فرض ضرائب على اجهزة التكييف المنزليه .... اه يادماغى

[hossam_elwani]

قال الدكتور المهندس هشام كامل تمراز، عضو لجنة بحث عدم انتظام التيار الكهربائى التى شكلها رئيس مجلس الوزراء، إن اللجنة قدمت مقترحاً، ووافق عليه الدكتور هشام قنديل، رئيس مجلس الوزراء، لتحميل المواطنين رسوماً جديدة على كل من يمتلك جهاز تكييف بسرعة 2 حصان.

وأوضح- على هامش مؤتمر شركة شنيدر لإنتاج الطاقة الكهربائية بالخلايا الشمسية فى الوادى الجديد- أن اللجنة عرضت على رئيس الوزراء المقترح، وأبدى استعداده لتطبيقه، معللاً ذلك بأن سعر جهاز التكييف 2 حصان يتراوح بين 2 إلى 3 آلاف جنيه، بينما يكلف الدولة فى محطة التوليد 12 ألف جنيه للجهاز الواحد فقط سنوياً.

وحول إمكانية تغطية محافظات القاهرة الكبرى "القاهرة والجيزة والقليوبية" والإسكندرية، قال الدكتور المهندس هشام كامل تمراز: إن القاهرة الكبرى تستهلك 7500 ميجا، لافتاً إلى أن كل 170 متراً مربعاً تعطى 10 كيلو وات، أى نحتاج 17 ألف متر مربع فى هذه المحافظات، وهذا الأمر غير موجود فى نطاق القاهرة الكبرى.
المصدر اليوم السابع


عايز حد بقه يرد على الكلام ده ويفسرى ايه الى بيحصل بلزبط

[aboomar22]

ايوه وكمان نفرض ضريبة على تكييف السيارة ماهو بيكلف الدولة وقود -- اه ياقلبى دا شكلنا هنشوف حجات مكناش نفكر فيها

[ibn_seena]

هما هيفرضوا علينا الجزية امتى.
صدقت يا مرتضى منصور.
وانا اللي كنت زعلان انك شتمت قنديل.
اشتم اشتم

[Elawany13]

فاكرين لما احمد عز كان بيستشهد بمبيعات أجهزة التكييف فى مصر وبيقول ان الشعب عايش فى رفاهيه ... هما رموز النظام البائد الفاسد المنيل بنيلة كانوا بيتكلموا صح ولا ايه ؟؟... كل كلامهم بيتطبق دلوقتى !!!!
اللى ناقص بقى الضريبه على راديو السيارة اللى كان بيتكلم عليها بطرس غالى

[Land_Cruiser]

هما ما بيشبعوش من السرقه فى فواتير الكهرباء فعايزين يعملوا وسيله جديده لسرقه الناس. هو المواطن اللى عايزين يغلوا عليه كل حاجه ده و مرتبه زى ما هو المفروض يعمل ايه حلال علشان يقدر يلبى طلبات الاسياد اللى شكلها مش هتخلص أبدا دى ؟

[hossam_elwani]

فاكرين لما احمد عز كان بيستشهد بمبيعات أجهزة التكييف فى مصر وبيقول ان الشعب عايش فى رفاهيه ... هما رموز النظام البائد الفاسد المنيل بنيلة كانوا بيتكلموا صح ولا ايه ؟؟... كل كلامهم بيتطبق دلوقتى !!!!
اللى ناقص بقى الضريبه على راديو السيارة اللى كان بيتكلم عليها بطرس غالى

ضريبة الراديو مطبقه فعلا انا بدفع 3 جنيه فى السن وده واضح فى تفصيل الرسوم السنويه للترخيص فى وحدة المرور

[Egyzizo]

ما يحدث هو إعادة لتوزيع الثروة بهدف أن يصبح الجميع فقراء.

[moh19227]

هما هيفرضوا علينا الجزية امتى.
صدقت يا مرتضى منصور.
وانا اللي كنت زعلان انك شتمت قنديل.
اشتم اشتم

ما يحدث هو إعادة لتوزيع الثروة بهدف أن يصبح الجميع فقراء.

