٢ موبايل. @@@ ايه الفرق بينهم @@ samsung galaxy s 3

[Y a r i s]

مساء الخير يا اهل الخبرة والعلم



( باختصار )
من فترة نزل سامسونج جلكسي السوق ب ٤٢٠٠ جنية مصري
مفيش بعدها بكام يوم نزل اعلان في التلفزيون نفس الموبايل بنفس الامكانيات وباندوريد برضوا ولكن ب ٣٦٥ جنية

@@@@@@@@@@@

بفكر وبقول لنفسي ايه الي يخليني ادفع مبلغ كبير زي ده في موبايل اخوه موجود وبسعر اقل
انا شايف الموبايلات الصيني غزت السوق ... ومستوها اتحسن فهل ياترى ده زي ده
والسؤال الحقيقي هل فرق الفلوس ده هيديني فرق في الامكانيات ولا هيا هياااا !!!

[S O P H O S]

هو فرق بسيط
يشبه الفرق بين ماتور سيات 133 وماتور الكامري
دي بتمشي ودي بتمشي
وده بيقول الو وده بيقول الو
مجرد راي ..

[AirForces]

دا تليفون صينى يا باشا دا لو كان تقليد لل s3 اصلا لكن اللى هيوصلك البيت هتلاقيه حاجة تانية خالص مقلب يعنى من الأخر ولا هيبقا نفس الإمكانيات ولا اى حاجة غالبا هيبقا نفس الشكل بس

ال s3 الأصلى دلوقتى سعره نزل بعد ما الجلاكسى نوت 2 نزل

[Land_Cruiser]

اللى ب ٤٢٠٠ ج ده الاصلى اللى فيه الامكانيات بجد و انتاج سامسونج إنما أبو ٣٦٥ جنيه ده تقليد فى الشكل فقط لكن و لا حاجه تانيه بعد كده و مجهول المصدر و على فكره اللى يضحك ان الرخيص ده كمان بخطين . التقليد ده فلوس مرميه فى الأرض و اخره شهر او شهرين و يترمى. الموضوع عامل زى فى العربيات المبنى كوبر و العربيه الصينى اللى اسمها جيلى اللى هى التقليد بتاعها. مفيش اى وجه شبه فى المكونات و لا التكنولوجيا و حتى تقليد الشكل الخارجى مش دقيق و مخللى شكلها زى المسخ او نقدر نقول عليها النسخه البلدى من المينى كوبر :)

[Y a r i s]

هو فرق بسيط
يشبه الفرق بين ماتور سيات 133 وماتور الكامري
دي بتمشي ودي بتمشي
وده بيقول الو وده بيقول الو
مجرد راي ..

لا اذا موبايل السامسونج. بنفس كفائة الكامري ده انا اجيبوا على طول. .... بس انا بشوف في الدعاية فولة واتقسمت نصين يابوحميد

[Y a r i s]

دا تليفون صينى يا باشا دا لو كان تقليد لل s3 اصلا لكن اللى هيوصلك البيت هتلاقيه حاجة تانية خالص مقلب يعنى من الأخر ولا هيبقا نفس الإمكانيات ولا اى حاجة غالبا هيبقا نفس الشكل بس

ال s3 الأصلى دلوقتى سعره نزل بعد ما الجلاكسى نوت 2 نزل

هو ده الي انا خايف منو لانهم بيبجيبوا دعاية. نص ساعه عنوا وبيحكوا موصفات الجلكسي اس ثري بالملي ... خايف لمن يجبوه البيت. مع المندوب ابص الاقي حاجة مختلفه تماماً عن الي بتيجي في التلفزيون .... وباستغرب كمان. ازاي شركة سامسونج سيباهم. يعني ليه مترفعش قضية زي القضية الي كانت رفعاها عليهم شركة ابل !

صحيح. هو الجلاكسي نوت ٢ اقوى من جلاكسي اس ثري. .... انا عجبني في الاس ثري انو حجموا صغنطط كده وصغير

[Y a r i s]

اللى ب ٤٢٠٠ ج ده الاصلى اللى فيه الامكانيات بجد و انتاج سامسونج إنما أبو ٣٦٥ جنيه ده تقليد فى الشكل فقط لكن و لا حاجه تانيه بعد كده و مجهول المصدر و على فكره اللى يضحك ان الرخيص ده كمان بخطين . التقليد ده فلوس مرميه فى الأرض و اخره شهر او شهرين و يترمى. الموضوع عامل زى فى العربيات المبنى كوبر و العربيه الصينى اللى اسمها جيلى اللى هى التقليد بتاعها. مفيش اى وجه شبه فى المكونات و لا التكنولوجيا و حتى تقليد الشكل الخارجى مش دقيق و مخللى شكلها زى المسخ او نقدر نقول عليها النسخه البلدى من المينى كوبر :)

