اشتريت جلاكسي s3 وملحقتش اروح بيه اتسرق

[النوبي]

اولا اللي عايز يتريق يقف علي باب الموضوع ويتريق براحته لاكن مايقعدش
ثانيا انا مش هخوض في تفاصيل علشان انا الغلطان تماما والصراحه انا اخدت تريقه بعمري
مش كفايه الفلوس 3500 جنيه لا وكل البيت بيتريق عليا
المهم العده اتاخدت من العلبه قبل ما تتفتح (الحرامي كان اول واحد يفتحها ابن المحظوظه)
دلوقتي انا عايز ابلغ عن العده علشان نفسي اتأكد مين اخدها اصلي شاكك في ناس كتير (هو واحد فقط مفيش غيره بس بداري الخيبه التقيله)
ايه الاجرءات اروح فين اروح لمين
انا اشتريت من القاهره بس طبعا هبلغ في الاقصر لاني رجعت
الف شكر مقدما الي كل معلومه مفيده وربنا يسامحك ياللي هتتريق وهيجيلك يوم اكيد

[masterzmind]

انا عااااااااااااااوز اعيط قدر الله ما شاء فعل

[mohamedbook]

طيب مش ممكن تكون نسيت تحطة في العلبة وهو عند الي اشتريتة منة
اتصل بيه كده يمكن يكون شيلهولك هناك
او كلمني وانا اروح اسالك عليه هناك

[hobiko]

مين قال اننا حنتريق ...... فيه حد يتريق فى مصايب حد

ربنا يعوض و يخلف عليك ان شاء الله

[BESO516]

ربنا يعوض عليك ويرزقك بالأحسن منه ان شاء الله

انا معايا نفس التليفون ده

هو عيبه العلبه صغيره اوى يدوبك على حجمه بس وده اللى جننى شويه لما اشتريته

[Mo3taz Selim]

ربنا يعوضك خير إن شاء الله

[ahmedteam]

ربنا يعوض عليك و بيدلك خير منه

متزعلش محدش عارف الخير فين مش يمكن دا فدا حاجه تانيه اكبر كانت ممكن تحصلك

قول الحمد لله

[i_Am_Legend]

قدر الله وماشاء فعل..

[SAMEH_FOUAD]

لا حول ولا قوة الا بالله , ربنا يصبرك على ال3500 جنية اللى انت لسة دافعهم

عموما ياباشا كل اللى هتعملة انك هتاخد ال serial number بتاع الجهاز ولازم عشان يعتمد بية انك تصور الورقة اللى بتكون مع الجهاز اللى بيبقى مكتوب فيها الضمان وشروطة , وتصور بطاقتك , وتطلع على القسم

وشوف التليفون اتسرق منك فين والمكان اللى اتسرق منة هو دة اللى تعمل من البلاغ على حسب دائرة القسم , لانى من اللى فهمتة من كلامك انك اشتريت التليفون ولما روحت البيت مالقيتش التليفون فى العلبة

وان شاء الله يعملولة تتبع وربنا يسهل وتلاقية

[النوبي]

اولا الحمد لله علي كل شيء وانا بجد مش زعلان نهائي بل بالعكس انا بقول اهم حاجه اشوف اولادي بصحه وسلامه وفي داهيه اي حاجه تاني
القصه في التريقه اني آمنت لواحد ماعرفهوش مش اكتر نزلت اجيب اكل وسيبت التيلفون في التاكس كان معايا من الصبح وانا اديتله 400 جنيه وقلت له لو عايز اكتر قول والراجل طلع زوق وانا كنت فاكره محترم
المهم انا مش من عادتي اني اسيب حاجه زي كده هو انتهز الفرصه اني نزلت اشتري اكل..... وراح قطع الاستيكر من ناحيه واحده وفتح العلبه اخد التليفون وساب العلبه زي ما هي
وانا جايبها هديه للمدام ومش راضي افتحها غير في البيت طبعا وصلت البيت وفاجأت المدام .......واشتغلت تزعق انت بتستهبل ليه تشتري دي وانت عارف انا مش همسك عده غاليه كده وبتاع ...........المهم بنفتح العلبه كان هيغمي علينا من المفاجأه هههههههههههههههههههه
اتصلت بالمحل قالوا احنا مش بنفتحها ابدا وبنسلمها مقفوله وانا متاكد اني استلمتها مقفوله
طبعا مفيش غير سواق التاكسي
بس هي نصيبها جه كده والحمد لله علي كل حال
الجميل في الموضوع اني عامل مفاجأه للمدام قلبت بمفاجأه لينا كلنا ومن ساعتها اخواتي والبيت وكل اصحابي بيتريقوا علي المفاجأه الجميله ههههههههههههههههههههه

