ايهما تختار ؟؟؟

[mohamed hatem]

سؤال يا جماعه ....على ضوء موضوع يوسف معاطي ومارينا


انا مرحتش مارينا قبل كده ...بس اللي راحو واعرفهم ....بيتكلمو في الف جنيه لليوم (ايجار واكل وشرب )
يعني عشرة الاف مثلا للاسبوع ....هل ده معقول ....وفي ناس بتعملها جمعيات كمان

يعني لو معاك الفلوس دي ترضى تدفعها في مصيف ....وعشان تروح تتفرج على مايوهات ..وناس ضايعه ...وكل همها المظاهر ...و النميمة ....الخ

يعني تدفع عشر الاف جنيه وتاخد ذنوب ولا تدفعهم وتطلع عمرة عشان ربنا يغفرلك ذنوب...وخصوصا ان رمضان جاي في الصيف اهه؟؟؟؟

[piezo]

مكه المكرمه طبعا من دون اي نقاش اساسا

[mohamed hatem]

انا عارف انه ما فيش نقاش طبعا...
بس حابب افكر الناس اللي بتروح عشان تدفع الالوفات دي ...ان في الاحسن و الافضل ...

[1.8Tee]

معلش يعنى....لية يعنى فى مقارنة كدة ؟.

هل لو حد اختار مارينا يبقى بياخذ ذنوب و رايح يتفرج على مايوهات !!.

[MMamdouh]

ايه العلاقة بين الاتنين؟؟ هى مارينا بقت مرادف للفسق؟

انا روحت مارينا قبل كدة كذا مرة و معتقدش دة يخلينى زنديق مثلا.. كل واحد بيحكم نفسة بنفسة و اللى بيعمل غلط فى مارينا بيعمل غلط برة مارينا برضة ... و اللى بيعمل الصح برة مارينا حيعمل الصح جوة مارينا

و حتى انا مصرفتش 1/100 من ال10 الاف جنية لانى مكنتش ماجر شالية

و مش كل واحد بيروح مكة بيبقى شيخ... دا فيه ناس بتسرق فى موسم الحج

معلش المقارنة دى عجيبة الشكل جدا

MMamdouh

[mohamed hatem]

طبعا مش كل واحد بيروح مكة يبقى شيخ .....ولا كل اللي بيروح مارينا يبقى فاسق ...
ومينفعش نقارن ما بين المكانين ابدا ابدا ...

بس ليه تروح مكان فيه شبهات ....؟؟؟وتقعد وسطهم كمان ...لانك مش معقوله هتروح وتقعد في شاطئ لوحدك او هتقعد في غرفتك وتقفل عليك

المسأله مش انك تعمل عمرة وكده ...اعتبر ده مثال ...انك تسيب الغلط عشان الصح

مارينا فيها وفيها ...بس الغالب هو اللي هيغلب...انا مش متحامل ..وبروح اصيف وادفع فلوس كمان ...بس كل بالمعقول وفي مكان مقبول...
وانا لما بتكلم عارف ان في ناس واخده بالها ..بس في ناس برده خرباها وعايشة حياتها

[Noha.M]

انا مش عارفة ليه الناس متخيلة ان مارينا دى عبارة عن شوية مايوهات و بنات و فسق و فساد !!

يا جماعة الموضوع مش كدة خالص .. ماشي مارينا فيها بذخ و فشخرة زيادة حبتين عن اى مكان تانى فى الساحل لكن مينفعش اننا نعمم و يبقي اى حد رايح مارينا يبقي رايح عشان يتفرج على البنات و بعدين البلاجات زى لابلاج و ريو والتانى دة اللى اسمه spot دى بنبقي عارفين فيها ايه و مبندخلهاش اساسا ..فكل واحد رايح و مسئول عن نفسه و هيتحاسب على نيته اللى هو رايح بيها
كمان من قبل مارينا ما تطلع وقت ما كنا بنصيف فى فى العجمى و باراديس و كان معروف الدنيا بتبقي عاملة ازاى هناك و مع ذلك برضه مدخلتوش ولا حتى مهتمة انى اعرف الناس هناك بتعمل ايه

بعدين مينفعش بأى حال من الاحوال اننا نقارن مارينا بمكة المكرمة !!!

بعدين ما انا بصيف فى مارينا من 5 سنين و بجد عمرى حتى ما دخلت لابلاج ولا حتى لافام بتاع المحجبات لانه اكيد مش هبقي بالسذاجة انى افك حجابى فى شاطئ مفتوح و كل شوية جيت سكي عليه ولاد يعدي من جنبنا ولا الله اعلم ممكن حد يبقي مدخل معاه كاميرا .. فالواحد فى الاول و الاخر بيحاول يجتنب الشبهات سواء فى مارينا او اى مكان تانى

بس بالنسبة للمصاريف و كدة انا متهيألى اصلا كل حاجة غليت دلوقتي اشمعني المصيف هو اللى هيبقي رخيص يعني!

[محمد المشد]

مع التقدير والاحترام للسؤال والمقارنة ، إلا اننى ارى ان المقارنة هنا ظالمة لان كافة المسلمين بدون تردد سوف يختار مكة المكرمة على اساس انه يبتعد عن التعليقات والشبهات عن نفسة ، وفى نفس الوقت سوف نجد الكثير من المدافعين عن مارينا بأعتبار انهم من مرتديها وقاطنيها ، وهم ليسوا بالضرورة من اصحاب المايوهات او المتبرجيين على الشواطىء
لذا فأننى ارى ان البعض سوف ينكر وينفى عن نفسة الذهاب لمارينا لما سمعناه عنها من فشخرة وتبرج زائد عن الحد واموال تلقى بلا حساب وهناك العشرات بلا ماؤى ولا لقمة عيش
ولكن هذا لاينفى ان هناك الكثير ايضا منهم من اصحاب الاخلاق العالية
يعنى فى النهاية هتختار مكة 000 حتى اصحاب مارينا سوف يختارون مكة

[mohamed hatem]

على العموم يا جماعه حصل خير .....
انا لكان قاصدي اعيب على حد ولا افرض راي على حد ....

انا بس كنت حابب الفت نظر ان سعات الواحد بيصرف فلوس كتير عشان يتمتع ..في حين انه ممكن يصرف اقل ويتمتع ...وفي نفس الوقت هيصر برده عشان يرضي ربنا .....ويعمل لأخرته

وعلى العموم مارينا بقيت موجوده في كل مكان ...لان الناس اياهم دول ...عايشين معانا برده بقيت السنة ...مبيجوش يصيفو من بره ...