ما رأيك في مساعدة الرجل لزوجته في الاعمال المنزلية ؟

[nonetta]

كامل الإحترام والتقدير لشخصكم الكريم وإن دل ماكتبتم على شىء فإنما دليل على حسن الخلق وجمال الأدب وإن أطول الناس أعناقاً يوم القيامة أحسنهم خلقاً

وأذكر الأخوه الأفاضل بحديث النبى صلى الله عليه وسلم
(حديث مرفوع) وَأَخْبَرَنَا أَحْمَدُ بْنُ عَبْدِ اللَّهِ الصَّالِحِيُّ ، أَنَا أَبُو الْحُسَيْنِ بْنُ بِشْرَانَ ، أَنَا إِسْمَاعِيلُ بْنُ مُحَمَّدٍ الصَّفَّارُ ، نا أَحْمَدُ بْنُ مَنْصُورٍ الرَّمَادِيُّ ، نا عَبْدُ الرَّزَّاقِ ، أَنَا مَعْمَرٌ ، عَنِ الزُّهْرِيِّ ، عَنْ عُرْوَةَ ، وَهِشَامِ بْنِ عُرْوَةَ ، عَنْ أَبِيهِ عُرْوَةَ ، قَالَ : سَأَلَ رَجُلٌ عَائِشَةَ , رَضِيَ اللَّهُ تَعَالَى عَنْهَا : هَلْ كَانَ رَسُولُ اللَّهِ , صَلَّى اللَّهُ تَعَالَى عَلَيْهِ وَسَلَّمَ , يَعْمَلُ فِي بَيْتِهِ ؟ قَالَتْ : نَعَمْ ، كَانَ رَسُولُ اللَّهِ , صَلَّى اللَّهُ تَعَالَى عَلَيْهِ وَسَلَّمَ , يَخْصِفُ نَعْلَهُ ، وَيُخَيِّطُ ثَوْبَهُ ، وَيَعْمَلُ فِي بَيْتِهِ كَمَا يَعْمَلُ أَحَدُكُمْ فِي بَيْتِهِ .

فلننتهج نهجه ونقيم سنته وأنا لست متزوجاً وأنوى ذلك حال زواجى بإذن الله
جزاكم الله خيراً ونفع الله بكم

اذا كان الرسول الكريم كان فى مهنة اهله

عموما انا عادى باعمل كل حاجة طالما هى مش قادرة تعبانة

او بتذاكر للاولاد فى ايام الامتحانات او اى حاجة طارئة - واعترف ان اعمال البيت لا

تنتهى وربنا يكون فى عون الستات بس برضه الاجهزة الحديثة وفرت الجهد والوقت

يعنى هما اكثر حظا واقل جهدا من الاجيال اللى فاتت

تصدقوا انا فعلا فخورة برجا المنتدى
انا كنت متوقعة الناس تدخل تهاجمني وتقول لي ازاي امال الست لازمتها ايه وربنا خلقها ليه
فعلا ناس محترمة ربنا يزيدكم ويبارك فيكم

[D . a .\ AYMAN]

يشرفني جدا ان اعترف باني اقوم بكل الحاجات دي

هي تاخد بالها من الأطفال انا اشطب المطبخ

هي بتطبخ اخد انا بالي من العيال واغيرلها

هي نايمة مع الأطفال من كتر الاجهاد استغل الوقت واكنس الشقة وامسحها

هي نايمة من التعب وشغل البيت وحد من العيال بيعيط اشيله في اوضة تانية بعيد عنها والعب معاه واسكته واغيرله علشان اديها فرصة تنام وترتاح

قال رسول الله صلى الله عليه وسلم: خيركم خيركم لأهله، وأنا خيركم لأهلي

اللهم صلي وسلم وبارك على رسول الله وعلى آله وأصحابه أجمعين

+1
بارك الله فيك
بصراحة انت قلت الكلمتين اللى كنت عايز أقلهم
وما شاء الله على كل المشاركات حفظنا الله وهدانا أجمعين

[lanos2004]

راجل محترم جدا
هوة فيه حد بيعمل حاجه غير كدة

[memofree]

الام تحب جوز بنتها اوي لو ريحها وعمل شغل البيت
لكن لو ابنها عمل كده مع مراته يبقي راجل مش تمام
الكيل بمعيارين

[alrabeh]

بفضل الله هذه متعة لمن يعرفها
عندما تريح من حولك وبالأخص الأم والزوجة فهم عليهم مسئوليات كتير جدا يومية فمن الرجولة والدين بذل أقصى الجهد لراحتهم وليس مساعدتهم فى الأشياء البسيطة فقط

[ramyhekal]

