الحسنة المخفية -ماتنشفهاش قوي

[Karim_Monir]

السلام عليكم ورحمه الله
الموضوع زي ماهو باين من عنوانه
لما تيجي تشتري حاجة من بياع انت شايف انه غلبان او مكسبه في شوية البضاعة دول بسيط
ما تنشفهاش معاه قوي
دي الحسنة المخفية في البيع والشراء
خليك سمحا اذا باع سمحا اذا اشتري
ماتجيش على بياع فاكهة ولا خضار وتشدها معاه قوي كدة في النص جنيه والجنيه
مش معني كدة انك تكون عبيط او تشتري حاجات بايظة وتقول معلش ده غلبان
هو حط سعر على الحاجة انها سليمة تاخدها بالسعر انها سليمة
يلف ايده ويحطلك بايظ تسيبهالة وتمشي
تبص في الشنطة بعد ما تتشال من علي الميزان لان فيهم كتير نصابين
البلطجي واللي معطل الطريق بعربيته ما تشتريش منه وماتساعدوش على التمادي في الغلط
لكن مع المحترم ما تشدش قوي
واعمل حساب الحر والبرد والوقفة في الشارع والبضاعة اللي بتبوظ والبضاعة اللي بتبقي اخر حاجة ومحدش بيشتريها لعيوبها
حالة البلد كل يوم اصعب ولو ربنا ميسرها عليك وواقف تشتري يبقي انت واحد من الموسرين وخليك كريم مع المعسرين
ولما تسيب ده في الدنيا بكيفك وبخاطرك اعمل حساب ان في رب كريم هايشلها للاخرة
ويشيل عنك في الدنيا كمان واعتبرها من صدقات السر
دي صدقة السر تطفئ غضب المولي عز وجل
اللهم ارفع مقتك وغضبك عنا
معلش صدعتكم

[ahmedteam]

جزاك الله خيرا

عندك حق فعلا فى بياعين غلابه كتيير

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " رَحِمَ اللَّهُ عَبْدًا سَمْحًا إِذَا بَاعَ ، وَسَمْحًا إِذَا اشْتَرَى ، وَسَمْحًا إِذَا قَضَى ، وَسَمْحًا إِذَا اقْتَضَى " .

[alaa74]

السلام عليكم ورحمه الله
الموضوع زي ماهو باين من عنوانه
لما تيجي تشتري حاجة من بياع انت شايف انه غلبان او مكسبه في شوية البضاعة دول بسيط
ما تنشفهاش معاه قوي
دي الحسنة المخفية في البيع والشراء
خليك سمحا اذا باع سمحا اذا اشتري
ماتجيش على بياع فاكهة ولا خضار وتشدها معاه قوي كدة في النص جنيه والجنيه
مش معني كدة انك تكون عبيط او تشتري حاجات بايظة وتقول معلش ده غلبان
هو حط سعر على الحاجة انها سليمة تاخدها بالسعر انها سليمة
يلف ايده ويحطلك بايظ تسيبهالة وتمشي
تبص في الشنطة بعد ما تتشال من علي الميزان لان فيهم كتير نصابين
البلطجي واللي معطل الطريق بعربيته ما تشتريش منه وماتساعدوش على التمادي في الغلط
لكن مع المحترم ما تشدش قوي
واعمل حساب الحر والبرد والوقفة في الشارع والبضاعة اللي بتبوظ والبضاعة اللي بتبقي اخر حاجة ومحدش بيشتريها لعيوبها
حالة البلد كل يوم اصعب ولو ربنا ميسرها عليك وواقف تشتري يبقي انت واحد من الموسرين وخليك كريم مع المعسرين
ولما تسيب ده في الدنيا بكيفك وبخاطرك اعمل حساب ان في رب كريم هايشلها للاخرة
ويشيل عنك في الدنيا كمان واعتبرها من صدقات السر
دي صدقة السر تطفئ غضب المولي عز وجل
اللهم ارفع مقتك وغضبك عنا
معلش صدعتكم

صباح الخير يا كيمو
وجزاك الله خيرا على الموضوع وصدعنا ولا يهمك بالنوعيه دى من المواضيع . ههههه
عندك حق والله يا كريم
كتير مننا بيشترى حاجات كتير من الشارع زى الفاكهه مثلا وتلاقى الواحد ممكن يدقق مع البياع
على الرغم من إنه بيشترى من اى هايبر ماركت نفس الحاجه وأغلى طبعا بكتير وبيدفع ومبيعلقش .
المفروض زى ما انت قلت لو انا عجبتنى الحاجه وشايفها كويسه يعنى مش بايظه أو فيها عيب
وسعرها مقبول يعنى السعر الشائع فى السوق لكن لو بفرق بسيط مفيش مشكله
يعنى لو حسبتها هتلاقيك دفعت فرق اقل من خمسه جنيه فى العمليه كلها
ودة ممكن يكون اقل من تمن الباركنج فى اى مول من المولات .
وبقابل ناس كتيره بتبيع حاجات فى الشارع بيبان انهم فعلا مش بياعين لكن هو بيبيع بدلا من سؤال الناس وده أفضل مليون مره من المتسول او اللى بيقف لك عند اى مكان ويعملك فيها سايس
ويمين يا باشا شمال يا بيه وتلاقيه طالعلك متعرفش منين وعاوز ياخد منك الاتاواة .

الخلاصه لو صحينا فى نفسنا إحساس الرحمه بالناس حياتنا هتتغير تماما .