[النوبي]

لا حول ولا قوة الا بالله , ربنا يصبرك على ال3500 جنية اللى انت لسة دافعهم

عموما ياباشا كل اللى هتعملة انك هتاخد ال serial number بتاع الجهاز ولازم عشان يعتمد بية انك تصور الورقة اللى بتكون مع الجهاز اللى بيبقى مكتوب فيها الضمان وشروطة , وتصور بطاقتك , وتطلع على القسم

وشوف التليفون اتسرق منك فين والمكان اللى اتسرق منة هو دة اللى تعمل من البلاغ على حسب دائرة القسم , لانى من اللى فهمتة من كلامك انك اشتريت التليفون ولما روحت البيت مالقيتش التليفون فى العلبة

وان شاء الله يعملولة تتبع وربنا يسهل وتلاقية

يعني البلاغ يبقي في القاهره ماينفعش اقدم بلاغ من هنا في الاقصر لان انا مش هينفع اسافر دلوقتي نهائي
وبارك الله فيك يااخي الكريم

[marsguy]

يعني البلاغ يبقي في القاهره ماينفعش اقدم بلاغ من هنا في الاقصر لان انا مش هينفع اسافر دلوقتي نهائي
وبارك الله فيك يااخي الكريم

أولاً: ربنا يعوض عليك.

ثانياً: الحمد لله إنك ما زعلتش, معظم الناس كانوا هايتنكدوا جداً لو حصلهم كده. دي في حد ذاتها نعمه إنك مش حاسس بضيق.

ثالثاً: حضرتك ممكن تسأل في مديرية الأمن إذا كان ممكن تعمل البلاغ من عندك ولا لأ؟ بس خليك لحوح في السؤال وخليك واثق كده.

لسه واحد صاحبي مسروق في الأقصر وما حدش عمله حاجه إلا لما سواق التاكسي لفت نظره إنه يروح المديريه نفسها عشان لسه في مدير أمن جاي جديد وشادد عليهم.

شكراً

[alaa74]

قدر الله وما شاء فعل
وربنا يعوض عليك يا نوبى باشا
المهم سلمتك وسلامه اولادك وكله يتعوض
لكن برضو خليك إيجابى وإعمل اللى عليك وإعمل محضر وخليك فعلا لحوح ومتنطش
ومتعرفش الخير فين وربنا يعوضك ألف خير إن شاء الله .
واوعى تحسبها إنها تريقه من الناس ولا حاجه إنت كنت حسن النيه لأقصى درجه فى وقت صعب فيه
حسن النيه للأسف .
لكن كرم مع سواق التاكسى اللص أكيد ربنا هيعوضك عنه خير .
ولو محتاج أى حاجه أعملهالك من القاهرة أنا جاهز وتحت أمرك .

[النوبي]

قدر الله وما شاء فعل
وربنا يعوض عليك يا نوبى باشا
المهم سلمتك وسلامه اولادك وكله يتعوض
لكن برضو خليك إيجابى وإعمل اللى عليك وإعمل محضر وخليك فعلا لحوح ومتنطش
ومتعرفش الخير فين وربنا يعوضك ألف خير إن شاء الله .
واوعى تحسبها إنها تريقه من الناس ولا حاجه إنت كنت حسن النيه لأقصى درجه فى وقت صعب فيه
حسن النيه للأسف .
لكن كرم مع سواق التاكسى اللص أكيد ربنا هيعوضك عنه خير .
ولو محتاج أى حاجه أعملهالك من القاهرة أنا جاهز وتحت أمرك .

الله يباركلك يابوعلاء ده العشم برضه انا عارف ان هنا اخواتي علشان كده حتي بتكلم حريه
انا كنت نازل اعمل محضر بس لما قرأت اني اعمله في القاهره رجعت وقلت انتظر لغايه لما افهم علشان اتحرك علي بصيره

[ICE_MAN]

انا مش عايز احبط حضرتك .. لكن تتبع التليفونات داخل شركات المحمول لا يتم الا باذن من النيابة و النيابة لا تأمر بتتبع تليفون معين الا فى حالات الجرائم الكبرى (قتل - سرقة كبيرة .... الخ)

عموما ربنا يعوض عليك و يرزقك باللى احسن منه.