي يقوم طالعين على منطقة جبلية وطوبتين من هنا وطوبتين من هنا وبقى بيت. يجي الي جمبوا ونفس الحكاية هوبا اتبنى بيت جمب بيت بقة مدينة لا اساس لها

وتلاقي متعتهم الوحيدة هيا الجواز والخلفة. وتلاقي كل واحد بقه عندوا دستت عيال .... مع مر السنين بقت منطقة عشوائية ... بيت هنا وبيت هناك وبيت جي كده والبيت في البيت والحيطه في الحيطه حتى لا قدر الله لو حصل حريقة مفيش عربية مطافي ولا اسعاف تقدر تخوش جوى تطفي. ولو حفروا الارض علشان يمددوا مواسير ميه ولا مجاري مش بعيد البيوت دي تنهار ويجروا الناس يطلبوا بتعويضات من الحكومة .... الي بالتالي عماله تمص في دمنا. وتمص في فلوسنا وشقانا بالضرايب والجمارك الي كسرت كاهل كل اسرة مصرية

الزحف من الاقاليم خطير جداً .... وبيسبب عدم توازن في التوزيع الجغرافي .... تصور انسان مزارع او فلاح ساب الفلاحة والزراعه. ونزل القاهرة علشان يشتغل بياع. يبقى تحول من انسان منتج لانسان مش عارف اقول عليه ايه غير مستهلك

المهم
الناس مشكلتهم. بتجري وخلاص وبيتعاملوا بعشوائية بكل شيء وفي النهاية يقولوا الحقينا ياحكومة وعوزين تعويضات وشقق ياحكومة .... والحكومة ذات نفسها مفلسة. وقريب هتبقى زي اليونان وتعلن افلاسها لولا الله ثم مجهود سيادة الرئيس
حركة البلد. مازالت تكاد تكون واقفه .... فانتا عاوز الحكومة تجبلهم منيين .... اذا حتى فكرة رفع الدعم عن البنزيين. الي هو طالع من بترول بلدنا وارض بلدنا شوف الناس هتهيج قد ايه .... وبالك انتا تعاله مثلاً تعملهم مساكن عند ابني بيتك في اكتوبر ولا تنقلهم ورى التجمع الخامس وتقولهم يالله شقق ببلاش روحوا اسكنوا فيها عارف هيعملوا ايه. هيبيعوا الشقق ويرجعوا يسكنوا في الدويقه هههههههه .... نفس فكرة الشحات الي صعب على راجل. فقام الراجل طلع فلوس من جيبوا وادهالوا علشان يبطل شحاته .... قام الشحات خد الفلوس اشترى بيها مناديل ووقف بيها عند الاشارة يشحت بيها .... فالمشكلة. ذات نفسها. ملهاش اي حل .... وهتستمر وهتتفاقم بس المشكلة الاخطر من سلوكيات الناس الي ساكنين في مجاهل الدويقة .... شوية الناس دي لمن تطلع للمجتمع وتشوفك ساكن فين وراكب ايه وبتاكول ايه والقر يشتغل وهوبا. يتحول القر ده من قر لتعدي علي الناس الغلابة من الطبقة المتوسطة ياريت مثلاً يتعدوا على واحد معاه شبح ولا بي ام لا بيخافوا ، لكن ممكن يتجرئوا على واحد غلبان معاه عربية لانسر قسط ولا هونداي ولا حتى دايو

فصدقني مشكلة ملهاش حل حتى موضوع فتح. باب الصدقات. .... هيعملوا بيها ايه الصدقات الي هيلموهالهم .... هيعملوا بيها ايه ولا ايه ولا ايه. .... هتلاقي الصدقات دي تتشفط قبل ما توصل لمستحقيها ولو وصلت لهم هتلاقيهم. جابوا بيها لبس واكل وموبايلات ومش ممكن يفكروا ابداً ابداً يسيبوا منطقه استراتيجية زي الدويقة حتى لو اديت واحد فيهم نص مليون جنية علشان ويروحوا يسكنوا في بيوت محترمه ونضيفه في الصحرا مش هيرضى ويقول الي هيوديني في الصحرا انا اجيب بيهم شوية تكاتك وانزل العيال تشتغل عليها. قال يعني بقى مستثمر بسلامتو .... ده لو الحكومة وزعت اراضي ليهم في توشكا مجاناً وتسهيلات وقروض بس روحوا ازرعوا وافلحوا .... هيقولك لا ياعم خليني هنا. احسن الي هيوديني توشكا

@@@@@@
( مجرد راي وتقبلوا تحياتي )

[windofchange]

الله ينور يا ميدو وجهة نظر تحترم لكن ربنا ينتقم من مبارك واعوانه اللي سابوا البذرة تبقي شجر متجذر في اعماق تاريخ مصر الحديث