[Eng_Doaa]

ربنا يكرمك يا باشمهندس على الموضوع

و كان فى أحد السلف بيقول : من خدعنا بالله انخدعنا له

يعنى لو حد بيبع حاجات و زود هامش ربح بسيط و انت شايف انه يستاهل تنزل فيه شوية . طنش و أعمل مش واخد بالك

ساعات لما باركب تاكسى بحاسب السواق و هو دايما مش بيدينى الباقى مش عارفة ليه :) مع ان لو انا دفعت اقل و فى فكة ملا 75 قرش مش بيسيبهم . بس بقول عند ربنا

[friendship7897]

وخليك كريم مع المعسرين
ولما تسيب ده في الدنيا بكيفك وبخاطرك اعمل حساب ان في رب كريم هايشلها للاخرة

كريم أنت زودتها أوي
مش علشان أنت رئيس مجلس إدارة المنتدى كل شوية تجيب سيرتك
طبعاً عندك حق .... بس لما بنتعامل مع بعض البائعين اللي معندهمش ضمير ( اللئيم ) - مش بتفاصله ومش بتحسسه أنك مصحصح له بيضحك عليك ويحشر لك أي حاجة والسلام - ودا حصل لي أكتر من مرة ولما أروح البيت آلاقي حاجات كتير مش سليمة - وهوصفهم ببيت شعر معروف وهستعين بكلمة كريم زيك :
إذا أكرمت الكريم ملكته ..... وإن أكرمت اللئيم تمرادا
وكمان

ليس الكريمُ الذي من نعته كرمٌ ................... إنَّ الكريمَ الذي من ذاته الكرمُ
ليس الكريمَ الذي يعطيك عن قدر .................. إنَّ الكريمَ الذي يعطي ويهتم
ليس الكريمُ الذي يعطي بحكمته ................. إنَّ الكريمَ الذي تُعطى به الحِكَمُ
طبعاً أنا مش بجيب سيرتك خاااالص

[marsguy]

عاوز أزود حاجه كمان:

ممكن تشتري حاجه إنت مش محتاجها عشان بس تشجع البياع على إنه يشتغل بدل ما ينحرف ويمشي في طريق الحرام.

مثلاً ممكن تلاقي بياع فارش في الأرض بيبيع حاجه هايفه أوي وجودتها مش اللي ترضيك يعني: لعب أطفال بسيطه أو طواقي أو محافظ ... إلخ ممكن تشتري منه وتديها هديه لحد غلبان هايفرح بيها أوي وبكده تكون ساعدت 2 غلابه.

برضه لما تشتري مناديل للعربيه مثلاً إشتري من الراجل اللي واقف في الإشاره وما تشتريش من السوبر ماركت ... الراجل اللي في الإشاره ده كل ربحه جاي من المناديل لكن السوبر ماركت بيكسب من حاجات تانيه كتير. بس طبعاً ده مش معناه إنك تشتري المناديل المضروبه الضاره بالصحه اللي بعض البياعين بيبيعوها.

وطبعاً مش هاعيد تاني كلام إن ما فيش داعي للفصال الشديد مع الناس دية: روى البخاري و ابن ماجة عن جابر بن عبد الله رضي الله عنهما أن رسول الله صلى الله عليه وسلم قال: (رحم الله عبداً سمحاً إذا باع، سمحاً إذا اشترى، سمحاً إذا اقتضى).

شكراً

[Karim_Monir]

الا البلطجية والفهلوية
والله مرة كنت دفعت الفلوس ونسيت افتح الشنطة وفتحت لقيت ام الحركة الهباب بتاعتهم رجعت واديته الشنطة وقاللي اللي انت عايزةاصريت اني هاخد الفلوس ومش هاشتري منه وخدتها


حنان واخد بالي انك ماجبتيش سيرتي خالص :-)

[amrelsha3er]

جزاك الله خير ياستاذ كريم على التذكره لنا جميعا بالموضوع ده
فعلا ساعات الواحد بينسى الموضوع ده

[ahmed_m_ashraf]

كلام سليم جدا، جزاك الله خير.

[RAPID]

جزاك الله خيرا

[rompo10]

جزاك الله خيرا

[pro_samir]

مش فاهم بيعملو ايه ؟ بيكمل الوزن بحاجات بايظه مثلا ولا بيديك كيس غيره خالص :))

[Karim_Monir]

لا يا سمير وانت بتنقي الفاكهة بيحط معاك
هو بيكون راصص الفاكهة مثلا الحتة المعطوبة لجوة والسليمة لبرة وهو بحطهالك في الشنطة مثلا لازم يلف ايدة بطريقة يخليك ماتشوفش الحتة المعطوبة
وكله كوم وبتوع التفاح الملفوف بالورق ده كوم تاني
هو لو سليم مش هايسيب الروق حواليه :-)
لكن هو بايظ او مضروب اصلا :-)

[Karim_Monir]

marsguy انا بشوف ناس بتفاصل لغاية ما تزهقهم والموضوع تلاقية بيكون حوالين ربع جنيه او نص جنيه
ويدخل اون زاي ران يجيب الحاجة اغلي منبرة مرة ونص وهو مبسوط عشان واقف في اون زا ران مثلا ولا مش عارف مبسوط عليه ايه :-)
تجيب ازازة مية ليه ب 3 جينه ونص ممكن تجيبها من الكشك ب 2 جنيه وتبقي ساعدت صاحب الكشك برضه

[د.اشرف هنداوى]

كلام محترم و جاي في وقت الشدة اللي احنا فيه دلوقتي