هههههههههههههههههههههههههههههههههههههههههه
ولسا اللي جاي احلي " تامر حسني " :)

[GMC]

حكومه مصريه غريبه اوي طيب ما يجيبوا الفلوس من برا الي متجمده في البنوك وحتحل مشكله كبير وحتسدد الدين الداخلي ويمكن الخارجي كمان

يعني ايه ضريبه على جهاز التكييف ؟ مشفتهاش في اي بلد متخلف حتى لحد دلوقتي

ده تلاقي الي عملها راج ابن ............ معندوش تكييف وقاعد في الحر وجاله تسلخ والتهابات وريحته بقت وحشه

هههههههههههههههههههههههههه

قالك ........ الناس الي عندها تكيف اومال انا اتسلخ والتهب وغيري بيستمتع بالتكييف ؟؟؟ مع اني معرفش مين

اساسا صاحب الفكره الهبله ديه

الرجاء مراعاة أداب الحوار
م ع 3

[احمد المصرى]

مفيش ضريبه على نوع الاكل ال بناكله

[Ahmed Selim]

نفى علاء الحديدى المتحدث الرسمى باسم مجلس الوزراء ما تناولته بعض المواقع الإلكترونية عن موافقة الحكومة على مقترح لفرض رسوم على ملاك تكييفات المنازل .
وناشد كافة وسائل الإعلام بتحرى الدقة خاصة فى الموضوعات التى تهم المواطن والأسرة المصرية .

اقرأ المقال الأصلي علي بوابة الوفد الاليكترونية الوفد - الحكومة: لا رسوم على المنازل المكيفة

[tutankhamoun]

يا جماعة البلد عايشة في أزمة أقتصادية .
و التكييفات دي شئ مستجد على الشعب المصري .
أغلب الشعب المصري من 10 إلى 15 سنة فاتت كانت تسمع عن التكييف بس في التليفزيون .

تصوروا أن جهاز تكييف قوة 2 حصان بيستهلك حوالي 1620 وات بحالهم و ده تكييف واحد .
يعني حوالي 16 لمبة 100 وات و معاهم واحدة سهاري .

=========================

في أوروبا ........ بيشجعوا الناس تركب لمبات موفرة للطاقة و الناس دي معندهاش مشكلة في توفير الكهرباء لأن عدد السكان ثابت مش زي عندنا داخلين سباق الأرانب ........ بالاضافة أن عندهم محطات نووية لتوليد الطاقة .

هو ليه كل واحد باصص لنفسه هو بس و مش باصص على المشكلة الموجودة للبلد بوجه عام .

معلش أذا كنت مختلف معاكم بس أنا مصلحة البلد تهمني أكتر من مصلحتي الشخصية

على فكرة أنا مش أخواني و ما أنتخبتهمش و مش هانتخبهم لأختلافي الأيدولوجيات بيني و بينهم .

بس الله يكون في عونهم في شعب مش عاجبه العجب و لا الصيام في رجب .

[MTAK]

الله ينور عليك يا استاذ توت
دخلت الموضوع مخصوص علشان اشوف ردك
و سعدت به
---------------
هذا ردى فى موضوع اخر لنفس موضوع التكييف
---
بغض النظر عن الموضوع لانى لا استطيع ان افتح جريده اليوم السابع و لا احترمها بس لى شوية كلام عاوز اقوله بعد اذنك عن تلك المواضيع

اولا : تعرف ان كان زمان فى ضريبه بتتدفع على الناس اللى عندهم تليفزيون و قبلها بفترة كانت على الراديو

نشد خط و نتكلم :)
-------------------------------------------------------------

اى مؤسسه ( بيتك - شركتك - بلدك ) لها حد اقصى من الدخل و يجب ان يكون لها حد ادنى من النفقه حتى لا تضطر الى الاستدانه او الفلس او الجوع

يعنى مثلا ماينفعش يكون دخلك 10 جنيه فى الشهر و تدىى مصروف لولادك الاربعه كل واحد فيهم 2.5 فى اليوم

و المفروض ان ولادك ما يكلفوكش اكتر من دخلك
يعنى مايجيش العيل الصغير و يقولك انا دخلت سينما امبارح مع خطيبتى و طلعنا اكلنا عند ماك و دفعنا 50 جنيه :)
اول حاجه هاتعملها معاه ان بالقلم على وشه و تفسخ الخطوبه و تقوله

