دعاء المسروق منه حاجة :) :) :)

[m_aash]

آسف للتكرار و لكن لتعديل السطور

يارب اللى سرق منى حاجة.. يكون تليفونه بايظ من زمان ومايشتغلش إلا الشهر ده بعد ما ولاد المفترية زودوا الفواتير وقيمة الاشتراك .
يارب اللى سرق منى حاجة.. تطلع له فسفوسة فى مكان حساس رِجله يعنى .. ولما ييجى يقعد عليها على رِجله يعنى مايعرفش يقعد .
يارب اللى سرق منى حاجة .. يشوف الإعلان بتاع وقفة مصرية يفضل واقف ومحدش يقف معاه.. يبقى على كوبرى قصر النيل شايف الأسدين قاعدين وهوه واقف زى عود القصب .
يارب اللى سرق منى حاجة .. أبوه يفصل الدش عشان القنوات إياها .. وبتاع الوصلة يشيلها عشان مادفعوش فلوس الشهر.. ومايبقاش قدامه إلا تامر أمين فى البيت بيتك وجلسات مجلس الشعب .
يارب اللى سرق منى حاجة.. يدخل انتخابات نادى الزمالك عشان مرتضى منصور يجيب ملف اسود بعمايله من ايام ما كان فكرة قليلة الأدب فى دماغ ابوه قبل ما يتجوز أمه .
يارب اللى سرقت منى حاجة.. يكتشفوا انها ساقطة ثانوية عامة فيرجعوها ثانوية تانى وتيجى صورتها فى تقرير العاشرة مساءا بعد امتحان الفيزيا وهيه ماسكة الموبايل وبتعيط وبتقول لمامتها : ده ذنب ....... ياماما .. عاااااااا .
يارب اللى سرق منى حاجة .. أجيله أنا فى الأحلام كده وتبقى أحلام من نوعية أحلام فيلم معالى الوزير .. ومايعرفش ينام إلا ف مكانين .. الحمام أو قدام قصر الرئاسة عشان يتبوأ فى أمريكا اللاتينية بقى .
يارب اللى سرق منى حاجة .. يحلم وهوه نايم بكل الوزرا واحد واحد .. وكل واحد منهم بيضربه على قفاه .. ولما قفاه يورم وييجى يقوم مفزوع .. أطلع له أنا بقى على باب الحلم وأقول له: ارجع يامعفن .. لسة رئيس الوزرا .
يارب اللى سرق منى حاجة.. ابوه يسافر ويضطر باعتبار انه راجل البيت انه هوه يقوم الصبح يقف فى طابور العيش ..بس هوه يستاهل .
يارب اللى سرق منى حاجة.. يجيله دور برد جامد .. تبقى فتحة من مناخيره فيها زكام.. والتانية بتسيـّل يعنى.. ويقعد بقى يتنطط عشان مش ملاحق لا شهيق ولا زفير..

يارب اللى سرق منى حاجة.. ييجى يدفع فاتورة التليفون يكتشف انه عليه فاتورة 300 جنيه دولى وهوه أصلا مش مركّب دولى .
يارب اللى سرق منى حاجة .. ييجى يصب الدور التانى يكتشف ان ناقص سيخ حديد.. يروح فى طابور الحديد عشان يجيب سيخ .. يكتشف ان كل الحديد فى السوق السودا وسعره 10 تلاف جنيه.. يرجع محسور ويعيط .. ييجى ابوه يلومه ويقول له: لو كنت محترم ومسرقتش حاجة من ....... .. كان ربنا رزقك بسيخ .. روح يا سيخ ربنا ياخدك .
يارب اللى سرق منى حاجة ..يبقى من ضمن الخمسة مليون شاب اللى كل شهر بييجى خبر تعيينهم فى الأهرام الصفحة الأولى ولا عمرهم شافوا تعيين..المفروض ان حكومتنا عينت مليار شاب دلوقتى.. باعتبار ان حكومتنا بتعين شباب الصين .
يارب اللى سرق منى حاجة.. يكتشفوا انه قال على الوزرا انهم بيدخلوا الحمام زى البشر العاديين .. فيترفع عليه قضية سب وقذف بعنوان " قضية حمامات الوزرا" زى صحة الرئيس كده

