تشتغل في ليبيا ؟؟؟

[goodwave]

السلام عليكم
لي صديق يعمل في مجال الملاحة وقد جاءة عرض (عقد عمل) في شركة الملاحة الوطنية الليبية .... بالنظر لموقع الشركة على الإنترنت فهي شركة كبيرة وتقوم برأس مال محترم وعدد لا بأس به من المراكب التي تعمل في مجال نقل البترول.

المرتب ضعف مرتبه الحالي في مصر + السكن والعفش على الشركة + تذاكر الطيران له ولأسرته على الشركة.

مقر الشركة في مدينة طرابلس.

فما رأيكم دام فضلكم؟ إية رأيكم في ليبيا والعمل فيها؟ هل لكم قريب او صديق بيعمل في ليبيا؟ ما مستوى المعيشة هناك؟ ما نوع المعاملة مع المصريين؟ هل تكلفة المعيشة غالية؟ كيف تبدو مدينه طرابلس؟ واي معلومات قد تفيد يكون لكم جزيل الشكر وجزاكم الله خير.

[Islam_galal]

ليبيا كل يوم بحال
يعني ممكن الأخ العقيد يصبح الصبح يروح قاطع العلاقات
هي دي المشكلة
كان لي قرايب كتير هناك، مرة رجعوهم و قاللوهم تاخدوا بدل فلوسكم بضاعه (مقايضة زي قبل اختراع العملة)
أخدوا المنتجات و باعوها باسعار ارخص علشان يعرفو يرجعوا مصر بأي فلوس

[goodwave]

اشكرك لسرعة الرد يا استاذ إسلام
بس صديقي رايح شركة كبيرة وكمان فية عقد .... يعني مش رايح على باب الله يبيع ويشتري .... ولا إنت شايف مفيش فرق؟
في إنتظار مزيد من الردود وياريت محدش يبخل بالنصيحة.

[ZALABANY]

أي حته في الدنيا هاتبقى أحسن من البلد الجميله اللي احنا عايشين فيها وطالما مؤسسة كبيره توكل على الله بس ظبط عقدك وشروطه كويس ووثقه عشان لو لا قدر الله حصل حاجه تعرف تاخد حقك وأهم شئ الإستخارة

[Islam_galal]

أنا قرايبي واحد كان شغال في شركة سياحة و التاني مدرس

[aliabutaleb]

أنا ليا واحد زميل دفعتي (اظن انك تعرفه يا احمد) شغال في بيبسي في ليبيا
لو تحب تتصل بيه ممكن أبعتلك بياناته تساله بس لما أرجع البيت ان شاء الله

[goodwave]

ياريت يا علي ربنا يكرمك وإن شاء الله أتصل بيك وأفكرك.

بس يا جماعة المبدأ مقبول .... ولا من ليبيا لمصر يا قلبي لا تحزن؟؟؟

[Migo123]

توكل على الله
ليبيا بلد جميله
وناسها طيبين
وبيحبو المصريين وبيعاملوهم كويس
موضوع ان المرتب ضعف مرتبه في مصر دي مش مقياس .... لازم يعرف تكاليف الحياه هناك ويحدد على اساسها هل مستوى الدخل ده مناسب لحياه كريمه ... وماينساش ثمن الغربه ...
وربنا يكرمه ان شاء الله ......... وادعولي الاقي اي سفريه بقه عشان مش قادرررر خلاااااااااص

[aliabutaleb]

ياريت يا علي ربنا يكرمك وإن شاء الله أتصل بيك وأفكرك.

بس يا جماعة المبدأ مقبول .... ولا من ليبيا لمصر يا قلبي لا تحزن؟؟؟

إن شاء الله اول ما أروح
رأيي الشخصي
الموضوع نسبي
يعني كل واحد ظروفه مش زي التاني
لو صاحبك مثلاً مرتبه هنا 5 آلاف انا شايف إن قليل إني أروح ليبيا على ضعف المرتب يعني 10 آلاف ده عرض مش مجزي خالص بمراعاة كل الفروقات بين الغربة في بلد زي ليبيا والحياة بالخمسة آلاف في مصر

إنما لو صاحبك بياخد أكتر من 10 آلاف هنا اظن الموضوع التفكير فيه يختلف شوية

[فادى]

بص انا رحت ليبيا ثلاثة مرات فى مهام عمل,
طرابلس بلد نضيفة جدا او الى حد ما,
بالنسبة للمعاملة فبعض الليبيين بيعاملوا المصريين معاملة سيئة, لكن هذه المعاملة هتتحسن كل ما كان مركزه أحسن, طبعا العمال بيتم معاملتهم بأسوأ ما يكون, و تتحسن بعض الشىء كلما زاد مقام الوظيفة(مهندس مثلا), طبعا لا ينبغى التعميم, فأنا وجدت معاملة طيبة من البعض, و معاملة غاية فى السوء من البعض الاخر, و لكننى كنت أستطيع الرد بالمثل نظرا لمركزى و احتياج الشركة الليبية التى تعاقدت معنا لوجودى.
المعيشة رخييييصة جدا و دى احسن حاجة فى ليبيا, يعنى مثلا 2.5 دينار ممكن يأكلوك ثلاثة سندويتشات لحمة و فوقيهم بيبسى و سلطة!
مدينة طرابلس جيدة الى حد كبير, و لكن مفيهاش ناس كتير, هى البلد عموما تبدو كثيبة و المعيشة هناك جيدة نوعا ما و لكنها مملة شوية, من الأخر البلد مفيهاش حياة زى مصر كده.
اتوكل على الله البلد مش سيئة يعنى و الحياة فيها محتملة لكن مش ممتعة زى مصر, لكن مفيش حاجة ببلاش.