خلى عندك دم - دا اللى مايشوفش من الغربال يبقى اعمى


طيب لو سيادتك المدير قالك انت علشان بتشتغل كويس لك مكافأه الشهر ده
فرحت انت بالمكافأه و قولت للعيال مصروفكم الشهر ده هايبقى الدوبل

و رجعت الخطوبه تانى و صالحت ابنك و الدنيا زى الفل

الشهر اللى بعد ماخدتش مكافأه ( عادى ما هى مش كل يوم )

و اول ما دخلت مالبيت لقيت الواد بيقولك انا مادخلتش سيما مع خطيبتى بس ودتها مطعم ابو فلوس كتر منه
و المدام نطت فى وشك و قالتلك الغساله موتورها اتحرق
و ييجى حيلتها الصغير و يقولك كسرت ازاز عم ممتاز بالكوره و عاوز يكلمك

تعمل ايه ساعتها يا حلو
يا تنتحر
يا تسرق
يا تنتن يا تنتن و الاتنين ......................

---
حد فهم حاجه

الناس طالبت بفلوس زياده
و فعلا فى كتير مرتباتهم زادت
قوم ايه الناس انبسطت ان معاها فلوس و عاوزه تعيش زى اللى بتشوفهم

بقى السيد المحترم ابو منطلون من الباله ماسك البلاك بيرى و قاعد على قهوة ولى النعم
و الباشا اللى كان لما بيركب اتوبيس جيرانه بيحسدوه - اشترى موتوسيكل و جاره حب يغيظه
اشترى عربيه بالتقسيط و هو مش عارف هايدفع منين باقى اقساطها و هلم جرا

و طبعا انتم عارفين الباقى
الناس دى اتبهدلت فعملت ايه
عملت مظاهرة و اعتصام علشان مرتبها يزيد تانى و فعلا الحكومه زودته مرة تانيه

و حصل اختلاف فى حياة الناس دى
ان ابومنطلون بقى ماسك اى فون بدل البى بى
و ابو فسبه اشترى عربيه بالقسط ( هو جاره احسن منه )
و ابو عربيه ما عملش حاجه علشان رحمه من الدنيا فى حادثه بالعربيه الجديده

لا انكر على الناس حقها فى العيشه و التطلع الى الافضل و لكننا للأسف شعب استهلاكى و سفيه
الدوله عليها مسئوليه و لكننا فى مرحله يجب ان نتحمل المسئوليه معها
-----
لازم نفكر فى ابعد من كده و لازم نكون فى الناحيه الايجابيه

مش كل ما يحصل موضوع مشابه نلاقى كل الردود تستنكر و تشتم الحكومه و لا مرة لقيت ردود ايجابيه على المستوى الشخصى ( مع احترامى للجميع فى وجهات نظرهم)

لازم نعمل اى حاجه و لو حتى هاتوفر جنيه و لو كل الناس فى مصر مش هاتعمل اى حاجه و سايبينك انت لوحدك
برضه لازم نعمل الحاجه البسيطه

حتى و لو مش علشان خاطر البلد
و حتى لو كانت الحكومه حراميه و الاخوان سارقين البلد و المناصب و .........

خلوها علشان ربنا و تبتغى بها رضوان الله عليك

-----------------------------

افتكرت واحد قاعد فى كنتاكى و عمال يلعن السمنه و اللى بتعمله و هاتك يا اكل فى كل ما يسبب السمنه و فى الاخر
بيبسى دايت لو سمحت

المشكله انى شايف ان احنا حتى ما طلبناش البيبسى الدايت

[ehab]

ما يحدث هو إعادة لتوزيع الثروة بهدف أن يصبح الجميع فقراء.

طيب هو التكييف دا علامة الثراء

[ابو لؤى]

هو رئيس الوزراء عاوز يدفعنا وخلاص بنزين وخلصنا ودلوقتى التكيف هو علشان ساكتين يبيع ويشترى فينا انا لو حصل كده انا هخلى الكهرباء مش على العداد كفايه 3 جنيه القمامه اللى بندفعها ابتديت ا ندم على اختيارى لمرسى والله