[mohamed_88sk]

هههههههههههههههههههههههههههههههههههه
أيه ده يا عم أنت الناس كلها سرقاك ولا أيه
هههههههههههههههههههههههههههههههههههههو انت زعلان مني في حاجه هههههههههههههه
بتدعي عليا ليه الدعوة دي

يارب اللى سرق منى حاجة.. ابوه يسافر ويضطر باعتبار انه راجل البيت انه هوه يقوم الصبح يقف فى طابور العيش ..بس هوه يستاهل .

هههههههههههههههههههههههههههههههههه

[M_ashraf]

بمناسبة الحديد
انا اتسرق مني نصف طن حديد
والدعاء ده مش بيشفي غليلي منه
ربنا ياخده

[MoToRiZeR]

انا اول مرتب اخدته في حياتي اتسرق .. كله يوم ما خدته

[mohamed_88sk]

انا اول مرتب اخدته في حياتي اتسرق .. كله يوم ما خدته

يا خبر بجد؟؟
عارف أنا مرة أتسرق كاب من على راسي ولا حسيت ههههههههههههههههههههههه
أصلي كنت في مايكروباص ونمت ولما نزلت ومشيت كتير بهرش في راسي ملقتش الكاب ههههههههههه

[mohamed_88sk]

بمناسبة الحديد
انا اتسرق مني نصف طن حديد
والدعاء ده مش بيشفي غليلي منه
ربنا ياخده

إزاي ده ؟؟؟؟ كنت سايبه فين؟؟ ولا أتسرق بالعربيه اللي جيباه ؟؟

[MoToRiZeR]

يا خبر بجد؟؟

اه و الله .. كان عندي 17 سنة و كان المرتب اللي اخدته ساعتها 500 جنيه
و بعدين حسيت ان الخمسميت جنيه مبلغ كبير و اني كواحد من كبار المستثمرين في البلد لازم أحرص علي ثروتي خصوصا ان اعدائي كتير في السوق .. فا قلت أعمل credit card و كان طالع ساعتها ال BM CARD اللي بالبطاقة ده مش لازم يكون عندك 21 سنة .. و انا رايح البنك واحد وقع ادامي في الشارع و اللي ماشي معاه قاللي سنده معايا نركب تاكسي و نروح المستشفي الله يكرمك .. و بعد ما ركبتهم و اتطمنت عليهم طبعا كان السؤال التاريخي .. المحفظة فيييييين !؟

بس كان حرامي محترم و الله .. لم الكارنيهات كلها في جدول الجامعة اللي كان في المحفظة و وداهم النادي

[mohamed_88sk]

بس كان حرامي محترم و الله .. لم الكارنيهات كلها في جدول الجامعة اللي كان في المحفظة و وداهم النادي

هههههههههههههه لا محترم جزاه الله خير هههههههههههه

[M_ashraf]

كان الحديد في الموقع ومسامه للغفير
وبعد كده الغفير قال معرفش وما شوفتش
وجربنا معاه الشده و جربنا اللين
وناس اتدخلت و ناس اتوسطت
مفيش فايده
حسبي الله ونعم الوكيل

[محمد عز]

الكلام ده من مدونة أشرف توفيق
الراجل ده فعلا عبقري ودمه خفيف

[m_aash]

الكلام ده من مدونة أشرف توفيق
الراجل ده فعلا عبقري ودمه خفيف

أنا معرفش بصراحة أصل الكلام ده منين , بس هو جالى على الميل بتاعى و ضحكنى جدا , قولت أشارككم الضحك.
ممكن تكتبلنا عنوان الموقع بتاع أشرف توفيق , باين عليه بيقول كلام جامد.

وواضح إن الكلام قللب المواجع على اللى فى المنتدى و كل واحد إفتكر حاجة إتسرقت منه :) :) :) :)