معنديش اى مانع انى اعمل الحاجات دى كلها بس طبعا كله بالحب لا مؤاخذه مش حنفى يعنى

[midooo_119]

انا لسه ماجوزتش بس ان شاء الله هعمل كده و اساعدها طبعا الحياة مشاركة انا مش واخدها تخدمنى لكن كله بالحب

[Ahmed_selmy]

انا شايف ان الموضوع يختلف من ست لاخرى, يعنى مثلا ملاقيش ميراتى عايزه تشتغل وتصر على الشغل وترجع البيت على الساعه 4 كل يوم ,فى حين ان احنا مش محتاجين الشغل دا فى حاجه, وبعدين تقولوا اساعد , ازاى؟؟؟؟
بالاضافه انا مؤمن جدا بنظرية الادوار وان كل واحد لو ادى دوره كما يجب حيكون الكل مرتاح, يعنى الراجل مسؤل انه يشتغل ويجيب فلوس ويقضى كل طلابات بيته( يعنى ينزل السوق ويشتر الخضار و يشترى الطلبات من السوبر ماركت وغيره), والست مهمتها البيت والاولاد والزوج طبعا .
دا طبعا ميمنعش ان فى بعض الاوقات لو الزوج شايف انها مريضه مثلا او حد من الاولاد مريض وهى سهرانه جنبه انه ممكن يساعدها فى شغل البيت.
المشكله الحقيقيه ان انت لو عملت اى مساعد مره وبعديها مره وبعديها كمان مره وجت مره معملتهاش , يتقال لك انتا معملتش دى ليه ومسوتش دى ليه وتبدا تتحاسب كأن الموضوع اصلا بتاعك مش انت بتساعد.
وعموما دى مناهج وكله فى الاصل بيعتمد على الزوجه وانت شايفها عامله ايه معاك.

[assaf]

انا بحب اساعد في البيت
انا بحب التعامل الاجهزه عموما يعني بحب احط الغسيل و استعمال المكنسه
وساعات بساعد في المواعين بس خفيف كوبايه او شطف بس
بعد ولاده ابني حقيقه ادبست في المواعين حسيت اد ايه هي متعبه الحمد لله بعدها بشهر جبت لها غساله اطباق
المهم الست تقدر المساعده و متحسسش الراجل انها حق مكتسب

[هيثم المنياوى]

لوسمحتم لى بمشاركه أخرى....
الكثير من الرجال لايعلم أن خدمة المرأة للرجل تفضلاً منها وليس إحقاقاً لحق الرجل وأنه وجب على الرجل أن يأتى لزوجته بمن تخدمها إن كان فى سعة من الرزق...

ده لفته بسيطه أعلم أن الكثير منا لايعلمها
جزاكم الله خيراً

[Ahmed_Adham]

أنا بعرف اساعد في حاجتين

1- الطبيخ لأني بحبه وبعرف أعمل اصناف حلوه كتير.
2- بلهي البنت لما مراتي بتكون بتطبخ.

غير كده احنا معندناش غير طفل واحد ومراتي مش بتشتغل فبتقدر تعمل شغل البيت كله بدون مساعده معظم الوقت.

[D . a .\ AYMAN]

لوسمحتم لى بمشاركه أخرى....
الكثير من الرجال لايعلم أن خدمة المرأة للرجل تفضلاً منها وليس إحقاقاً لحق الرجل وأنه وجب على الرجل أن يأتى لزوجته بمن تخدمها إن كان فى سعة من الرزق...

ده لفته بسيطه أعلم أن الكثير منا لايعلمها
جزاكم الله خيراً

قول حق بالفعل ...

[هيثم المنياوى]

قول حق بالفعل ...

جزاكم الله خيراً

[shaddadfalcon1]

علي جسب المزاج والشغل وحالتها الصحيه

[omaroof]

كامل الاحترام للرجال اللى بيساعدو زوجتهم بس فيه فرق بين المساعده وان الموضوع يبقى الزام
ولانى ممن يعشق الاختصاص بساعد زوجتى بس بطريقه تانيه
يعنى مشكله فى نور ولا تغيير لمبات اوكى
شد حبال للمنشر ولا عمل اى وصلات للحمام او تغيير جلد الحنفيات تمام
ممكن تشميس المرتبه فى البلكونه او مساعدتها كل فترة فى تغيير مكان الكنب والكراسى اوكى
لكن تغيير للاطفال ولا غسيل مواعين او طبيخ فالحقيقه مافيش مجال ومساعدنى ان مراتى ما بيتحبش حد غيرها يدخل المطبخ وانا بطبعى بكرة المطبخ فكدا 100 %