مساعدة لمعرفة التكيف المناسب

[Sherif Khalifa]

عندى غرفة مساحة 4X4 بس فيها مكتبة كبيرة و واخدة مساحة يعنى تقربا الصافى 3ْX4 و بفكر فى تكيف 1,5 HP و دا على اساس حساب القدرة المناسبة للمساحة و الى حسبتها عن طريق الموقع دا

http://www.electvillage.com/coolroom.htm

فا يريت لو حد بيعرف فى قدرات التكيفات و كيفية الحساب يفيدنى الموقع دا حسباته دقيقة ام لا

انا سوف اشترى تكيف كرافت 1.5 حصان سبليت انشاء الله

[saifsaadmohamed]

السلام عليكم و رحمة الله و بركاته
يا باشا احسن حاجة ليك 2 حصان مش 1.5 عشان الجهاز يفصل و يشتغل مرتاح عشان تريح الكمبرسور ميبقاش شغال على طول

[sab3aawy]

بفكر فى تكيف 1,5 HP

طيب ليه هتجيب تكييف HP ؟ ليه مفكرتش فى تكييف DELL أو IBM؟

ننتقل للكلام الجد، بص لو الغرفة فيها اكتر من حيطة واحدة معرضة للشمس (يعنى حيطة خارجية وليست فواصل مع غرفة اخرى او جار، وانت دور عالى بتطوله الشمس ولا تحجبه حوائط العمارات المقابلة)

او لو فيها حيطة واحدة معرضة للشمس لكن غربية(يعنى الشمس بتضرب فيها من 12 الضهر لحد 8 بالليل، وبرضه لا تحجبه حوائط العمارات المقابلة)

او لو انت آخر دور وفوقك سطح مكشوف

فى كل هذة الحالات ال 1.5 مش هيسد معاك

وعموما تقدر تختبر ده اختبار بسيط جدا، بعد ما تهوى الغرفة صباحا اقفلها وضلمها وتعال الساعة 3 العصر وحط ايدك على الحيطان وشوف كام حيطة سخنةيعنى ملمس الحيطة اكثر سخونة من ملممس اى جزء آخر فى الغرفة، سرير، دولاب ، الخ) ، لو اكتر من حيطة واحدة يبقى بلاش 1.5 وانصحك بال2 فأكثر

ولو انت خيارات مفتوحة بالنسبة للتكييف انصحك بشارب العربى،

ولو عندك لمبات عادية فى الغرفة غيرها بلمبات نيون او لمبات موفرة للطاقة، لأن اللمبات العادية تشكل حمل حرارى لا لازم له على التكييف

محدثكم سبعاوى(مشروع تخرج تبريد وتكييف من 13 سنة:biggrinjester: )

[Sherif Khalifa]

شكرا يا جماعة على الردود

انا عارف ان 1.5 ضعيف نوعا ما بس المشكلة انى مرتبط بعوامل مادية
الفرق فى السبليت بين 1.5 و ال 2.25 كبير جدا

بالنسبة للحوائط ,الغرفة غربية و حيطة واحدة بس معرضة للشمس وقت الغروب

[Sherif Khalifa]

انا حجزت وايت ويستنج هوس
حد عندة فكرة كويس ولا لا
علان الكارير و الكرافت مسحوبين من السوق الايام و مش متوفرين كتير عند شركة الشمس

[Noha.M]

انا مع سبعاوى فى موضوع شارب دة

مع ان كل تكييفات بيتنا كاريير بس شارب احسن كمان و لسه مركبينه عند اختى و فعلا كفاءته عالية جداا و احسن من الشباك 1.5 كاريير اللى عندنا كمان

[Sherif Khalifa]

شارب مفيش منة 1.5 سبليت (على ما اعتقد)
على العموم انا حجزت خلاص الويت وستنج هوس

اتمنى يطلع كويس

[mostafabakry]

طيب ليه حضرتك ما فكرتش في الشباك بدل من الأسبليت طالما ان ان الإختيارات مرتبطة بالسعر
انت ممكن تشتري تكييف بقدرة اعلي بحيث انك تضمن كفاءة تشغيل عالية و يكون شباك و النهاردة الشباك مش زي زمان بالعكس النهاردة تكييفات شارب الشباك هادية جدا و ما تسمعش صوته وهو شغال

[Ahmed Samy]

حضرتك انا عندي كاريير و شارب و أخيرا يورك

اذا كنت مهتم باستهلاك الكهرباء فهو شارب بلا منازع (جهاز تحفة) بس للأسف الـ1,5 مش متوافر

الكاريير ال 1,5 شكله كويس و لا يعيبه شيء (بس تقفيله مش قد كده)

يورك ..بصراحة هو صوته عالي شويه بس تبريد قااااااااااااااااااااااااااااتل

كفائة مذهلة و قدرة على تبريد غرفة 15 متر بها أثاث بسيط بقوة فائقه

لاحظ ان كارير و شارب برضه محترمين

ويستنجهاوس و تراين مشهورين بالكفاءات في الأحصنة العالية أكثر

ارشح لك يورك York هو صيني على فكرة و ضمانه خمس سنوات على الكومبريسور و سنة على وحدة التوزيع

نصيحة بقى لو جبت أي تكييف (اطلب وصلات النحاس بتاعة شارب اولا لأنها 5 متر و معدنها و عزلها أنظف منهم كلهم) و هيا ممكن تزود السعر بتاع 100 جنيه

يورك تمنه 3100
كاريير تمنه 2950
شارب 3 الاف وحاجة بس مش موجود فا ماهتمتش

[Sherif Khalifa]

الشباك مينفعش يركب عندى علشان شباك الغرفة كبير واكل معظم الحيطة

فا مينفعش غير سبليت
و النقود المخصصة للتكيف مش هعرف اجيب غير 1.5 حصان
المعادلة صعبة :)

على العموم ربنا يكرم فى الوستنج هوس
و لما يركب اخر الاسبوع إن شاء الله هبلغكو بالنتيجة

[HeMa_LanCeR]

طيب ممكن اعرف ياشباب اصغر تكييف اسبليت كام حصان
لأن انا عندي الغرفه بتاعتي حوالي 3*3 ومافيش ولا حيطه باينه للهوا غير شباك عرضه نص متر تقريبا فا لازم اجيب اسبليت وطبعا محتاج اصغر حاجه وكنت عايز اعرف متوسط الاسعار

[Sherif Khalifa]

سمعت ان فى 1.25

بس اعتقد اقل من 1.5 هيبئة مش كويس لان اصلا ال 1.5 مش يالكفائة العالية

متوسط اسعار ال 1.5 لو بارد فقط 2600 لو بارد ساخن 2800

[Mido80]

ممكن سؤال لو سمحتم. انا كمان محتاج اركب 2 تكييف سبليت عندي في الشقة بس مش عارف الاسعار. يعني:-
1- سبيلت 1.5 سعرة كام؟
2- سبليت 2.00 سعرة كام؟

وياريت ترشحولي افضل نوع مكيف من حيث الكفاءة والصيانة والسعر

عاجز عن الشكر للاخوة الكرام

[جمال]

انا عندى اسبليت يونيون اير 1.5 حصان فى غرفة مساحتها 3 ×4 م
وشغال كويس من كذا سنة ويعتبر كافى جدا للغرفة
بالنسبة لل سبليت 1.25 حصان اعتقد انه موجود فقط فى اميريكول

[Mido80]

اية يا جماعة، ما حدش عندة فكرة اسعار المكيفات اية؟