عاوز رئيكم فى كام وضوع كدة

[viper911s]

السلام عليكم
اولا
انا بشتغل فى مجال قطع الغيار وخبرتى فية حوالى 6 سنوات
المهم تعبت من انى الاقى فرصة سفر للخارج
بس لقيت قدامى مشاريع صغير
زى انى اعمل محل قطع غيار هيونداى وهيساعدنى فية موزع معتمد لهيونداى (المبلغ الى معايا يادوب يغطى التكاليف معاة)

ثانيا انى اعمل مشروع برة مجال شغلى خالص وكانت الفكرة فى محل (اسماك ووجبات بحرية رخيصة )


ثالثا قبل ما امشى من شغلى عرض عليا شخص ما ليبى الجنسية انو يعمل مشروع قطع غيار فى ليبيا بنى غازى وانى اكون معاة


بصراحة انا محتار خصوصا وانى بفكر جديا انى اعمل شغل لنفسى
شكرا ارجو الافادة

[أبو صلاح]

ما تفكر ياباشا في موضوع ليبيا ده خصوصا لو هتدخل شريك معاه بالخبرة وليس بالمال

انا شخصيا نفسي اتعمل مجال قع غيار السيارات خصوصا الكوري والياباني
وعامة ما تسيبش المجال ده وتروح مجال تاني

[RAPID]

ربنا يوفقك
بس عامة مفيش مشروع اكل بيخسر

[amrelsha3er]

خايك فى ليبيا

[viper911s]

اولا انا متشكر للتفاعل
انا بصراحة محتار
ما بين انى اكلم الراجل اليبى
وخصوصا ان فى صديق ليا عاوز يعمل مطبعة تشيرتات
وانا ادخل معة شريك
استاذ ابو صلاح انا والله خبرتى فى مجال السيارات الامريكى وخصوصا جيب ودودج وكرايسلر
وحاليا هى مطلوبة كتير فى ليبيا
يمكن دة الى مخلينى محتار ما بين الشغل هنا او اروح هناك انا بردو هتصل بية واشوف الامور اية
ومستنى بقيت الردود

[أبو صلاح]

استاذ ابو صلاح انا والله خبرتى فى مجال السيارات الامريكى وخصوصا جيب ودودج وكرايسلر
وحاليا هى مطلوبة كتير فى ليبيا
يمكن دة الى مخلينى محتار ما بين الشغل هنا او اروح هناك انا بردو هتصل بية واشوف الامور اية
ومستنى بقيت الردود

ياباشا التجربة في ليبيا مش هتخسرك حاجة غير الوقت
وليبيا اعتقد انها اقتصاديا احسن من مصر حتى بعد الثورة عندهم

توكل على الله

[Ahmed_Adham]

متعملش مشروع مع حد بره بلدك لما لما تكون فاهم البلد دي كويس وسكنت فيها فتره قبل المشروع عشان تعرف قوانينها وسكك المشاريع فيها وابن البلد ميضحكش عليك في الشراكه لكن لما تروح على العمياني كده هتبقى مضطر تصدق أي حاجه يقولهالك عن البلد وعن النشاط بتاعكو.

نصيحتي اشتغل في مالك واعمل محل قطع الغيار ده هنا في مصر ولما يمشي الحال ان شاء الله ممكن تعمل جنبه مشروع المطعم ده او أي مشروع تاني انت شايفه مناسب بس ابدأ باللي بتفهم فيه عشان حاجتين

1- تاخد ثقه في قدرتك على تغيل مشروع.
2- تعرف ترجع فلوسك عشان تعمل مشروع تاني.

لكن لو بدأت بحاجه مش بتفهم فيها وخسرت مش هيبقى عندك فرصه تشتغل لا في اللي بتفهم فيه ولا اللي مبتفهمش فيه.

وبالتوفيق ان شاء الله وربنا يوسع رزقك.

[mohammedabdallh]

لبيا افضل بس متشركهوش فلوس شاركه بمجهودك علشان اى وقت عاوز تخلع تقدر تخلع اما لو دفعت فلوس وعاوز تخلع هتخسر فلوسك
ولبيا دلوقتى افضل من مصر

[omar-saad]

ليبيا افضل بكتير من مصر
بس لو عايز تشاركه يبقى فيه عقد
وانك انتا تدخل بالخبرة والادارة
علشان لاقدر الله لو حصل اى حاجة تعرف تخلع
الوضع هنا صعب اوى اوى

[viper911s]

شكرا يا شباب
والله انا شايف ليبيا هى الاقرب خصوصا انى مش هخسر فلوس لاانى ناوى ادخل بخبرة وادارة فعلا
علشان الى بيعرف فى العربيات الامريكى هناك قليل جدا
بس علشان كدة بد
االموضوع انا كلمتة وكان الكلام لما انزل اسكندرية هنتقابل ونتكلم
ويا مسهل الحال
اصلى بصراحة مقدرش اجازف حاليا بفلوس علشان خاطب والفلوس الى معايا فلوس الشقة بالظبط

[meeezo333eg]

الاخ الحبيب
انت تعرض 3 خيارات
محل وجبات سريعة و انا فهمت انك معندكش خبرة فيه و علشان كده لا انصح به لانك ستعتمد على صنايعى
المشوار بتاع ليبيا و ده لا انصحك به نهائيا و انا قاعد فى مطروح و عارف طبع البدو اللى هما منهم اهل ليبيا ممكن تروح معاه 3 او 4 سنين و بعدين باكل عليك حقك غير الانفلات الرهيب فى ليبيا يعتبر معندهمش نظام و كل واحد يحمى نفسه بنفسه و الفكر القبلى رهيب هناك يعنى مهما كنت انت على حق مش هتلاقى حد ينصفك على ابن عمه
رايى تخليك فى اللى انت بتفهم فيه بس بعد دراسة صح و اختيار مكان صح
و ربنا يوفقك ان شاء الله

[Ahmed_selmy]

انا راى انك تعمل حركه مزدوجه , بمعنى انك تروح مع الراجل بتاع ليبيا خبره واداره وفى نفس الوقت تستثمر فلوسك هنا, يعنى حضرتك قولت ان فى واحد صاحبك حيفتح مطبعه تى شيرتات حضرتك ممكن تشاركه وخصوصا لو واثق فيه وتكون المشاركه فى راس المال, فى نفس الوقت حضرتك تشتغل فى ليبيا.
طبعا الموضوع حيحتاج تركيز من حضرتك علشان تتابع فى الاتنين, ولكن الاستفاده فى كذا حاجه:
1- خضرتك مش حتسيب مجالك فخبرتك فيه حتزيد
2- الفلوس بدل ما حتكون مركونه, حتبقى شغاله وبتجيب فلوس
3- حضرتك حتزود فلوسك عن طريق العمل فى ليبيا
4- لو لقدر الله حصل اى حاجه فى واحد من الاتنين حيكون فيه التانى شغال
عموما دى وجهة نظرى وربنا يوفقك.