[Falcon.Crest]

look man i am in libya since 2 years working for Schlumberger, i will back egypt after 6 days you can call me on 0101714390 for any thing you more than wellcome

[sab3aawy]

أي حته في الدنيا هاتبقى أحسن من البلد الجميله اللي احنا عايشين فيها

انت محتاج تشوف ليبيا علشان تغير رأيك، انا زرت ليبيا مرة واحدة فقط وبعد العودة سجدت على الأرض شكرا لله على نعمته علينا ببلدنا الللى احنا عاييشن فيها، بالمقارنة بليبيا مصر تعتبر دولة اوروبية، سيبك من الكام عربية اللى اثرياء لبييا بينزلوا يتفسحوا بيهم فى مصر، فيما عدا ذلك لبيبا بلد كئيبة جدا والانجاز الحضارى فيها لا يذكر، يعنى طرابلس دى شبه اسكندرية فى اواخر السبعينات اما بنى غازى فهى شبه السويس بعد حرب 67، لكن فى النهاية لو الفلوس كويسة فالمعيشة هناك مش مميتة يعنى، بس الواحد هيحس انه عايش فى الأرياف ، لكن اكل العيش يعلو فوق كل اعتبار

[aif]

السلام عليكم
لي صديق يعمل في مجال الملاحة وقد جاءة عرض (عقد عمل) في شركة الملاحة الوطنية الليبية .... بالنظر لموقع الشركة على الإنترنت فهي شركة كبيرة وتقوم برأس مال محترم وعدد لا بأس به من المراكب التي تعمل في مجال نقل البترول.

المرتب ضعف مرتبه الحالي في مصر + السكن والعفش على الشركة + تذاكر الطيران له ولأسرته على الشركة.

مقر الشركة في مدينة طرابلس.

فما رأيكم دام فضلكم؟ إية رأيكم في ليبيا والعمل فيها؟ هل لكم قريب او صديق بيعمل في ليبيا؟ ما مستوى المعيشة هناك؟ ما نوع المعاملة مع المصريين؟ هل تكلفة المعيشة غالية؟ كيف تبدو مدينه طرابلس؟ واي معلومات قد تفيد يكون لكم جزيل الشكر وجزاكم الله خير.

انت كدة عرضت نص المسألة بس ....
الأهم هو وضعك في مصر .....ايه اللي انت ح تضحي بيه في مصر عشان تروح ليبيا ....
لو انت مش بتشتغل في مصر مثلا .... يبقى روح وانت مغمض... ما عندكش ما تبكي عليه
لكن لو عندك وظيفة ... مش ح اقول مرموقه ... لكن وظيفة بتكفيك وتعرف تعيش منها كويس وتربي اولادك ...... يبقى هنا بقى لازم تفكر كويس وتكون مطمئن للوظيفة اللي انت رايحها والشركة اللي ح تشتغل فيها ... مع مراعاة عنصر الاستقرار الشبه مفقود في ليبيا .....
ممكن في يوم وليلة تلاقي السواق بتعاك بقى رئيس مجلس الادارة ... اللجان الشعبية رشحته ..... دي مش خيالات ...ده واحد حكاهالي عن تجربة واقعية ... ومش في شركة ...... في محكمة ..... ايون محكمة من بتاعت ...حكمت المحكمة حضوريا .....بالاعدام شنقا ... السواق بقي مدير كبير اوي وبيرأس قضاة

[tutankhamoun]

انت كدة عرضت نص المسألة بس ....
الأهم هو وضعك في مصر .....ايه اللي انت ح تضحي بيه في مصر عشان تروح ليبيا ....
لو انت مش بتشتغل في مصر مثلا .... يبقى روح وانت مغمض... ما عندكش ما تبكي عليه
لكن لو عندك وظيفة ... مش ح اقول مرموقه ... لكن وظيفة بتكفيك وتعرف تعيش منها كويس وتربي اولادك ...... يبقى هنا بقى لازم تفكر كويس وتكون مطمئن للوظيفة اللي انت رايحها والشركة اللي ح تشتغل فيها ... مع مراعاة عنصر الاستقرار الشبه مفقود في ليبيا .....
ممكن في يوم وليلة تلاقي السواق بتعاك بقى رئيس مجلس الادارة ... اللجان الشعبية رشحته ..... دي مش خيالات ...ده واحد حكاهالي عن تجربة واقعية ... ومش في شركة ...... في محكمة ..... ايون محكمة من بتاعت ...حكمت المحكمة حضوريا .....بالاعدام شنقا ... السواق بقي مدير كبير اوي وبيرأس قضاة

فطستني من الضحك يا أستاذ أحمد
بس هي فعلا ليبيا بلد غريبة قوي
مفيهاش ثوابت و لا قوانين
كل حاجة ممكن تطلع في يوم و ليلة و ثالث يوم يلغوها
بلد زي العسل و القذافي جميل

[Islam_galal]

فطستني من الضحك يا أستاذ أحمد
بس هي فعلا ليبيا بلد غريبة قوي
مفيهاش ثوابت و لا قوانين
كل حاجة ممكن تطلع في يوم و ليلة و ثالث يوم يلغوها
بلد زي العسل و القذافي جميل

و الصين حلوة