المشكلة بجد يا لاند يا حبيبي انك تجيب الموبايل ابو ٤٠٠٠ من هنا تيجي تبيعوا مايجبلكش سعر .... فاكر زمان لمن كنا نجيب الموبايلات النوكيا وننزل عبدالعزيز نبيعها. وانتا في الشارع تتخطف منك وبسعر زي العسل .... النهاردة الموبايل. حتى لو نزلت في تمنو النص يعني ٢٠٠٠ جنية برضوا تبص تلاقي الي هيشتري يقعد يتنك عليك والي يقلك لا اصل فيه شعره من الجنب. وفين جرابوا وفين سمعاتوا واخبار بطريتوا ايه وفي النهاية يديك ١٠٠٠ جنية. ويقلك هجربوا لو فيه حاجة هرجعهووووولك ههههههه. ميعرفش ان الموبايل انتا جيبوا غالي نااااار وبتبيعهولوا ببلاش

لكن الموبايل ابو ٣٦٥ جنية السامسونج ابو خطين لمن تفكر تبيعوا هتبيعوا بكام !!! ١٠٠ جنية ايه. يعني طزز فاهمني. فمعقول الفرق بين السامسونج ده والسامسونج ده زي الفرق كده بين السما والعمى. ولا فورقات بسيطه وده شغال على النيت وتقدر تخش على المنتدى وتستعمل الفايبر كمان بسهولة ويسر انا استخدامي كلو عليه ماسينجر وياهو ونايل موترز وفايبر. وحيانا سكاي بي. فهل ابو ٣٦٥ جنية يستحمل ؟

[Y a r i s]

ومعليش سؤال كمان ؟

انا عارف بتقل عليكم في اسئلتي بس انتم زي اخواتي ومفهاش حاجة
حبايبي جميعاً. مين الي هاخود قيمة بجد من تمنوا ولمن ابيعوا يتباع معايا هوى بمجرد ما اقول يابيع ... هل الاي فون اس ٤ ولا الجلاكسي اس ٣

ومحدش يقلي انتا هتشتري الحاجة علشان تبيعها .... لا بس بصراحة. اصعب كلمة على الواحد يسمعها التيلفون الي معاك ميجبلكش حاجة وده طلع دلوقتي تيلفون جديدة دلوقتي فيه شخارة بالكهربا ... وتحط التيلفون كده على قفاك يقوم يعملك فايبريشن مساج لضهرك

الواحد مبقاش قادر يلحق. التكونولوجيا. ... عارف لو بجري ورى هيفاء وهبي علشان تمضيلي اوتجراف ... كان زماني لحقتها. ومضيتلي ووقفت اتصورت معاها كمان ... بس اني الحق التكونولوجيا والحجات الجديدة الي طالعه اهو ده الي مش ممكن ابداً ... فقولولي انو تيلفووون فيهم بياع اكترررر ومبتخسرش فية. زي التاني ؟؟

وتحياتي

[AHMED_DINAMO]

ده الفرق يا باشا
ده الصينى


ده الأصلى

[S O P H O S]

هو انت معكش اي فون ولا ايه ...؟؟؟

[Y a r i s]

انا حالياً معايا موبايل نوكيا. الي فيه كشاف من فوووق ده ههههههه. ابو ١٢٥ جنية
وبعت البلاك بيري البولد ٩٩٠٠ حسيت اني بدفع ٥٠ جنية في الشهر على الفاضي

ومبستفيدش منوا غير في ال bbm اما الماسينجر والياهو كل شوية ابص الاقيه. عملوا سينج اوووت لوحدهم .... وكل شوية لازم اعملوا رستارت واشيل البطارية وارجع ادخلها تاني وشغلانه زيوا زي اي تيلفون بلاك بيري فقلت على ايه. خليني ابيعوا واخلص منوا وبعتوا واللهي بنص التمن مع انوا ايه جديد واستخدام ست شهور بس وبكرتنوتوا وحاجتوا وكل حاجة ... بس بيعتوا علشان مبستفيدش منوا والي معايا على البي بي ام شوية عيال كل شوية يبعتولي نكته ان مافي حد فيهم حتى افتكر يقول ازي صحتك يا ابيه .... ولا عامل ايه ياعمي فقلت انا بدفع خمسين جنية كل شهر علشان شوية نوكت. لا خلاص بلاش منو وبيعتو وشغال على الموبايل ابو ١٢٥ جنية ابو كشاف

وعندي الاي باد ا بس مشكلة حجموا مقدرش اخدوا واتمشى بيه

[AirForces]

هو ده الي انا خايف منو لانهم بيبجيبوا دعاية. نص ساعه عنوا وبيحكوا موصفات الجلكسي اس ثري بالملي ... خايف لمن يجبوه البيت. مع المندوب ابص الاقي حاجة مختلفه تماماً عن الي بتيجي في التلفزيون .... وباستغرب كمان. ازاي شركة سامسونج سيباهم. يعني ليه مترفعش قضية زي القضية الي كانت رفعاها عليهم شركة ابل !

صحيح. هو الجلاكسي نوت ٢ اقوى من جلاكسي اس ثري. .... انا عجبني في الاس ثري انو حجموا صغنطط كده وصغير

يا باشا الإعلانات عن الموبايلات دى بتجى فى قنوات اى كلام بتكون لسه فاتحة وعايشة على الإعلانات من النوع دا حتى تلاقى مدة الإعلانات اللى بيجيبوها فى فيلم بيذيعوه اكبر من مدة الفيلم نفسه ... وتلت تربع الإعلانات دى نصب فى نصب وطبعا سامسونج لو عرفت هترفع قضية اكيد


انا قريت تقرير من موقع gsmarena بيقول مفيش فروق تذكر بين ال s3 والنوت 2 غير فى حجم الشاشة والبروسيسور اسرع شوية والرامات فى الs3 واحد جيجا انما فى ال نوت 2 اتنين جيجا

[Land_Cruiser]

بص حضرتك بالنسبه للتكنولوجيا كل لما بتطلع تكنولوجيا جديده بتغلى اللى قبلها و ده معناه ان اى تليفون حضرتك بتشتريه بعد كام شهر هيطلع منه موديل أحدث و بالتالى هتلاقى الموبايل اللى بقى معاك بقى سعره قليل قوى. الموضوع ده يشمل الالكترونيات بصفه عامه زى الكمبيوتر و الموبايلات و الكاميرات و التلفيزيونات و ده نتيجه تطور التكنولوجيا السريع قوى فى الحاجات دى بعكس حاجات إلكترونيه تانيه تطورها التكنولوجى مش سريع زى مثلا التلاجات و التكييفات و كتير من الاجهزه المنزليه و لهذا السبب حضرتك تقدر تقعد تستخدم ثلاجه او غساله مثلا عشر سنوات بدون مشاكل و مش هيفوتك كتير لان تطورها بطىء و كمان هتلاقى سعرها فى رينج معين دائماً يكاد يكون ثابت أما الالكترونيات ذات التطور السريع فالسعر غالى و متغير لأنك بتشترى تكنولوجيا جديده اتصرف عليها ملايين فى البحث و التطوير و لذلك فان سعرها مرتفع . بالمناسبه سامسونج أعلنت أنها هتنزل ال s4 فى الأسواق فى فبراير 2013 و هو ده التطور السريع اللى باقول عليه مع ان ال s3 لسه نازل من كام شهر. بالنسبه لحل المشكله دى هو بسيط و هو ان حضرتك تحدد ايه احتياجاتك بالضبط و تشوف ايه أرخص موديل الحاجات دى موجوده فيه و تشتريه و بذلك تكون الخساره عند البيع اقل ما يمكن و فى نفس الوقت يؤدى كل الوظائف اللى حضرتك محتاجها و الموضوع ده سهل لان هناك عشرات الموديلات من سامسونج كلها كويسه و فيها اغلب الوظائف و أسعارها معقوله تقدر تختار منها اللى يناسبك و بعد كده حتى تقدر تغيرها بسهوله لأنك مش دافع فيها كتير و مش هيفرق معاك سعر اعاده البيع قوى او لو حضرتك كنت محتاج كل وظائف ال s3 ممكن تفكر تشتريه بس من الخليج مثلا و هيفرق معاك ٨٠٠ جنيه على الأقل و جيتكس فى الإمارات شغال دلوقتى و منزلين الاسعار جامد. المهم حضرتك أيا كان اختيارك سواء ال s3 او حاجه اقل أنها تبقى أصلى من الصانع الاصلى و ليست تقليد و بالذات فى الالكترونيات لان التقليد ده لو باظ ملوش تصليح و لا بيع و الخساره هتبقى تمنه بالكامل أما لو كان التليفون أصلى فحتى لو كان اقل فانه معاه ضمان و فى امكانيه لتصليحه

[Land_Cruiser]

يا باشا الإعلانات عن الموبايلات دى بتجى فى قنوات اى كلام بتكون لسه فاتحة وعايشة على الإعلانات من النوع دا حتى تلاقى مدة الإعلانات اللى بيجيبوها فى فيلم بيذيعوه اكبر من مدة الفيلم نفسه ... وتلت تربع الإعلانات دى نصب فى نصب وطبعا سامسونج لو عرفت هترفع قضية اكيد


انا قريت تقرير من موقع gsmarena بيقول مفيش فروق تذكر بين ال s3 والنوت 2 غير فى حجم الشاشة والبروسيسور اسرع شوية والرامات فى الs3 واحد جيجا انما فى ال نوت 2 اتنين جيجا

+1111
وزن ال s3 أخف كتير من ال note2 . هو اللى معندوش ايباد هينا سبه ال note2 اكتر لانه هيغنيه عن اللابتوب أما اللى عنده و محتاج تلفون و حاجه خفيفه ممكن يختار ال s3

[shiko85]

الموبايل الصينى ملهوش اى علاقه بالــ s3 غير الشكل بس
لكن نظام التشغيل مختلف مش اندرويد طبعا و كمان مش جافا يعنى موبايل منظر بس و صوت و خلاص
انا شايف انك لو عايز تشتريه لمجرد انه رخيص و بخطين يبقى مفيش مشاكل لكن تشتريه كبديل للــ s3 يبقى مستحيل
و لو ناوى تشتريه انزل اى محل عنده تليفونات صينى و اشتريه منه مش من اعلانات التليفزيون